1 Ḥizqiya idweř d ajeǧid umi tuɣa ɣares xemsa u-ɛicrin n iseggʷusa. Netta iḥkem tesɛa u-ɛicrin n iseggʷusa di Urcalim. Yemmas qqaren as Abiya, yeǧis n Zakariyya. 2 Netta igga min iǧan nican di tiṭṭawin n SIDI, nican am mammec t igga babas Dawud. 3 Deg useggʷas amezwaru n řeḥkamet nnes, deg uyur amezwaru, yarzem tiwwura n Taddart n SIDI uca iɛdeř i-tent. 4 Issidef ikehhanen d Ilawiyyen uca issmun i-ten x wazzay ɣar uɣezdis n ccarq. 5 Inna asen: “Sřem-dd ɣari, a Ilawiyyen. Sqeddsem ixef nwem uřa d Taddart n SIDI, AREBBI n řejdud nwem, u kksem marra min ixemjen zi Zzawect Iqeddsen. 6 Maɣar řejdud nneɣ tuɣa aten d iɣeddaren u ggin min iǧan d aɛeffan di tiṭṭawin n SIDI, AREBBI nneɣ. Nitni ḥeyyden xas, nnqeřben udmawen nsen zi Tzeddiɣt n SIDI uca arrin s weɛrur ɣar SIDI. 7 Ɛad uřa d tiwwura n wesqif n wadaf n Zzawect bellɛen tent, ssxesyen řefnarat, war ssarɣen řebxur u war ssgiɛɛden ɛad taɣarṣt n wecmaḍ i AREBBI n Israil di Zzawect Iqeddsen. 8 S uya yusa-dd uduqqez ameqqran n weɣḍab n SIDI x Yahuda d Urcalim, uca Netta yarra i-ten d ict n řqecɛet n unexřiɛ d usiggʷed d tseḍḥact am mammec tᵉttwařam kenniw s tiṭṭawin nwem. 9 Xzarem, řejdud nneɣ wḍan s ssif u iḥenjiren nneɣ, tiḥenjirin nneɣ d temɣarin nneɣ aqa aten di řeḥbes x uya. 10 Řexxu aqa-tt ɣari deg wuř inu maḥend ad ggeɣ ijj n řɛahd ak-d SIDI, AREBBI n Israil, ḥima řḥaduq n weɣḍab nnes ad xaneɣ ibeɛɛed. 11 A arrawen inu, war arexxum, minzi SIDI ifarz i kenniw, aqa ad tbeddem zzat i wudem nnes, ḥima ad as tsexxarem u ḥima kenniw ad as tiřim d imsexxaren nnes u ad as tqeddmem řebxur.”

12 Xenni kkaren Ilawiyyen: Maḥat, mmis n Ɛamasay, d Yuwil, mmis n Ɛazarya, zeg iḥenjiren n Quḥat. Zeg warrawen n Marari, Qis, mmis n Ɛabdi, d Ɛazarya, mmis n Yahlayil. Zeg warrawen n Jarcun, Yuwax, mmis n Zimma, d Ɛidan, mmis n Yuwax. 13 Zeg warrawen n Iliṣafan, Cimri d Yaɛiyil, u zeg warrawen n Asaf, Zakariyya d Mattanya. 14 Zeg warrawen n Hayman, Yaḥiyil d Cimɛi, u zeg warrawen n Yadutun, Camɛiya d Ɛuzziyil. 15 Nitni ssmunen aytmatsen uca ssqeddsen ixef nsen ɛlaḥsab řumur n ujeǧid wenni iɛemmden x wawařen n SIDI, ḥima ad ssizedgen Taddart n SIDI. 16 Udfen ikehhanen ɣar Taddart n SIDI, ḥima ad tt ssizedgen uca ssuffɣen marra řexmej i ufin di Zzawect Tameqqrant n SIDI ɣar řemraḥ n Taddart n SIDI, uca Ilawiyyen ksin t, ḥima ad t awyen ɣar barra, ɣar teɣzart n Qidrun. 17 Deg wass amezwaru n uyur amezwaru bdan ad ssqeddsen Taddart uca deg was wiss tmenya n uyur iwḍen nitni ɣar wesqif n wadaf n Zzawect n SIDI. Ammu i ssqeddsen Taddart n SIDI di tmenya n wussan. Deg wass wiss seṭṭac n uyur amezwaru tuɣa kemmřen řxedmet. 18 Nitni udfen ɣar ujeǧid Ḥizqiya, nnan: “Neccin nessizdeg marra Taddart n SIDI, aɛalṭar n wecmaḍ ak-d marra dduzanat nnes d tzewḍa s weɣrum n wescan ak-d marra dduzanat nnes. 19 Marra řeqcuɛ i inḍar ujeǧid Aḥaz zi řeɣdar nnes deg wussan n tgelda nnes, neɛdeř i-ten u nessqeddes i-ten. Aqa aten zzat i uɛalṭar n SIDI.”

20 Xenni ikkar ujeǧid Ḥizqiya zic uca issmun imeqqranen n tendint uca igeɛɛed ɣar Taddart n SIDI. 21 Nitni iwyen-dd sebɛa n ifunasen imeẓyanen, sebɛa n icarriyyen, sebɛa n izmaren d sebɛa n imuyan n iɣayḍen, maḥend ad iřin d taɣarṣt n ddenb i tgeldit, řa i Zzawect Iqeddsen uřa i Yahuda, uca netta inna i warrawen n Harun, ikehhanen, ḥima ad ten qeddmen x uɛalṭar n SIDI. 22 Ɣarṣen i ifunasen uca sseřqan ikehhanen i idammen uca ruccen ten x uɛalṭar. Nitni ɣarṣen uřa i icarriyyen uca zeǧɛen idammen x uɛalṭar. Ɣarṣen uřa i izmaren uca zeǧɛen idammen x uɛalṭar. 23 Nitni iwyen-dd imuyan i tɣarṣt n ddenb zzat i wudem n ujeǧid d wegraw n řgens, uca ssarsen xasen ifassen nsen. 24 Ikehhanen ɣarṣen asen u s idammen nsen ssizedgen aɛalṭar zi ddenb, ḥima ad ggen aṣřaḥ i marra Israil, maɣar ajeǧid tuɣa igga taɣarṣt n wecmaḍ d tɣarṣt n ddenb nni i marra Israil. 25 Netta issbedd Ilawiyyen di Taddart n SIDI s taǧunin n wuzzař d řgambriyat d lharpat, ɛlaḥsab řumur n Dawud d Jad, amwařaw n ujeǧid, d unabi Natan, minzi řumur-a tuɣa i dd-yusa zi SIDI s uqemmum n inabiyyen. 26 Ayt n Lawi bedden din ak-d dduzanat n lmusiqa n Dawud u ikehhanen ak-d řebwaq.

27 Xenni yumur Ḥizqiya ad awyen taɣarṣt n wecmaḍ x uɛalṭar. Di tsaɛɛet i di tebda tɣarṣt n wecmaḍ, ibda uřa d azehhed i SIDI s řebwaq u s dduzanat n lmusiqa n Dawud, ajeǧid n Israil. 28 Marra agraw n řgens ibendeq, am ttɣennajen u ttsuḍan di řebwaq. Man aya marra ikka ařami tᵉttwakemmeř tɣarṣt n wecmaḍ. 29 Umi ikemmeř usiweḍ n tɣarṣt n wecmaḍ, iwḍa ujeǧid x ifadden nnes d marra inni tuɣa ɣares iǧan, uca bendqen. 30 Awarni uya inna ujeǧid Ḥizqiya d řḥukkam i Ilawiyyen, ad ssɛuǧan SIDI s wawařen n Dawud u n umwařaw Asaf. Ssɛuǧan ɛad s řefraḥet, xenni uḍaren uca bendqen.

31 Ḥizqiya yarra-dd, inna: “Řexxu kenniw tᵉttwařeqqmem d ikehhanen i SIDI. Asettiw-dd uca awyem-dd tiɣarṣa d tewhibin n uqadi i Taddart n SIDI.” Xas uca yiwi-dd wegraw n řgens tiɣarṣa d tewhibin n uqadi, u marra inni i ɣar tt tuɣa di řxadar nsen, iwyen-dd tiɣarṣa n wecmaḍ. 32 Řqedd n tɣarṣa n wecmaḍ i dd-yiwi wegraw n řgens, aqa-t di sebɛin n ifunasen d mya n icarriyyen d mitayen n izmaren. Nitni marra ttwawyen-dd d taɣarṣt n wecmaḍ i SIDI. 33 Tiwhibin iqeddsen aqa atent di setta-mya n ifunasen d teřt-ařaf n wuǧi. 34 Maca aqa din drus n ikehhanen, u nitni war zemmaren ad ssarxun tiřmect n marra tiɣarṣa n wecmaḍ. S uya ɛawnen ten aytmatsen Ilawiyyen, ařami kemmřen řxedmet u ařami ikehhanen nneɣni tuɣa ssqeddsen ixef nsen, minzi Ilawiyyen tuɣa seggden deg wuř ktar zeg ikehhanen ḥima ad ssqeddsen ixef nsen. 35 Tuɣa din ɛawed aṭṭas n tɣarṣa n wecmaḍ ak-d tadunt n tewhibin n řehna d tewhibin n useyyeb i tɣarṣa n wecmaḍ. Ammu i tᵉttwaɛdeř tsexxart n Taddart n SIDI. 36 Ḥizqiya d marra řgens farḥen x min tuɣa issewjed AREBBI i řgens, maɣar tamesřact tᵉttwagg břa ma ad as ggen řeḥsab.