Ṣafanya
1
Ass ameqqran n SIDI
1 Awař n SIDI i dd-yusin i Ṣafanya, mmis n Kuci, mmis n Jadalya, mmis n Amarya, mmis n Ḥizqiya, deg wussan n Yuciya, mmis n Amun, ajeǧid n Yahuda. ◼1:1 Ṣafanya - isem-a wanita ixs ad yini ‘wenni t issnuffaren SIDI’.
2 Necc ad kkseɣ qaɛ marra min iǧan
zeg wudem n temmurt,
ammu i iqqar SIDI.
3 Ad kkseɣ bnadem d řmař,
ad kkseɣ ijḍaḍ n ujenna
d iseřman n řebḥar
d tɛenkrifin ak-d iɛeffanen,
wah Necc ad qḍiɣ bnadem
x wudem n temmurt,
ammu i iqqar SIDI. ◘1:3 Amz. 6:7
4 Necc ad sswiẓẓḍeɣ s ufus inu
ḍidd i Yahuda
u ḍidd i marra imezdaɣ n Urcalim.
Necc ad teḥḥiɣ min iqqimen zi Baɛl
zeg wemcan-a
ak-d yisem n ikehhanen n l’aṣnam, ◼1:4 ad teḥḥiɣ - s Tɛibranit ‘ad qeḍɛeɣ’.
5 d yinni isejden x tzeɣwin
zzat i řɛeskar n ijenwan,
u inni, am bendqen, jjuǧen ɣar SIDI,
u aqa jjuǧen i Malkam,
6 uřa d yinni dd-ittɛaqqaben
zi ḍeffar n SIDI,
u yinni war arezzun x SIDI
u war xas ttsseqsin. ◘1:6 Ica. 1:4; 59:13; Irm. 15:6
7 Seɣd zzat i wudem n Sidi inu, SIDI,
maɣar ass n SIDI yudes.
SIDI aqa issewjed ict n tɣarṣt,
Netta issqeddes imeɛraḍen nnes.
8 Ad imsar deg wass n tɣarṣt n SIDI,
aqa Necc ad ɛaqbeɣ řḥukkam
d iḥenjiren n ujeǧid
d marra inni yarrḍen arruḍ aɣrib.
9 Deg wass nni ad ɛaqbeɣ
marra inni ineggzen tanebdat,
inni ittɛemmaren taddart n siditsen
s lɛunf d řɣecc.
10 Deg wass nni, iqqar SIDI,
ad din yiři ijj n řḥess n iɣuyyan
zi Tewwart n Iseřman,
uřa d řḥess n yinni ittrun
zi tendint n jdid
d ict n tareẓẓit temɣar zi tewririn.
11 Rum, imezdaɣ n jjihet n Umehraz,
minzi marra isebbabben ttwaseɣḍen,
marra inni iwezznen tmenyat ttwaqeḍɛen.
12 Di řweqt nni ad beqqceɣ
di Urcalim s řeqnadeř,
u Necc ad ɛaqbeɣ iryazen
inni ittwagdaren zi řatar
nni iqqimen n binu,
inni iqqaren deg wuř nsen:
‘SIDI war ittegg řxar
u war ittegg řɣar!’
13 Agřa nsen ad yiři i tkeccaḍt
d tudrin nsen ad dewřent d řxarbet.
Nitni ad bnan tudrin i yixef nsen,
maca war daysent zeddɣen ca,
nitni ad ẓẓun tizayarin,
maca war sessen zi binu nnes.
14 Ass ameqqran n SIDI yudes,
aqa-t yudes, deɣya yusa-dd.
Řḥess n wass n SIDI!
Ad isɣuy bu-teɣruḍt din
s yict n tɣuyyit tarzeg. ◘1:14 Yuw. 2:10, 31; 3:15; Ica. 13:6-13; 24:23; Am. 8:9; Mt. 24:29; Řex. 2:20; Asa. 6:12-13
15 Ass nni ad yiři
d ass n uduqqez n ufugem,
d ass n řeḥṣaret d ḍḍiqa,
d ass n uxarreb d wareddeǧ,
d ass n ṭṭřam d taǧest,
d ass n iseynuten d useynu ibbumbes,
16 ijj n wass n usuḍi deg uyicc n icarri
u n iɣuyyan n umenɣi
ḍidd i tneddam ifaryen
u ḍidd i ṣṣumɛat nni iǧan
ɣar tɣemmura.
17 Necc ad ḥṣareɣ iwdan
u nitni ad uyuren am yidarɣařen,
minzi nitni ggin ddenb x SIDI.
Idammen nsen ad ttwazeǧɛen
amecnaw tɛejjajt,
d weysum nsen amecnaw ixxan.
18 Uřa d nnuqart nsen d wureɣ nsen
war zemmaren ad ten ssnejmen
deg wass n uduqqez n ufugem n SIDI.
Timessi n tusmi nnes iqeddsen
ad tecc marra tammurt,
maɣar deɣya Netta ad iqḍa
marra imezdaɣ n temmurt. ◘1:18 Awřn. 11:4; Ḥiz. 7:19; Ṣaf.1:14-16
◼1:1 1:1 Ṣafanya - isem-a wanita ixs ad yini ‘wenni t issnuffaren SIDI’.
◼1:4 1:4 ad teḥḥiɣ - s Tɛibranit ‘ad qeḍɛeɣ’.
◘1:6 1:6 Ica. 1:4; 59:13; Irm. 15:6
◘1:14 1:14 Yuw. 2:10, 31; 3:15; Ica. 13:6-13; 24:23; Am. 8:9; Mt. 24:29; Řex. 2:20; Asa. 6:12-13
◘1:18 1:18 Awřn. 11:4; Ḥiz. 7:19; Ṣaf.1:14-16