1 “Ittwahellek umsegged uca war din uřa d ijj wi t ittkessin ɣar wuř. Iryazen daysen tamexsiwt icewwaren mmeksin, břa ma iḥeṭṭa uřa d ijj aqa amsegged immeksi qbeř i dd ɣa yas ass n lmuṣiba. ◘57:1 Izhd. 12:2; Mixa 7:2 2 Netta ad dd-yadef di řehna, ad arreyḥen nitni di qamat nsen deg imeḍřan, kuř ijj wenni yuyuren abrid nnes iseggmen.”

3 “Qarrbem-dd da, a kenniw iḥenjiren n tbezgiwt, tarwa n yinni izennan u n temɣart n farq-ccɣeř! 4 Wi zi testehezzam ammu, wi x tcarragem aqemmum u wi ɣar tjebbdem iřes ɣar barra? Ma war teǧim d iḥenjiren n uɛeddi, tarwa n řɣecc? ◼57:4 tarwa - s Tɛibranit ‘zzariɛet’. 5 Kenniw inni itthajen ɣar tcejjura n l’aṣnam, sadu kuř tacejjart tazizawt, kenniw inni iɣarrṣen i iḥenjiren imeẓyanen di teɣzurin, swadday di tezziyin n řejruf. ◼57:5 tacejjart - niɣ ‘addag’ (‘iddagen’). 6 Tasɣart nnem ɣar iẓra iyuydan n teɣzurin. Aqa din tasɣart i d am dd-yekkaren. Uřa i nitni tzeǧɛed asen tawhibt n useyyeb, twehhbed tawhibt n řɣiǧet. Ma Necc ad qqimeɣ sqareɣ x man aya?”

7 “X wedrar yuɛřan d ittwassgeɛɛden tessud qama nnem. Uřa dinni tgeɛɛded ḥima ad twehhbed taɣarṣt. 8 Awarni tewwart d řeḍruf nnes ɣar iɣezdisen nnes teggid řeɛřamet nnem n řidaret, ‘mzuza nnem’, maɣar cem tenɛezřed xafi d taɛaryant u tgeɛɛded dinni sennej. Tɛedřed i yixef nnem qama d tmiriwt uca tɛahded ixef nnem ak-d ca zzaysen. Tettexsed tassut nsen, teẓrid taryast nsen. 9 Ak-d zzect truḥed ɣar ujeǧid uca tarnid aṭṭas di řeɛṭur ittfuḥen nnem. Tessekked imsexxaren nnem ɣar řaggʷaj uca tesswaḍɛed ixef nnem ař řaxart. 10 Zi ssibbet n waṭṭas n imsagaren nnem tuḥřed, maca ɛemmarṣ war tennid: ‘War din iqqim řayas!’ Tufid jjehd n jdid i tudart. X uya war teḥřiced. 11 Man wen zi tessḥissfed u teggʷeded aqa cem tessxarrqed xafi u war d ayi tidared, war d ayi teggid ɣar wuř nnem? Ma war tuɣi Necc sseɣdeɣ zeg wecḥař uya, ařami cem war zzayi teggʷided ca ɛad?” ◘57:11 Ica. 42:14

12 “Necc ad ɛawdeɣ x tsegda nnem d tmegga nnem: war cem neffɛen ca. 13 Xmi ɣa třaɣid, ejj xenni agraw nnem i ɣarem tessmuned ad cem ifekk. Asemmiḍ ad ten yawi marra, ijj n usuḍi ad ten iksi, maca wenni ɣari yarekkwařen, ad iwart tammurt d wedrar inu iqeddsen d tasɣart.” ◘57:13 Izhd. 34:9

14 “Ad yini: ‘Sgeɛɛdem, sgeɛɛdem abrid, ksem min issenqraḍen zeg webrid n řgens inu!’ 15 Maɣar ammu i iqqar wenni yuɛřan u wenni ittwassgeɛɛden, wenni izeddɣen di řebda, wenni umi qqaren aqa Amqeddas i iǧa: ‘Necc zeddɣeɣ di řuɛřa u deg weqdas u ɣar wenni umi ittwarẓ buḥbeř u ɣar umwaḍeɛ n buḥbeř, maḥend ad arreɣ buḥbeř n imwaḍɛen d wuř n inni ittwarẓin ɣar Tudart!’ 16 Maɣar Necc war ttemcubbuceɣ i řebda u war tteggeɣ ad idduqqez weɣḍab inu břa qeṭṭu, minzi xenni iři ad yarxu kuř buḥbeř zi zzat n wudem inu, řeɛmur nni ggiɣ.” ◘57:16 Izhd. 103:9; Ɛbr. 12;9

17 “Necc ffugmeɣ x řmuɛṣiyyet n meẓri nnes deg warbeḥ uca wtiɣ řgens. Necc nnuffareɣ uca xenni idduqqez weɣḍab inu. Maca řgens yuyur, idweř ɣar webrid n wuř nnes.”

18 “Necc ẓriɣ ibriden nnes, ad t ssgenfiɣ, ad t ssqebbḍeɣ, ad as ssfewwjeɣ uca ad as wceɣ ifewwajen, i netta u i yinni iceḍnen nnes. 19 Necc ad dd-xeřqeɣ řɣiǧet n iyencicen nsen. ‘Řehna, řehna i yinni iggʷejen u i yinni yudsen’, iqqar SIDI. 20 Maca iɛeffanen ggin am řebḥar innhewřen i war izemmaren ad yarsa, uca aman nnes iwyen-dd abaryuḍ d ubeǧaɛ. 21 Iɛeffanen war ɣar iǧi řehna!, iqqar AREBBI inu.” ◘57:21 Ica. 48:22