1 Xenni iřaɣa deg imezzuɣen inu s tmijja tejhed, inna: “Ejj imeḥḍayen n tendint ad dd-qarrben, kuř ijj s řesnaḥ nnes n ureddeǧ deg ufus nnes.” 2 Uca xzar, setta n yeryazen usin-dd zeg webrid zi Tewwart Yuɛřan nni ixezzaren ɣar ccamal u kuř ijj ɣares řesnaḥ nnes i uteḥḥi deg ufus nnes. Di řwesṭ nsen tuɣa din ijj n weryaz, tuɣa yarḍ řeqṭen, yiwi tadwat n umarir ɣar webyas nnes. Udfen nitni uca ggin ad bedden ɣar uɛalṭar n nnḥas. 3 Aɛuǧi n AREBBI n Israil issgeɛɛed ixef nnes zi sennej n ukirub nni x iǧan, yuyur ɣar tnebdat n Taddart uca Netta iřaɣa-dd i weryaz nni yarḍen řeqṭen d wenni yiwyen tadwat n umarir ɣar webyas nnes. ◼9:3 akirub - ict n marka n lmalakat. 4 Inna as SIDI: “Cuqq di řwesṭ n tendint, di řwesṭ n Urcalim, uca egg kruz d řeɛřamet x tenyarin n yeryazen nni ittnixsisen d ttweɛɛḍen x ssibbet n marra jjɛayef nni ittwaggen di řwesṭ nnes.” 5 Umi sřiɣ, inna i inneɣni: “Cuqqem di tendint awarni as, nɣem, war zziǧizem u war areḥḥmem! 6 Nɣem iwessura, iḥuḍriyyen, tiɛezriyin, iḥenjiren d temɣarin ař ɣa ttwahellken qaɛ, maca war tthadam uřa d ijj xas kruc d řeɛřamet. Bdam zi Zzawect inu Iqeddsen.” Uca nitni bdan zeg iwessura nni iǧan zzat i Taddart. 7 Uca Netta inna asen: “Sxemjem Taddart uca ccurem řemraḥat s řxecbat n yinni ittwanɣen. Ffɣem!” Ffɣen nitni uca nɣin iwdan di tendint.

8 Řami ten nɣin uca qqimeɣ necc, imsar aqa necc wḍiɣ x uɣembub inu ɣar temmurt uca nniɣ: “Ax, Sidi inu, SIDI, ma ad tareddǧed řexxu min iqqimen n Israil umi ɣa tzeǧɛed asɛar nnec x Urcalim?” 9 Xenni inna ayi: “Řmuɛṣiyyet n taddart n Israil d Yahuda temɣar aṭṭas u tammurt teccur s idammen u tendint teccur s usfarɣ n řḥeqq, minzi nitni qqaren: ‘SIDI ismeḥ di temmurt uca SIDI war iẓarr!’ 10 S uya uřa d Necc ad ggeɣ ammu. Tiṭṭ inu war tsemmeḥ u Necc war ttḥinniɣ. Necc ad ssenqeřbeɣ abrid nsen x uzeǧif nsen.” ◘9:10 Ḥiz. 5:11; 7:4; 8:18

11 Uca xzar, aryaz nni yarḍen řeqṭen, wenni dd-yiwyen ɣar webyas nnes tadwat n umarir, aqa yarra-dd řexbar, inna: “Ggiɣ am mammec i d ayi tumured.”