1 Awarni aya ẓriɣ, xzar, sennej i řqubbet, sennej i uzeǧif n ikiruben, tuɣa din ca am weẓru n ṣaffir, min dd-ittbanen am wudem n min yarwesen deg ijj n řɛarc, u sennej i nitni iḍhar-dd Netta. 2 Uca issiweř ak-d weryaz nni yarḍen arrud n řeqṭen, inna: “Adef-dd ɣar daxeř jar tjarrarin ittennḍen, ař sadu i ikiruben, uca ccur ifassen nnec s řefḥem itteḥduduqen zi jar ikiruben uca zeǧeɛ i-t x tendint!” Uca yudef-dd jar asent zzat i tiṭṭawin inu. ◼10:2 ikiruben - ict n marka n lmalakat inni ɣarsen ṣulṭa tameqqrant.  ◘10:2 Ḥiz. 1:13

3 Ikiruben tuɣa bedden ɣar uɣezdis afusi n Taddart umi dd-yadef weryaz ɣar daxeř uca aseynu iccur řemraḥ n daxeř. 4 Aɛuǧi n SIDI issgeɛɛed ixef nnes zi sennej n uxirub, iɛdu x tnebdat n tewwart n Taddart uca tᵉttwaccur Taddart s useynu u řemraḥ n zzat tuɣa iccur s tessiqt n uɛuǧi n SIDI. 5 Drizz n wafriwen ittwaseř-dd ař daxeř di řemraḥ n barra, am tmijja n Arebbi, Amzemmar x kuřci, xmi issawař.

6 Imsar awarni řami yumur Netta i weryaz nni yarḍen řeqṭen, inna: “Ksi timessi zi jar tjarrarin ittenḍen, zi jar ikiruben!”, aqa wanita yudef-dd uca ibedd zzat i tjarrart ittenḍen. 7 Xenni isswiẓẓeḍ ijj n ukirub afus nnes zi jar ikiruben ɣar tmessi nni tuɣa jar asen, iksi zzayes uca issars i-tt deg ifassen n wenni yarḍen řeqṭen. Wanita iksi tt uca iffeɣ. 8 Sadu wafriwen n ikiruben ittwaẓar ca am ṣṣifet n ufus n bnadem.

9 Xenni ẓriɣ, xzar, aqa din arebɛa n tjarrarin ɣar uɣezdis n ikiruben, ict n tjarrart ɣar uɣezdis n ijj n ukirub. Udem n tjarrarin am wudem n weẓru n texrisulit. ◘10:9 Ḥiz. 1:16 10 X mammec dd-ḍharen, aqa arebɛa ɣarsen ṣṣifet d icten, axmi ict n tjarrart tᵉttřiq nican di řwesṭ n tjarrart nneɣni. 11 Xmi gguren, gguren ɣar arebɛa n iɣezdisen nsen. Nitni war ttneqřiben ca xmi gguren, minzi amcan mani tarra tjarrart n zzat azeǧif nnes, aqa ḍfaren tt-i-dd. Nitni war nnqeřben ca xmi gguren. 12 Marra arrimet nsen: iɛurar nsen, ifassen nsen d wafriwen nsen, uca uřa d tijarrarin nsen ccuren s tiṭṭawin deg wenneḍ nsen ɣar marra arebɛa imuddaren nni, wah ɛad tijarrarin nsen. 13 Sřiɣ ict n tmijja aqa tᵉttřaɣa asent i tjarrarin: ‘Tajarrart n ddewran!’ 14 Kuř ijj ɣares arebɛa n wudmawen: udem amezwaru tuɣa d udem n ukirub, u udem wiss tnayen d udem n bnadem, u udem wiss třata d udem n weyrad, u udem wiss arebɛa d udem n ugider.

15 Ssgeɛɛden ikiruben ixef nsen. Wa d simant n umuddar i ẓriɣ ɣar yeɣzar n Xabur. 16 Umi uyuren ikiruben, uyurent uřa d tijarrarin ɣar uɣezdis nsen, umi ssgeɛɛden ikiruben afriwen nsen maḥend ad ssgeɛɛden ixef nsen zi temmurt, war qnunnyent tjarrarin nni ařami aggʷejent x uɣezdis nsen. ◘10:16 Ḥiz. 1:19 17 Umi bedden nitni, beddent uřa d nitenti, umi ssgeɛɛden nitni ixef nsen, ssgeɛɛdent uřa d nitenti ixef nsent, minzi buḥbeř n imuddaren tuɣa-t daysent. ◘10:17 Ḥiz. 1:20

18 Xenni iffeɣ uɛuǧi n SIDI zi sennej n tnebdat n Taddart uca ibedd sennej i ikiruben. 19 Ikiruben ssgeɛɛden afriwen nsen uca, umi dd-ffɣen, ssgeɛɛden ixef nsen zi temmurt zzat i tiṭṭawin inu uca uřa d tijarrarin ɣar uɣezdis nsen. Nitni qqimen bedden ɣar wadaf n Tewwart n Ccarq n Taddart n SIDI uca aɛuǧi n AREBBI tuɣa-t xasen zi sennej. 20 Wa d amuddar i ẓriɣ sadu AREBBI n Israil ɣar yeɣzar n Xabur. Xenni ssneɣ belli tuɣa aten d ikiruben. ◘10:20 Ḥiz. 1:3 21 Kuř ijj ɣares arebɛa n wudmawen u kuř ijj ɣares arebɛa n wafriwen u sadu afriwen nsen aqa din min yarwesen deg ifassen n iwdan. ◘10:21 Ḥiz. 1:6, 8; 10:8, 14 22 Udmawen nsen am wudmawen nni ẓriɣ ɣar yeɣzar n Xabur, mammec dd-banen wudmawen nni, uřa d nitni s yixef nsen. Nitni gguren kuř ijj nican ɣar zzat nnes.