1 Issiweř SIDI ak-d Musa di řexřa n Sina, deg Uqiḍun n Umsagar, deg wass amezwaru n uyur wiss tnayen, deg useggʷas wiss tnayen awarni řami dd-ffɣen zi temmurt n Miṣra, inna:

2 “Ksim řqedd n ismawen n marra iryazen n marra tamesmunt n ayt n Israil, azeǧif azeǧif, am ttwasettfen nitni ɛlaḥsab řaǧat nsen, ɛlaḥsab tudrin n ibabaten nsen. ◘1:2 Uf. 30:12 3 Ittxeṣṣa cek d Harun ad tḥesbem kuř ijj di Israil zi ɛicrin n iseggʷusa sennej, marra inni dd-iffɣen ak-d řɛeskar, ɛlaḥsab tirbiɛin n řɛeskar nsen. 4 Ad awem iwc afus ijj n weryaz zi kuř taqbič, aryaz i iǧan d azeǧif n taddart n babas. 5 Aqa d ina d ismawen n yeryazen nni d awem ɣa iwcen afus:

I Rubin, Iliṣur mmis n Cadayur,

6 i Cimɛun, Calumiyil, mmis n Ṣuriycadday,

7 i Yahuda, Naḥcun, mmis n Ɛamminadab,

8 i Issakar, Natanayil, mmis n Ṣuɣar.

9 i Zabulun, Iliyab, mmis n Ḥilun,

10 i ayt n Yusuf:

i Ifrayim, Ilicamaɛ, mmis n Ammihud,

i Manassa, Jamliyil, mmis n Fadahṣur,

11 i Binyamin, Abidan mmis n Jidɛuni,

12 i Dan, Axiɛazar, mmis n Ɛammicadday,

13 i Acir, Fajɛiyil, mmis n Ɛukran,

14 i Jad, Iliyasaf, mmis n Daɛuyil,

15 i Naftali, Axiraɛ, mmis n Ɛinan.”

16 Ina tuɣa d inni ittwařaɣan zi tmesmunt, nitni d řḥukkam n tqebbař n ibabaten nsen, izeǧifen x řuřuf n Israil. 17 Ksin Musa d Harun iryazen nni tuɣa ittwarecmen s ismawen nsen 18 uca ssmunen tamesmunt marra deg wass amezwaru n uyur wiss tnayen uca nitni xebbaren jjdira nsen, ɛlaḥsab řaǧat nsen, ɛlaḥsab tudrin n ibabaten nsen, am ttwazemmemen ismawen n yinni ɣar iǧa ɛicrin n iseggʷusa sennej, azeǧif azeǧif.

19 Am mammec d as yumur SIDI i Musa, aqa iḥseb i-ten di řexřa n Sina.

20 Ayt n Rubin, amenzu n Israil: tarwa nsen - ttwasettfen ɛlaḥsab řaǧat nsen, ɛlaḥsab tudrin n ibabaten nsen - inni zzayes ittwaḥesben ɛlaḥsab ismawen nsen azeǧif azeǧif, kuř aryaz zi ɛicrin iseggʷusa sennej, marra wenni i ɣa iffɣen ak-d řɛeskar, 21 wah, inni ittwaḥesben ammu i teqbič n Rubin, tuɣa aten di setta u-rebɛin-ařef u-xemsa mya.

22 Ayt n Cimɛun: tarwa nsen - ttwasettfen ɛlaḥsab řaǧat nsen, ɛlaḥsab tudrin n ibabaten nsen - inni zzayes ittwaḥesben ɛlaḥsab lɛadad n ismawen nsen, azeǧif azeǧif, kuř aryaz zi ɛicrin iseggʷusa sennej, marra wenni i ɣa iffɣen ak-d řɛeskar, 23 wah, inni ittwaḥesben ammu i teqbič n Cimɛun tuɣa aten di tesɛa u-xemsin-ařef u-teřt-mya.

24 Ayt n Jad: tarwa nsen - ttwasettfen ɛlaḥsab řaǧat nsen, ɛlaḥsab tudrin n ibabaten nsen - inni zzayes ittwaḥesben ɛlaḥsab ismawen n marra iryazen zi ɛicrin iseggʷusa sennej, marra wenni i ɣa iffɣen ak-d řɛeskar, 25 wah, inni ittwaḥesben ammu i teqbič n Jad tuɣa aten di xemsa u-rebɛin-ařef u-setta-mya u-xemsin.

26 Ayt n Yahuda: tarwa nsen - ttwasettfen ɛlaḥsab řaǧat nsen, ɛlaḥsab tudrin n ibabaten nsen - inni zzayes ittwaḥesben ɛlaḥsab ismawen n marra iryazen zi ɛicrin iseggʷusa sennej, kuř ijjen i dd-itteffɣen ak-d řɛeskar, 27 wah, inni ittwaḥesben ammu i teqbič n Yahuda tuɣa aten di arebɛa u-sebɛin-ařef u-setta-mya.

28 Ayt n Issakar: tarwa nsen - ttwasettfen ɛlaḥsab řaǧat nsen, ɛlaḥsab tudrin n ibabaten nsen - inni zzayes ittwaḥesben ɛlaḥṣab ismawen n marra iryazen zi ɛicrin iseggʷusa sennej, marra wenni i ɣa iffɣen ak-d řɛeskar, 29 wah, inni ittwaḥesben ammu i teqbič n Issakar tuɣa aten di arebɛa u-xemsin-ařef u-arebɛa-mya.

30 Ayt n Zabulun: tarwa nsen - ttwasettfen ɛlaḥsab řaǧat nsen, ɛlaḥsab tudrin n ibabaten nsen - inni zzayes ittwaḥesben ɛlaḥsab ismawen n marra iryazen zi ɛicrin iseggʷusa sennej, marra wenni i ɣa iffɣen ak-d řɛeskar, 31 wah, inni ittwaḥesben ammu i teqbič n Zabulun tuɣa aten di sebɛa u-xemsin-ařef u-arebɛa-mya.

32 Ayt n Yusuf:

Ayt n Ifrayim: tarwa nsen - ttwasettfen ɛlaḥsab řaǧat nsen, ɛlaḥsab tudrin n ibabaten nsen, inni zzayes ittwaḥesben ɛlaḥsab ismawen n marra iryazen zi ɛicrin iseggʷusa sennej, marra wenni i ɣa iffɣen ak-d řɛeskar, 33 wah, inni ittwaḥesben ammu i teqbič n Ifrayim tuɣa aten di arebɛin-ařef u-xemsa-mya.

34 Ayt n Manassa: tarwa nsen - ttwasettfen ɛlaḥsab řaǧat nsen, ɛlaḥsab tudrin n ibabaten nsen, inni zzayes ittwaḥesben ɛlaḥsab ismawen n marra iryazen zi ɛicrin iseggʷusa sennej, marra wenni i ɣa iffɣen ak-d řɛeskar, 35 wah, inni ittwaḥesben ammu i teqbič n Manassa tuɣa aten di tnayen u-třatin-ařef u-mitayen.

36 Ayt n Binyamin: tarwa nsen - ttwasettfen ɛlaḥsab řaǧat nsen, ɛlaḥsab tudrin n ibabaten nsen, inni zzayes ittwaḥesben ɛlaḥsab ismawen n marra iryazen zi ɛicrin iseggʷusa sennej, marra wenni i ɣa iffɣen ak-d řɛeskar, 37 wah, inni ittwaḥesben ammu i teqbič n Binyamin tuɣa aten di xemsa u-třatin-ařef u-arebɛa-mya.

38 Ayt n Dan: tarwa nsen - ttwasettfen ɛlaḥsab řaǧat nsen, ɛlaḥsab tudrin n ibabaten nsen, inni zzayes ittwaḥesben ɛlaḥsab ismawen n marra iryazen zi ɛicrin iseggʷusa sennej, marra wenni i ɣa iffɣen ak-d řɛeskar, 39 wah, inni ittwaḥesben ammu i teqbič n Dan tuɣa ten di tnayen u-settin-ařef u-sebɛa-mya.

40 Ayt n Acir: tarwa nsen - ttwasettfen ɛlaḥsab řaǧat nsen, ɛlaḥsab tudrin n ibabaten nsen, inni zzayes ittwaḥesben ɛlaḥsab ismawen n marra iryazen zi ɛicrin iseggʷusa sennej, marra wenni i ɣa iffɣen ak-d řɛeskar, 41 wah, inni ittwaḥesben ammu i teqbič n Acir tuɣa ten di waḥit u-rebɛin-ařef u-xemsa-mya.

42 Ayt n Naftali: tarwa nsen - ttwasettfen ɛlaḥsab řaǧat nsen, ɛlaḥsab tudrin n ibabaten nsen, inni zzayes ittwaḥesben ɛlaḥsab ismawen n marra iryazen zi ɛicrin iseggʷusa sennej, marra wenni i ɣa iffɣen ak-d řɛeskar, 43 wah, inni ittwaḥesben ammu i teqbič n Naftali tuɣa aten di třata u-xemsin-ařef u-arebɛa-mya.

44 Ina d inni ittwaḥesben, inni ttwaḥesben s ufus n Musa d Harun d řḥukkam n Israil, tenɛac n yeryazen, ijjen weryaz i taddart n babas. ◼1:44 taddart n babas - ixs ad yini ‘raǧ i dd-itteffɣen zeg ict n tbabat ak-d twacunin i dayes d jjiřat nnes’. 45 Marra inni ittwaḥesben zeg ayt n Israil - am ttwasettfen nitni ɛlaḥsab taddart n ibabaten nsen - marra inni ɣar iǧa ɛicrin n iseggʷusa sennej, kuř ijj wenni dd-itteffɣen ak-d řɛeskar, 46 wah, marra inni ittwaḥesben tuɣa aten di setta-mya u-ṭeřt-ařaf u-xemsa-mya u-xemsin. ◘1:46 Uf. 38:26

47 Ilawiyyen war carcen ca jar asen di řeḥsab di ṭṭweɛ n teqbič n ibabaten nsen, 48 minzi SIDI tuɣa issiweř ak-d Musa, inna: 49 “Mɣir taqbič n Lawi war tt ttᵉḥseb ca u war tt zemmi ca azeǧif azeǧif jar ayt n Israil. 50 Maca ittxeṣṣa cek s yixef nnec, ad tegged Ilawiyyen x Tzeddiɣt n Cchadet u x marra řeqcuɛ nnes u x marra min d as dd-yusin. Nitni ad arbun Tazeddiɣt ak-d řeqcuɛ nnes marra, uca ad dayes sexxaren. Ittxeṣṣa ad wten iqiḍan nsen min dd-innḍen i Tzeddiɣt. 51 Mařa ad tᵉttwafsi Tzeddiɣt, ad tt hedmen Ilawiyyen uca mařa tiweḍ Tzeddiɣt ɣar řmargeh aneḍfar, xenni ad tt ssbedden Ilawiyyen ɛawed. Mařa dd-iqarreb ca n ubarrani, xenni netta ad ittwaneɣ. 52 Ayt n Israil ad wten iqiḍan n řmargeḥ nsen, kuř ijj ɣar tɛeǧant nnes, am ttwasettfen nitni ɛlaḥsab tirbiɛin n řɛeskar nsen. 53 Ilawiyyen ad wten iqiḍan nsen ɣar kuř jjihet n Tzeddiɣt n Cchadet, ḥima war ittiři uduqqez n weɣḍab x tmesmunt n ayt n Israil. Ittxeṣṣa i Ilawiyyen ad ḥḍan x Tzeddiɣt n Cchadet.”

54 Uca ggin ayt n Israil s marra min yumur SIDI i Musa, wah, ammu i-t ggin.