21
Řḥukm x temmurt n ljanub
1 Yusa-dd ɣari wawař n SIDI, inna: 2 “A mmis n bnadem, egg udem nnec ɣar ljanub, ejj awařen nnec ad udumen jjihet n ljanub uca nabb ḍidd i wezɣar n yeyyar di Temmurt n Ljanub. ◼21:2 azɣar - niɣ ‘řɣabet’ niɣ ‘tazgant’. 3 Ini i wezɣar n Temmurt n Ljanub: ‘Seř i wawař n SIDI: Ammu i iqqar Sidi inu, SIDI: Xzar, Necc ad ssarɣeɣ dayem ict n tmessi, tenni i ɣa iccen kuř tacejjart tazizawt u kuř tacejjart yuẓɣen. Aceɛɛař n řɛabuq war ittwaxessi u s uya ad ttwacemḍen marra iɣembab zi ljanub ař ccamal ◘21:3 Lk. 23:31 4 uca marra iwdan d řmař ad ẓaren aqa Necc, SIDI, d wenni issarɣen timessi. War tᵉttwaxessi ca.’ ◼21:4 marra iwdan d řmař - s Tɛibranit ‘marra aysum’. 5 Nniɣ necc: ‘A, Sidi inu, SIDI, ɛad nitni qqaren xafi: ‘Ma war issiweř netta s tḥuja n twafit waha?’!”
Řḥukm n SIDI x Urcalim
6 Yusa-dd ɣari wawař n SIDI, inna: 7 “A mmis n bnadem, egg udem nnec ɣar Urcalim, ejj awařen nnec ad udumen ḍidd i tzawiyyin Iqeddsen uca nabb ḍidd i temmurt n Israil. 8 Ini i temmurt n Israil: ‘Ammu i iqqar Sidi inu, SIDI: Xzar, aqa ɣarem, Necc ad dd-jebdeɣ ssif inu zeg ufurru n weɣřaf nnes uca ad qeḍɛeɣ am umsegged am uɛeffan. 9 Minzi ad qeḍɛeɣ am umsegged am uɛeffan zi řwesṭ nnem, s uya ad dd-iffeɣ ssif inu zeg ufurru n weɣřaf nnes, ḍidd i marra inni ɣarsen arrimet n weysum, zi ljanub ař ccamal, 10 uca marra inni ɣarsen arrimet n weysum ad ssnen, belli Necc, SIDI, jebdeɣ ssif inu zeg ufurru n weɣřaf. Ɛemmarṣ war ɣares dd-iddikkwiř.’ ”
11 “Maca cek, a mmis n bnadem, sɣunfa, sɣunfa zzat i tiṭṭawin nsen s tejɛinnatin ttwarẓent d tarzugi. 12 Ad imsar xmi d ac i ɣa inin: ‘Maɣar tessɣunfid ammu?’, aqa cek ad tinid: ‘Zi ssibbet n min sřiɣ, maɣar ad dd-yas uca kuř uř ad ifsi u marra ifassen ad heyyfen u marra buḥbeř ad yarxu u marra ifadden ad ardben am waman. Xzar, ad dd-yas uca ad yiři, ammu i iqqar Sidi inu, SIDI.’ ” ◘21:12 Irm. 6:24; 49:23; Ḥiz. 4:17; 7:17
13 Yusa-dd ɣari wawař n SIDI, inna: 14 “A mmis n bnadem, nabb uca ini: ‘Ammu i iqqar Sidi inu, SIDI!’ Uca ini:
‘Ssif, ssif,
aqa ittwasseqḍeɛ u ittwassuyda.
15 Ittwasseqḍeɛ maḥend ad iɣarṣ tiɣarṣa,
ittwassuyda maḥend ad ilellec.’
Niɣ ittxeṣṣa i neccin ad nfarreḥ, ad nini:
‘Azeǧaḍ n řeḥkamet n mmi
16 ‘Immewc maḥend ad ittwassuyda,
maḥend ad t ṭṭfen deg ufus.
Ssif ittwaqḍeɛ u ittwassuyda,
maḥend ad ittwagg deg ufus n uqettař.
17 Sɣuyy uca trud, a mmis n bnadem,
maɣar ad yiři x řgens inu,
ad yiři x marra řḥukkam n Israil.
Aqa mmewcen i ssif munen
ak-d řgens inu.
S uya, wwet x tmeṣṣaḍt nnec.’ ◘21:17 Ḥiz. 6:11; 7:27
18 ‘Wah, ssif ittwaqeǧeb.
Maca mana, mařa azeǧaḍ
nni isseḥqaren marra akeccuḍ
war dd-ittiři ɛad?’,
ammu i iqqar Sidi inu, SIDI.◘21:18 Ica. 1:5; Irm. 6:28-30
19 ‘Cek, a mmis n bnadem, nabb,
uca wwet ifassen ijj deg wenneɣni,
maɣar ssif ad iwwet tnayen,
wah, třata n imuren.
Aqa-t d ssif n yinni ittwanɣen,
ssif n umeqqran nni ittwaneɣ,
ssif nni ɣarsen ittadfen,
20 ḥima xenni uř ad ifsi
uca ad mmarenyent tɛenkrifin.
Řeqḍeɛ n ssif ggiɣ t
x marra tiwwura nsen.
Ay, aqa ssif iwjed maḥend ad ilellec,
aqa ittwajebb-dd zeg ufurru n weɣřaf
maḥend ad iɣarṣ. ◘21:20 Ḥiz. 21:32
21 Smun jjehd nnec, qess ɣar ufusi,
bedd, qess ɣar uzeřmaḍ,
arr řeqḍeɛ nnec mani ma texsed.’
22 ‘Uřa d Necc ad wteɣ ifassen inu
ijj deg wenneɣni
uca ad ssareyyḥeɣ asɛar inu.
Necc, SIDI, aqa ssiwřeɣ.’ ”
23 Yusa-dd ɣari wawař n SIDI, inna: 24 “Cek, a mmis n bnadem, egg tnayen n ibriden zi mani dd ɣa yas ssif n ujeǧid n Babil. Zeg ict n temmurt ad ffɣen nitni s tnayen idsen. Nqec ijj n uciyyar ɣar ubeṭṭu n webrid, nqec i-t ɣar ubeṭṭu n webrid ɣar tendint. 25 Ad tneyyced abrid s manis dd ɣa yas ssif ɣar Rabba n ayt n Ɛammun u ɣar Yahuda ař daxeř di tendint ittwassjehden: Urcalim. 26 Minzi ajeǧid n Babil ad ibedd ɣar mani farqen ibriden, ɣar ubeddu n tnayen n ibriden nni maḥend ad iɛezzem. Ad izzerz fřitcat n řqewṣ, ad isseqsa řexyařat n l’aṣnam, ad ixzar tsa. 27 Deg ufus nnes ufusi yusa-dd wectab n ‘Urcalim!’, maḥend ad din yegg řeqcuɛ n wedham, maḥend ad yarzem aqemmum nnes s iɣuyyan n wenɣi, maḥend ad issgeɛɛed tmijja nnes s iɣuyyan n umenɣi, maḥend ad igg řeqcuɛ n wedham ḍidd i tewwura, maḥend ad yegg acbar, maḥend ad igg lbarajat. ◘21:27 Ḥiz. 4:2; 17:17 28 Maca man aya ad ɣarsen yiři am ugezzen iɣeccen di tiṭṭawin nsen, maɣar nitni aqa ɣarsen tijaǧatin imetnen, maca Netta ad isseɛqeř x řmuɛṣiyyet nsen, maḥend ad ttwaṭṭfen nitni.”
29 “S uya, ammu i iqqar Sidi inu SIDI: ‘Minzi tesseɛqiřem x řmuɛṣiyyet nwem umi iɛeddiyen nwem ttbanen nican, xmi ttwaẓarren ddnub nwem s marra min tᵉtteggem, wah, minzi tsseɛqiřem x řmuɛṣiyyet nwem, s uya ad kenniw ṭṭfen s ufus.’ 30 U cek, aɛeffan iyezzmen i řmewt, cek, a řḥakem n Israil, wenni ass nnes ad dd-yas di řweqt n řeḥsab aneggaru n řmuɛṣiyyet, 31 ammu i d ac iqqar Sidi inu, SIDI: ‘Kkes areẓẓet nni, kkes ttaj nni. Ammu war ittiři ɛad. Min issehwan, ad ittwassuɛřa, u min issuɛřan, ad dd-ittwassehwa. 32 Ad arreɣ aya d řxarbet, d řxarbet, wah, ad t arreɣ d řxarbet. Maca marra aya war ittɣimi ɛad, mɣir ař dd ɣa yas wenni ɣar iǧan řḥeqq uca Necc ad as t wceɣ.’ ” ◘21:32 Amz. 49:10
Řḥukm n SIDI x Iɛammuniyyen
33 “U cek, a mmis n bnadem, nabb uca ini: ‘Ammu i iqqar Sidi inu, SIDI, x ayt n Ɛammun u x useḥqar nsen!’ Ini:
‘Ssif, ssif ittwajebd-dd,
ittwassuyda maḥend ad yecc,
maḥend ad ilellec, ...
34 - waxxa nitni ttwařan i cek ijj n řewḥiy war iǧin, waxxa nitni ttgezznen i cek ijj n ugezzen issxarriqen -
... aqa ssif ittwajebd-dd
maḥend ad cek yarr
ɣar irawen n iɛeffanen ittwassnuqqben
nni zi dd-yusa wass nsen
di řweqt n řeḥsab aneggaru n řmuɛṣiyyet.
35 Arr ssif ɣar ufurru n weɣřaf nnes.
Deg wemcan mani dd-tᵉttwaxeřqed,
di temmurt n ř’aṣeř nnec
ad cek ḥekmeɣ.
36 Ad xak zeǧɛeɣ wesxeḍ inu.
S tmessi n uduqqez inu n ufugem
ad xak suḍeɣ uca ad cek ggeɣ
deg ufus n ayt n bu-ɣezzu
nni issnen ad deǧen.
37 Ad tiřid d macca i tmessi,
idammen nnec ad ten ssizzřen
di řwesṭ n temmurt.
War tᵉttiři qaɛ řidaret dayek,
maɣar Necc, SIDI, aqa ssiwřeɣ.’ ”
◼21:2 21:2 azɣar - niɣ ‘řɣabet’ niɣ ‘tazgant’.
◼21:4 21:4 marra iwdan d řmař - s Tɛibranit ‘marra aysum’.
◘21:12 21:12 Irm. 6:24; 49:23; Ḥiz. 4:17; 7:17
◼21:15 21:15 Azeǧaḍ - aqa-t d azeǧaḍ (n ṣṣulṭa) n Yahuda (xzar Amz. 49:10). Deg Amz. 49:10 nettaf aqa azeǧaḍ-a war dd-ittwakkes zi Yahuda. Řexxu Ḥizqiyal, umi řgens issen aqa ixs ad iṭṭef di lwaɛd-a, isseqsa ‘Ma ad teqqim ṣṣulṭa n Yahuda am mammec d as ittɣiř i řgens x dsas n lwaɛd niɣ lla? Minzi nitni qqaren s yixef nsen ‘azeǧaḍ n mmi isseḥqar kuř akeccuḍ (nneɣni)’, ixs ad yini lwaɛd ad iqqim uca ajeǧid n Babil (‘ssif’) war d aneɣ izemmar. Xenni yarra-dd SIDI belli řgens n Yahuda ad ittwařqef s ssif n ujeǧid n Babil u Netta ad ten issuffeɣ di tmeḥbast ɣar Babil, maca lwaɛd i Yahuda di Amz. 49:10 ad iqqim uca ad ittwakemmeř di Lmasiḥ wenni dd i ɣa ittwaxeřqen awarni ɛřayen 500 n iseggʷusa di Bayt-Laḥm, tandint n Yahuda, zi Arruḥ Iqeddsen, zeg uɛeddis n Maryam, tenni tuɣa ittwaxḍben i Yusuf. Yusuf d Maryam tuɣa-ten s tnayen idsen zi twacunt n Dawud, zeg ict n twacunt igellden, waxxa Udayen war ɣarsen ajeǧid zeg yixef nsen di řweqt nni maɣar Hirudus zi Idum tuɣa d ajeǧid x řumur n Irumaniyyen. mmi - aqa-t d Yahuda (xzar Amz. 49:9)
◘21:18 21:18 Ica. 1:5; Irm. 6:28-30
◘21:20 21:20 Ḥiz. 21:32
◘21:32 21:32 Amz. 49:10