1 Imsar ɣar tmeksit n Iliya s ufus n SIDI deg ict n tḥaryaḍt ɣar ujenna, aqa iffeɣ Iliya ak-d Ilicaɛ zi Jiljal. 2 Inna Iliya i Ilicaɛ: “Qqim da, maɣar SIDI issekk ayi ɣar Bayt-Il.” Maca Ilicaɛ inna:“S tidett am iddar SIDI u iddar řeɛmar nnec, necc war cek ttejjiɣ.” Ammu i hwan nitni s tnayen ɣar Bayt-Il. 3 Ffɣen-dd ayt n inabiyyen, inni tuɣa iǧan di Bayt-Il, ɣar Ilicaɛ, nnan as: “Ma tessned, aqa SIDI ass-a ad ikkes bab nnec tiwa i uzeǧif nnec?” Netta yarra-dd: “Uřa d necc aqa ssneɣ t. Sqarem!”

4 Iliya inna as: “Qqim da, Ilicaɛ, maɣar SIDI issekk ayi ɣar Ariḥa.” Maca netta inna: “S tidett am iddar SIDI u iddar řeɛmar nnec, necc war cek ttejjiɣ ca!” Ammu dd-usin nitni ɣar Ariḥa. 5 Xenni usin-dd ayt n inabiyyen nni iǧan di Ariḥa ɣar Ilicaɛ, nnan as: “Ma tessned, aqa SIDI ass-a ad ikkes bab nnec tiwa i uzeǧif nnec?” Netta yarra-dd: “Uřa d necc aqa ssneɣ t. Sqarem!”

6 Iliya maca inna as: “Qqim da, maɣar SIDI issekk ayi ɣar L’Urdun.” Maca netta inna: “S tidett am iddar SIDI u am iddar řeɛmar inu, necc war cek ttejjiɣ ca!” Uca nitni uyuren s tnayen idsen. 7 Uřa d xemsin n yeryazen zeg ayt n inabiyyen uyuren, qqimen bedden arendad nsen ɣar řaggʷaj, am bedden nitni s tnayen idsen ɣar L’Urdun. 8 Xenni iksi Iliya aseřham nnes, issunneḍ i-t uca iwta zzayes x waman nni ttwabḍan x tnayen n iɣezdisen u nitni ẓwan s tnayen idsen x řaẓaɣ. 9 Řami ẓwan nitni, imsar, aqa Iliya inna i Ilicaɛ: “Ttar ict n řḥajjet i d ac ɣa ggeɣ, qbeř mma xak i ɣa mmeksiɣ!” Ilicaɛ yarra-dd: “Iři ad xafi dd-hwant tnayen n tseqqar n buḥbeř nnec!” 10 Iliya inna: “Cek tᵉttared ict n tmesřact tewɛar. Mařa cek teẓrid ayi řami xak i ɣa mmeksiɣ, ad ac imsar ammu, maca mařa war iǧi amenni, war ittemsar ca.”

11 Uca imsar am nitni gguren u ssawařen ak-d wayawya, xzar, aqa din ict n tkarrut n tmessi ak-d iysan n tmessi tenni tebḍa i-ten ijj x wenneɣni. Ammu igeɛɛed Iliya di tḥaryaḍt ɣar ujenna. 12 Ilicaɛ iẓra uca iřaɣa xas: “A baba, a baba! Akarru n umenɣi n Israil d imnayen nnes!” Xenni netta war t itwiři ɛad uca iksi arruḍ nnes, icarreg i-t x tnayen. ◘2:12 2 Ij. 13:14 13 Xenni issmun-dd aseřham i dd-yewḍan zzayes netta uca iɛqeb, ibedd ɣar tma n L’Urdun. 14 Netta iksi aseřham n Iliya i dd-yewḍan zzayes netta, iwta zzayes x waman, inna: “Mani iǧa SIDI AREBBI n Iliya? Wah, Netta!” Uca netta iwta x waman uca mmsebḍan nitni x tnayen n iɣezdisen uca iẓwa Ilicaɛ.

15 Umi ayt n inabiyyen nni din ibedden arendad n Ariḥa, ẓrin t, nnan: “Buḥbeř n Iliya yarsa x Ilicaɛ.” Nitni usin-dd ɣares uca uḍaren zzates s uɣembub nsen ɣar temmurt. 16 Nitni nnan as: “Xzar xenni, jar imsexxaren nnec aqa din xemsin n yeryazen, ayt n umenɣi. Ejj i-ten ad uyuren, ad arzun x sidi nnec, ad taɣ SIDI iksi t uca inḍar i-t x ijj n wedrar niɣ deg ict zi teɣzurin.” Maca netta inna: “War sekkim uřa d ijj!” 17 Umi xas ɛemmden nitni ařami d as iweddar min ɣa yegg, inna: “Iwa sekkem ten din!” Nitni ssekken xemsin n yeryazen d ina arzun třata n wussan, maca nitni war t ufin. 18 Uca ɛeqben-dd nitni ɣares, minzi tuɣa iqqim di Ariḥa. Netta inna asen: “Ma war d awem nniɣ: ‘War ttriḥem ca’?”

19 Iryazen n tendint nnan i Ilicaɛ: “Xzar xenni, addud n tendint mliḥ, am mammec ittwařa sidi inu simant nnes, maca aman war iḥřin u tammurt tiwi-dd agray.” 20 Netta inna: “Awyem ayi-dd ijj n ṭṭebsi d amaynu u ggem dayes tameǧaḥt!” Uca nitni iwyen as t-i-dd. 21 Xenni iffeɣ zi tendint ɣar tařa n waman uca inḍar dayes tameǧaḥt nni, inna: “Ammu i iqqar SIDI: ‘Necc arriɣ aman-a ṣebḥen. War dd-ttiwyen řmewt niɣ d agray ɛad.’ ” 22 Aman dewřen ṣebḥen ɛawed ař ass-a ɛlaḥsab awař n Ilicaɛ i issiweř.

23 Ssenni igeɛɛed ɣar Bayt-Il. Am ittgeɛɛed abrid, ffɣen-dd iḥudriyyen zi tendint, inni t ikkʷaren, nnan as: “Aqeccar, geɛɛed! Aqeccar, geɛɛed!” 24 Netta inneqřeb-dd awarni as, ixzar daysen uca ixza i-ten deg Yisem n SIDI. Řexdenni usin-dd tnayen n ddubat zeg wezɣar u mezzqen tnayen-u-rebɛin n iḥudriyyen. ◼2:24 azɣar - niɣ ‘řɣabet’ niɣ ‘tazgant’. 25 Ssenni yuyur netta ɣar wedrar n Karmil uca ssenni iɛqeb ɣar Samarya.