1 Awarni uya issekk Ḥizqiya ireqqasen ɣar marra Israil d Yahuda u yura tibratin i Ifrayim d Manassa, ḥima ad dd-asen ɣar Taddart n SIDI di Urcalim ad ggen Řɛid n Tɣarṣt n Useɛdu i SIDI, AREBBI n Israil. 2 Maɣar imcawar ujeǧid ak-d řḥukkam nnes d marra agraw n řgens di Urcalim, ḥima ad ggen Řɛid n Tɣarṣt n Useɛdu deg uyur wiss tnayen, 3 maɣar nitni war zemmaren ad t ggen di řweqt nnes ittwaggen, minzi aṭṭas n ikehhanen war ttwaqeddsen ca am dd-ittřiq, u řgens war tuɣi imun ɛad di Urcalim. 4 Tamesřact-a tuɣa-tt nican di tiṭṭawin n ujeǧid u di tiṭṭawin n marra agraw n řgens. 5 Nitni ggin, ad barrḥen di marra Israil zi Dan ař Bi’r-Sebɛa, ḥima ad dd-asen ad ggen Řɛid n Tɣarṣt n Useɛdu i SIDI, AREBBI n Israil, di Urcalim, maɣar war tt ggin aṭṭas n řweqt am mammec tuɣa tura.

6 Ireqqasen n tazřa kkin s tebratin n ujeǧid d řḥukkam nnes deg ufus x marra Israil d Yahuda, u barrḥen am mammec t yumur ujeǧid, nnan: “Kenniw, ayt n Israil, dewřem-dd ɣar SIDI, AREBBI n Ibrahim, Isḥaq d Israil, xenni Netta ad dd-idweř ɣar yinni innejmen zeg ufus n ujeǧid n Accur, ɣar yinni i ɣarwem iqqimen. 7 War ttiřim am řejdud nwem d aytmatwem, inni iɣdaren SIDI, AREBBI n řejdud nsen, ařami ten isellem Netta ɣar unexřiɛ, am mammec tᵉttwařam s yixef nwem. 8 War sseqsaḥem řexxu irawen nwem, iřim am řejdud nwem. Wcem afus i SIDI u asem-dd ɣar Zzawect nnes Iqeddsen tenni issqeddes Netta i řebda. Sexxarem i SIDI, AREBBI nwem, xenni ad xawem iḥeyyed řḥaduq n weɣḍab nnes. 9 Mařa kenniw tdewřem-dd ɣar SIDI, ad afen aytmatwem d iḥenjiren nwem arreḥmet zzat i wudem n yinni i-ten iḥebbsen ařami ɣa dd-dewřen ɣar temmurt-a. Maɣar SIDI, AREBBI nwem, d bab n uḥinni d arreḥmet u Netta war xawem issḥeyyid ca udem mařa kenniw tdewřem-dd ɣares.”

10 Ammu i uyuren ireqqasen n tazřa zi tendint ɣar tendint, kkin x temmurt n Ifrayim d Manassa ař Zabulun, maca iwdan ḥeccen xasen u kkwaren ten iwdan. 11 Maca ca n yeryazen zi Acir, Manassa d Zabulun sswaḍɛen ixef nsen uca usin-dd ɣar Urcalim. 12 Uřa di Yahuda indeh ufus n SIDI uca igga ad ḍfaren řumur n ujeǧid u n řḥukkam ɛlaḥsab awař n SIDI, s wuř d ijjen. 13 Munen waṭṭas n yewdan zi řgens di Urcalim, ḥima ad ɛeyyden Řɛid n Weɣrum břa Antun deg uyur wiss tnayen. Ammu i tuɣa din ijj n wegraw n řgens d ameqqran aṭṭas.

14 Nitni kkaren u kksen iɛalṭaren nni iǧan di Urcalim. Kksen uřa d marra iɛalṭaren n řebxur uca nḍaren ten di teɣzart n Qidrun. 15 Deg wass wiss arbeɛṭac n uyur wiss tnayen ɣarṣen nitni i Tɣarṣt n Useɛdu. Ikehhanen d Ilawiyyen iwḍen ad seḍḥan u bdan ad ssqeddsen ixef nsen uca iwyen tiɣarṣa n wecmaḍ ɣar Taddart n SIDI. 16 Nitni bedden deg wemcan nsen am mammec i teggur ɣarsen ɛlaḥsab Ccariɛa n Musa, aryaz n AREBBI. Ikehhanen zeǧɛen idammen nni ksin zeg ifassen n Ilawiyyen. 17 Minzi aṭṭas deg wegraw n řgens tuɣa war ssqeddsen ixef nsen. S uya ttwaggen Ilawiyyen x tɣarṣt n izmaren n Tɣarṣt n Useɛdu i marra inni war izdigen, ḥima ad ten ssqeddsen i SIDI. 18 Maɣar azyen ameqqran n řgens, zzaysen aṭṭas zi Ifrayim d Manassa d Issakar d Zabulun, tuɣa war ssizedgen ixef nsen. Nitni ccin Taɣarṣt n Useɛdu war iǧi am mammec tura. Maca Ḥizqiya iẓẓuǧ i nitni, inna: “SIDI icna, iři Netta ad igg aṣřaḥ i nitni, ◼30:18 ifdi - xzar Izhd. 78:35. 19 x kuř ijj wenni inwan ad yarzu s marra uř nnes x AREBBI, SIDI, AREBBI n řejdud nnes, waxxa war iǧi s usizdeg i ittřiqen i Zzawect Iqeddsen.” 20 Isřa SIDI ɣař Ḥizqiya uca issgenfa řgens.

21 Ammu i ɛeyyden ayt n Israil, inni tuɣa innyarwen di Urcalim, sebɛa n wussan n Řɛid n Weɣrum břa Antun s řefraḥet tameqqrant. Ayt n Lawi d ikehhanen ssɛuǧan SIDI ass x wass s jjehd n dduzanat n lmusiqa i uɛuǧi n SIDI. 22 Issiweř Ḥizqiya ɣar wuř n marra Ilawiyyen inni ɣar teǧa řefhamet icnan n tussna n SIDI. Ccin sebɛa n wussan zi tɣarṣa di řweqt ittwaggen n řɛid, am tuɣa iwyen tiwhibin n řehna u qadan SIDI, AREBBI n řejdud nsen. 23 Umi imcawar wegraw n řgens marra maḥend ad t ggen ict n twařa nneɣnit i sebɛa n wussan, arnin nitni ɛad sebɛa n wussan ccuren s řefraḥet, 24 maɣar Ḥizqiya, ajeǧid n Yahuda, tuɣa iwca ařef n ifunasen imeẓyanen d sebɛa-ařaf n wuǧi uca řḥukkam tuɣa wcin ařef n ifunasen imeẓyanen d ɛecra-ařaf n wuǧi. Ijj n ubarru n ikehhanen tuɣa ssqeddsen ixef nsen zzaysen.

25 Ifarḥ marra wegraw n řgens n Yahuda, uřa d ikehhanen d Ilawiyyen d marra agraw n řgens n yinni dd-yusin zi Israil, uřa d ibarraniyyen nni dd-yusin zi Israil d yinni izeddɣen di temmurt n Yahuda. 26 Tuɣa din řefraḥet d tameqqrant di Urcalim, maɣar zeg wussan n Suliman, mmis n Dawud, ajeǧid n Israil, tuɣa war imsar am uya di Urcalim. 27 Xenni bedden ikehhanen n Ilawiyyen uca barken řgens. Tmijja nsen tᵉttwaseř, maɣar taẓaǧit nsen tudef ɣar Tzeddiɣt Tamqeddest nnes deg ujenna.