2
Aweṭṭu n Ninwa
1 Xzar, x idurar ttazzřen iḍaren
n wenni dd-yiwyen řexbar aṣebḥan,
wenni ixebbaren s řehna.
Ɛeyyed řeɛyudat nnec, a Yahuda,
seqfeř lwuɛud nnec,
maɣar wenni yareddǧen
war ittɣimi iẓekkwi xak ɛad,
netta inneqḍeɛ marra. ◘2:1 Ica. 52:7; Rum. 10:15
2 Ijjen wenni yuẓẓřen x iwdan s lɛunf
i dd-igeɛɛed xak!
Ɛess x lburj, ḥḍa abrid,
semḥeḍ tijɛinna nnec,
arni di jjhed nnec!
3 S minzi SIDI ad dd-yarr
řɛezz n Yaɛqub,
aqa-t d řɛezz n Israil.
Maɣar ikeccaḍen keccḍen ten,
u nitni ɣeḍřen tizermin nsen. ◘2:3 Izhd. 80:13; Ica. 10:12
4 Tcappat n useřqi
n ayt n bu-teɣruḍt zewɣent,
iryazen imeḥḍen bedden
sswejden i umenɣi
s warruḍ azeggʷaɣ iḥedqen,
ɣar tessiqt n tmessi n wuzzař
n ikarruten n umenɣi,
deg wass i di i ɣa issewjed ixef nnes
u ticejjura n umerzi ad nnhezzen. ◼2:4 amerzi - niɣ ‘ameḍzi’.
5 Ikarruten n umenɣi hajen deg ibriden,
aqa ẓẓeɛwaḍen zi ssa ɣar da
deg wazzayen,
ttwaḍharen am yiṣefḍawen,
nitni gemmaren da d diha am wassamen.
6 Netta ittxarreṣ deg ayt n jjehd,
nitni maca ttneqraḍen am gguren
nitni ttazzřen ɣar řḥiḍ nsen,
mani ibedd ssqef n uhjam iwjed.
7 Tiwwura n iɣezran nnurezment,
u řeqṣar ad ifsi.
8 Aqa tamesřact tbedd nican!
Nettat ad tᵉttwaɛarra,
ad tᵉttwassgeɛɛed,
u tiyya nnes sɣuyyunt
amecnaw abarri n tedbirin,
am ccatent deg idmaren nsent. ◼2:8 deg idmaren nsent - s Tɛibranit ‘deg wuřawen nsent’.
9 Ninwa am yijj n uyeřmam n waman
zeg wass i di iǧa.
Řexxu maca arekkweřen nitni.
Beddem! Beddem!, ttřaɣan nitni,
maca uřa d ijj war dd-ittneqřib.
10 Keccḍem nnuqart, keccḍem ureɣ!
War din qeṭṭu i řeknuz,
ɣar ucewwar n ɛřam kuř řeqcuɛ.
11 Texwa, tᵉttwakecceḍ
u tᵉttwareddeǧ nettat,
uř ifsi uca ifadden fecřen,
ttekksent as tijɛinna marra
u iɣembab nsen warɣen marra. ◘2:11 Aɛwd. 1:28; 20:8; Yac. 2:11; 5:1; 7:5; Ica. 13:8, 7; 21:3; Ḥiz. 21:12
12 Mani iǧa řexxu řmargeḥ n wayraden,
d řmedweř n wayraden imeẓyanen,
mani yuyur weyrad,
aqa-tt d tayradt ak-d weyrad ameẓyan
am uřa d ijj issnexřeɛ i-ten?
13 Mani iǧa řexxu wayrad nni imezzqen
min ḥdajen tarwa nnes
u ijeyyef i tayradin nnes,
d wenni iccuren ifran nnes s ukecceḍ,
d imucan nnes n udurri
zi min ittwacarrgen?
14 Xzar, Necc ad iřiɣ xak,
ammu i iqqar SIDI n řɛeskarat,
Necc ad arreɣ ikarruten nnec d ddexxan.
Ad cceɣ ssif iyraden nnec imeẓyanen,
u Necc ad qeḍɛeɣ takeccaḍt nnec
zi temmurt
u ɛemmarṣ ɛad ad tᵉttwaseř
tmijja n ireqqasen nnec. ◼2:14 tmijja n ireqqasen nnec - xzar Ica. 36:13, 37:9.
◘2:1 2:1 Ica. 52:7; Rum. 10:15
◘2:3 2:3 Izhd. 80:13; Ica. 10:12
◼2:4 2:4 amerzi - niɣ ‘ameḍzi’.
◼2:8 2:8 deg idmaren nsent - s Tɛibranit ‘deg wuřawen nsent’.
◘2:11 2:11 Aɛwd. 1:28; 20:8; Yac. 2:11; 5:1; 7:5; Ica. 13:8, 7; 21:3; Ḥiz. 21:12
◼2:14 2:14 tmijja n ireqqasen nnec - xzar Ica. 36:13, 37:9.