1 Awarni i řmewt n Yacuwa, imsar aqa ayt n Israil sseqsan SIDI, nnan: “Man wen zzayneɣ i ɣa ikkaren d amezwaru ad igeɛɛed ad immneɣ ak-d ayt n Kenɛan?” ◘1:1 Řqḍ. 20:18 2 Yarra-dd SIDI: “Yahuda ad igeɛɛed d amezwaru. Xzar, Necc wciɣ as tammurt deg ufus nnes.” 3 Uca inna Yahuda i umas Cimɛun: “Geɛɛed akidi di temmurt n tqedduḥt n řeɛbar inu uca ejj aneɣ ad nemmneɣ ak-d ayt n Kenɛan, xenni necc ad kik geɛɛdeɣ di temmurt n tqedduḥt nnec.” Uca yuyur akides Cimɛun.

4 Igeɛɛed Yahuda uca SIDI iɛarn ayt n Kenɛan d Ifiriziyyen deg ufus nsen uca ɣeřben xasen ɣar Bazaq, ɛecra-ařaf n yiryazen. ◼1:4 Bazaq - isem wanita ixs ad yini ‘assam’. 5 Nitni ufin Aduni-Bazaq di Bazaq uca mmenɣen akides u nitni ɣeřben x ayt n Kenɛan u x Ifiriziyyen. 6 Maca Aduni-Bazaq yarweř uca nitni ḍfaren t uca ṭṭfen t uca qessen as imzawen d tfednin timeqqranin zeg ifassen nnes u zeg iḍaren nnes. 7 Xenni inna Aduni-Bazaq: “Sebɛin n ijeǧiden, ttwaqessen asen imzawen d tfednin, tuɣa řeqqḍen iřeqqʷaz sadu ṭṭabřa inu. Mammec i kidsen ggiɣ, ammu i d ayi ixeǧeṣ AREBBI!” Iwyen t ɣar Urcalim uca netta immut dinni.

8 Ayt n Yahuda mmenɣen ak-d Urcalim uca ṭṭfen tt, wtin tt s řeqḍeɛ n ssif uca qqeden tandint s tmessi.

9 Awarni as hwan ayt n Yahuda ḥima ad mmenɣen ak-d ayt n Kenɛan, inni izeddɣen di Temmurt n Idurar, di Temmurt n Ljanub u di Temmurt Iwaṭan. ◘1:9 Yac. 10:36; 11:21; 15:13

10 Iffeɣ Yahuda ɣar ayt n Kenɛan i tuɣa izeddɣen di Ḥabrun. Isem n Ḥabrun tuɣa zic qqaren as Qaryat-Arbaɛ. Nitni ɣeřben x Cicay d Aximan d Talmay. ◘1:10 Yac. 15:14 11 Ssenni iffeɣ ɣar imezdaɣ n Dabir. Isem n Dabir tuɣa zic qqaren as Qaryat-Safar. ◘1:11 Yac. 15:15-19. 12 Inna Kalib: “Wenni i ɣa iwten Qaryat-Safar ad tt iṭṭef, ad as wceɣ yeǧi Axsa d tamɣart.” 13 Ɛutniyil, mmis n Qinaz, umas ameẓyan n Kalib, iṭṭef i-tt. Uca Kalib iwca as yeǧis Axsa d tamɣart. ◼1:13 Ɛutniyil - isem wanita ixs ad yini ‘ayrad n Arebbi’. 14 Imsar umi ɣares dd-tusa nettat, tɛarn i-t s tutra x yeyyar n babas. Uca teḍra x weɣyuř. Isseqsa tt Kalib: “Min cem yuɣin?” ◘1:14 Yac. 15:18 15 Nettat tarra-dd xas: “Ewc ayi ict n lbaraka, minzi tewcid ayi ict n treqqiɛt n temmurt ɣar ljanub. Ttzawgeɣ, ewc ayi uřa d řɛunṣarat!” Uca iwca as Kalib řɛunṣarat n nej d řɛunṣarat n wadday.

16 Geɛɛden arraw n Uqini, wenni d aḍegʷař n Musa, ak-d ayt n Yahuda zi Tendint n Tcejjura n Tini ɣar řexřa n Yahuda nni iǧan di Temmurt n Ljanub ɣar Ɛarad. Ffɣen nitni, zeddɣen ak-d řgens. ◼1:16 Tandint n Tcejjura n Tini - aqa-tt d tandint n Ariḥa. 17 Iruḥ Yahuda ak-d umas Cimɛun uca ɣeřben nitni x ayt n Kenɛan inni i tuɣa izeddɣen di Ṣafat, ḥarrmen ten qaɛ uca teḥḥan ten uca ggin as i tendint nni Ḥurma. 18 Iṭṭef Yahuda uřa d Ɣazza ak-d temmurt nnes d Acqalun ak-d temmurt nnes d Ɛaqrun ak-d temmurt nnes. 19 SIDI tuɣa-t ak-d Yahuda ařami yuẓẓeř x imezdaɣ n Temmurt n Idurar, maca imezdaɣ n řewda n teɣzurt war izemmar ad xasen yaẓẓeř zi tesɣart nsen, minzi nitni tuɣa ɣarsen ikarruten n umenɣi n wuzzař. 20 I Kalib wcin as Ḥabrun, am mammec tuɣa inna Musa, uca netta yuẓẓeř ssenni x třata n iḥenjiren n Ɛanaq.◘1:20 Řxř. 14:24; Yac. 14:13

21 Ayt n Binyamin war zemmaren ad aẓẓřen x Iyabusiyyen, inni izeddɣen di Urcalim. Ammu i qqimen Iyabusiyyen zeddɣen ɣar ayt n Binyamin di Urcalim, ař ass-a.

22 Taddart n Yusuf tgeɛɛed ɣar Bayt-Il uca SIDI tuɣa-t akidsen. 23 Tuyur taddart n Yusuf ḥima ad tbergag ɣar Bayt-Il. Isem n tendint tuɣa zic qqaren as Luz. ◘1:23 Amz. 28:19 24 Inni tuɣa iřebten i tendint, ẓrin ijj n weryaz iffeɣ-dd zi tendint, nnan as: “Scen aneɣ manis nzemmar ad nadef ɣar tendint, xenni neccin ad kik negg tamexsiwt icewwaren.” 25 Xenni isscen asen tawwart n wadaf ɣar tendint uca nitni wtin tandint s ict n tecti s řeqḍeɛ n ssif, maca nitni jjin aryaz nni ad yuyur ak-d marra raǧ nnes. 26 Uca yuyur weryaz ɣar temmurt n Iḥittiyyen uca ibna ict n tendint, igga as isem Luz. Wa d isem nnes ař ass-a.

27 Manassa war izemmar ad yaẓẓeř x imezdaɣ n Bayt-Can d tneddam i ɣares dd-iqqnen, řa x imezdaɣ n Taɛnak ak-d tneddam nnes řa x imezdaɣ n Dur d tneddam nnes řa x imezdaɣ n Yiblaɛam d tneddam nnes uřa x imezdaɣ n Majiddu d tneddam nnes. Tuɣa ayt n Kenɛan ɛewwřen ad qqimen zeddɣen di temmurt nni. ◘1:27 Yac. 17:11, 12 28 Tuɣa Israil idweř ijhed ařami igga ljizya x ayt n Kenɛan, maca war zemmaren ad xasen aẓẓřen marra.

29 Uřa d Ifrayim war izemmar ad yaẓẓeř x ayt n Kenɛan i tuɣa izeddɣen di Jazar u qqimen ayt n Kenɛan zeddɣen di řwesṭ nsen di Jazar. ◘1:29 Yac. 16:10

30 Zabulun war izemmar ad yaẓẓeř x imezdaɣ n Qiṭrun d imezdaɣ n Nahalul u qqimen ayt n Kenɛan zeddɣen di řwesṭ nsen u tᵉttwagg xasen ljizya.

31 Acir war izemmar ad yaẓẓeř x imezdaɣ n Ɛakku uřa x imezdaɣ n Ṣidun d Aḥlab d Akzib d Halba d Afiq d Raḥub. 32 Iciriyyen zeddɣen di řwesṭ n ayt n Kenɛan, inni d imezdaɣ n temmurt, minzi nitni war zemmaren ad xasen aẓẓřen. ◼1:32 Iciriyyen - ixs ad yini ‘ayt n Acir’.

33 Naftali war izemmar ad yaẓẓeř x imezdaɣ n Bayt-Cams d imezdaɣ n Bayt-Ɛanat. Ammu i tuɣa izdeɣ di řwesṭ n ayt n Kenɛan, inni d imezdaɣ n temmurt. Tᵉttwagg xasen ljizya x imezdaɣ n Bayt-Cams d Bayt-Ɛanat.

34 Imuriyyen ḥṣaren ayt n Dan ɣar idurar, minzi war ten jjin ad hwan ɣar řewḍa n teɣzurt. 35 Tuɣa Imuriyyen ɛewwřen ad qqimen zeddɣen deg idurar n Ḥaras, di Ayalun u di Caɛalbim, maca afus n taddart n Yusuf tuɣa izeyyar xasen aṭṭas ařami xasen tᵉttwagg ljizya. 36 Tuɣa aymir n Imuriyyen zi Tsunta n Tɣarḍmiwin, zi jjarf uca ssenni ɣar sennej.