1 “Cek xenni, sgeɛɛed ijj n yeẓri n wecḍan

x řḥukkam n Israil 2 uca ini:

‘Mammec tuɣa tezzeř yemmatwem

am teyradt tezzeř jar teyradin!

Tessyem imeẓyanen nnes

jar wayraden imeẓyanen!

3 Nettat tesyem ijj zeg imeẓyanen nnes.

Wanita idweř d ayrad ameẓyan,

iřmed ad icarreg taymart nnes,

ɛad iwdan icca i-ten.

4 Řami sřin řegnus man aya,

ḥebbsen t deg weḥfur n turṣuḍi nsen,

uca iwyen t s tsennarin deg wenzar nnes

ɣar temmurt n Miṣra.’ ◘19:4 2 Ij. 23:33; Irm. 22:11

5 ‘Umi teẓra aqa řayas nnes iruḥ, ibḍeř,

xenni teksi ijjen zeg imeẓyanen nnes,

uca igga i-t d ayrad ameẓyan.

6 Wanita tuɣa iggur jar wayraden,

uca idweř d ayrad d ameẓyan,

iřmed ad icarreg taymart nnes,

ɛad iwdan icca i-ten.

7 Netta iɣṣeb tijjař nsen,

yareddeǧ tineddam nsen,

ařami tsusem temmurt d marra min dayes

zi ssibbet n řḥess n uzehhar nnes.

8 Xenni ssbedden xas řegnus

zi temmura i d as dd-innḍen

uca bezzɛen xas tracca nsen,

ṭṭfen t deg weḥfur nsen n turṣuḍi.

9 Nitni bellɛen xas deg ijj n řeqfez

s tsennarin deg wenzaren nnes,

ḥima ad t awyen ɣar ujeǧid n Babil.

Nitni iwyen t di lqelɛat,

ařami war ittwaseř ɛad tmijja nnes

x idurar n Israil.’ ◘19:9 2 Im. 36:6

10 ‘Tuɣa yemmac am tzayart

di řweqt n arraḥet nnec,

tᵉttwaẓẓu ɣar waman aṭṭas.

Tuɣa s řɣiǧet u s waṭṭas n tseḍwin,

zi ssibbet n waṭṭas n waman.

11 Tuɣa ɣares tiseḍwin ijehden

am izeǧaḍ n řḥukkam.

Trunku n yijjen zzayes

igeɛɛed jar iseynuten,

uca s řuɛřa nnes ittwaẓar nican,

s waṭṭas n řefruɛ nnes.

12 Maca tazayart tᵉttwaqřeɛ

s ijj n uduqqez n wesɛar,

temmenḍar ɣar temmurt,

uca asemmiḍ zi ccarq yuẓeɣ řɣiǧet nnes.

Arẓen uca uẓɣen řefruɛ nnes ijehden,

timessi tecca i-ten.

13 Řexxu ẓẓun t di  řexřa,

deg ict n temmurt yuẓɣen d iffuden.

14 Teffeɣ-dd tmessi zeg ict n tseṭṭa

zi jar tzermin nnes,

tecca řɣiǧet nnes,

ařami war ɣares teqqim ɛad tseṭṭa ijehden

uřa d azeǧaḍ maḥend ad iḥkem.’ ”

Wa d ijj n yeẓri n wecḍan uca ad idweř d ijj n yeẓri n wecḍan s tidett.