1 Issiweř SIDI ak-d Musa d Harun, inna:

2 “Ayt n Israil ad wten iqiḍan nsen kuř ijj ɣar tɛeǧant nnes, ɣar řeɛřamat n taddart n ibabaten nsen. Ad wten iqiḍan nsen cwayt ɣar řaggʷaj ɣar marra iɣezdisen n Uqiḍun n Umsagar.”

3 Inni iǧan sadu n tɛeǧant n řmargeḥ n řɛeskar n Yahuda ad wten iqiḍan nsen, am ttwasettfen nitni ɛlaḥsab tirbiɛin n řɛeskar nsen ɣar ccarq, ɣar manis dd-tneqqar tfuct. Naḥcun, mmis n Ɛamminadab, ad yiři d řḥakem n ayt n Yahuda. 4 Inni ittwaḥesben i řɛeskar nnes, tuɣa aten di arebɛa u-sebɛin-ařef u-setta-mya.

5 Zzates ad tewwet teqbič n Issakar iqiḍan nnes. Natanayil, mmis n Ṣuɣar, ad yiři d řḥakem n ayt n Issakar. 6 Inni ittwaḥesben i řɛeskar nnes, tuɣa aten di arebɛa u-xemsin-ařef u-arebɛa-mya.

7 Xenni taqbič n Zabulun. Iliyab, mmis n Hilun, ad yiři d řḥakem n ayt n Zabulun. 8 Inni ittwaḥesben i řɛeskar nnes, tuɣa aten di sebɛa u-xemsin-ařef u-arebɛa-mya.

9 Inni ittwaḥesben i řmargeḥ n řɛeskar n Yahuda tuɣa aten marra jmiɛ di mya u-setta u-tmanin-ařef u-arebɛa-mya n yeryazen, ttwasettfen ɛlaḥsab tirbiɛin n řɛeskar nsen. Nitni ad fesyen iqiḍan nsen amezwaru.

10 Ɣar ljanub ad tiři tɛeǧant n řmargeḥ n řɛeskar n Rubin. Nitni ad iřin ttwasettfen ɛlaḥsab tirbiɛin n řɛeskar nsen. Iliṣur, mmis n Cadayyur, ad yiři d řḥakem n ayt n Rubin. ◼2:10 ɣar uẓeřmaḍ - niɣ ‘ɣar ljanub’. 11 Inni ittwaḥesben i řɛeskar nnes, tuɣa aten di setta u-rebɛin-ařef u-xemsa-mya.

12 Zzates ad tewwet teqbič n Cimɛun iqiḍan nnes. Calumiyil, mmis n Ṣuriycadday, ad yiři d řḥakem n ayt n Cimɛun. 13 Inni ittwaḥesben i řɛeskar nnes, tuɣa aten di tesɛa u-xemsin-ařef u-teřt-mya.

14 Xenni taqbič n Jad. Ilyasaf, mmis n Raɛuyil, ad yiři d řḥakem n ayt n Jad. 15 Inni ittwaḥesben i řɛeskar nnes, tuɣa aten di xemsa u-rebɛin-ařef u-setta-mya u-xemsin.

16 Inni ittwaḥesben i řmargeḥ n řɛeskar n Rubin, tuɣa aten marra di mya u-waḥit u-xemsin-ařef u-arebɛa-mya u-xemsin n yeryazen, ttwasettfen ɛlaḥsab tirbiɛin n řɛeskar nsen. Nitni ad fesyen iqiḍan nsen wiss tnayen.

17 Xenni ad ittwafsi Uqiḍun n Umsagar ak-d řmargeḥ n Ilawiyyen, di řwesṭ n marra řɛeskar. Am mammec ɣa wten iqiḍan nsen, ammu ittxeṣṣa ad mmuṭṭiyen ɛawed, kuř ijj deg wemcan nnes, am ttwasettfen nitni ɛlaḥsab tiɛeǧanin nsen.

18 Ɣar řɣarb ad tiři tɛeǧant n řmargeḥ n řɛeskar n Ifrayim. Nitni ad iřin ttwasettfen ɛlaḥsab tirbiɛin n řɛeskar nsen. Ilicamaɛ, mmis n Ɛammihud, ad yiři d řḥakem n ayt n Ifrayim. 19 Inni ittwaḥesben i řɛeskar nnes, tuɣa aten di arebɛin-ařef u-xemsa-mya.

20 Zzates ad tiři teqbič n Manassa. Jamliyil, mmis n Fadahṣur ad yiři d řḥakem n ayt n Manassa. 21 Inni ittwaḥesben i řɛeskar nnes, tuɣa aten di tnayen u-třatin-ařef u-mitayn.

22 Xenni taqbič n Binyamin. Abidan, mmis n Jidɛuni, ad yiři d řeḥkam n ayt n Binyamin. 23 Inni ittwaḥesben i řɛeskar nnes, tuɣa aten di xemsa u-ṭřatin-ařef u-arebɛa-mya.

24 Inni ittwaḥesben i řmargeḥ n řɛeskar n Ifrayim, tuɣa aten di mya u-tmenya-ařef u-mya n yeryazen, ttwasettfen ɛlaḥsab tirbiɛin n řɛeskar nsen. Nitni ad fesyen iqiḍan nsen wiss třata.

25 Ɣar ccmal ad tiři tɛeǧant n řmargeḥ n řɛeskar n Dan. Nitni ad iřin ttwasettfen ɛlaḥsab tirbiɛin n řɛeskar nsen. Axiɛazar, mmis n Ɛammicadday, ad yiři d řḥakem n ayt n Dan. 26 Inni ittwaḥesben i řɛeskar nnes, tuɣa aten di tnayen u-settin-ařef u-sebɛa-mya.

27 Zzates ad tewwet teqbič n Acir iqiḍan nnes. Fajɛiyil, mmis n Ɛukran, ad yiři d řḥakem n ayt n Acir. 28 Inni ittwaḥesben i řɛeskar nnes, tuɣa aten di waḥit u-rebɛin-ařef u-xemsa-mya.

29 Xenni taqbič n Naftali. Axiraɛ, mmis n Ɛinan, ad yiři d řḥakem n ayt n Naftali. 30 Inni ittwaḥesben i řɛeskar nnes, tuɣa aten di třata u-xemsin-ařef u-arebɛa-mya.

31 Inni ittwaḥesben i řmargeḥ n řɛeskar n Dan, tuɣa aten di mya u-sebɛa u-xemsin-ařef u-setta-mya n yeryazen. Nitni ad fesyen iqiḍan nsen d aneggaru, am ttwasettfen nitni ɛlaḥsab tiɛeǧanin nsen.

32 Ina d inni ittwaḥesben n ayt n Israil, am ttwasettfen nitni ɛlaḥsab taddart n ibabaten nsen. Marra inni ittwaḥesben di řemrageḥ n řɛeskar, am ttwasettfen nitni ɛlaḥsab tirbiɛin n řɛeskar nsen, tuɣa aten di setta-mya u-teřt-ařaf u-xemsa-mya u-xemsin n yeryazen.” ◘2:32 Uf. 38:26; Řxř. 1:46

33 Ilawiyyen jar ayt n Israil war ttwaḥesben ca, nican am mammec d as yumur SIDI i Musa. ◘2:33 Řxř. 1:48, 49

34 Uca ggin ayt n Israil am mammec marra min d as yumur SIDI i Musa: am mammec wtin iqiḍan nsen s usettef ɣar tɛeǧanin nsen, ammu i ɣa fesyen iqiḍan nsen ɛawed, kuř ijjen ittwasettef ɛlaḥsab řaǧat nnes, ɣar taddart n ibabaten nnes.