1 Umi idweř Camwil iwsar, imsar, aqa igga iḥenjiren nnes d řquḍat x Israil. 2 Mmis amezwaru tuɣa qqaren as Yuwil u wenni wiss tnayen qqaren as Abiya. Nitni tuɣa aten d řquḍat di Bi’r-Sebɛa. 3 Maca iḥenjiren nnes war aredfen ibriden nnes. Nitni arezzun x arbeḥ i yixef nsen, ṭṭfen arriɣalut u ssfarrɣen řḥeqq. ◘8:3 Uf. 18:21; Aɛwd. 16:19. 4 Xenni munen marra imɣaren n Israil, usin-dd ɣar Camwil di Rama. 5 Nitni nnan as: “Xzar, cek tewsared u iḥenjiren nnec war gguren ca x tebridin nnec. S uya egg řexxu ijj n ujeǧid xaneɣ maḥend ad xaneɣ iḥkem, am mammec iǧa ɣar marra řegnus nneɣni.” ◘8:5 Ḥuc. 13:10; Řex. 13:21.

6 Awař-a iǧa d aɛeffan di tiṭṭawin n Camwil, řami nnan: “Ewc aneɣ ijj n ujeǧid maḥend ad xaneɣ iḥkem!” Uca Camwil iẓẓuǧ i SIDI. ◘8:6 1 Ṣm. 12:17. 7 Inna SIDI i Camwil: “Seř ɣar řgens di marra min i d ac ɣa inin, maɣar war iǧi d cek i nḍaren nitni, maca d Necc i nḍaren nitni, ḥima Necc war ttiřiɣ d ajeǧid xasen. ◼8:7 ɣar řgens - s Tɛibranit ‘ɣar tmijja n řgens’. 8 Nitni tteggen ɛad am mammec ggin s marra timegga nsen zeg wass i ten dd-ssgeɛɛdeɣ zi Miṣra ař ass-a. Nitni semḥen d ayi uca sexxaren i irebbiten nneɣni. Ammu i dayek tteggen nitni ɛawed. 9 Seř řexxu ɣarsen, maca ɛřem asen nican uca sargeb i-ten s řḥeqq n ujeǧid wenni i xasen i ɣa iḥekmen.” ◼8:9 Seř řexxu ɣarsen - s Tɛibranit ‘Seř řexxu ɣar tmijja nsen’.

10 Issiweř Camwil marra awařen n SIDI ak-d řgens nni zzayes ittaren ijj n ujeǧid. 11 Netta inna: “Aya i ɣa yiři d řḥeqq n ujeǧid i xawem i ɣa iḥekmen: netta ad yawi iḥenjiren nwem, ad ten yarra i yixef nnes ɣar ikarruten nnes maḥend ad iřin d imnayen nnes, u ad zzřen ɣar zzat i ikarruten nnes. 12 Netta ad ten igg i yixef nnes d imeqqranen x wařef uřa d imeqqranen x xemsin, u ad ten yarr ad carzen iyyaren nnes, ad mjaren ṣṣabet nnes u ad ggen dduzan n umenɣi nnes d dduzan n ikarruten nnes. 13 Yessitwem ad tent-i-dd-yawi maḥend ad as ggent fumaḍat, ad ssnennant u ad ggʷent. 14 Ad iksi mummu n iyyaren nwem, n imarjaɛen nwem n uḍiř u n iḥwicen n tazart nwem, uca ad t iwc i imsexxaren nnes. 15 Ad iksi řeɛcur n zzariɛet nwem, n imarjaɛen nwem n uḍiř uca ad ten iwc i imsexxaren nnes icennɛen u i imsexxaren nnes inneɣni. 16 Ad iksi isemɣan d tiyya nwem d iḥudriyyen nwem iṣebḥen d iɣyař nwem, uca ad ten yejj ad as xedmen. 17 Ad iksi řeɛcur n tḥimriwin nwem u kenniw ad tiřim d imsexxaren nnes. 18 Deg wass nni ad tesɣuyem zzat i wudem n ujeǧid nwem i texḍarem kenniw, maca SIDI war d awem ittesři ca deg wass nni.” 19 Maca řgens war ixs ad iseř ɣar Camwil, nnan: “Lla, ittxeṣṣa ad xaneɣ yiři ijj n ujeǧid.” 20 Uřa d neccin ad niři am řegnus nneɣni marra, ajeǧid nneɣ ad xaneɣ iḥkem s řḥeqq. Netta ad yizwar zzat i wudem nneɣ uca ad issuyur imenɣan nneɣ.” 21 Umi isřa Camwil i marra awařen n řgens, inna ten deg imezzuɣen n SIDI. 22 SIDI inna i Camwil: “Seř ɣarsen, egg xasen ijj n ujeǧid!” Xas uca inna Camwil i yeryazen n Israil: “Ejj ad yuyur kuř ijj ɣar tendint nnes.” ◼8:22 Seř ɣarsen - s Tɛibranit ‘Seř ɣar tmijja nsen’.