1 Deg useggʷas wiss tmenṭac n Yahucafaṭ, ajeǧid n Yahuda, idweř Yuram, mmis n Axab, d ajeǧid x Israil di Samarya. Netta iḥkem tenɛac n iseggʷusa. 2 Netta igga min iǧan d aɛeffan di tiṭṭawin n SIDI, maca war t iggi ammu d taɛeffant am babas d yemmas, maɣar ikkes amayḍu iqeddsen n Baɛal wenni igga babas. ◘3:2 1 Ij. 16:32 3 Maca netta iqqim imenneɛ di ddnub n Yarubɛam, mmis n Nabaṭ, wenni yarrin Israil ad ixḍa. Netta war iḥeyyed x ddnub n Yarubɛam. 4 Micaɛ, ajeǧid n Mu’ab, tuɣa d ameksaw u tuɣa ittic i ujeǧid n Israil myat-ařef n izmaren d taḍuft n myat-ařef n icarriyyen. ◼3:4 ameksaw - niɣ ‘aniči’. 5 Řami immut Axab, imsar, aqa iɣewweɣ ujeǧid n Mu’ab x ujeǧid n Israil. ◘3:5 2 Ij. 1:1

6 Deg wass nni iffeɣ-dd ujeǧid Yuram zi Samarya uca isedd marra Israil. 7 Iṭṭef abrid uca issekk ijj n ureqqas ɣar Yahucafaṭ, ajeǧid n Yahuda, inna: “Ajeǧid n Mu’ab iɣewweɣ xafi. Ma cek ad kidi teffɣed deg umenɣi ak-d Mu’ab?” Netta inna: “Necc ad ffɣeɣ akidek. Necc ad iřiɣ am cek, řgens inu am řgens nnec d iysan inu am yiysan nnec.” ◘3:7 1 Ij. 22:4 8 Inna: “X man abrid i ɣa ngeɛɛed?” Netta inna: “X webrid n řexřa n Idum.”

9 Řexdenni yuyur ujeǧid n Israil d ujeǧid n Yahuda d ujeǧid n Idum. Nitni nnḍen ijj n webrid n sebɛa n wussan uca war tuɣi din aman i řɛeskar u i řebhayem nni ten iḍfaren. 10 Xenni inna ujeǧid n Israil: “Axeyyeb i neccin umi dd-iřaɣa SIDI třata n ijeǧiden-a, ḥima ad ten iwc deg ufus n Mu’ab!” 11 Uca Yahucafaṭ inna: “Ma war da iǧi ijj n unabi n SIDI, wenni i zi ɣa nesseqsa SIDI?” Xenni yarra-dd ijjen zeg imsexxaren n ujeǧid n Israil, inna: “Ilicaɛ, mmis n Cafat, wenni izeǧɛen aman x ifassen n Iliya, aqa-t danita!” ◘3:11 1 Ij. 22:7

12 Uca inna Yahucafaṭ: “Ɣares netta awař n SIDI.” Uca ajeǧid n Israil d Yahucafaṭ d ujeǧid n Idum hwan-dd ɣares. 13 Ilicaɛ inna i ujeǧid n Israil: “Min dinni jar ayi-dd d cek? Uyur ɣar inabiyyen n babac u ɣar inabiyyen n yemmac!” Maca ajeǧid n Israil yarra-dd xas: “Lla, maɣar SIDI iřaɣa-dd i třata-ya n ijeǧiden ɣar da, ḥima ad ten iwc deg ufus n Mu’ab.” ◘3:13 1 Ij. 18:19 14 Ilicaɛ yarra-dd xas: “S tidett am iddar SIDI n řɛeskarat nni umi beddeɣ zzat i wudem nnes, mři necc war ɣari bu uweqqar i Yahucafaṭ, ajeǧid n Yahuda, ad yiři necc war cek ḥessbeɣ u war dayek xezzareɣ! ◘3:14 1 Ij. 17:1 15 Xenni řexxu, awi ayi-dd ijj iccat x ifiřan. Řami tuɣa ittirar wenni iccaten x ifiřan, imsar aqa afus n SIDI yarsa xas. 16 Inna netta: “Ammu i iqqar SIDI: ‘Ggem di teɣzurt-a tařyiwin d teřyiwin ktar!’ 17 Maɣar ammu i iqqar SIDI: ‘Kenniw war tẓarrem asemmiḍ uřa d anẓar, maca waxxa amenni taɣzurt-a ad teccur s waman uca kenniw ad tessʷem, kenniw uřa d řebhayem nwem d zzwayeř nwem.’ 18 Maca man aya ɛad drus di tiṭṭawin n SIDI, maɣar Netta ad awem iwc uřa d Mu’ab deg ifassen nwem. 19 Kenniw ad tewtem kuř tandint ifaryen u kuř tandint icennɛen, u ad tqeḍɛem kuř tacejjart iṣebḥen u ad tbellɛem marra řɛunṣarat n waman u ad tḍeyyɛem kuř iyyar iṣebḥen n temmurt s yeẓra.”

20 Uca di tiwecca ɣar tsaɛɛet i ɣar dd-ttawyen tawhibt n řɣiǧet, imsar, aqa usin-dd waman zi Idum uca tɣebba temmurt s waman. 21 Mu’ab am ikmeř isřa belli ijeǧiden ffɣen-dd i umenɣi akidsen. Xenni řaɣan-dd x marra iryazen, ixs ad yini, zeg inni izemmaren ad sennḥen s webyas n řesnaḥ ař kuř ijj sennej i uya, uca nitni settfen ixef nsen ɣar weymir. 22 Nitni kkaren ɣar tuffut n ṣṣbeḥ, u umi dd-tenqar tfuct x waman, ẓrin ayt n Mu’ab nni x ujemmaḍin, aqa aman d izeggʷaɣen am yidammen. 23 Nitni nnan: “Ina d idammen. Ijeǧiden nɣin ixef nsen am mmenɣen jar asen s ssif uca ijj iwta wenneɣni. Iwa ayt n Mu’ab, ṭṭfem takeccaḍt!” ◼3:23 ijj - s Tɛibranit ‘aryaz’. 24 Maca umi iwḍen nitni ɣar řmargeḥ n řɛeskar n Israil, kkaren ayt n Israil uca wtin ayt n Mu’ab. Arewřen ayt n Mu’ab zzat i wudem nsen uca xenni udfen nitni ɣar temmurt, wtin Mu’ab. 25 Nitni hedmen tineddam uca kuř aryaz inḍar aẓru nnes x kuř iyyar iṣebḥen uca dřin t. Ɛawed netyen nitni marra řɛunṣarat n waman uca qeḍɛen kuř tacejjart iṣebḥen ařami ceṭṭen mɣir iẓra n řḥiḍ n Qir-Ḥarisat. Ayt bu-iǧayen nnḍen as uca ɣeḍřen tt. 26 Umi iẓra ujeǧid n Mu’ab belli amenɣi iwɛar xas aṭṭas, issmun-dd ɣares sebɛa mya n yeryazen nni izemmaren ad jebden ssif, ḥima ad icuq iseddiyyen n řɛeskar ɣar ujeǧid n Idum, maca nitni war zemmaren. 27 Xenni iksi netta mmis amenzu wenni i ɣa idewřen d ajeǧid awarni as, uca yiwyi t x řḥiḍ d taɣarṣt n wecmaḍ. Uca yusa-dd uduqqez d ameqqran n weɣḍab x Israil. Nitni ffɣen zzayes uca ɛeqben ɣar temmurt nsen.