1 Yusa-dd ɣari wawař n SIDI, inna: 2 “A mmis n bnadem, arr udem nnec ɣar idurar n Saɛir u nabb xas, 3 wah, ini as: ‘Ammu i iqqar Sidi inu, SIDI! Xzar, Necc ad ɣarek dd-aseɣ, a, idurar n Saɛir uca ad sswiẓẓḍeɣ afus inu ḍidd nnec uca ad cek arreɣ d tareddeǧt d řexřa. 4 Necc ad arreɣ tineddam nnec d řxarbet u cek ad tdewřed d tareddeǧt u cek ad tessned belli Necc d SIDI, 5 minzi ɣarek řeɛdawat ittduman u minzi tsellmed ayt n Israil i tzemmar n ssif di řweqt n uḍeyyeɛ nsen, di řweqt n lḥisab aneggar x řmuɛṣiyyet.’ ” ◘35:5 Ḥiz. 25:15

6 “S uya, s tidett am ddareɣ Necc, iqqar Sidi inu, SIDI: ‘Necc ad cek arreɣ d idammen qaɛ u idammen ad cek ḍfaren. Wah umi war tcarhed ca asizzeř n idammen, ad cek ḍfaren idammen. 7 Necc ad arreɣ idurar n Saɛir d tareddeǧt d řxarbet. Necc ad zzayes qesseɣ wi iɛeddun d wi dd-idekkwařen. 8 Necc ad ccureɣ idurar nnes s yinni ittwanɣen, tiwririn nnec d teɣzurtin nnec, wah, inni ittwanɣen s ssif ad wḍan di marra tiɣezratin nnec. 9 Necc ad cek ggeɣ d tireddeǧin i řebda u tineddam nnec ɛemmarṣ war daysent ttwifen ɛad imezdaɣ u kenniw ad tessnem belli Necc d SIDI, 10 minzi tennid: Tnayen n řegnus nni d tnayen n temmura nni ad iřint inu u neccin ad tent ṭṭfen d řwart!, am SIDI aqa-t din.’ ” ◘35:10 Izhd. 83:13

11 “S uya, s tidett am ddareɣ Necc, iqqar Sidi inu, SIDI: ‘Necc ad ac ggeɣ anect n weɣḍab nnec u anect n tusmi nnec nni tuɣa ɣarek deg wecrah nnec zzaysen, maca nitni ad ayi ssnen xmi xak ɣa ḥekmeɣ. 12 Ad tessned, belli Necc, SIDI, sřiɣ i marra aceqqaf nnec nni tessiwřed ḍidd i idurar n Israil, tennid: Aqa twareddǧen, mmewcen aneɣ d macca. 13 Ammu i xafi tqeřbem s uqemmum nwem iccur s ukebbar uca tarnim tfarrɣem awařen nwem xafi aṭṭas. Necc sřiɣ t.’ 14 Ammu i iqqar Sidi inu, SIDI: ‘Am tfarreḥ marra tammurt, Necc ad cek arreɣ d ict n temmurt ittwareddǧen. 15 Am mammec tfarḥed s tesɣart n taddart n Israil, minzi aqa tᵉttwareddeǧ, Necc ad kik ggeɣ ammu, a kenniw, idurar n Saɛir, cem marra tammurt n Idum, ad tiřid d tareddeǧt! Uca nitni ad ssnen, belli Necc d SIDI.’ ”