1 Uca ixarreṣ AREBBI di Nuḥ u di marra řmař n řexřa d marra řebhayem i tuɣa akides deg uɣarrabu. Igga AREBBI ad yekk ijj n usemmiḍ x temmurt ařami arsan waman. 2 Bellɛent řɛunṣarat n waman ihewřen d tburjatin n ujenna uca ibedd wenẓar zeg ujenna. 3 Uca, am dd-ttasen ttraḥen, dewřen-dd waman zi temmurt. Awarni mya u-xemsin n wussan neqṣen waman. 4 Deg uyur wiss sebɛa, deg wass wiss sbeɛṭac n uyur nni, yarsa uɣarrabu x idurar n Ararat. 5 Qqimen waman neqqṣen ař ayur wiss ɛecra. Deg uyur wiss ɛecra, deg wass amezwaru n uyur, ḍharent-i-dd tqiccatin n idurar.

6 Awarni řami ɛdun arebɛin n wussan, yarzem Nuḥ taburjet n uɣarrabu nni dayes tuɣa igga, 7 uca issekk abaɣeř. Wanita iffeɣ, iqqim ittraḥ ittas-dd ařami bdan waman ttaẓɣen x temmurt. 8 Xenni issekk ssenni tadbirt, ḥima ad iẓar, ma aman neqṣen x wudem n temmurt. 9 Maca war tufi tedbirt mani ɣa tessars tařeqqa n uḍar nnes uca teɛqeb-dd ɣares ɣar uɣarrabu, minzi aman tuɣa aten ɛad x wudem n marra tammurt. Isswiẓẓeḍ afus nnes, iṭṭef i-tt uca issidef i-tt-i-dd ɣares deg uɣarrabu. 10 Iraja ɛad sebɛa n wussan nneɣni, xenni issekk tadbirt ɛawed zeg uɣarrabu. 11 Uca tadbirt teɛqeb-dd ɣares ɣar tmeddit, u xzar, aqa afar n zzitun deg uqemmum nnes. Xenni ifhem Nuḥ belli aman neqṣen zi temmurt. 12 Iraja ɛad sebɛa n wussan, xenni issekk tadbirt ɛawed uca nettat war ɣares dd-teɛqib ɛad. 13 Deg useggʷas wiss setta-mya u-waḥit n Nuḥ, deg uyur amezwaru, deg wass amezwaru n uyur nni, uẓɣen waman x temmurt. Iksi Nuḥ tawwart n useqqaf n uɣarrabu, ixzar ɣar barra, uca xzar, udem n temmurt aqa yuẓeɣ. 14 Deg uyur wiss tnayen, deg wass wiss sebɛa u-ɛicrin n uyur nni, tuẓeɣ temmurt.

15 Xenni issiweř AREBBI ak-d Nuḥ, inna: 16 “Ffeɣ zeg uɣarrabu, cek d temɣart nnec d iḥenjiren nnec d temɣarin n iḥenjiren nnec akidek. 17 Marra min iddaren i iǧan akidek, zi marra min ɣarsen arrimet n weysum, zeg ijḍaḍ, zi řmař u zi marra imuddaren nni ittbuɛen x temmurt, ejj i-ten ad ffɣen akidek, ejj i-ten ad mṭarracen x temmurt, ad arren řɣiǧet uca ad mmarenyen x temmurt.” ◘8:17 Amz. 1:22, 28; 9:1. 18 Iffeɣ Nuḥ d iḥenjiren nnes d temɣart nnes d temɣarin n iḥenjiren nnes akides. 19 Marra řmař n řexřa, marra min ittbuɛen, d marra ijḍaḍ, d marra min ittenhezzan x temmurt ffɣen zeg uɣarrabu ɛlaḥṣab řaǧat nsen.

20 Ibna Nuḥ ijj n uɛalṭar i SIDI uca iksi zi marra řmař n řeḥřař u zi marra ijḍaḍ n řeḥřař uca iqeddem tiɣarṣa n wecmaḍ x uɛalṭar. ◼8:20 aɛalṭar- niɣ ‘řmedbeḥ’.  ◘8:20 Lawi 11. 21 Uca icemm SIDI řefwaḥet ittfuḥen uca inna SIDI deg wuř nnes: “War ttɛiqqibeɣ ɛad ad neɛřeɣ tammurt x ssibbet n bnadem, minzi min dd-itteffɣen zeg wuř n bnadem d aɛeffan waha zi temẓi nnes. War ttɛiqqibeɣ ɛad ad wteɣ marra min iddaren am mammec ggiɣ. ◘8:21 Amz. 6:5; Awřn. 22:15; Mt. 15:19. Mk. 7:21-23 22 Marra ussan i ɣa teqqim temmurt teǧa, ad tiři tyarza d tmeyra, teṣmeḍ d řeḥmu, anebdu d řmecta uca ass d ǧiřet war ttbeddin ɛemmarṣ.” ◼8:22 tayarza - niɣ ‘amud’. tameyra - niɣ ‘tafersit’.  ◘8:22 Irm. 33:20, 25.