1 A aytma, ameẓri n wuř inu u taẓaǧit tenni ẓuǧeɣ ɣar AREBBI di ṭṭweɛ n Israil, aqa-tt ḥima ad ɣarsen tiři Tudart. 2 Aqa cehhdeɣ xasen aqa nitni ɣarsen cḍaret i AREBBI, maca břa tussna. ◘10:2 Řex. 22:3; Rum. 9:31; Gal. 4:17. 3 Maɣar war ssinen tasegda n AREBBI, maca arezzun ad ṭṭfen di tsegda n ixef nsen. S uya war sswaḍɛen ixef nsen i tsegda n AREBBI. 4 Minzi akemmeř n Ccariɛa netta d Lmasiḥ i tsegda i kuř ijjen i ittamnen. ◘10:4 Mt. 5:17; Řex. 13:38; 2 Kur. 3:13; Gal. 3:24. 5 Minzi Musa yura zi jjihet n tsegda di Ccariɛa:

“Wenni itteggen man aya,

ad zzayes iddar.” ◘10:5 Lawi 18:5; Ḥiz. 20:11; Gal. 3:12.

6 Maca tasegda tenni zi l’iman teqqar ammu:

“War teqqar deg wuř nnec:

‘Wi ɣa igaɛɛden ɣar ujenna

uca ad issehwa Lmasiḥ?”

7 niɣ:

“Wi dd-ihwan deg weḥfur n řaxart,

uca issgeɛɛed Lmasiḥ

zi taddart n imettinen?”

8 Maca min ixs ad yini man aya xenni?

“Tamwarrit tudes i cek,

aqa-t deg uqemmum nnec uřa deg wuř nnec.

Wa d Awař n l’iman i zi nettbarreḥ.” ◘10:8 Aɛwd. 30:12-14.

9 Mařa tcehded i Siditneɣ Yasuɛ s uqemmum nnec uca ad tamned s wuř nnec belli AREBBI issnekkar i-t zi taddart n imettinen, ad teddared. 10 Minzi uř i dayes ittamen ad ittwasegged, uca aqemmum i zzayes icehhden, ad iddar. 11 Minzi Tira Iqeddsen qqarent:

“Marra wi zzayes i ɣa yamnen,

war ittseḍḥi ca.” ◘10:11 Ica. 28:16; Rum. 9:33.

12 Minzi Netta war ittegg bu řfarz jar Wudayen d Iramiyyen, minzi Netta d Ijjen, SIDI nsen marra nni ittenfeyyaḍ řxar x marra inni xas dd-ittřaɣan. ◘10:12 Řex. 15:9; Rum. 3:22.

13 “Minzi kuř ijjen

wenni i ɣa iřaɣan s Yisem n SIDI,

ad iddar.” ◘10:13 Yuw. 3:5; Řex. 2:21.

14 Mammec i ɣa řaɣan x Wenni di war uminen ca? Niɣ mammec ɣa yamnen deg Wenni mixef war sřin, niɣ mammec ɣa sřen, mařa uřa d ijj war zzayes ibarreḥ ca? 15 Mammec i ɣa barrḥen mařa war dd-ttwassekken? Am mammec tura:

“Mecḥař ḍarfen iḍaren

n yinni ittbarrḥen s řehna,

n yinni ittbarrḥen s tebratin tiṣebḥanin.” ◘10:15 Ica. 52:7; Nḥm. 2:1.

16 Maca war iǧi marra ṭṭaɛen i ubarreḥ n Řexbar Aṣebḥan n L’Injil, minzi Icaɛya iqqar:

“A Sidi inu, wi ɣa yamnen di tebrat nneɣ?” ◘10:16 Ica. 53:1; Yḥ. 12:38.

17 Aqa l’iman zeg usḥessi uca asḥessi zeg Wawař n AREBBI. 18 Maca ad iniɣ:

“Ma zeɛma nitni war sřin?”,

“Xzar, řḥess nsen iffeɣ-dd

ɣar marra tammurt,

uca awařen nsen ɣar tneggura n ddunect.” ◘10:18 Izhd. 19:5.

19 Maca ad iniɣ:

“Ma Israil war tefhim ca man aya?”

Ɣar umezwar Musa inna:

“Ad daywem ggeɣ tusmi

zeg ijj n řgens i war iǧin ca d řgens,

uca s yijj n řgens i war ittᵉṭṭiɛen

ad daywem ggeɣ axeyyeq.” ◘10:19 Aɛwd. 32:21.

20 Uca Icaɛya izɛem ad yini:

“Aqa baneɣ-dd i yinni war xafi yarezzun,

aqa ufin ayi inni war xafi isseqsan.” ◘10:20 Ica. 65:1.

21 Maca zi jjihet n Israil iqqar:

“Ass ikmeř sswiẓẓḍeɣ ifassen inu

i ijj n řgens ittɛekksen, iɛeṣṣan.”◘10:21 Ica. 65:2.