1 Umi Ɛatalya, yemmas n Axazya, teẓra, aqa mmis immut, tegga ad teqḍa x marra tarrawt n řaǧ n ujeǧid. ◘11:1 [2 Im. 22:10-12; 23:1-21] — 2 Im. 22:10 2 Maca Yahuciba, yeǧis n ujeǧid Yahuram, učmas n Axazya, teksi Yuwac, mmis n Axazya, s tnuffra zi jar iḥenjiren n ujeǧid nni ittwanɣen uca tiwyi t ak-d temɣart i t issuṭṭuḍen deg wexxam n tassut uca tessnuffar i-t dinni zi Ɛatalya, ḥima war ittwaneqq. 3 Netta iqqim inuffar akides setta n iseggʷusa di Taddart n SIDI, umi teḥkem Ɛatalya x temmurt.

4 Deg useggʷas wiss sebɛa issekk Yahuyadaɛ uca ijja ad dd-asen imeqqranen x mya n iɛessasen n arrimet u n ireqqasen n tazřa uca issmun i-ten ɣares di Taddart n SIDI. Netta igga akidsen ijj n řɛahd, ijja i-ten ad jjaǧen di Taddart n SIDI. Xas uca isscen asen mmis n ujeǧid. ◘11:4 2 Im. 23:1 5 Netta yumur i-ten, inna: “D man aya i ɣa teggem: ict n ttuřut nwem, inni i ɣa yadfen deg wass n ssebt, ad ɛessen ɣar taddart n ujeǧid. 6 Ict n ttuřut ad tbedd ɣar tewwart n Ṣur u ict n ttuřut ɣar tewwart awarni i ireqqasen n tazřa. Ammu i ɣa tɛessem x taddart di tnubbat. 7 Tnayen n izeynat nwem, zi marra inni i ɣa iffɣen di ssebt, ad ḥḍan ɣar Taddart n SIDI, ɣar ujeǧid. 8 Kenniw ad tennḍem i ujeǧid, kuř aryaz s řesnaḥ nnes deg ufus nnes, u wenni i ɣa yarzun ad yadef jar řeṣfuf ad ittwaneɣ. Ittxeṣṣa kenniw ad teqqimen ak-d ujeǧid mařa netta iffeɣ niɣ mařa yudef.

9 Imeqqranen x mya ggin am mammec iweṣṣa ukehhan Yahuyadaɛ uca kuř ijj zzaysen yiwi akides iryazen nnes inni yudfen deg wass n ssebt, jmiɛ ak-d yinni iffɣen deg wass n ssebt uca usin-dd ɣar ukehhan Yahuyadaɛ. ◘11:9 2 Im. 23:8 10 I imeqqranen n mya iwca ukehhan lansat d tseddariyin iqesḥen n řɛeskar i tuɣa iǧan n ujeǧid Dawud, tinni tuɣa iǧan di Taddart n SIDI. 11 Ireqqasen n tazřa bedden s řesnaḥ deg ufus zeg uɣezdis afusi n wudem n Taddart ař aɣezdis azeřmaḍ n wudem n Taddart, ɣar uɛalṭar u ɣar Taddart, ammu quwwaren-dd i ujeǧid. 12 Xenni issuffeɣ-dd mmis n ujeǧid ɣar barra uca igga as ttaj n weɛzař x uzeǧif uca iwca as Cchadet. Ammu i t ggin d ajeǧid, dehnen t. Nitni wtin deg ifassen, nnan: “Tudart i ujeǧid!”

13 Umi tesřa Ɛatalya řḥess n ireqqasen n tazřa d wenni n řgens, tusa-dd nettat ɣar řgens ɣar Taddart n SIDI. 14 Teẓra, u xzar, ajeǧid ibedd ɣar upilar am mammec teǧa di lqaɛida, uca ikumandaren n řɛeskar d inni iṣuden di řebwaq bedden ɣar ujeǧid. Marra řgens n temmurt ifraḥ u isuḍ di řebwaq. Xenni tcarreg Ɛatalya arruḍ nnes, tesɣuy: “Tamenziwt, tamenziwt!” 15 Maca yumur ukehhan Yahuyadaɛ i imeqqranen x mya, inni tuɣa iǧan x řɛeskar, inna asen: “Awyem tt jar iseddiyyen n řɛeskar ɣar barra uca nɣem wi tt ɣa iḍfaren s ssif.” Maɣar akehhan tuɣa inna: “War tt ttejji ad tᵉttwaneɣ di Taddart n SIDI.” 16 Nitni ssarsen xas ifassen, uca řami truḥ x webrid n wadaf n iysan ɣar taddart n ujeǧid, nɣin tt dinni. ◼11:16 ifassen - s Tɛibranit ‘s ifassen nsen’.

17 Yahuyadaɛ igga ijj n řɛahd jar SIDI d ujeǧid d řgens, ḥima ad iřin d ijj n řgens i SIDI, uca netta igga uřa d ijj n řɛahd jar ujeǧid d řgens. ◘11:17 2 Im. 23:16 18 Xas uca yudef marra řgens n temmurt ɣar taddart n zzawect n Baɛal u hedmen tt. Iɛalṭaren nnes d řexyařat nnes arẓin ten qaɛ. U nitni nɣin Mattan, akehhan n Baɛal, zzat i iɛalṭaren. Akehhan yařeqqem imeḥḍayen x Taddart n SIDI. 19 Netta yiwi akides imeqqranen x mya d iɛessasen n arrimet d ireqqasen n tazřa d marra řgens n temmurt u nitni ssehwan ajeǧid zi Taddart n SIDI uca kkin x webrid n Tewwart n Ireqqasen n Tazřa tenni ɣar taddart n ujeǧid, u dinni iqqim x řɛarc n ijeǧiden. 20 Marra řgens n temmurt ifarḥ uca tarsa tendint. Aqa nɣin Ɛatalya s ssif ɣar taddart n ujeǧid.