1 Deg useggʷas wiss setta, deg uyur wiss setta, deg wass wiss xemsa n uyur, umi tuɣa qqimeɣ di tudart inu u imɣaren n Yahuda tuɣa qqimen zzat i wudem inu, xenni imsar aqa iwḍa-dd xafi din ufus n Sidi inu, SIDI. 2 Necc ẓriɣ, uca xzar, tuɣa din wenni ṣsifet nnes yarwesen deg wudem n tmessi. Zi tejɛinnatin nnes ɣar wadday aqa iban-dd am tmessi u zi tejɛinnatin nnes ař sennej tuɣa axmi teẓrid tissiqt, tban-dd am wuzzař ittwessgen. 3 Isswiẓẓeḍ-dd min yarwesen deg ijj n ufus uca Netta iṭṭef ayi-dd ɣar ict n tzarezt n uzeǧif inu, uca Arruḥ issgeɛɛed ayi jar ujenna d temmurt, indeh ayi di iweḥḥan n AREBBI ɣar Urcalim, ɣar wadaf n tewwart n řemraḥ n daxeř nni ixezzaren ɣar ccamal, mani iǧa řkursi n řexyař n l’aṣnam n tusmi nni issekkaran tusmi. ◘8:3 Dan. 5:5 4 U xzar, din i iǧa uɛuǧi n AREBBI n Israil, ittban-dd am mammec t ẓriɣ di řewḍa n teɣzurt. ◘8:4 Ḥiz. 3:23 5 Netta inna ayi: “A mmis n bnadem, sgeɛɛed řexxu tamuɣři nnec ɣar ccamal!” Uca ssgeɛɛdeɣ tamuɣři inu jjihet n ccamal, u xzar, ibedd din řexyař nni n ṣṣanam n tusmi ɣar ccamal n Tewwart n Uɛalṭar deg wadaf. 6 Xas uca inna ayi: “A mmis n bnadem, ma tᵉttwařid min tteggen nitni, jjɛayef timeqqranin nni tᵉttegg taddart n Israil danita, ařami ittxeṣṣa ad aggʷejeɣ x Zzawect inu Iqeddsen. Ad tẓared ɛad jjɛayef timeqqranin x tina.”

7 Netta yiwyi ayi ɣar wadaf n řemraḥ. Umi ẓriɣ, xzar, aqa din ijj n weḥfur di řḥiḍ. 8 Netta inna ayi: “A mmis n bnadem, ɣaz xenni řḥiḍ.” Necc ɣziɣ řḥiḍ uca xzar, aqa din ijj n wadaf. 9 Xenni inna ayi: “Adef, uca xzar jjɛayef timeqqranin nni tteggen danita.” 10 Udfeɣ uca ẓriɣ, xzar, aqa din ɛřam kuř ineqqacen n imuddaren ittbuɛen, n řmař amengus u n marra imeyḍa n l’aṣnam n taddart n Israil ttwaneqcen di řḥid deg wenneḍ. ◘8:10 Ica. 66:17 11 Aqa sebɛin n yeryazen zeg imɣaren n taddart n Israil, ak-d Yazanyahu, mmis n Cafan, di řwest nsen, bedden zzatsen u kuř ijj s řmejmar nnes n řebxur deg ufus nnes uca tuři tejnewt teccur s arriḥet n řebxur. ◘8:11 Ica. 66:17 12 Xenni inna ayi: “A mmis n bnadem, ma teẓrid min tteggen imɣaren n Israil di taǧest, kuř ijj deg wexxam n řexyař nnes ineqcen, maɣar qqaren: SIDI war d aneɣ iẓri, SIDI yejja tammurt.” ◘8:12 Ḥiz. 9:9 13 Netta inna ayi: “Ad tẓared ɛad jjɛayef timeqqranin x tina nni tteggen nitni.”

14 Xenni indeh ayi ɣar wadaf n tewwart n Taddart n SIDI, wenni iǧan ɣar ccamal, u xzar, qqiment din temɣarin ttrunt di Tammuz. ◘8:14 Uf. 38:8 15 Netta inna ayi: “A mmis n bnadem, ma teẓrid aya! Ad tẓared ɛad jjɛayef mɣarent x tina.”

16 Uca yiwyi ayi ɣar řemraḥ n daxeř n Taddart n SIDI, uca xzar, ɣar tewwart n Zzawect n SIDI, jar wesqif d uɛalṭar, aqa din ɛřaḥař xemsa u-ɛicrin n yeryazen. Iɛurar nsen dewřen ɣar Zzawect n SIDI u udmawen nsen ɣar ccarq, uca nitni sejden ɣar ccarq i tfuct. 17 Xenni inna ayi: “A mmis n bnadem, ma teẓrid aya? Ma aqa drust i taddart n Yahuda maḥend ad ggen jjɛayef-a timeqqranin nni tteggen danita? Maɣar nitni ccuren tammurt s lɛunf uca qqimen dewřen-dd ɣari ḥima ad ayi sɛaren. Xzar, tteggen ɛad taseṭṭa ittwaqeḍɛen ɣar wenzaren nsen! 18 Xenni uřa d Necc ad ggeɣ s wesɛar. War dayi izziǧiz ḥed u war areḥḥmeɣ. Waxxa nitni sɣuyyun s tmijja ijehden deg imezzuɣen inu, Necc war dd ɣarsen ttesřiɣ.” ◘8:18 Awřn. 1:28; Ica. 1:15; Irm. 11:11; Ḥiz. 5:11; 7:4