1 Deg useggʷas wiss sebɛa u ɛicrin n Yarubɛam, ajeǧid n Israil, idweř Ɛazarya, mmis n Amaṣya, ajeǧid n Yahuda. ◘15:1 [2 Im. 26:1-23] — 2 Ij. 14:21; 2 Im. 26:1 2 Netta tuɣa ɣares seṭṭac n iseggʷusa umi idweř d ajeǧid. Netta iḥkem tnayen u-xemsin n iseggʷusa di Urcalim. Yemmas qqaren as Yakulya zi Urcalim. ◘15:2 2 Im. 26:1, 3; 2 Im. 27:3 3 Netta igga min iǧan nican di tiṭṭawin n SIDI, am mammec marra i tuɣa igga babas Amaṣya. 4 Mɣir war ttwakksent řegɛudi. Yiwi řgens ɛad tiɣarṣa d tewhibin n řebxur x řegɛudi. 5 Maca SIDI iwta ajeǧid ařami ihřec s řbarṣ ař ass n řmewt nnes. Netta iqqim izeddeɣ deg ict n taddart tᵉttwaɛzeř, umi Yutam, mmis n ujeǧid, tuɣa d řemqeddem n tzeddiɣt n ujeǧid u iḥekkem x řgens n temmurt.

6 Imezruyen iqqimen n Ɛazarya d marra min igga, ma man aya marra war ittwazemmem ca deg wedlis n imezruyen n ijeǧiden n Yahuda? 7 Ɛazarya igga ad yareyyeḥ jar řejdud nnes. Neḍřen t jar řejdud nnes di tendint n Dawud. Mmis Yutam idweř d ajeǧid deg wemcan nnes.

8 Deg useggʷas wiss tmenya u-třatin n Ɛazarya, ajeǧid n Yahuda, iḥkem Zakariyya, mmis n Yarubɛam, x Israil di Samarya, řqedd n setta n iyuren. 9 Netta igga min iǧan d aɛeffan di tiṭṭawin n SIDI, nican am mammec t ggin řejdud nnes. Netta war iḥeyyed x ddnub n Yarubɛam, mmis n Nabaṭ, wenni yarrin Israil ad ixḍa. 10 Callum, mmis n Yabic, igga xas ict n tmeɛmuč uca iwta i-t zzat i řgens uca inɣa i-t. Netta idweř d ajeǧid deg wemcan nnes. ◼15:10 Callum - isem wanita ixs ad yini ‘nneqmet’ niɣ ‘axřaf’.

11 Imezruyen iqqimen n Zakariyya, xzar, aqa ttwazemmemen deg wedlis n imezruyen n ijeǧiden n Israil. 12 Wa d awař i tuɣa issiweř SIDI ɣar Yahu, inna: “Iḥenjiren nnec ad qqimen x řɛarc n Israil ař jjiř wiss arebɛa!” Uca ammu i temsar. ◘15:12 2 Ij. 10:30

13 Deg useggʷas wiss tesɛa u-třatin n Ɛuzziya, ajeǧid n Yahuda, idweř Callum, mmis n Yabic, d ajeǧid. Netta iḥkem ijj n uyur ikmeř di Samarya. ◼15:13 Ɛuziya - niɣ ‘Ɛuzi-Yahu’. Isem wanita ixs ad yini ‘SIDI d jjhed inu’. 14 Manaḥim, mmis n Jadi, iffeɣ-dd ɣares zi Tirṣa uca yusa-dd ɣar Samarya, iwta Callum, mmis n Yabic, di Samarya, uca inɣa i-t. Netta idweř d ajeǧid deg wemcan nnes.

15 Imezruyen iqqimen n Callum d tmeɛmuč i igga, xzar, man aya marra ittwazemmem deg wedlis n imezruyen n ijeǧiden n Israil. 16 Xenni iɣřeb Manaḥim x Tafsaḥ, d marra imezdaɣ nni dayes, uca iwta uřa d tammurt nnes zi Tirṣa, minzi nitni tuɣa war d as arzimen tiwwura. Aqa inɣa i-ten. Marra timɣarin s ddeyset ifetteq asent aɛeddis.

17 Deg useggʷas wiss tesɛa u-třatin n Ɛazarya, ajeǧid n Yahuda, idweř Manaḥim, mmis n Jadi, d ajeǧid x Israil. Netta iḥkem ɛecra n iseggʷusa di Samarya. 18 Netta igga min iǧan d aɛeffan di tiṭṭawin n SIDI. Marra ussan n tudart nnes war iḥeyyed ca x ddnub n Yarubɛam, mmis n Nabaṭ, wenni yarrin Israil ad ixḍa. 19 Xenni yusa-dd Ful, ajeǧid n Accur, ihjem x temmurt. Iwca Manaḥim ařef talint n nnuqart i Ful, ḥima ad iqqim ad iḥkem u ḥima ad issemten tageldit deg ufus nnes. ◘15:19 1 Im. 5:26 20 Manaḥim igga Israil ad ɣares dd-yiwi nnuqart, marra ayt n bu-wagřa, ḥima ad issiweḍ nnuqart nni i ujeǧid n Accur. Zi kuř aryaz iksi xemsin ciqlu. Xas uca iɛqeb ujeǧid n Accur, war iqqim ɛad di temmurt.

21 Imezruyen iqqimen n Manaḥim d marra min igga, ma man aya marra war ittwazemmem ca deg wedlis n imezruyen n ijeǧiden n Israil? 22 Manaḥim igga ad yareyyeḥ jar řejdud nnes. Mmis Faqaḥya idweř d ajeǧid deg wemcan nnes.

23 Deg useggʷas wiss xemsin n Ɛazarya, ajeǧid n Yahuda, idweř Faqaḥya, mmis n Manaḥim, d ajeǧid x Israil. Netta iḥkem tnayen n iseggʷusa di Samarya. 24 Netta igga min iǧan d aɛeffan di tiṭṭawin n SIDI. Netta war iḥeyyed x ddnub n Yarubɛam, mmis n Nabaṭ, wenni yarrin Israil ad ixḍa. 25 Faqaḥ, mmis n Ramalyahu, aneɣraf n řɛeskar, igga xas ict n tmeɛmuč, iwwet i-t di Samarya, di lburj n taddart n ujeǧid. Arjub d Aryah wcin as afus u tuɣa akides ɛawed xemsin n yeryazen zi Jilɛad. Netta inɣa Faqaḥya u idweř d ajeǧid deg wemcan nnes.

26 Imezruyen iqqimen n Faqaḥya d marra min igga, xzar, man aya marra ittwazemmem deg wedlis n imezruyen n ijeǧiden n Israil.

27 Deg useggʷas wiss tnayen u-xemsin n Ɛazarya, idweř Faqaḥ, mmis n Ramalyahu, d ajeǧid x Israil. Netta iḥkem ɛicrin n iseggʷusa di Samarya. 28 Netta igga min iǧan d aɛeffan di tiṭṭawin n SIDI. Netta war iḥeyyed ca x ddnub n Yarubɛam, mmis n Nabaṭ nni yarrin Israil ad ixḍa. 29 Deg wussan n Faqaḥ, ajeǧid n Israil, yusa-dd Tiɣlat-Filasir, ajeǧid n Accur. Netta iḥewwes Ɛayun d Abil-Bayt-Maɛka d Yanuḥ d Qadac d Ḥaṣur d Jilɛad d Ljalil d marra tammurt n Naftali. Netta indeh i-ten ɣar lmenfa ɣar Accur. ◘15:29 Ica. 8:23 30 Huciɛa, mmis n Ila, igga ict n tmeɛmuč x Faqaḥ, mmis n Ramalyahu. Netta iwta i-t uca inɣa i-t. Netta idweř d ajeǧid deg wemcan nnes deg useggʷas wiss ɛicrin n Yutam, mmis n Ɛuzziya.

31 Imezruyen iqqimen n Faqaḥ d marra min igga, xzar, man aya marra ittwazemmem deg wedlis n imezruyen n ijeǧiden n Israil.

32 Deg useggʷas wiss tnayen n Faqaḥ, mmis n Ramalyahu, ajeǧid n Israil, idweř Yutam d ajeǧid. Tuɣa netta d mmis n Ɛuzziya, ajeǧid n Yahuda. ◘15:32 [2 Im. 27:1-9] 33 Netta tuɣa ɣares xemsa u-ɛicrin n iseggʷusa umi idweř d ajeǧid. Netta iḥkem seṭṭac n iseggʷusa di Urcalim. Yemmas qqaren as Yaruca, yeǧis n Ṣaduq. ◘15:33 2 Im. 27:1-9 34 Netta igga min iǧan nican di tiṭṭawin n SIDI, nican am mammec t igga babas Ɛuzziya. 35 Mɣir war ttwakksent řegɛudi. Řgens yiwyi-dd ɛad tiɣarṣa d tewhibin n řebxur x řegɛudi. Netta ibna Tewwart Yuɛřan di Taddart n SIDI.

36 Imezruyen iqqimen n Yutam, d marra min igga, ma man aya marra war ittwazemmem ca deg wedlis n imezruyen n ijeǧiden n Yahuda? 37 Deg wussan nni ibda SIDI ad issekk Raṣin, ajeǧid n Aram, d Faqaḥ, mmis n Ramalyahu, ɣar Yahuda. ◘15:37 2 Ij. 16:5; Ica. 7:1 38 Yutam igga ad yareyyeḥ jar řejdud nnes. Netta ittwanḍeř jar řejdud nnes di tendint n babas Dawud. Mmis Aḥaz idweř d ajeǧid deg wemcan nnes. ◼15:38 Aḥaz - isem wanita ixs ad yini ‘netta iṭṭef’.