31
Yacuwa iksi amcan n Musa
1 Iruḥ Musa uca issiweř s wawařen-a ak-d marra Israil, 2 inna asen: “Ass-a necc ɣari mya u-ɛicrin n iseggʷusa. War zemmareɣ ɛad ad ffɣeɣ uřa ad adfeɣ uca SIDI inna ayi: ‘War tẓekkʷid iɣzar-a n L’Urdun!’ ◘31:2 Řxř. 27:12; Aɛwd. 3:26 3 SIDI, AREBBI nnec, ad iẓwa zzat i wudem nnec. Netta ad yareddeǧ řegnus-a zzat i wudem nnec uca ad tᵉṭṭfed řwart nsen. Yacuwa ad iẓwa zzat i wudem nnec, am mammec inna SIDI. ◘31:3 Řxř. 27:18 4 SIDI ad kisen igg am mammec igga ak-d Siḥun d Ɛuj, ijeǧiden n Imuriyyen, inni yareddeǧ Netta s tnayen, u am mammec igga ak-d temmurt nsen. ◘31:4 Řxř. 21:24,33 5 Xmi ten ɣa isellem SIDI zzat i wudem nwem, ad kisen teggem ɛlaḥsab marra tawṣeyyet nni zi kenniw weṣṣiɣ◘31:5 Aɛwd. 7:1, 2 6 Iřim d iryazen u iřim tmeḥḍem, war tteggʷedem, war ttarjijem ca zzat i wudem nsen, minzi SIDI, AREBBI nnec, d wenni akidek igguren. Netta war dayek isemmeḥ niɣ cek ittejji.” ◘31:6 Yac. 1:5; Ɛbr. 13:5
7 Iřaɣa Musa i Yacuwa, inna as zzat i tiṭṭawin n marra Israil: “Iři d aryaz u iři tmeḥḍed, minzi ad tadfed ak-d řgens-a ɣar temmurt nni ijjuǧ SIDI i řejdud nsen ad asen tt-i-dd-iwc uca cek ad ten tejjed ad tt ṭṭfen d řwart. 8 SIDI, d wenni yuyuren zzat i wudem nnec, d Netta i ɣa yiřin akidek, war cek ittettu ca niɣ ad dayek ismeḥ. War tteggʷed u war ttarjiji.” ◘31:8 Yac. 1:9
Musa iwca Ccariɛa i ayt n Lawi
9 Yura Musa Ccariɛa-ya uca iwca i-tt i ikehhanen, ayt n Lawi, inni yarbun Ttabut n Řɛahd n SIDI, u i marra imɣaren n Israil. 10 Musa yumur i-ten, inna: “Awarni sebɛa n iseggʷusa, di řweqt ittwaggen n useggʷas n ufekki n imerwusen di Řɛid n Iɛuccuten, 11 xmi ɣa imun marra Israil maḥend ad iḥḍar zzat i wudem n SIDI, AREBBI nnec, deg wemcan nni i ɣa yixḍar Netta, ad tɣared s jjehd Ccariɛa-ya zzat i marra Israil deg imezzuɣen nsen. ◘31:11 Ɛiz. 8 12 Ejj ad imun řgens, iryazen d temɣarin d iḥenjiren d ibarraniyyen nni iǧan ɣar daxeř n tewwura nnec ḥima ad sřen u ḥima ad řemden ad ggʷeden SIDI, AREBBI nwem uca ad ḥḍan marra awařen n Ccariɛa-ya 13 u ḥima iḥenjiren nsen, inni war tt issinen, ad sřen uca ad řemden ad ggʷeden SIDI, AREBBI nwem marra ussan nni i ɣa teddarem x wudem n temmurt nni ɣar ɣa teẓwam x L’Urdun maḥend ad tt tᵉṭṭfem d řwart.”
Abarreḥ x řmuɛṣiyyet i dd ɣa yasen
14 SIDI inna i Musa: “Aqa iwḍen-dd wussan nnec i di ɣa temmted. Řaɣa i Yacuwa u sbeddem ixef nwem deg Uqiḍun n Umsagar ḥima ad t umureɣ.” Musa d Yacuwa ruḥen, bedden deg Uqiḍun n Umsagar. 15 Xenni iban-dd SIDI deg Uqiḍun, deg ijj n uqellij n useynu, uca ibedd uqellij n useynu sennej i wadaf n Uqiḍun. 16 SIDI inna i Musa: “Aqa cek ad tᵉttwassmuned ak-d řejdud nnec uca xenni řgens-a ad ikkar ad issefsed ixef nnes am ɣa yuyur awarni i irebbiten n ibarraniyyen n temmurt nni ɣar ɣa yadef řgens ař řwesṭ nnes uca řgens ad dayi ismeḥ, ad yarẓ Řɛahd inu wenni kidsen ggiɣ. 17 Deg wass nni ad yareɣ weɣḍab inu x řgens uca ad ten jjeɣ, ad zzaysen ffareɣ udem inu uca ad ittwaṣarḍ řgens uca ad xas dd-asen waṭṭas n iceřwawen d řeḥṣarat, ař ɣa yini řgens deg wass nni: ‘Ma war xafi dd-usin iceřwawen-a, minzi AREBBI war kidi iǧi?’ ◼31:17 war kidi iǧi - s Tɛibranit ‘war iǧi di řwest inu’. 18 Deg wass nni ad ffareɣ udem inu marra di ssibbet n řɣar nni igga umi idweř ɣar irebbiten nneɣni. 19 Řexxu xenni, ari tizřit-a i yixef nwem uca seřmed i-tt i ayt n Israil, egg i-tt deg uqemmum nsen, ḥima tizřit-a ad tiři d acehhad di ṭṭweɛ inu ḍidd i Israil, 20 minzi Necc ad ssidfeɣ řgens-a ɣar temmurt nni x jjuǧeɣ i řejdud nsen ad asen tt wceɣ, ict n temmurt ifeyyḍen s uɣi d tamment, uca ad ccen, ad jjiwnen, ad dewřen qbubbzen. Xenni ad dewřen ɣar irebbiten nneɣni, ad xasen sexxaren uca ad ayi ssduqzen, ad arẓen Řɛahd inu. 21 Uca ad imsar umi d as dd-usin i řgens-a aṭṭas n iceřwawen d řeḥṣarat, aqa xenni izři-ya ad dd-tarr deg wudem nnes am yijj n ucehhad, minzi war tᵉttiři tᵉttwattu zeg uqemmum n tarwa nnes, minzi Necc ssneɣ axarreṣ nni iḥeṭṭa ɛad ass-a di daxeř nnes, qbeř ma ad t ssidfeɣ di temmurt nni x jjuǧeɣ ad asen tt wceɣ.” ◼31:21 tarwa - s Tɛibranit ‘zaad’.
22 Deg wass nni yura Musa tizřit-a uca isseřmed i-tt i ayt n Israil. 23 Uca Netta yumur i Yacuwa, mmis n Nun, inna: “Iři d aryaz, iři tmeḥḍed, minzi ad tessidfed ayt n Israil di temmurt nni x d asen jjuǧeɣ maḥend ad asen tt wceɣ uca Necc ad akidek iřiɣ.” ◘31:23 Yac. 1:6
24 Uca imsar umi ikemmeř Musa tira n wawařen n Ccariɛa-ya deg ijj n wedlis ittwannḍen, ař aneggar nsen, 25 aqa Musa yumur Ilawiyyen nni yarbun Ttabut n Řɛahd n SIDI, inna: 26 “Ksim adlis-a ittwanḍen n Ccariɛa uca teggem t zzat i Ttabut n Řɛahd n SIDI, AREBBI nwem, maḥend ad din yiři d acehhad ḍidd nwem, ◘31:26 2 Ij. 22:8 27 minzi necc ssneɣ aɣewweɣ nwem d tɣennant nwem. Xzar, umi necc ddareɣ ɛad akidwem ass-a, kenniw aqa tɣewwɣem x SIDI, mecḥař ɛad ktar i ɣa teggem awarni i řmewt inu! 28 Smunem-dd ɣari marra imɣaren n tqebbař nwem d imeḥḍayen nwem, xenni ad ssiwřeɣ awařen-a deg imezzuɣen nsen uca ad ggeɣ ajenna d temmurt d řechud ḍidd nsen. 29 minzi necc ssneɣ aqa awarni řmewt inu ad tfesdem ař ṭṭarf uca ad teffɣem x webrid nni x kenniw umureɣ. Deg uneggar n wussan, ad teggem řɣar di tiṭṭawin n SIDI ař ɣa t tesɛarem s řxedmet i teggim s ifassen nwem.”
30 Xenni issiweř Musa deg imezzuɣen n marra agraw n řgens n Israil s wawařen n tizřit-a ařami ten ikemmeř.
◘31:2 31:2 Řxř. 27:12; Aɛwd. 3:26
◘31:3 31:3 Řxř. 27:18
◘31:4 31:4 Řxř. 21:24,33
◘31:5 31:5 Aɛwd. 7:1, 2
◘31:6 31:6 Yac. 1:5; Ɛbr. 13:5
◘31:11 31:11 Ɛiz. 8
◼31:17 31:17 war kidi iǧi - s Tɛibranit ‘war iǧi di řwest inu’.
◼31:21 31:21 tarwa - s Tɛibranit ‘zaad’.
◘31:26 31:26 2 Ij. 22:8