1 “ⵎⴰⵔⵔⴰ ⴰⵡⴰⵍ ⵏⵏⵉ ⵅ ⴽⴻⵏⵏⵉⵡ ⵡⴻⵚⵚⵉⵖ, ⴰⴷ ⵜ ⵜⴻⵃⴹⴰⵎ ⴰⴷ ⵣⵣⴰⵢⴻⵙ ⵜⴻⴳⴳⴻⵎ. ⵡⴰⵔ ⵖⴰⵔⴻⵙ ⴰⵔⴻⵏⵏⵉ ⵓ ⵡⴰⵔ ⵣⵣⴰⵢⴻⵙ ⵜⵜⴻⴽⴽⴻⵙ. ◘13:1 ⴰⵄⵡⴷ. 4:2; ⴰⵡⵍⵏ. 30:6; ⴰⵙⴰ. 22:18

2 ⵎⴰⵍⴰ ⵉⴽⴽⴰⵔ ⵉⵊⵊ ⵏ ⵓⵏⴰⴱⵉ ⵏⵉⵖ ⵉⵊⵊ ⵏ ⵓⵎⴻⵔⵊⵉ ⵏ ⵜⵉⵔⵊⴰ ⴷⵉ ⵍⵡⴻⵙⵟ ⵏⵏⴻⵛ ⵓⵛⴰ ⵉⴳⴳⴰ ⵛⴰ ⵏ ⵍⴻⵄⵍⴰⵎⴻⵜ ⵏⵉⵖ ⵙ ⵛⴰ ⵏ ⵍⵎⵓⵄⵊⵉⵣⴰ ⵖⴰⵔⴻⴽ, 3 ⵓⵛⴰ ⵍⴻⵄⵍⴰⵎⴻⵜ ⵏⵏⵉ ⵏⵉⵖ ⵍⵎⵓⵄⵊⵉⵣⴰ ⵏⵏⵉ ⵅ ⴷ ⴰⵛ ⵉⵙⵙⵉⵡⴻⵍ ⵜⴻⵎⵙⴰⵔ ⵓⵛⴰ ⵅⴻⵏⵏⵉ ⵉⵏⵏⴰ: ‘ⴻⵊⵊ ⴰⴷ ⵏⵓⵢⵓⵔ ⴰⵡⴰⵔⵏⵉ ⵉ ⵉⵔⴻⴱⴱⵉⵜⴻⵏ ⵏⵏⴻⵖⵏⵉ!’, ⵉⵏⵏⵉ ⵡⴰⵔ ⵜⴻⵙⵙⵉⵏⴻⴷ, ⵓⵛⴰ: ‘ⴻⵊⵊ ⴰⵏⴻⵖ ⴰⴷ ⴰⵙⴻⵏ ⵏⴻⵄⴱⴻⴷ!’, 4 ⵅⴻⵏⵏⵉ ⵡⴰⵔ ⵜⵜⴻⵙⵍⵉ ⵉ ⵡⴰⵡⴰⵍⴻⵏ ⵏ ⵓⵏⴰⴱⵉ ⵏⵏⵉ ⵏⵉⵖ ⵏ ⵓⵎⴻⵔⵊⵉ ⵏ ⵜⵉⵔⵊⴰ ⵏⵏⵉ, ⵎⵉⵏⵣⵉ ⵙⵉⴷⵉ, ⴰⵔⴻⴱⴱⵉ ⵏⵡⴻⵎ, ⵉⵜⵜⵇⴻⴵⴰⴱ ⴽⴻⵏⵏⵉⵡ, ⵃⵉⵎⴰ ⴰⴷ ⵉⵙⵙⴻⵏ ⵎⴰ ⵜᵉⵜⵜⴻⵅⵙⴻⵎ ⵙⵉⴷⵉ, ⴰⵔⴻⴱⴱⵉ ⵏⵡⴻⵎ ⵙ ⵎⴰⵔⵔⴰ ⵓⵍ ⵏⵡⴻⵎ ⵓ ⵙ ⵎⴰⵔⵔⴰ ⵍⴻⵄⵎⴰⵔ ⵏⵡⴻⵎ. 5 ⴰⴷ ⵜⵓⵢⵓⵔⴻⵎ ⴰⵡⴰⵔⵏⵉ ⵉ ⵙⵉⴷⵉ, ⴰⵔⴻⴱⴱⵉ ⵏⵡⴻⵎ, ⴰⴷ ⵣⵣⴰⵢⴻⵙ ⵜⴻⴳⴳⵯⴷⴻⵎ, ⴰⴷ ⵜᵉⵟⵟⴼⴻⵎ ⴷⵉ ⵜⵡⴻⵚⵚⴰ ⵏⵏⴻⵙ, ⴰⴷ ⵜⴻⵙⵍⴻⵎ ⵉ ⵜⵎⵉⵊⵊⴰ ⵏⵏⴻⵙ, ⴰⴷ ⴰⵙ ⵜⵙⴻⵅⵅⴰⵔⴻⵎ ⵓ ⴰⴷ ⴷⴰⵢⴻⵙ ⵜⵍⴻⵚⵇⴻⵎ. ◘13:5 ⴰⵄⵡⴷ. 10:20 6 ⵉⵜⵜⵅⴻⵚⵚⴰ ⴰⴷ ⵉⵜⵜⵡⴰⵏⴻⵖ ⵓⵏⴰⴱⵉ ⵏⵏⵉ ⵏⵉⵖ ⵓⵎⴻⵔⵊⵉ ⵏⵏⵉ ⵏ ⵜⵉⵔⵊⴰ, ⵎⵉⵏⵣⵉ ⵉⵙⵙⵉⵡⴻⵍ ⵅ ⵍⴰⴳⴳⵯⴰⵊⴻⵜ ⵅ ⵡⴻⴱⵔⵉⴷ ⵏ ⵙⵉⴷⵉ, ⴰⵔⴻⴱⴱⵉ ⵏⵡⴻⵎ - ⵡⴻⵏⵏⵉ ⴽⴻⵏⵏⵉⵡ ⵉⵙⵙⵓⴼⴼⵖⴻⵏ ⵣⵉ ⵜⴻⵎⵎⵓⵔⵜ ⵏ ⵎⵉⵚⵔⴰ, ⴷ ⵡⴻⵏⵏⵉ ⵛⴻⴽ ⵉⴼⴷⵉⵏ ⵣⵉ ⵜⴰⴷⴷⴰⵔⵜ ⵏ ⵜⴻⵙⵎⵓⵖⵉ - ⵎⴰⵃⴻⵏⴷ ⴰⴷ ⵛⴻⴽ ⵉⵙⵙⵓⴼⴼⴻⵖ ⵣⴻⴳ ⵡⴻⴱⵔⵉⴷ ⵏⵏⵉ ⵅ ⵢⵓⵎⵓⵔ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⴰⴷ ⴷⴰⵢⴻⵙ ⵜⵓⵢⵓⵔⴻⴷ. ⵉⵜⵜⵅⴻⵚⵚⴰ ⴰⴷ ⵜⴻⴽⴽⵙⴻⴷ ⵍⵖⴰⵔ ⵣⵉ ⵍⵡⴻⵙⵟ ⵏⵏⴻⵛ. ◼13:6 ⵉⴼⴷⵉⵏ-ⵅⵥⴰⵔ ⵉⵥⵀⴷ. 78:35.  ◘13:6 ⴰⵄⵡⴷ. 18:20; ⵉⵔⵎ. 14:15

7 ⵎⴰⵍⴰ ⵓⵎⴰⵛ, ⵎⵎⵉⵙ ⵏ ⵢⴻⵎⵎⴰⵛ, ⵏⵉⵖ ⵎⵎⵉⵛ ⵏⵉⵖ ⵢⴻⴵⵉⵛ ⵏⵉⵖ ⵜⴰⵎⵖⴰⵔⵜ ⵏ ⵡⵓⵍ ⵏⵏⴻⵛ ⵏⵉⵖ ⴰⵎⴻⴷⴷⵓⴽⴽⴻⵍ ⵏⵏⴻⵛ ⵏⵏⵉ ⵉ ⵉⴵⴰⵏ ⴰⵎ ⵍⴻⵄⵎⴰⵔ ⵏⵏⴻⵛ, ⴰⴷ ⵛⴻⴽ ⵉⵖⴰⵔ ⵙ ⵜⵏⵓⴼⴼⵔⴰ ⴰⴷ ⵢⵉⵏⵉ: ‘ⴻⵊⵊ ⴰⵏⴻⵖ ⴰⴷ ⵏⵓⵢⵓⵔ ⴰⴷ ⵏⵙⴻⵅⵅⴰⵔ ⵉ ⵉⵔⴻⴱⴱⵉⵜⴻⵏ ⵏⵏⴻⵖⵏⵉ!’ ⵉⵏⵏⵉ ⵡⴰⵔ ⵜⴻⵙⵙⵉⵏⴻⴷ ⵛⴰ ⵛⴻⴽ ⵓⵍⴰ ⴷ ⵍⴻⵊⴷⵓⴷ ⵏⵏⴻⵛ, ◘13:7 ⴰⵄⵡⴷ. 17:2 8 ⵉⵏⵏⵉ ⵉⴵⴰⵏ ⵣⴻⴳ ⵉⵔⴻⴱⴱⵉⵜⴻⵏ ⵏ ⵍⴻⴳⵏⵓⵙ ⵉ ⴷ ⴰⵛ-ⴷⴷ ⵉⵏⵏⴹⴻⵏ, ⵉⵏⵏⵉ ⵢⵓⴷⵙⴻⵏ ⵏⵉⵖ ⵉⵏⵏⵉ ⵅⴰⴽ ⵉⴳⴳⵯⴻⵊⴻⵏ ⵣⵉ ⵟⵟⴰⵔⴼ ⵏ ⵜⴻⵎⵎⵓⵔⵜ ⴰⵍ ⵟⵟⴰⵔⴼ ⵏⵏⴻⵖⵏⵉ, 9 ⵅⴻⵏⵏⵉ ⵡⴰⵔ ⵅⴰⵙ ⵜⵜⴻⴳⴳ ⵛⴰ, ⵡⴰⵔ ⵖⴰⵔⴻⵙ ⵜⵜⴻⵙⵍⵉ ⵛⴰ. ⵡⴰⵔ ⵜ ⴰⵔⴻⵃⵃⴻⵎ ⵛⴰ, ⵡⴰⵔ ⴷ ⴰⵛ ⵉⵣⵣⵉⴵⵉⵣ ⵛⴰ ⵏⵉⵖ ⴰⴷ ⵜ ⵜⴻⴼⴼⴰⵔⴻⴷ, 10 ⵎⴰⵛⴰ ⵉⵜⵜⵅⴻⵚⵚⴰ ⴰⴷ ⵜ ⵜⴻⵏⵖⴻⴷ ⵏⵉⵛⴰⵏ. ⴰⴼⵓⵙ ⵏⵏⴻⵛ ⴰⴷ ⵅⴰⵙ ⵢⵉⵍⵉ ⴷ ⴰⵎⴻⵣⵡⴰⵔⵓ, ⵎⴰⵃⴻⵏⴷ ⴰⴷ ⵜ ⵜⴻⵏⵖⴻⴷ ⵓ ⵅⴻⵏⵏⵉ ⴰⴷ ⵅⴰⵙ ⵢⵉⵍⵉ ⵓⴼⵓⵙ ⵏ ⵍⴳⴻⵏⵙ ⵎⴰⵔⵔⴰ. ◘13:10 ⴰⵄⵡⴷ. 17:7 11 ⴰⴷ ⵜ ⵜⵃⴻⵊⵊⴰⵔⴻⵎ ⵙ ⵢⴻⵥⵔⴰ ⴰⵍ ⵖⴰ ⵉⵎⵎⴻⵜ, ⵎⵉⵏⵣⵉ ⵜⵓⵖⴰ ⵢⴰⵔⴻⵣⵣⵓ ⴰⴷ ⵛⴻⴽ ⵉⵙⵙⵉⴳⴳⵯⴻⵊ ⵅ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⵡⴻⵏⵏⵉ ⵉ ⵛⴻⴽ ⴷⴷ-ⵉⵙⵙⵓⴼⴼⵖⴻⵏ ⵣⵉ ⵜⴻⵎⵎⵓⵔⵜ ⵏ ⵎⵉⵚⵔⴰ, ⵣⵉ ⵜⴰⴷⴷⴰⵔⵜ ⵏ ⵜⴻⵙⵎⵓⵖⵉ. 12 ⵎⴰⵔⵔⴰ ⵉⵙⵔⴰⵉⵍ ⴰⴷ ⵙⵍⴻⵏ ⵓⵛⴰ ⴰⴷ ⴳⴳⵯⴻⴷⴻⵏ, ⴰⵍⴰⵎⵉ ⵡⴰⵔ ⴷⴷ-ⴷⵉⴽⴽⵯⵉⵍⴻⵏ ⴰⴷ ⴳⴳⴻⵏ ⵍⵖⴰⵔ-ⴰ ⴷⵉ ⵍⵡⴻⵙⵟ ⵏⵏⴻⵛ.” ◘13:12 ⴰⵄⵡⴷ. 17:13

13 “ⵎⴰⵍⴰ ⵜⴻⵙⵍⵉⴷ ⴰⵇⴰ ⵇⵇⴰⵔⴻⵏ ⴷⴻⴳ ⵉⵛⵜⴻⵏ ⵣⵉ ⵜⵏⴻⴷⴷⴰⵎ ⵏⵏⵉ ⵉ ⴷ ⴰⵡⴻⵎ ⵖⴰ ⵉⵡⵛ ⵙⵉⴷⵉ ⵃⵉⵎⴰ ⴰⴷ ⴷⴰⵢⵙⴻⵏⵜ ⵜⵣⴻⴷⵖⴻⴷ: 14 ‘ⴰⵇⴰ ⴼⴼⵖⴻⵏ-ⴷⴷ ⵣⵉ ⵍⵡⴻⵙⵟ ⵏⵡⴻⵎ ⵢⴻⵔⵢⴰⵣⴻⵏ, ⴰⵢⵜ ⵉ ⵡⴰⵔ ⵉⵙⴻⴽⴽⵡⵉⵏ, ⵓⵛⴰ ⵙⵙⵖⴻⴽⴽⵡⴰⵏ ⵉⵎⴻⵣⴷⴰⵖ ⵏ ⵜⴻⵏⴷⵉⵏⵜ ⵏⵙⴻⵏ, ⵇⵇⴰⵔⴻⵏ: ⴻⵊⵊ ⴰⴷ ⵏⵔⴰⵃ ⴰⴷ ⵏⴻⵄⴱⴻⴷ ⵉⵔⴻⴱⴱⵉⵜⴻⵏ ⵏⵏⴻⵖⵏⵉ, ⵉⵏⵏⵉ ⵡⴰⵔ ⵜⴻⵙⵙⵉⵏⴻⵎ!’, 15 ⵅⴻⵏⵏⵉ ⴰⴷ ⵜⴰⵔⵣⵓⴷ ⵓ ⴰⴷ ⵜⴻⵙⵙⴻⵇⵙⵉⴷ ⵎⵍⵉⵃ, ⵓ ⵅⵣⴰⵔ, ⵎⴰⵍⴰ ⵜⵓⴼⵉⴷ ⵜⴰⵎⴻⵙⵍⴰⵛⵜ ⵏⵏⵉ ⵜⴱⴻⴷⴷ ⵅ ⵜⵉⴷⴻⵜⵜ, ⴰⵇⴰ ⵊⵊⵄⵉⴼⴻⵛⵜ ⵏⵏⵉ ⵜᵉⵜⵜⵡⴰⴳⴳ ⴷⵉ ⵍⵡⴻⵙⵟ ⵏⵏⴻⵛ, 16 ⵍⴻⵅⴷⴻⵏⵏⵉ ⴰⴷ ⵜⴻⴳⴳⴻⴷ ⵉⵛⵜ ⵏ ⵜⴻⵛⵜⵉ ⵉ ⵉⵎⴻⵣⴷⴰⵖ ⵏ ⵜⴻⵏⴷⵉⵏⵜ ⵙ ⵍⴻⵇⴹⴻⵄ ⵏ ⵙⵙⵉⴼ. ⴰⴷ ⵜⵜ ⵜⵃⴰⵔⵔⵎⴻⴷ ⵉ ⵓⵜⴻⵃⵃⵉ ⵙ ⵎⴰⵔⵔⴰ ⵎⵉⵏ ⴷⴰⵢⴻⵙ, ⵓⵍⴰ ⴷ ⵍⴻⴱⵀⴰⵢⴻⵎ ⵏⵏⴻⵙ, ⵙ ⵍⴻⵇⴹⴻⵄ ⵏ ⵙⵙⵉⴼ. 17 ⴰⴷ ⵜⴻⵙⵙⵎⵓⵏⴻⴷ ⵎⴰⵔⵔⴰ ⵜⴰⴽⴻⵛⵛⴰⴹⵜ ⵏⵏⴻⵙ ⵖⴰⵔ ⵍⵡⴻⵙⵟ ⵏ ⵡⴰⵣⵣⴰⵢ ⵏⵏⴻⵙ, ⴰⴷ ⵜⴻⵙⵙⴻⵛⵎⴻⴹ ⵜⴰⵏⴷⵉⵏⵜ ⵙ ⵜⵎⴻⵙⵙⵉ ⴰⴽ-ⴷ ⵎⴰⵔⵔⴰ ⵜⴰⴽⴻⵛⵛⴰⴹⵜ ⵉ ⴷⴰⵢⴻⵙ, ⵉ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⵓⵛⴰ ⴰⴷ ⵜⴻⴷⵡⴻⵍ ⵜⴻⵏⴷⵉⵏⵜ ⴷ ⵉⵛⵜ ⵏ ⵍⵅⴰⵔⴱⴻⵜ ⵉ ⵍⴻⴱⴷⴰ, ⵄⴻⵎⵎⴰⵔⵚ ⴰⴷ ⵜᵉⵜⵜⵡⴰⴱⵏⴰ ⵄⴰⵡⴻⴷ. 18 ⵡⴰⵔ ⵜⵜⴻⵊⵊⵉ ⵎⵉⵏ ⵉⵜⵜⵡⴰⵃⴰⵔⵔⵎⴻⵏ ⵉ ⵓⵜⴻⵃⵃⵉ ⴰⴷ ⵉⵇⵇⵉⵎ ⵉⵍⴻⵚⵚⴻⵇ ⵊⴰⵔ ⵉⴼⴰⵙⵙⴻⵏ ⵏⵏⴻⵛ, ⵃⵉⵎⴰ ⵙⵉⴷⵉ ⴰⴷ ⵅⴰⴽ ⵉⵙⵙⵉⴳⴳⵯⴻⵊ ⵍⵃⴰⴷⵓⵇ ⵏ ⵡⴻⵖⴹⴰⴱ ⵏⵏⴻⵙ ⵓⵛⴰ ⴰⴷ ⴰⵛ ⵉⵡⵛ ⴰⵔⵔⴻⵃⵎⴻⵜ, ⴰⴷ ⵛⴻⴽ ⵢⴰⵔⵃⴻⵎ ⴰⴷ ⵛⴻⴽ ⵢⴰⵔⵏⵉ, ⴰⵎ ⵎⴰⵎⵎⴻⵛ ⵉⵊⵊⵓⴵ ⵉ ⵍⴻⵊⴷⵓⴷ ⵏⵏⴻⵛ, 19 ⵅⵎⵉ ⵖⴰ ⵜⴻⵙⵍⴻⴷ ⵖⴰⵔ ⵜⵎⵉⵊⵊⴰ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⵃⵉⵎⴰ ⴰⴷ ⵜⴻⵃⴹⵉⴷ ⵎⴰⵔⵔⴰ ⵜⵉⵡⴻⵚⵚⴰ ⵏⵏⴻⵙ, ⵜⵉⵏⵏⵉ ⵉ ⵅ ⴷ ⴰⵛ ⵡⴻⵚⵚⵉⵖ ⴰⵙⵙ-ⴰ, ⵓ ⵃⵉⵎⴰ ⴰⴷ ⵜⴻⴳⴳⴻⴷ ⵎⵉⵏ ⵉⵙⴻⴳⴳⴷⴻⵏ ⴷⵉ ⵜⵉⵟⵟⴰⵡⵉⵏ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ.”