1 A imɛizzen, ařami ɣarneɣ lwuɛud-a, ejj aneɣ ad nessizdeg ixef nneɣ zi marra řexmej n arrimet u n arruḥ, ejj aneɣ ad nessqeddes ixef nneɣ zi tiggʷudi n AREBBI.

2 Qebřem aneɣ, kenniw a aytmatneɣ, uřa d ijj war dayes neggi řɣar, uřa d ijj war t nɣecc, uřa d ijj war zzayes nestenfiɛ. 3 War ssiwřeɣ ḥima ad xawem ḥekmeɣ, min zi izzareɣ nniɣ, aqa kenniw deg wuřawen nneɣ maḥend ad nemmet jmiɛ uca ad neddar jmiɛ. ◘7:3 2 Kur. 6:11, 12, 13. 4 Taryast inu qibač i kenniw temɣar uca asemɣar inu xawem imɣar. Aqa ayi ccureɣ s ufewwej, aqa řefraḥet tfeyyeḍ dayi aṭṭas di kuřci řemḥayem inu. ◘7:4 Mt. 5:12; Řex. 5:41; Fil. 2:17; Kul. 1:24.

5 Minzi zeg wami dd-nusa ɣar Makiduniya, war nufi arraḥet i arrimet nneɣ, maca tuɣa nessḥissif zi marra iɣezdisen, zi barra aqa din imcubbecen, zi daxeř aqa din tiggʷudi. ◘7:5 Řex. 16:19, 23. 6 Maca AREBBI, wenni issfewwajen x imwaḍɛen, issfewwej-dd xaneɣ s twasit n Titus, ◘7:6 2 Kur. 1:4. 7 war iǧi s twasit nnes waha, maca ɛawed s ufewwej i zi tuɣa ittwassfewwej zzaywem, maɣar issargeb aneɣ x tayri nwem d wecḍan nwem d cḍaret nwem xaneɣ. Umi sřiɣ aya, farḥeɣ aṭṭas.

8 Minzi waxxa ssfugmeɣ kenniw s ict n tebrat, war ndimeɣ ca, waxxa ndimeɣ, maɣar ttwařiɣ aqa tabrat nni tessfugem i kenniw i ict n tsaɛɛet waha. 9 Maca farḥeɣ aṭṭas, war iǧi řami tᵉttwassfugmem, maca umi afugem nwem yarra kenniw ɣar ttubet, minzi afugem nwem yusa-dd zi AREBBI, ařami uřa d ict n txessart war kenniw třeqqef ca zzayneɣ di ca n tmesřact. 10 Minzi afugem nni iǧan di ṭṭweɛ n AREBBI, ineddeh ɣar ttubet n buḥbeř u ɣar wedwař i Tudart, maca afugem n ddunect ittawi ɣar řmewt. ◘7:10 2 Ṣm. 12:13; Mt. 26:75; Lk. 18:13. 11 Maca xzar, aqa d man aya imsar, minzi tᵉttwassffugmen di ṭṭweɛ n AREBBI. Mecḥař i kenniw ittejjan n cḍaret d udafeɛ n yixef nwem d warzam n uqemmum d tiggʷudi d tayri d tusmi d uwebbex! Di min di ma iffeɣ-dd aqa kenniw s ixef nwem d imezdagen di tmesřact-a.

12 Min d awem uriɣ, war iǧi x ssibbet n wenni ixeṭṭan niɣ x ssibbet n wenni umi i di ittwagg řɛib, maca ḥima ad tban jar awem cḍaret nwem i neccin zzat i wudem n AREBBI. 13 S uyenni aqa nettwassfewwej u ɣar ufewwej nneɣ aqa nfarreḥ s ufeyyeḍ ktar zi řefraḥet n Titus umi arruḥ nnes ittwassareyyeḥ akidwem marra. 14 Minzi di min di ssemɣareɣ daywem ɣares, aqa war ttwassḥecmeɣ ca, maɣar am d awem nenna tidett kuřci, ammu ɛawed iban-dd, aqa asemɣar nneɣ ɣar Titus ibedd x tidett. 15 Aqa řeḥnunect nnes xawem temmarni aṭṭas umi ittfekkar di ṭṭaɛet nwem marra, aqa tqebřem t s tiggʷudi d tarjijit. 16 Farḥeɣ umi zemmareɣ ad xawem ttecřeɣ di min di mma.