1 lmalak n SIDI igeɛɛed zi Jiljal ɣar Bukim, inna: “Necc ssuffɣeɣ-dd kenniw zi Miṣra uca iwyeɣ-dd kenniw ɣar temmurt nni x jjuǧeɣ i řejdud nwem, nniɣ: ‘Necc ɛemmarṣ war ttareẓẓiɣ Řɛahd inu akidwem i řebda. ◘2:1 Amz. 17:7; Aɛwd. 29:13, 14 2 Uca kenniw, war d awem iɛeddeř ad teggem uřa d ijj n řɛahd ak-d imezdaɣ n temmurt-a, u ittxeṣṣa awem ad tɣeḍřem iɛalṭaren nsen!’ Maca kenniw war tesřim ca i tmijja inu. Mayemmi teggim aya? ◘2:2 Aɛwd. 7:2; 12:3 3 U Necc nniɣ awem ɛawed: ‘Aqa war xasen taẓẓřeɣ zzat i wudem nwem, maca nitni ad iřin am isennanen deg iɣezdisen nwem uca irebbiten nsen ad awem dewřen d řfex.’ ” ◘2:3 Uf. 23:33; 34:12; Aɛwd. 7:16; Yac. 23:13 4 Umi lmalak n SIDI tuɣa issiweř awařen-a ɣar marra ayt n Israil, imsar, aqa řgens issgeɛɛed tmijja nnes uca run nitni. 5 Nitni qqaren as i wemcan nni ‘Bukim’ uca nitni qeddmen din taɣarṣt i SIDI. ◼2:5 Bukim - ixs ad yini ‘inni ittrun’.

6 Umi issekk Yacuwa řgens, ffɣen ayt n Israil, kuř aryaz ɣar tesɣart nnes, maḥend ad ṭṭfen tammurt d řwart. ◘2:6 Yac. 24:28 7 Tuɣa řgens isexxar i SIDI marra ussan n Yacuwa d marra ussan n imɣaren, inni ɛad iqqimen ddaren aṭṭas awarni i Yacuwa u inni iẓrin marra řxedmet tameqqrant n SIDI tenni igga i Israil. 8 Yacuwa, mmis n Nun, amsexxar n SIDI, immut am ijj n bnadem d bab n mya u-ɛecra n iseggʷusa. 9 Neḍřen t daxeř i weymir n tesɣart nnes di Timnat-Ḥaras, di temmurt n idurar n Ifrayim, ɣar uɣezdis n ccamal n wedrar n Jaɛac.

10 U ɛawed marra jjiř nni, aqa ittwassmun ɣar řejdud nsen. Awarni asen ikkar-dd ijj n jjiř nneɣni, jjiř nni war issin ca SIDI u war issin ca řxedmet i igga ak-d Israil. 11 Xenni ggin ayt n Israil min tuɣa iǧan d aɛeffan di tiṭṭawin n SIDI uca sexxaren i ‘Ibaɛlen’ 12 Nitni jjin SIDI, AREBBI n řejdud nsen, wenni ten dd-issuffɣen zi Miṣra uca nitni ḍfaren irebbiten nneɣni, irebbiten n řegnus i d asen-dd innḍen, uca uḍaren asen u ammu i sɛaren SIDI. 13 Maɣar nitni jjin SIDI uca dewřen sexxaren i Baɛal u i ‘Ɛactarutin’. 14 X uya yarɣa weɣḍab n SIDI x Israil. Netta igga i-ten deg ufus n iceffaren i ten ikeccḍen u igga i-ten deg ufus n řɛedyan nsen i d asen dd-innḍen uca dewřen war zemmaren ad qqimen bedden zzat i wudem n řɛedyan nsen. ◘2:14 Izhd. 44:13; Ica. 50:1 15 Mani ma ffɣen nitni, tuɣa afus n SIDI ḍidd nsen i řɣar, am mammec tuɣa issiweř SIDI u am mammec tuɣa i d asen ijjuǧ SIDI. Aqa ttwaḥṣaren ař aneggar. ◘2:15 Lawi 26; Aɛwd. 28

16 Maca SIDI issekkar řquḍat, inni ten issnejmen zeg ufus n yinni ten ikeccḍen. 17 Nitni war sřin ca uřa ɣar řquḍat nsen, maca ssfesden ixef nsen umi uyuren awarni irebbiten nneɣni uca uḍaren asen. Deɣya ḥeyyden x webrid nni i di uyuren řejdud nsen, inni tuɣa isřin i tweṣṣa n SIDI. Nitni maca war ggin amenni! 18 Umi d asen dd-issekkar SIDI řquḍat, tuɣa SIDI ak-d řqaḍi uca issenjem i-ten zeg ufus n řɛedyan nsen, marra ussan n řqaḍi nni, maɣar SIDI tuɣa indem zi ssibbet n iɣuyyan nsen zzat i wudem n yinni ten iḥṣaren d yinni i xasen ittaẓẓřen. 19 Uca imsar umi immut řqaḍi, aqa nitni dewřen ɣar ḍeffar uca dewřen ɛeffnen ktar zeg řejdud nsen umi uyuren awarni irebbiten nneɣni, sexxaren asen uca bendqen asen. Nitni war jjin zi tmegga nsen tiɛeffanin u zi webrid nsen i tuɣa ḍeffaren s tɣennant. ◘2:19 Řqḍ. 3:12 20 Xenni yarɣa weɣḍab n SIDI x Israil uca Netta inna: “Minzi řgens-a iɛedda Řɛahd inu min xef weṣṣiɣ řejdud nsen u war sřin i tmijja inu, 21 uřa d Necc war qqimeɣ ɛad ad aẓẓřeɣ zzat i wudem nsen x řegnus nni ijja Yacuwa, umi immut, ◘2:21 Yac. 23:13 22 ařami Necc ad zzaysen qeǧbeɣ Israil, ma ad ḥḍan nitni abrid n SIDI maḥend ad dayes uyuren am mammec t ḥḍan řejdud nsen, niɣ lla.” 23 Uca ijja SIDI řegnus-a ad areyyḥen uca war xasen yuẓẓiř deɣya u ɛawed netta war ten iggi deg ufus n Yacuwa.