1 Deg useggʷas wiss ḥiṭɛac, deg wass amezwaru n uyur imsar belli yusa-dd ɣari wawař n SIDI, inna: 2 “A mmis n bnadem, umi tenna tendint n Ṣur x Urcalim: ‘Ya ayuz, aqa tᵉttwareẓẓa, tawwart n řegnus tᵉttwarzem ɣari. Ad ɣari yiři wagřa aṭṭas, umi nettat tᵉttwareddeǧ řexxu!’, 3 s uya, ammu i iqqar Sidi inu, SIDI: ‘Xzar, Necc ǧiɣ ḍidd nnec, a Ṣur! Ad xam ssekkareɣ aṭṭas n řegnus, am mammex issgeɛɛed řebḥar řemwaj nnes. 4 Nitni ad areddǧen řehyuḍ n tendint n Ṣur uca ad arẓen ṣṣumɛat nnes u Necc ad xas kkseɣ acař nnes uca ad tt arreɣ d taṣḍart taqeccart. 5 Ad din tiři di řwest n řebḥar, maḥend ad xas bezzɛen tiracciwin i tneymart n iseřman, minzi Necc nniɣ t, ammu i iqqar Sidi inu, SIDI, u nettat ad tiři d takeccaḍt i řegnus. 6 Yessis nni iǧan deg iyyar x řbarr, ad ttwanɣent s ssif u nitni ad ssnen belli Necc d SIDI.’ ”

7 “Minzi ammu i iqqar Sidi inu, SIDI: ‘Xzar, zi ccamal ad ssiwḍeɣ Nabuxadraṣṣar, ajeǧid n Babil, ajeǧid n ijeǧiden, x Ṣur ak-d iysan d ikarruten, ak-d imnayen u ak-d ijj n wegraw d ijj n řgens ameqqran. ◼26:7 ak-d iysan d ikarruten - s Tɛibranit ‘ak-d uyis d ukarru’. 8 Ad ineɣ s ssif yessim nni yeǧan deg iyyar, ad issbedd řqammat ḍidd nnem, ad ibna ijj n wecbar ḍidd nnem u ad issbedd ḍidd nnem ict n tesqift ttwaggen tt s tseddariyin timeqqranin. 9 Netta ad igg icarriyyen n wedham ḍidd i řeḥyuḍ nnem uca ad issḥeyyed ssumɛat nnem s řesyuf nnes. 10 Ad am ideř řeɛjaj n ubarru n yeysan nnes, s zzhir n imnayen d uqarqeb n tjarrarin d ddriz n ikarruten ad arjijen řeḥyuḍ nnem xmi ɣa yadef x tewwura nnem am dd-udfen x ict n tendint tᵉttwahdem. 11 S icucca n yeysan nnes ad iɛfes x ibriden nnem marra, ad ineɣ řgens nnem s ssif uca ipilaren nnem ijehden iqeddsen ad wḍan ɣar temmurt. ◼26:11 ipilaren nnem ijehden - aqa-ten d ipilaren n weɛbed n Baɛal di zzawect n Hirkulis di Ṣur. War ǧin d řexyařat n ṣṣanam maca d ipilaren.  ◘26:11 Ica. 5:28; Irm. 47:3 12 Nitni ad acaren agřa nnem ad keccḍen tasebbabt nnem, ad areddǧen řeḥyuḍ nnem, ad ɣeḍřen tudrin nnem iɛizzen. Iẓra nnem d tḥenya n ukeccud nnem d řeɛjaj nnem ad ten mmenḍaren deg waman. 13 Ammu i ɣa ssesqareɣ ddriz n iẓřan nnem uca řḥess n řgambriyat nnem war ittwaseř ɛad. ◘26:13 Ica. 24:7, 8; Irm. 7:34; 16:9 14 Ad cem arreɣ d taṣḍart taqeccart i wefsar n tracciwin i tneymart n iseřman. Ɛemmarṣ ad tᵉttwabnid ɛawed, minzi Necc, SIDI, nniɣ t!, ammu i iqqar Sidi inu, SIDI.’ ”

15 “Ammu i iqqar Sidi inu, SIDI i tegzirt n Ṣur: ‘Ma war ttarjijint tegzirin s řḥess n uweṭṭu nnem, xmi ssbuɛruren inni ittwayezzmen i řmewt, xmi ɣa temsar ict n tecti ineqqen di řwest nnem? 16 Marra řḥukkam n řebḥar ad dd-hwan zi řekrasi nsen igellden uca ad ɣeḍřen iḥacen nsen, ad kksen arruḍ nsen iburḍaren s tintat ifarzen. Ad řeḥḥfen s řɛurret, ad qqimen x temmurt uca ad arjijen di kuř řweqt uca ad xam nxeřɛen. 17 Ad xam ssiřyen ijj n wezři n wecḍan, ad am inin:

Mammec tᵉttwateḥḥid,

a cem, tenni i di zedɣen

inni dd-iffɣen zi řebḥar,

a cem tandint icennɛen,

tenni ijehden aṭṭas di řebḥar,

cem, a Ṣur d imezdaɣ nnes,

tenni itteggen arjef jar asen

di marra inni dayes izedɣen. ◼26:17 inni dd-iffɣen zi řebḥar - imezdaɣ n Ṣur tuɣa arwesen deg imezdaɣ n řebḥar minzi tuɣa tagzirt tgeɛɛed-dd zi řebḥar ak-d imezdaɣ nnes umi ɣares dd-texzared zi řaggʷaj, zi temmurt. tenni itteggen arjef ... - man aya war ixs ad yini aqa imezdaɣ n Ṣur tuɣa ssiggʷiden ijj zeg wenneɣni, maca, umi ɣarsen ijj n isem icenɛen zi ssibbet n tsebbabt nsen di marra ddunect, aqa arjfen umi ẓrin nitni ccan n tendint nsen, uca uřawen nsen dewřen ccuren s uweqqar ařami tandint tḥewwes i-ten s yisem nnes icenɛen.  ◘26:17 Asa. 18:9-19

18 Řexxu ad arjijent tegzirin

deg wass n uweṭṭu nnem,

wah tigzirin di řebḥar

ad nnxeřɛent s uneggar nnec.’ ”

19 “Minzi ammu i iqqar Sidi inu, SIDI: ‘Xmi Necc ad cem yarreɣ d tandint ittwaredǧen am tneddam nni war izdiɣen, xmi xam i ɣa ssiwḍeɣ aman ihewřen uca xmi aṭṭas n waman ad cem dřen, 20 xenni ad cem dd-ssehwiɣ ak-d yinni dd-ihwan deg weḥfur n wenḍeř, ɣar řgens n řweqt n zic. Ad cek ssarseɣ di řaǧaɣ n temmurt, di řxirbat n řweqt n zic, ɣar inni dd-ihwan deg weḥfur n wenḍeř, ḥima war dayem ttiřin imezdaɣ ɛad. Maca di temmurt n yinni iddaren ad wceɣ řɛezz. 21 Ad cem arreɣ d ijj n umedya n warjef uca war tᵉttiřid ɛad. Ad xam arzun uca war tᵉttwifid ɛemmarṣ i řebda!’, ammu i iqqar SIDI inu SIDI.”