1 Issiweř SIDI ak-d Musa, inna:

2 “Umur ayt n Israil ad ssuffɣen marra ayt n řbarṣ zi řmargeḥ n řɛeskar, uřa d marra inni ɣar iǧa useyyeř d marra inni ittwassxemjen zeg ict n řxecbet. ◘5:2 Lawi 13:3, 46; 15:2; 21:1 3 Ad ten tessuffɣem, am yeryazen am temɣarin. Kenniw ad ten tessuffɣem barra i řmargeḥ n řɛeskar ḥima war ssxemmajen řemrageḥ nsen mani zeddɣeɣ Necc di řwesṭ nsen.”

4 Uca ggin ayt n Israil ammu. Nitni ssuffɣen ten barra i řmargeḥ n řɛeskar. Ayt n Israil ggin am mammec i inna SIDI i Musa.

5 Issiweř SIDI ak-d Musa, inna:

6 “Siweř ak-d ayt n Israil: ‘Mařa ijj n weryaz niɣ ict n temɣart i iggin ca n ddenb n bnadem i zi iɣdar di SIDI, xenni ad yiři řeɛmar nni d bu-umarwas. ◘5:6 Lawi 5:21, 22 7 Ad neɛmen x ddenb nsen i ggin. Netta ad ixeǧeṣ amarwas nnes marra u ad as yarni ict n tesɣart texmusect uca ad iwc aya i wenni idewřen itturs as netta. ◘5:7 Lawi 5:24

8 Maca mařa war din iǧi umefdi i weryaz nni, maḥend ad as ixeǧeṣ amarwas, xenni ad yiři umarwas, i ittxeṣṣa ad ixeǧeṣ i SIDI, i ukehhan, ak-d d icarri n weṣřaḥ i zzayes t ɣa isseṣřeḥ. ◼5:8 amefdi ... ifdi - xzar Izhd. 78:35.  ◘5:8 Lawi 5:21-26 9 Kuř tawhibt nni ssgeɛɛden ayt n Israil n tewhibin iqeddsen nni dd-ittawyen ɣar ukehhan ad tiři nnes. 10 Marra tiwhibin iqeddsen n ca n weryaz ad iřint i netta, min ma i ɣa iwc ijj n weryaz i ukehhan, d man aya ad yiři i netta.’ ” ◘5:10 Lawi 10:12

11 Issiweř SIDI ak-d Musa, inna:

12 “Siweř ak-d ayt n Israil uca ini asen: ‘Mařa tamɣart n ca n weryaz teffeɣ u teɣdar i-t, 13 u ca n weryaz issen i-tt, uca man aya innufaren i tiṭṭawin n weryaz nnes u nettat tessnuffar i-t uca ammu tessexmej ixef nnes u war din wi xas ɣa icehden u nettat ɛemmarṣ war tᵉttwaṭṭef, 14 uca xenni yusa-dd xas buḥbeř n tusmi uca yusem x temɣart nnes umi nettat tᵉttwassexmej, niɣ yusa-dd xas buḥbeř n tusmi uca yusem x temɣart nnes umi nettat war tᵉttwassexmij ca, 15 xenni aryaz ad yawi tamɣart nnes ɣar ukehhan uca ad yawi tawhibt nnes i nettat, aqa-tt d taɛcart n ijj n ifa n waren n imendi. War xas ifarreɣ zzect niɣ ad xas issars jjawi, minzi aqa-tt d tawhibt n řɣiǧet di ssibbet n tusmi, ict n tewhibt n řɣiǧet i řidaret, tenni dd ɣa yawyen axarreṣ di řmuɛṣiyyet.

16 Ad tt-i-dd-issqarreb ukehhan uca ad tt issars zzat i wudem n SIDI. 17 Ad iksi ukehhan aman iqeddsen deg ict n řqecɛet n třaxt uca ad iksi ca zeg ucař i iǧan di temmurt n Tzeddiɣt, ad yegg aya deg waman. 18 Xenni ad igg ukehhan tamɣart nni zzat i wudem n SIDI, ad ifekk acuwwaf n uzeǧif n temɣart uca ad igg tawhibt n řɣiǧet i řidaret deg ifassen nnes, aqa d tawhibt n řɣiǧet n tusmi. Akehhan ad iṭṭef deg ufus nnes aman imerzagen nni dd-ittawyen nneɛřet. 19 Akehhan ad tt yejj ad tejjaǧ uca ad yini i temɣart: Mařa war kim iṭṭiṣ ḥed u war tewḍid zeg weryaz nnem di texmuji, aqa ad tiřid tᵉttwaṣfid zeg waman-a imerzagen inni dd-ittawyen nneɛřet. 20 Maca uct xam, mařa tewḍid zeg weryaz nnem uca tᵉttwassxemjed uca ijj n weryaz mɣir aryaz nnem iṭṭeṣ akim! 21 Xenni ad yejj ukehhan tamɣart ad tejjaǧ tajaǧit n nneɛřet. Ad yini ukehhan i temɣart: SIDI ad cem yarr d ijj n umedya n nneɛřet-a d tjaǧit-a di řwesṭ n řgens nnem, xmi ɣa yejj SIDI ad iwḍa umeṣṣaḍ nnem uca ad yarr aɛeddis nnem yuff, 22 uca aman-a i dd-ittawyen nneɛřet ad adfen ɣar wadan nnem maḥend ad ssuffen aɛeddis nnem uca ad ssɣeḍřen ameṣṣaḍ nnem! Uca ad tini temɣart: Amin Amin!

23 Ad yari ukehhan nnɛaři-ya x ict n tewriqt ittwannḍen uca xenni ad tent imḥa deg waman imerzagen. 24 Ad iwc aman imerzagen i dd-ittawyen nneɛřet i temɣart u nettat ad tsu ařami aman i dd-ittawyen nneɛřet ad dayes adfen daxeř uca ad dewřen d imerzagen. 25 Akehhan ad iksi tawhibt n řɣiǧet n tusmi zeg ufus n temɣart uca ad issenhezz tawhibt n řɣiǧet zzat i wudem n SIDI uca ad tt-i-dd issqarreb ɣar uɛalṭar. 26 Ad iksi ukehhan ijj n wuru zi tewhibt n řɣiǧet, aqa-tt d tawhibt n řidaret, uca ad issbexxar aya x uɛalṭar uca xenni ad iwc aman i temɣart ad tsu. 27 Mařa iwca as aman ad tsu, xenni, mařa tᵉttwassexmej uca nettat teɣdar aryaz nnes, aman i dd-ittawyen nneɛřet ad dayes dewřen d imerzagen uca aɛeddis nnes ad yuff uca ameṣṣaḍ nnes ad ittwaɣḍeř u tamɣart ad tedweř d nneɛřet di řwesṭ n řgens nnes. 28 Maca mařa war texmij ca temɣart, maca tezdeg, xenni ad tiři war xas ca, ad tiři tᵉttaru.’ ”

29 Wa d azerf zi jjihet n tusmi, xmi tewḍa ict n temɣart zeg weryaz nnes uca tᵉttwassexmej 30 niɣ xmi dd yusa buḥbeř n tusmi x weryaz uca netta yusem x temɣart nnes. Xenni ad yarra tamɣart ad tbedd zzat i wudem n SIDI u akehhan ad as ikemmeř marra azerf-a wa. 31 Aryaz ad yiři d amezdag zi ssibbet n řmuɛṣiyyet, tamɣart-a ad tarbu řmuɛṣiyyet nnes.