1 Yusa-dd ɣari wawař n SIDI, inna: 2 “A mmis n bnadem, arr udem nnec ɣar ayt n Ɛammun uca nabb xasen. ◘25:2 Irm. 49:1 3 Ini i ayt n Ɛammun: ‘Sřem i wawař n Sidi inu, SIDI! Ammu i iqqar Sidi inu, SIDI: Umi tennid ‘Ya, ayuz!’ x Zzawect inu Iqeddsen umi tt ssɛiǧten, u x temmurt n Israil umi tt areddǧen, uřa x taddart n Yahuda řami ten iwyen ɣar lmenfa, 4 s uya, xzar, Necc ad wceɣ cem a, tammurt n Ɛammun d tasɣart i yinni dd-yusin zi ccarq uca nitni ad ggen řemrageḥ nsen dayem uca ad arren tizeddiɣin nsen dayem. Nitni ad ccen řɣiǧet nnem uca ad swen aceffay nnem. ◼25:4 dayem - ixs ad yini ‘di temmurt. řɣiǧet nnem - ixs ad yini ‘řɣiǧet n temmurt’. 5 Necc ad ggeɣ Rabba d amcan n arraḥet i iřeɣman uca tammurt n ayt n Ɛammun d ddmani n wareyyeḥ i wuǧi uca kenniw ad tessnem belli Necc d SIDI.’ 6 Minzi ammu i iqqar Sidi inu, SIDI: ‘Umi tewtid ifassen nnec ijj deg wenneɣni s řefraḥet, tedzed s uḍar u tfarḥed s marra nnfaxet nnec di řeɛmar x temmurt n Israil, 7 s uya, xzar, Necc ad sswiẓẓḍeɣ afus inu ḍḍid nnec uca ad cek arreɣ d takeccaḍt i řegnus u ad cek qeḍɛeɣ zi jar řegnus uca ad cek teḥḥiɣ zi temmura. Ad cek areddǧeɣ uca ad tessned aqa Necc d SIDI.’ ”

8 “Ammu i iqqar Sidi inu, SIDI: ‘Umi Mu’ab d Saɛir qqaren: Xzar, taddart n Yahuda teǧa am marra řegnus!, ◘25:8 Irm. 48:1-49:7-22 9 s uya, xzar, Necc ad arzmeɣ aɣezdis n zzat n Mu’ab, zi tneddam, zi tneddam nnes nni iǧan ɣar ṭṭarf qaɛ n temmurt nnes, tinni d talwizt n temmurt: Bayt-Yacimut, Baɛl-Maɛun d Qaryatayim. 10 Necc ad tent wceɣ d tasɣart i ayt n ccarq jmiɛ ak-d temmurt n ayt n Ɛammun, ḥima war tᵉttiři ɛad řidaret deg ayt n Ɛammun jar řegnus. ◘25:10 Ḥiz. 21:37 11 Ad ssiwḍeɣ řeḥkamat x Mu’ab u nitni ad ssnen, belli Necc d SIDI.’ ”

12 “Ammu i iqqar Sidi inu, SIDI: ‘Umi Idum igga s nneqmet waha ḍidd i taddart n Yahuda uca umi idweř daysen řɛib aṭṭas umi zzaysen neqmen, 13 s uya, ammu i iqqar Sidi inu, SIDI, ad sswiẓẓḍeɣ afus inu ḍidd i Idum uca ad zzayes qeḍɛeɣ bnadem d řmař uca ad t ggeɣ d řxirbet zi Tayman, uca ad wḍan s ssif ař Dadan. 14 Necc ad ssiwḍeɣ nneqmet inu x Idum s ufus n řgens inu Israil. U nitni ad ggen ak-d Idum ɛlaḥsab aɣḍab inu u ɛlaḥsab asɛar inu, ad ssnen nneqmet inu!’, iqqar Sidi inu, SIDI.”

15 “Ammu i iqqar Sidi inu, SIDI: ‘Umi Ifilisṭiniyyen ggin s nneqmet u neqmen s nnfaxet n wuř umi areddǧen nitni zi řeɛdawet ittduman, 16 s uya, ammu i iqqar SIDI inu, SIDI: Xzar, Necc ad sswiẓẓḍeɣ afus inu ḍidd i Ifilisṭiniyyen uca ad qeḍɛeɣ Ikaritiyyen uca ad areddǧeɣ min iqqimen x tma n řebḥar. ◼25:16 řebḥar - niɣ ‘il’. 17 Nneqmat timeqqranin s leɛqayeb iqesḥen ad daysen ggeɣ u nitni ad ssnen belli Necc d SIDI, xmi ɣa kemmřeɣ nneqmet inu daysen.’ ”