Adlis Iqeddsen Naḥum 1

Naḥum

Awař n Naḥum x Ninwa

1 Řḥukm issaggʷaden x Ninwa.

Adlis n řewḥiy n Naḥum, Alquci.◼

2 Alif. - Arebbi ittasmen u SIDI intaqam,

SIDI d aneqqam u Netta d bab n wesɛar.

SIDI d aneqqam i řɛedyan nnes,

Netta igga řɛedyan jar tiṭṭawin nnes. ◼ ◘

3 SIDI ɣares ttasiɛ n řxaḍar

u jjehd nnes imɣar

u Netta war ittbarri ɛemmarṣ

wenni itteggen ddenb.

Bit. Abrid n SIDI di tḥaryaḍt

u deg usemmiḍ,

iseynuten aqa aten

d taɛejjajt n iḍaren nnes. ◼

4 Gimel. - Netta iwebbex řebḥar,

ittarra i-t yuẓeɣ,

marra iɣezran ittejja i-ten ttaẓɣen.

Dalit. Bacan d Karmal sřawen,

uřa d nnuwar n Lubnan isřaw. ◼

5 Hi. - Idurar ttarjijin zzayes,

u tiwririn fessyent,

Waw. u tammurt tᵉttwassgeɛɛed-dd

zzat i wudem nnes,

uřa d marra wi xas izeddɣen! ◘

6 Zayin. - Wi izemmaren ad iqqim ibedd

zzat i wesxeḍ nnes,

u wi izemmaren ad ikkar

zzat i řḥaduq n weɣḍab nnes?

Xit. Asɛar nnes ittwakebb-dd am tmessi

u tiṣuḍar ttwaqeǧɛent-i-dd zzayes.

7 Tit. - Icna SIDI

i ddurri deg wass n řeḥṣaret.

Yud. Netta issen marra

inni ɣares yarekkwařen. ◘

8 Kaf. - S yict n řḥemřet ifeyyḍen

ad yuqa amcan nnes

u řɛedyan nnes ad ten iḍfar,

ař ɣa yadfen ɣar taǧest.

9 Mim. - Min txarrṣem xenni x SIDI?

Netta ad t iqḍa qaɛ.

Aɣufi war dd-ittis martayen.

10 Aqa nitni ttwamuden ɛad

am cbarq ak-d isennanen,

u ɣellan am yimescaren,

ammu i ɣa ttwaccen nitni

qaɛ am uřum yuẓɣen.

11 Zzayek i dd-iffeɣ

wenni ittxarrṣen

di min war iḥřin x SIDI,

amcawar i war isekkwin walu.

12 Ammu issawař SIDI:

Waxxa nitni ttfeřḥen

u ǧan deg waṭṭas,

waxxa amenni nitni ad ttwaqessen

u netta ad iɛdu.

Waxxa necc ggiɣ xak aɣiř,

maca necc war xak tteggeɣ aɣiř ɛad.

13 Řexxu ad arẓeɣ azayřu nnes

i xak immarsen,

u Necc ad carrgeɣ tisɣunin nnec.

14 SIDI iweṣṣa xak,

aqa war zzayek

ittiři ɛad ḥed s yisem nnec.

Necc ad qeḍɛeɣ řexyařat ineqcen

d řexyařat ifesyen zi taddart nnec.

Necc ad ggeɣ anḍeř nnec,

maɣar ufiɣ cek tefsused.

◼1:1 1:1 Naḥum - isem wanita ixs ad yini ‘Afewwej’ niɣ ‘Amfewwej’.

◼1:2 1:2 afessar - adlis n Naḥum dayes ijj n uṣettef ‘AlifBat’. Man aya ixs ad yini aqa ɛřayen marra isekkilen (lḥuruf) n Tɛibranit ttwassxeddmen di tira-ya, ijj awarni i wenneɣni, kuř ijj di nnubet nnes. Ntaf ɣar umezwaru n kuř tasɣart ijj n usekkil (ijj n lḥarf) n lḥuruf n alifBat n Tmaziɣt ɣar uzeǧif n wawař amezwaru n ijj n wezyen n wawařen n wedlis. Ittwaf usettef-a waha deg Wedlis Iqeddsen n SIDI AREBBI, war iǧi deg uřa d ijj n wedlis nneɣni di Ccarq Amerwasu.

◘1:2 1:2 Uf. 20:5

◼1:3 1:3 iseynuten ... - am mammec iggur bnadem di tɛejjact, ammu iggur SIDI AREBBI x iseynuten n ijenwan.

◼1:4 1:4 Bacan d Karmal ... Lubnan - aqa-ten d jjwayeh s řɣiǧet aṭṭas deg wussan n zic.

◘1:5 1:5 Uf. 19:18; Izhd. 18:8; 29:5, 6; 97:4, 5; 114:4

◘1:7 1:7 Yuw. 4:16