1 Amɣar, i Xayus iɛizzen, wenni ttexseɣ di tidett.

2 A amɛizz nneɣ, ssitimeɣ ad tiřid mliḥ di marra u ad tiři uřa d ṣṣeḥḥet nnec mliḥ, am mammec ittiři řeɛmar nnec d lemliḥ. 3 Minzi farḥeɣ aṭṭas, řami dd-usin wawmaten, cehden x řaman i dayek, mammec teggured di tidett. 4 War ɣari řefraḥet temɣar x ta: aqa sřiɣ tarwa inu gguren di tidett.

5 A amɛizz nneɣ, marra min tᵉttegged i wawmaten, tᵉttegged t s l’iman, d amezwaru i ibarraniyyen, 6 inni icehden x tayri nnec qibač i tmesmunt marra. Teggid mliḥ umi d asen tewcid afus di min hdajen nitni, am mammec yarḍa AREBBI, 7 minzi nitni ffɣen x ssibbet n Yisem nnes, am war ksin walu zi řegnus. 8 S uyenni ittxeṣṣa ad neqbeř iwdan am nitni, ḥima ad niři d imsexxaren akidsen i tidett.

9 Necc tuɣa xseɣ ad ariɣ i tmesmunt, maca Diyutrifu, wenni ittexsen ad yiři d amezwaru jar asen, war d aneɣ iqbiř ca. 10 S uyenni xmi dd ɣa yaseɣ, ad t ssɛeqřeɣ di řexdayem i ittegg, umi xaneɣ ittḥarreḍ řehrud tiɛeffanin. U řami war d as iɛjib řḥar ɛad, war iqbiř awmaten, u inni ten qebřen, immɛařa akidsen, issuffeɣ i-ten zi tmesmunt.

11 A amɛizz, war ḍeffar ca tuɛeffna maca tcuni! Wenni itteggen tcuni, netta zi AREBBI. Wenni itteggen tuɛeffna, war iẓri ca AREBBI. ◘1:11 Izhd. 37:27; Ica. 1:16; 1 Bṭ. 3:11; 1 Yḥ. 3:6. 12 Marra cehden mliḥ x Dimitriyu řa d tmesmunt uřa d tidett simant nnes. Uřa d neccin ncehhed xas mliḥ uca tessnem belli cchadet nneɣ d tidett.

13 Aqa ɣari aṭṭas i d ac dd ɣa ariɣ, maca war xseɣ ca ad ac dd-ariɣ s ssmex d řeqřem, ◘1:13 2 Yḥ. 12. 14 maca ssitimeɣ ad cek ẓareɣ deɣya, xenni ad nessiweř zeg wudem ɣar wudem. 15 Řehna ad yiři akidek. Imeddukkař ttseǧamen xak s řehna. Seǧem x imeddukkař s ismawen nsen.