9
1 Řḥukm issaggʷaden n wawař n SIDI x temmurt n Ḥadrax,
řḥukm nni yarsan x Dimacq.
“Maɣar SIDI iḥeṭṭa x bnadem
u x marra tiqebbař n Israil,
2 uřa x Ḥamat i-tt-dd-iřesqen,
x Ṣur d Ṣidun,
waxxa nitenti d timiɣisin aṭṭas.
3 Tebna Ṣur ijj n lbaraj i yixef nnes
u teyru nnuqart am tɛejjajt
d wureɣ iqquren am ubeǧaɛ n imesraq.
4 Xzar, Sidi inu ad tt iṭṭef,
ad iwwet lbaraj nnes ɣar řebḥar,
uca ad tt tecc tmessi.”
5 “Ackelun ad tt tẓar, ad tedweř teggʷed,
ammu uřa d Ɣazza, ad tarjij aṭṭas,
uřa d Ɛaqrun, maɣar ad ifceř uraji nnes.
Ad ittwateḥḥa ujeǧid zi Ɣazza
u di tandint n Acqalun
war dayes tzeddeɣ ɛad uřa d ijjen.
6 Mmis n řeḥram ad izdeɣ di Acdud
u Necc ad teḥḥiɣ nnfaxet n Ifilisṭiniyyen. ◼9:6 ad teḥḥiɣ - s Tɛibranit ‘ad qeḍɛeɣ’.
7 Necc ad ksiɣ idammen zeg uqemmum nnes
uřa d nnɛawat zi jar tiɣmas nnes
u ammu i ɣa iqqim uřa d netta
i AREBBI nneɣ.
Netta ad yiři am yijj n wemɣar di Yahuda
u Ɛaqrun am yijj n Uyabusi.
8 Necc ad ggeɣ řmargeḥ inu
deg wenneḍ n Taddart inu,
ḍidd n wenni i ɣa iẓwan
u ḍidd n wenni dd ɣa idewřen,
ḥima wenni iḥeṣṣaren
war xas iɛeddu ca ɛad,
maɣar řexxu ẓřiɣ t s tiṭṭawin inu.”
Ajeǧid i dd ɣa yasen n Siḥyun
9 “Farḥ, a yeǧis n Ṣihyun,
sřiwřew, a yeǧis n Urcalim!
Xzar, Ajeǧid nnem yusa-dd ɣarem,
Netta d amsegged
u aqa yarḍ arruḍ n usenjem,
Netta d amwaḍeɛ,
inya x ijj n weɣyuř,
x ijj n wezɛuq, asnus n ict n teɣyuč.
10 Necc ad qḍiɣ ikarruten n umenɣi
zi Ifrayim
uřa d iysan zi Urcalim.
Ad ittwaqřeɛ uřa d řqews n umenɣi.
Netta ad ibarreḥ s řehna i regnus
u ṣṣulṭa nnes ad tiři
zi řebḥar ař řebḥar,
zeg iɣzar n Lfuraṭ
ař ineggura n temmurt.”
11 “Wah uřa d cem, a yeǧis n Ṣihyun,
zi ssibbet n idammen n Řɛahd nnem
fekkeɣ-dd imeḥbas nnem
zeg wanu yuẓɣen i war di ǧin waman. ◘9:11 Mt. 26:28; Lk. 22:20; Rum. 9:3, 4; Rum. 11:25, 26, 27; 1 Kur. 11:25; Ɛbr. 9:19, 20, 21.
12 Ɛeqbem ɣar lburj nwem,
kenniw imeḥbas inni ɣar iǧa řayas.
Uřa d ass-a Necc ttbarrḥeɣ:
Aqa Necc ad ɣarem dd-arreɣ
tnayen n tseqqar,
13 maɣar Necc ad meḥḍeɣ Yahuda
am ijj n řqews
u ad ggeɣ Ifrayim x řqews.
Necc ad ssekkareɣ
iḥenjiren nnem, a Ṣihyun,
ḍidd i iḥenjiren nnec, a Yawan,
u Necc ad cek arreɣ
am ssif n ijj n bu-teɣruḍt.” ◼9:13 Yawan - ixs ad yini Lyunan n zic.
14 “SIDI ad iban sennej nsen
u fřitcat nnes ad iřint
ttwessgent am wassam
u Sidi inu, SIDI,ْ
ad isuḍ deg uyicc n icarri,
ad yuyur ak-d tḥaryaḍin
n usemmiḍ n ljanub. ◘9:14 Nḥm. 2:6
15 SIDI n řɛeskarat ad ten issduriy.
Nitni ad ccen,
ad ddzen iẓra n iǧiy uca ad swen,
ad ggen ddriz am ɣar binu
u ad dewřen ccuren
am ṭṭawya n urucci,
am tɣemmar n uɛalṭar.
16 SIDI, AREBBI nwem
ad ten issenjem deg wass nni
am wuǧi n řgens nnes,
maɣar nitni amecnaw iẓra iɣřan
x ijj n ttaj igellden
ittissiqen x temmurt nnes.
17 Maɣar mechař imɣar ad yiři řxar nnes
u mechař imɣar ad yiři waẓři nnes!
Imendi ad isseɣmi iḥudriyyen
uřa binu n jdid tiɛzariyyin.”
◼9:6 9:6 ad teḥḥiɣ - s Tɛibranit ‘ad qeḍɛeɣ’.
◘9:11 9:11 Mt. 26:28; Lk. 22:20; Rum. 9:3, 4; Rum. 11:25, 26, 27; 1 Kur. 11:25; Ɛbr. 9:19, 20, 21.
◼9:13 9:13 Yawan - ixs ad yini Lyunan n zic.