22
1 Isem aṣebḥan iḥřa
x waṭṭas n wagřa,
aḥinni iḥřa x nnuqart d wureɣ.◘22:1 Amb. 7:1
2 Bu-wagřa d umezřuḍ ttemsagaren,
SIDI i-ten iggin marra. ◘22:2 Awřn. 29:13
3 Bnadem ifettnen ittwařa řɣar
uca ittnuffar,
maca iḥafiyyen arennin gguren
uca ad ttwaɛaqaben. ◘22:3 Awřn. 27:12
4 Řmunet i uwaḍeɛ d tiggʷudi n SIDI,
d agřa d ccan d tudart.
5 Isennanen d řefxux aqa aten
x webrid n wenni ifarɣen,
wenni iḥeṭṭan řeɛmar nnes,
ittɣima ɣar řaggʷaj nsen.
6 Darreb aḥudri
ɛlaḥsab řeqyas n webrid nnes,
waxxa netta iwsar, war xas ittḥeyyid ca.
7 Bu-wagřa ittṣeǧaḍ x imezřaḍ,
bu-umarwas d ismeɣ
n wenni d as yareṭṭřen.
8 Wenni izarrɛen řɣecc, ad imjar řeɣben,
aɛmud n uduqqez nnes n ufugem ad ifna. ◘22:8 Ayub 4:8; Isaiah 14:5.; Psalm 125:3; Ḥuc. 10:13
9 Wenni ɣar iǧa řxezrat ṣebḥent,
ad ittwabarek,
minzi netta ittic i imezřaḍ
zeg weɣrum nnes. ◘22:9 2 Kur. 9:6
10 Aẓẓeř x umestehziy, ad iffeɣ řhemm,
aqa ibedd umḥarwaḍ d řefḍiḥet.
11 Wenni ittexsen řeṣfayet n wuř,
wenni ɣar iǧa iyencicen iccuren s arḍa,
ajeǧid ad yiři d ameddukkeř nnes. ◘22:11 Izhd. 101:6
12 Tiṭṭawin n SIDI ḥeṭṭant x tussna,
maca awařen n uɣeddar ad ten ibḍeř.
13 Ameɛguz iqqar:
“Aqa din ijj n wayrad di barra!
Ad taɣ balak ad ttwanɣeɣ
di řwesṭ n wazzayen!” ◘22:13 Awřn. 26:13
14 Aqemmum n temɣarin tibarraniyyin
d ict n tesraft yuǧɣen,
wenni x iffugem SIDI, ad dayes iwḍa. ◘22:14 Awřn. 2:16; 5:3; 7:5; 23:27
15 Tubbuheřya tᵉttɣima třesseq
deg wuř n uḥudri,
aɛmud n uwebbex ad tt issuffeɣ zzayes. ◘22:15 Awřn. 13:24; 19:18; 23:14; 29:15, 17
16 Wenni iḥeṣṣaren amarxu,
ad yarni di řemɣaret nnes,
wenni itticen i bu-wagřa,
ad iḥwaj waha. ◘22:16 Awřn. 14:31; 17:5
Awařen iweznen n ayt n tiɣit -tasɣart 1
17 Ewc amezzuɣ nnec,
uca seř ɣar wawařen n imiɣisen,
arr uř nnec ɣar tussna inu.
18 Maɣar aqa mliḥ
mařa txemmřed ten di daxeř nnec,
mařa ad ten tesswejded jmiɛ
x iyencicen nnec.
19 Maḥend ad yiři utecři nnec x SIDI,
ad ac ten ssecneɣ řexxu, wah i cek.
20 Ma zeɛma war d ac uriɣ
awařen ifarzen aṭṭas,
ccuren s ccwar d tussna,
21 ḥima ad ac ssecneɣ řemten
n wawařen n tidett,
maḥend tzemmared ad dd-tarred s řaman
x wenni cek dd-issekken.
22 War ttkeccaḍ amarxu
maɣar netta d amarxu,
war řebbez řmeskin ɣar tewwart, ◘22:22 Uf. 23:6; Ayub 31:13; Izhd. 82:3, 4; Zak. 7:10
23 maɣar SIDI ad asen yaɣ tasɣart nsen,
Netta ad ikecceḍ řeɛmar
n yinni i-ten ittkeccaḍen. ◘22:23 Uf. 22:22, 23; Izhd. 10:18
24 War ttemddukkuř
ak-d aryaz ittarrujduden,
war ttidef ɣar bab n wesɛar,
25 maḥend cek war tᵉttnimid ca
ak-d imesraq nnes,
ad tegged řfex i řeɛmar nnec.
26 War ttadef jar inni itticen awař
s tmewciwt n ifassen,
jar inni iǧan d aḍman i imarwusa. ◘22:26 Awřn. 6:1; 11:15
27 Mařa war ɣarek min zi ɣa txeǧṣed,
mayemmi ijebbed qama nnec
zi sadu nnec? ◘22:27 Awřn. 20:16
28 War smuṭṭuy aymir n wecḥař uya,
wenni ggin řejdud nnec. ◘22:28 Aɛwd. 19:14; 27:17; Awřn. 23:10
29 Ma teẓrid ijj n weryaz imeḥḍen
di řḥirfa nnes?
Ad t ssbedden zzat i wudem n ijeǧiden,
war iǧi ad ibedd zzat i wudem
n midden war di iǧi řaman.
◘22:2 22:2 Awřn. 29:13
◘22:3 22:3 Awřn. 27:12
◘22:8 22:8 Ayub 4:8; Isaiah 14:5.; Psalm 125:3; Ḥuc. 10:13
◘22:9 22:9 2 Kur. 9:6
◘22:11 22:11 Izhd. 101:6
◘22:13 22:13 Awřn. 26:13
◘22:14 22:14 Awřn. 2:16; 5:3; 7:5; 23:27
◘22:15 22:15 Awřn. 13:24; 19:18; 23:14; 29:15, 17
◘22:16 22:16 Awřn. 14:31; 17:5
◘22:22 22:22 Uf. 23:6; Ayub 31:13; Izhd. 82:3, 4; Zak. 7:10
◘22:23 22:23 Uf. 22:22, 23; Izhd. 10:18
◘22:27 22:27 Awřn. 20:16
◘22:28 22:28 Aɛwd. 19:14; 27:17; Awřn. 23:10