1 “Mři dd-tehwid, am timessi tessareɣ tizgi u am tmessi tesstartar aman, maḥend ad ittwasscen Isem nnec i iɣrimen nnec, ḥima ad arjijen zzatek řegnus, 2 umi teggid timesřayin issaggʷaden i war tent nriji ɛemmarṣ. Mři dd-tehwid ařami arjijen idurar zzat i wudem nnec.”

3 “Zeg wecḥař uya ɛemmarṣ war t sřin, řa d amezzuɣ war t isři, uřa d tiṭṭ war t teẓri, aqa ijj n arebbi nneɣni nhřa Cek, wenni itteggen ca di ṭṭweɛ n yinni xas ittrajan. ◘64:3 Izhd. 31:19, 20; 1 Kur. 2:9 4 Wenni ifarrḥen zi tsegda uca ad zzayes yegg, ad t teřqid Cek, inni xak itteɛqiřen deg ibriden nnec. Xzar, teffugmed, minzi neccin nexḍa. Negga i-t ɛad řebda, ma xenni ad nejmen? 5 Neccin marra am umexmuj, marra řmuɛṣiyyet nneɣ am warruḍ ixeǧḍen deg idammen, neccin marra am tfart nissřaw, uca řmuɛṣiyyet nneɣ tkessi aneɣ am usemmiḍ. ◘64:5 Izhd. 90:5, 6 6 Uřa d ijj war ittřiɣi Isem nnec, uřa d ijj ittekkar ḥima ad dayek iṭṭef, maɣar Cek tessnuffared aɣembub nnec xaneɣ uca tejjid aneɣ ad nɣarq deg ufus n řmuɛṣiyyet nneɣ. 7 Maca řexxu, a SIDI, Cek d Babatneɣ, neccin d třaxt u Cek d bu-třaxt nneɣ, neccin marra d řxedmet n ifassen nnec. 8 A SIDI, war teggid ad idduqqez weɣḍab nnec ammu aṭṭas u war ttidar i řebda řmuɛṣiyyet. Aqa da, xzar, neccin marra d řgens nnec. ◘64:8 Izhd. 79:8 9 Tineddam nnec timqeddasin dewřent d řexřa, Ṣihyun tedweř d tanezruft, Urcalim d amcan ittwareddǧen. 10 Taddart nneɣ teccur s temqeddast d tissiqt, mani řejdud nneɣ ssemɣaren Cek, tᵉttwacmeḍ s tmessi u marra min xaneɣ iɛizzen, idweř d řxirbet. 11 Ma tzemmared ad tmenɛed Ixef nnec di qaɛ aya, a SIDI, ma tzemmared ad tesseɣded u ad aneɣ teḥṣared ammu aṭṭas?”