1 Deg useggʷas amezwaru n ujeǧid Kurac n Lfurs, ḥima ad ittwakemmeř wawař n SIDI zeg uqemmum n Irmiya, issekkar SIDI buḥbeř n Kurac ajeǧid n Lfurs maḥend ad ittwabarreḥ di marra tageldit nnes s uqemmum d tira: ◘1:1 [2 Im. 36:22, 23; Irm. 25:12; 29:10; Dan. 9:2]

2 “Ammu i iqqar Kurac, ajeǧid n Lfurs: ‘SIDI, AREBBI n ijenwan, iwca ayi marra tigeldiwin n temmurt uca netta igga xafi, ad as bniɣ ict n Taddart di Urcalim, tenni iǧan di Yahuda. 3 Man wen zzaywem zi řgens nnes, ad yiři AREBBI akides, ejj i-t ad igeɛɛed ɣar Urcalim, tenni iǧan di Yahuda, ad ibna Taddart n SIDI, AREBBI n Israil. Aqa-t d AREBBI wenni izeddɣen di Urcalim. 4 Qaɛ wenni iqqimen ɛad di ca n wemcan n marra imucan mani izeddeɣ d abarrani, ad kkaren iryazen n wemcan nnes ad as wcen afus s nnuqart d wureɣ, s wagřa d řmař, u man aya sennej i tewhibt immewcen s řxaḍar i Taddart n AREBB di Urcalim.’ ”

5 Xenni kkaren izeǧifen x ibabaten n řaǧat n Yahuda d Binyamin uřa d ikehhanen d Ilawiyyen u marra inni umi issfaq AREBBI buḥbeř, maḥend ad geɛɛden ḥima ad bnan Taddart n SIDI wenni izeddɣen di Urcalim. 6 Marra inni d asen dd-innḍen wcin asen afus s řeqcuɛ n nnuqart, s wureɣ, s wagřa, s řmař u s řeqcuɛ iɣřan, břa min immewcen s řxaḍar. 7 Ajeǧid Kurac issuffeɣ řeqcuɛ n Taddart n SIDI, tinni tuɣa iksi Nabuxadnaṣṣar zi Urcalim uca igga i-tent di taddart n arebbi nnes. ◘1:7 2 Ij. 24:13; 2 Im. 36:7 8 Kurac, ajeǧid n Lfurs, issuffeɣ i-tent ɣar barra s ufus n Mitradat, bab n txubay, wenni tent iwcin s řeḥsab i Cicbaṣṣar, řḥakem n Yahuda. ◘1:8 Ɛiz. 5:14

9 Wa tuɣa d řqedd nsen: třatin n ṭṭbaṣa n wureɣ, ařef n ṭṭbaṣa n nnuqart, tesɛa u-ɛicrin n řemwas, 10 třatin n ifenjařen n wureɣ, arebɛa-mya u-ɛecra n ifenjařen inneɣni n nnuqart d wařef n řeqcuɛ nneɣnit. 11 Marra řeqcuɛ n wureɣ d nnuqart tuɣa iwḍen xemsa-ařaf u-arebɛa-mya. Marra aya yiwyi t Cicbaṣṣar akides, jmiɛ ak-d ayt n lmenfa inni ittwanedhen zi Babil ɣar Urcalim.