1 Axab tuɣa ɣares sebɛin n iḥenjiren di Samarya. Yahu yura tibratin, issekk i-tent ɣar Samarya i imeqqranen n Yazraɛil, i imɣaren u i yinni yarebban iḥenjiren n Axab. Daysent inna: 2 “Mařa řexxu tabrat-a tusa-dd ɣarwem, am ɣarwem iḥenjiren n siditwem řa d ikarruten d yeysan, d ict n tendint ifaryen d řesnaḥ, 3 arzum xenni x yinni iṣebḥen d inni imeḥḍen qaɛ jar iḥenjiren n siditwem u sɣimem t x řɛarc n babas u wtem di ṭṭweɛ n taddart n siditwem.” 4 Maca nitni dewřen tteggʷeden aṭṭas, nnan: “Xzar, tnayen n ijeǧiden war zemmaren ad qqimen bedden zzates, mammec i ɣa nzemmar neccin ad neqqim nbedd?” 5 Inni iǧan x taddart u x tendint, imɣaren d yinni yarebban iḥenjiren n Axab, ssekken ijj n ureqqas ɣar Yahu, nnan: “Neccin d imsexxaren nnec, u marra min d aneɣ ɣa tinid, ad t negg. Neccin war nᵉttegg uřa d ijj d ajeǧid. Egg min tᵉttwařid nican di tiṭṭawin nnec.”

6 Xenni yura ɣarsen ict n tebrat i twařa wiss tnayen, inna: “Mařa aqa kenniw ɣar uɣezdis inu, ad tesřem ɣar min ɣa iniɣ, ksim xenni izeǧifen n iḥenjiren n siditwem, u asem-dd tiwecca ammu ɣar řweqt-a ɣari di Yazraɛil.” Iḥenjiren n ujeǧid, sebɛin n yeryazen, tuɣa zeddɣen ɣar imcennɛen n tendint, inni ten yarebban. 7 Umi ɣarsen dd-tiweḍ tebrat, imsar, belli nitni ṭṭfen iḥenjiren n ujeǧid, nɣin ten marra, sebɛin n yeryazen. Nitni ggin izeǧifen nsen di řkurbat uca ssekken tent ɣares ɣar Yazraɛil. 8 Yusa-dd umsexxar, issiweḍ areqqas, inna: “Aqa iwyen-dd izeǧifen n iḥenjiren n ujeǧid.” Netta yarra-dd: “Sarsem ten ař tiwecca di tnayen n iɛurrac ɣar wadaf n tewwart.” 9 Ɣar tiwecca, umi iffeɣ ɣar barra, imsar, aqa ibedd din, inna i marra řgens: “Kenniw d imseggaden. Xzarem, d necc i iggin ict n tmeɛmuč x sidi inu u nɣiɣ t. Maca wi inɣin marra ina? 10 Snem, aqa war iweṭṭi ɣar temmurt uřa d ijj n wawař n SIDI nni inna SIDI ḍidd i taddart n Axab, maɣar SIDI igga min tuɣa inna s uqemmum n umsexxar nnes Ilicaɛ.” ◼10:10 s uqemmum - s Tɛibranit ‘s ufus’.  ◘10:10 1 Ij. 21:19, 21, 29 11 Yahu inɣa marra wi iqqimen zi taddart n Axab di Yazraɛil uřa d marra imcennɛen nnes d imeddukkař nnes d ikehhanen nnes, ařami war ijji ad zzayes iqqim uřa d ijj n umarweř.

12 Xenni ikkar uca iṭṭef abrid ɣar Samarya. Umi t tuɣa netta deg webrid, imsar di taddart n umeřqi n imeksawen, ◼10:12 imeksawen - niɣ iničan’. 13 aqa immeřqa Yahu ak-d awmaten n Axazya, ajeǧid n Yahuda, inna: “Min teɛnam kenniw?” Nitni arrin-dd: “Neccin d awmaten n Axazya u nehwa-dd, ḥima ad nseǧem x iḥenjiren n ujeǧid d iḥenjiren n tjeǧidt.” ◘10:13 2 Im. 22:8 14 Xenni inna: “Ṭṭfem ten ddaren!” Ṭṭfen ten ddaren u nɣin ten ɣar wanu n taddart n imeksawen. Tuɣa-ten di tnayen u arebɛin n yeryazen. War ijji uřa d ijj zzaysen iddar. 15 Netta iffeɣ ssenni uca yufa Yunadab, mmis n Rikab, wenni dd-iffɣen i umsagar akides. Netta iseǧem xas, inna as: “Ma uř nnec iseggem akidi am mammec iseggem wuř inu akidek?” Yunadab yarra-dd xas: “Amenni, amenni! Ewc ayi-dd afus nnec.” Netta iwca as afus uca ijja i-t ad dd-iniy ɣares deg ukarru. 16 Netta inna: “As-dd akidi uca ad tẓared asam inu i SIDI.” Ammu i jjin t ad dd-iniy akides deg ukarru. 17 Umi yiweḍ ɣar Samarya, inɣa netta marra inni tuɣa iqqimen n Axab di Samarya, ařami t iqḍa qaɛ am mammec inna wawař n SIDI nni tuɣa inna i Ilicaɛ. ◘10:17 2 Im. 22:8

18 Yahu issmun marra řgens uca inna asen: “Axab tuɣa isexxar i Baɛal cwayt, maca Yahu ad as isexxar aṭṭas ɛad. 19 Xenni řexxu, řaɣam-dd x marra inabiyyen n Baɛal d marra imsexxaren nnes d marra ikehhanen nnes, maḥend ad ɣari dd-asen. Ḥḍam aqa ad iqqim ḥed, minzi ɣari ict n tɣarṣt d tameqqrant i Baɛal. Marra wi ɣa iɣaben, war ittɣimi iddar.” Yahu maca igga ta s tḥraymect, maḥend ad iqḍa x imsexxaren n Baɛal. 20 Xas uca inna Yahu: “Sqeddsem ijj n umuni ifarzen i Baɛal!” Uca nitni barrḥen i man aya. 21 Issekk Yahu ireqqasen di marra Israil u marra imsexxaren n Baɛal usin-dd, war iqqim uřa d ijj war dd-yusi. Nitni udfen ɣar zzawect n Baɛal ařami teccur zzawect n Baɛal zi ṭṭarf ař ṭṭarf. 22 Xenni inna i wenni iǧan x wexxam n warruḍ: “Awi-dd arruḍen i marra imsexxaren n Baɛal!” U wanita yiwi asen-dd arruḍen.

23 Yudef Yahu ak-d Yunadab, mmis n Rikab, ɣar zzawect n Baɛal u netta inna i imsexxaren n Baɛal: “Xzarem mliḥ, aqa war ɣarwem ittiři uřa d ijj zeg imsexxaren n SIDI, mɣir imsexxaren n Baɛal waha.” 24 Umi iwḍen, maḥend ad din awyen tiɣarṣa d tɣarṣa n wecmaḍ, tuɣa issbedd Yahu tmenyin n yeryazen i yixef nnes di barra, inna: “Zeg weryaz nni i ɣa yejj ad injem ijj zeg yeryazen nni ggiɣ deg ifassen nwem, ad idweř řeɛmar nnes deg wemcan n řeɛmar nni.”

25 Řami iqfeř usewjed n tɣarṣṭ n wecmaḍ, imsar belli netta inna i ireqqasem n tazřa u i řqebṭanat: “Adfem, wtem ten, war ttejjim uřa d ijj ad injem!” Nitni nɣin ten s řeqḍeɛ n ssif u řqebṭanat nḍaren ten barra. Nitni udfen ɣar uř n zzawect n Baɛal. 26 Nitni kksen imayḍuten iqeddsen zi zzawect n Baɛal uca ssarɣen ten. 27 Nitni arẓin ameyḍa iqeddsen n Baɛal. Hedmen ɛawed zzawect n Baɛal uca ggin tt d ict n tzubact ař ass-a. 28 Ammu i imḥa Yahu Baɛal zi Israil. 29 Maca Yahu war ibedd zeg weḍfar n ddnub n Yarubɛam, mmis n Nabaṭ, wenni yarrin Israil ad ixḍa: iɛejmiyyen n wureɣ nni iǧan di Bayt-Il. ◼10:29 iɛejmiyyen - niɣ ‘iyenduzen’ niɣ ‘yuggu’.  ◘10:29 1 Ij. 12:28

30 SIDI inna i Yahu: “Minzi teggid nican umi teggid min iǧan nican di tiṭṭawin inu, uca teggid ak-d taddart n Axab marra min ɣari deg wuř, ad qqimen iḥenjiren nwem x řɛarc n Israil ař jjiř wiss arebɛa.” ◘10:30 2 Ij. 15:12 31 Maca Yahu war iḥḍi ca maḥend ad yuyur ɛlaḥsab Ccariɛa n SIDI, AREBBI n Israil, s marra uř nnes. Netta war iḥeyyed x ddnub n Yarubɛam wenni yarrin Israil ad ixḍa.

32 Deg wussan nni ibda SIDI ad issemẓi Israil. Ḥazayil iwta i-ten di marra tammurt n Israil, 33 zi L’Urdun manis dd-tneqqar tfuct, marra tammurt n Jilɛad, tammurt n Ijadiyyen d Irubiniyyen d Imanassiyyen, zi Aruɛir wenni iǧan ɣar teɣzart n Arnun, uřa d Jilɛad d Bacan.

34 Imezruyen iqqimen n Yahu, d marra min igga d marra timegga nnes imeḥḍen, ma man aya marra war ittwazemmem ca deg wedlis n imezruyen n ijeǧiden n Israil? 35 Yahu igga ad yareyyeḥ jar řejdud nnes. Neḍřen t di Samarya. Mmis Yahuyaḥaz idweř d ajeǧid deg wemcan nnes. 36 Ussan i di tuɣa Yahu iḥekkem di Samarya aqa aten di tmenya u-ɛicrin n iseggʷusa.