1 Xenni ibarek AREBBI Nuḥ d iḥenjiren nnes uca inna asen: “Jjem-dd řɣiǧet, marenyem u ɛemmarem tammurt! ◘9:1 Amz. 1:28; 8:17. 2 Tiggʷudi d řɛurret zi kenniw ad iřint x marra řmař n řexřa, x marra ijḍaḍ n ujenna u x marra min ittbuɛen x temmurt u x marra iseřman di řebḥar: aqa mmewcen deg ufus nwem. 3 Marra min ittbuɛen, min iddaren, ad awem yiři d macca. Necc ad awem t wceɣ marra, am d awem wciɣ afsu aziza, ◘9:3 Amz. 1:29. 4 maca aysum ak-d buḥbeř nnes i iǧan d idammen nnes, war ten ttᵉttem. ◘9:4 Lawi 3:17; 7:26; 17:14; 19:26; Aɛwd. 12:23. 5 D tidett ad ttareɣ idammen nwem n řeɛmur nwem, ad ten ttareɣ zeg ifassen n marra imuddaren, uřa zeg ifassen n bnadem, u zeg ifassen n umas n kuř ijjen ad ttareɣ řeɛmar n bnadem. ◘9:5 Uf. 21:12, 28. 6 Wi ɣa issizzřen idammen n bnadem, idammen nnes ad ten ssizzřen s ufus n bnadem, minzi AREBBI igga bnadem di ṣṣifet nnes. ◘9:6 Amz. 1:27; Igjd. 4:13; Mt. 26:52; Asa. 13:10. 7 U kenniw, jjem-dd řɣiǧet, dewřem deg waṭṭas, mṭarrcem di temmurt uca dewřem deg waṭṭas xas.” ◘9:7 Amz. 1:28; 8:17.

8 Uca issiweř AREBBI ak-d Nuḥ d iḥenjiren nnes nni ɣares, inna: 9 “Necc, xzar, Necc tteggeɣ Řɛahd inu akidwem u ak-d zzariɛet nwem awarni awem, ◘9:9 Ica. 54:9. 10 u ak-d marra buḥbeř iddaren nni iǧan akidwem, ak-d ijḍaḍ, ak-d řmař u ak-d marra řmař n řexřa x temmurt inni akidwem, wah, ak-d marra min dd-iffɣen zeg uɣarrabu ař marra min iddaren x temmurt. 11 Ad ggeɣ Řɛahd inu akidwem, aqa marra imeddaren s arrimet n weysum war ttwakessin ɛad s waman n sseḥřet, u war din tᵉttiři ɛad sseḥřet i ɣa yareddǧen tammurt.” 12 Xenni inna AREBBI: “D ta ad tiři d řeɛřamet n Řɛahd tenni i ɣa ggeɣ jar ayi d kenniw d marra řeɛmar iddaren akidwem, i marra jjiřat i řebda: 13 Ad ggeɣ řqews inu deg iseynuten wenni i ɣa yiřin d řeɛřamet n Řɛahd jar ayi d temmurt. 14 Xmi ɣa bḍiɣ iseynuten x temmurt, xenni ad imsar belli řqews-a ad dd-iḍhar deg iseynuten. 15 Xenni ad idareɣ Řɛahd inu jar ayi d kenniw d marra řeɛmar iddaren n marra imeddaren s arrimet n weysum. War dd-ddikkʷiřen waman d sseḥřet ɛawed, maḥend ad ssɣarqen marra imeddaren s arrimet n weysum. 16 Ad dd-iḍhar řqews deg iseynuten, uca Necc ad t ẓareɣ ḥima ad idareɣ Řɛahd i řebda jar AREBBI d marra řeɛmar iddaren di marra imeddaren s arrimet n weysum i iǧan x temmurt.” 17 Uca inna AREBBI i Nuḥ: “D ta d řeɛřamet n Řɛahd inu wenni i ɣa ggeɣ jar ayi d marra imeddaren s arrimet n weysum i iǧan x temmurt.”

18 Tarwa n Nuḥ inni dd-iffɣen zeg uɣarrabu tuɣa aten d Cam d Ḥam d Yafat. Ḥam tuɣa d babas n Kenɛan. ◼9:18 Kenɛan - isem-a wanita ixs ad yini ‘tammurt iwaṭan’.  ◘9:18 Amz. 6:10. 19 Ina d třata n iḥenjiren n Nuḥ. Zzaysen ttwabezzɛen iwdan di marra tammurt. 20 Ibda Nuḥ ixeddem am ufeǧaḥ, iẓẓu tizayarin deg umarjeɛ n uḍiř. 21 Umi iswa binu, iscar uca iɛarra ixef nnes di řwesṭ n uqiḍun nnes. 22 Iẓra Ḥam, babas n Kenɛan, tuɛɛaryent n babas uca inna t i tnayen n aytmas di barra. 23 Ksin Cam d Yafat ca n werruḍ, ssarsen t x tɣarḍin n tnayen idsen nsen uca uyuren ɣar ḍeffar, dřin tuɛɛaryent n babatsen. Arrin aɣembub nsen ɣar ḍeffar, war ẓrin ca tuɛɛaryent n babatsen. 24 Ifaq-dd Nuḥ zi ssekra nnes uca idweř yargeb x min d as igga mmis amaẓuẓ. 25 Inna: “D amenɛuř i yeǧa Kenɛan! Ad yiři d amsexxar qaɛ n imsexxaren i aytmas!” 26 Uca inna: “Ad ittwabarek SIDI, AREBBI n Cam. Kenɛan ad yiři d amsexxar i nitni. 27 Zeɛma ad iwesseɛ AREBBI tazeddiɣt i Yafat, ad izdeɣ deg iqiḍan n Cam, u Kenɛan ad asen yiři d amsexxar.” 28 Awarni sseḥřet iddar Nuḥ ɛad teřt-mya u-xemsin n iseggʷusa. 29 Ammu i iddar Nuḥ tesɛa-mya u-xemsin n iseggʷusa, xenni immut.

Ina d imezruyen n yinni dd-ittwaxeřqen zeg ayt n Nuḥ: Cam, Ḥam d Yafat.