1 ⵓⵛⴰ ⵏⴻⵜⵜⴰ ⵉⵙⵙⵛⴻⵏ ⴰⵢⵉ ⵉⵊⵊ ⵏ ⵉⵖⵣⴰⵔ ⵉⵣⴷⵉⴳ ⵏ ⵡⴰⵎⴰⵏ ⵉⴷⴷⴰⵔⴻⵏ, ⴷ ⴰⵎⴻⵣⴷⴰⴳ, ⵉⵚⴼⴰ ⴰⵎ ⵓⴽⵔⵉⵙⵜⴰⵍ, ⵉ ⴷⴷ-ⵉⵜⵜⴻⴼⴼⵖⴻⵏ ⵣⵉ ⵍⵄⴰⵔⵛ ⵏ ⴰⵔⴻⴱⴱⵉ ⵓ ⵏ ⵢⴻⵣⵎⴰⵔ. ◘22:1 ⵃⵉⵥ. 47:1; ⵣⴰⴽ. 14:8. 2 ⴷⵉ ⵍⵡⴻⵙⵟ ⵏ ⵡⴰⵣⵣⴰⵢ ⵏⵏⴻⵙ, ⵅ ⵜⵎⴰ-ⵢⴰ ⵓ ⵅ ⵜⵎⴰ ⵏⵏⵉ ⵏ ⵉⵖⵣⴰⵔ, ⵜⵓⵖⴰ ⵜⴰⵛⴻⵊⵊⴰⵔⵜ ⵏ ⵜⵓⴷⴰⵔⵜ ⵜⴻⵏⵏⵉ ⵜⴻⵙⵙⴻⵏⴹⴰⵢ ⵍⵖⵉⴵⴻⵜ ⵜⴻⵏⵄⴰⵛ ⵏ ⵜⵡⴰⵍⴰⵡⵉⵏ. ⴷⵉ ⵎⴽⵓⵍ ⴰⵢⵓⵔ ⵜⴻⵜⵜⵉⵛ ⵍⵖⵉⴵⴻⵜ ⵏⵏⴻⵙ ⴷ ⵜⵉⴼⵔⴰⵢ ⵏⵏⴻⵙ ⵉ ⵓⵙⴳⴻⵏⴼⵓ ⵏ ⵍⴻⴳⵏⵓⵙ. ◘22:2 ⵃⵉⵥ. 47:1-12; ⴰⵙⴰ. 2:7. 3 ⵡⴰⵔ ⴷⴰⵢⴻⵙ ⵜᵉⵜⵜⵉⵍⵉ ⵄⴰⴷ ⵏⵏⴻⵄⵍⴻⵜ. ⴰⴷ ⴷⴰⵢⴻⵙ ⵢⵉⵍⵉ ⵍⵄⴰⵔⵛ ⵏ ⴰⵔⴻⴱⴱⵉ ⵓ ⵏ ⵢⴻⵣⵎⴰⵔ ⵓⵛⴰ ⵉⵎⵙⴻⵅⵅⴰⵔⴻⵏ ⵏⵏⴻⵙ ⴰⴷ ⵅⴰⵙ ⵙⴻⵅⵅⴰⵔⴻⵏ. 4 ⵏⵉⵜⵏⵉ ⴰⴷ ⵥⴰⵔⴻⵏ ⵓⴷⴻⵎ ⵏⵏⴻⵙ, ⵉⵙⴻⵎ ⵏⵏⴻⵙ ⴰⴷ ⵢⵉⵍⵉ ⵅ ⵜⴻⵏⵢⴰⵔⵉⵏ ⵏⵙⴻⵏ. ◘22:4 ⴰⵙⴰ. 3:12. 5 ⵡⴰⵔ ⴷⵉⵏ ⵜᵉⵜⵜⵉⵍⵉ ⴵⵉⵍⴻⵜ ⵓⵛⴰ ⵏⵉⵜⵏⵉ ⵡⴰⵔ ⵜⵜⴻⵃⴷⵉⵊⴻⵏ ⵄⴰⴷ ⵟⵟⵢⴰ ⵏ ⵍⴻⴼⵏⴰⵔⴰⵜ ⵏⵉⵖ ⵏ ⵜⴼⴰⵡⵉⵏ ⵏⵉⵖ ⵏ ⵜⴼⴰⵡⵜ ⵏ ⵜⴼⵓⵛⵜ, ⵎⵉⵏⵣⵉ ⵙⵉⴷⵉ ⴰⵔⴻⴱⴱⵉ ⴰⴷ ⴰⵙⴻⵏ ⵉⴳⴳ ⵜⴰⴼⴰⵡⵜ ⵓⵛⴰ ⴰⴷ ⵢⵉⵍⵉ ⴷ ⴰⵊⴻⴵⵉⴷ ⵏⵙⴻⵏ ⵉ ⵍⴻⴱⴷⴰ ⵇⴰⵄ. ◘22:5 ⵉⵛⴰ. 60:19; ⵣⴰⴽ. 14:7; ⴰⵙⴰ. 21:23.

6 ⵅⴰⵙ ⵓⵛⴰ ⵉⵏⵏⴰ ⴰⵢⵉ:

“ⴰⵡⴰⵍⴻⵏ-ⴰ ⴷⴰⵢⵙⴻⵏ ⵍⴰⵎⴰⵏ ⴷ ⵜⵉⴷⴻⵜⵜ!

ⵙⵉⴷⵉ, ⴰⵔⴻⴱⴱⵉ ⵏ ⴰⵔⵔⵓⵃ ⵏ ⵉⵏⴰⴱⵉⵢⵢⴻⵏ ⵉⵇⴻⴷⴷⵙⴻⵏ,

ⴰⵇⴰ ⵉⵙⵙⴻⴽⴽ ⵍⵎⴰⵍⴰⴽ ⵏⵏⴻⵙ,

ⵃⵉⵎⴰ ⴰⴷ ⵉⵙⵙⵛⴻⵏ ⵉ ⵉⵎⵙⴻⵅⵅⴰⵔⴻⵏ ⵏⵏⴻⵙ

ⵎⵉⵏ ⵉ ⵖⴰ ⵢⵉⵍⵉⵏ ⴷⴻⵖⵢⴰ.” ◘22:6 ⴰⵙⴰ. 1:1; 19:9; 21:5.

7 “ⵅⵣⴰⵔ ⵏⴻⵛⵛ ⴰⴷ ⴷⴷ-ⴰⵙⴻⵖ ⴷⴻⵖⵢⴰ!

ⵙⵙⴻⵄⴷ ⵏ ⵡⴻⵏⵏⵉ ⵉⵜⵜᵉⵟⵟⴼⴻⵏ

ⴷⴻⴳ ⵡⴰⵡⴰⵍⴻⵏ ⵏ ⵏⵏⵓⴱⵓⵡⴰⵜ

ⵏ ⵡⴻⴷⵍⵉⵙ-ⴰ ⵉⵜⵜⵡⴰⵏⴹⴻⵏ.” ◘22:7 ⴰⵙⴰ. 1:3.

8 ⵏⴻⵛⵛ, ⵢⵓⵃⴰⵏⵏⴰ, ⴰⵇⴰ ⵥⵔⵉⵖ ⵓ ⵙⵍⵉⵖ ⵜⵉⵎⴻⵙⵍⴰⵢⵉⵏ-ⴰ. ⵓⵛⴰ ⵍⴰⵎⵉ ⵜⴻⵏⵜ ⵥⵔⵉⵖ ⵓ ⵙⵍⵉⵖ, ⵡⴹⵉⵖ ⵖⴰⵔ ⵉⴹⴰⵔⴻⵏ ⵏ ⵍⵎⴰⵍⴰⴽ ⵡⴻⵏⵏⵉ ⴷ ⴰⵢⵉ ⵉⵙⵙⴻⵛⵏⴻⵏ ⵜⵉⵎⴻⵙⵍⴰⵢⵉⵏ-ⴰ, ⵃⵉⵎⴰ ⴰⴷ ⴰⵙ ⵄⴻⴱⴷⴻⵖ. 9 ⵎⴰⵛⴰ ⵏⴻⵜⵜⴰ ⵉⵏⵏⴰ ⴰⵢⵉ:

“ⵃⴹⴰ, ⵍⵍⴰ, ⵡⴰⵔ ⵜⵜⴻⴳⴳ ⵎⴰⵏ ⴰⵢⴰ,

ⵎⴰⵖⴰⵔ ⵏⴻⵛⵛ ⴷ ⴰⵎⵙⴻⵅⵅⴰⵔ ⴰⵎⵄⴰⵛⴰⵔ ⵏⵏⴻⵛ,

ⵓ ⵏ ⴰⵢⵜⵎⴰⵛ, ⵉⵏⴰⴱⵉⵢⵢⴻⵏ, ⵓⵍⴰ ⵏ ⵢⵉⵏⵏⵉ ⵉⵜⵜᵉⵟⵟⴼⴻⵏ

ⴷⴻⴳ ⵡⴰⵡⴰⵍⴻⵏ ⵏ ⵡⴻⴷⵍⵉⵙ-ⴰ ⵉⵜⵜⵡⴰⵏⴹⴻⵏ.

ⵄⴻⴱⴷⴻⵜ ⴰⵔⴻⴱⴱⵉ!” ◘22:9 ⵍⴻⵅ. 10:26; 14:14; ⴰⵙⴰ. 19:10.

10 ⵅⴰⵙ ⵓⵛⴰ ⵉⵏⵏⴰ ⴰⵢⵉ:

“ⵡⴰⵔ ⵜⵜⴻⴳⴳ ⴰⵛⴻⵎⵎⵉⵄ ⵅ ⵡⴰⵡⴰⵍⴻⵏ ⵉ ⵉⵜⵜⵡⴰⵏⴰⴱⴱⴻⵏ

ⴷⴻⴳ ⵡⴻⴷⵍⵉⵙ-ⴰ ⵉⵜⵜⵡⴰⵏⴹⴻⵏ,

ⵎⵉⵏⵣⵉ ⵍⵡⴻⵇⵜ ⴰⵇⴰ ⵜⵉⵡⴻⴹ-ⴷⴷ.” ◘22:10 ⴷⴰⵏ. 8:26; 12:4; ⴰⵙⴰ. 1:3.

11 “ⵡⴻⵏⵏⵉ ⵉⵜⵜⴻⴳⴳⴻⵏ ⵎⵉⵏ ⵡⴰⵔ ⵉⵙⴻⴳⴳⴷⴻⵏ,

ⴰⴷ ⵉⴳⴳ ⵎⵉⵏ ⵡⴰⵔ ⵉⵙⴻⴳⴳⴷⴻⵏ ⴽⵜⴰⵔ,

ⴰⵎⴻⵏⴳⵓⵙ ⴰⴷ ⵉⴷⵡⴻⵍ ⴷ ⴰⵎⴻⵏⴳⵓⵙ ⴽⵜⴰⵔ,

ⴰⵎⵙⴻⴳⴳⴰⴷ ⴰⴷ ⵉⴳⴳ ⵜⴰⵙⴻⴳⴷⴰ ⴽⵜⴰⵔ

ⵓⵛⴰ ⴰⵎⵇⴻⴷⴷⴰⵙ ⴰⴷ ⵉⴷⵡⴻⵍ ⴷ ⴰⵎⵇⴻⴷⴷⴰⵙ ⴽⵜⴰⵔ.”

12 “ⵅⵣⴰⵔ, ⵏⴻⵛⵛ ⴰⴷ ⴷⴷ-ⴰⵙⴻⵖ ⴷⴻⵖⵢⴰ

ⵓⵛⴰ ⵍⵎⵓⵏⴻⵜ ⵉⵏⵓ ⴰⵇⴰ-ⵜⵜ ⴰⴽⵉⴷⵉ,

ⵃⵉⵎⴰ ⴰⴷ ⵅⴻⴵⵚⴻⵖ ⴽⵓⵍ ⵉⵊⵊⴻⵏ

ⴰⵏⴻⵛⵜ ⵏ ⵍⵅⴻⴷⵎⴻⵜ ⵏⵏⴻⵙ. ◘22:12 ⵉⵥⵀⴷ. 62:13; ⵉⵔⵎ. 17:10; 32:19; ⵎⵜ. 16:27; ⵔⵓⵎ. 2:6; 14:12; 1 ⴽⵓⵔ. 3:8; 2 ⴽⵓⵔ. 5:10; ⴳⴰⵍ. 6:5; ⴰⵙⴰ. 2:23.

13 ⵏⴻⵛⵛ ⴷ ⴰⵍⵉⴼ ⵓ ⵏⴻⵛⵛ ⴷ ⵜⴰⵡ,

ⴷ ⴰⵎⴻⵣⵡⴰⵔⵓ ⴷ ⴰⵏⴻⴳⴳⴰⵔⵓ,

ⴷ ⴱⴻⴷⴷⵓ ⴷ ⴰⴽⴻⵎⵎⴻⵍ.” ◘22:13 ⵉⵛⴰ. 41:4; 44:6; 48:12; ⴰⵙⴰ. 1:8; 21:6.

14 “ⵙⵙⴻⵄⴷ ⵏⵙⴻⵏ ⵉ ⵢⵉⵏⵏⵉ ⵉⵜⵜⴻⴳⴳⴻⵏ ⵜⵉⵡⴻⵚⵚⴰ ⵏⵏⴻⵙ.

ⴰⴷ ⵖⴰⵔⵙⴻⵏ ⵜⵉⵍⵉ ⵚⵚⵓⵍⵟⴰ ⵅ ⵜⵛⴻⵊⵊⴰⵔⵜ ⵏ ⵜⵓⴷⴰⵔⵜ

ⵓⵛⴰ ⴰⴷ ⴷⴷ-ⴰⴷⴼⴻⵏ ⵖⴰⵔ ⵜⴻⵏⴷⵉⵏⵜ

ⵣⵉ ⵜⴻⵡⵡⵓⵔⴰ ⵏⵏⴻⵙ.

15 ⴱⴰⵔⵔⴰ ⵉⴵⴰⵏ ⵉⵏⵏⵉ ⵉⵜⵜⴻⴳⴳⴻⵏ ⴼⴰⵔⵇ-ⵛⵛⵖⴻⵍ

ⴷ ⵢⵉⵏⵏⵉ ⵉⵏⴻⵇⵇⴻⵏ

ⴷ ⵢⵉⵏⵏⵉ ⵉⵄⴻⴱⴱⴷⴻⵏ ⵍ’ⴰⵚⵏⴰⵎ

ⴷ ⵢⵉⵏⵏⵉ ⴷⴰⵢⵙⴻⵏ ⵍⴻⵅⵎⴻⵊ

ⴷ ⵢⵉⵏⵏⵉ ⵉⵜⵜⵙⴻⵃⵃⴰⵔⴻⵏ ⴷ ⵎⴰⵔⵔⴰ ⵉⵎⵡⴰⵍⴰⵡⴻⵏ

ⴷ ⵉⵏⵏⵉ ⵉⵜⵜⴻⴳⴳⴻⵏ ⵎⵉⵏ ⵉ ⴷⴷ-ⵉⵜⵜⴻⴼⴼⵖⴻⵏ

ⵣⴻⴳ ⵓⵅⴰⵔⵔⵉⵇ.” ◘22:15 1 ⴽⵓⵔ. 6:10; ⴰⴼⴰ. 5:5; ⴽⵓⵍ. 3:5, 6.

16 “ⵏⴻⵛⵛ, ⵢⴰⵙⵓⵄ, ⴰⵇⴰ ⵙⵙⴻⴽⴽⴻⵖ ⵍⵎⴰⵍⴰⴽ ⵉⵏⵓ

ⵎⴰⵃⴻⵏⴷ ⴰⴷ ⵅⴰⵡⴻⵎ ⵉⵛⵀⴻⴷ ⵎⴰⵏ ⴰⵢⴰ

ⵣⵣⴰⵜ ⵉ ⵜⵎⴻⵙⵎⵓⵏⵉⵏ.

ⴰⵇⴰ ⴷ ⵏⴻⵛⵛ, ⴷ ⴰⵥⵡⴰⵔ ⴷ ⵣⵣⴰⵔⵉⵄⴻⵜ ⵏ ⴷⴰⵡⵓⴷ,

ⴷ ⵡⴻⵏⵏⵉ ⴰⴽⵉⴷⴻⵙ,

ⴷ ⵉⵜⵔⵉ ⵏ ⵍⴻⴼⵊⴰⵔ ⵢⴰⵔⴻⵇⵇⴻⵏ.” ◘22:16 ⵉⵛⴰ. 11:10; ⵔⵓⵎ. 15:12; 2 ⴱⵟ. 1:19; ⴰⵙⴰ. 1:1; 5:5.

17 ⴰⵔⵔⵓⵃ ⴷ ⵜⴻⵙⵍⵉⵜ ⵇⵇⴰⵔⴻⵏ:

“ⴰⵙ-ⴷⴷ!”

ⵓⵛⴰ ⴻⵊⵊ ⵡⴻⵏⵏⵉ ⵜ ⵉⵙⵍⵉⵏ, ⴰⴷ ⵢⵉⵏⵉ:

“ⴰⵙ-ⴷⴷ!”

“ⴷ ⵡⴻⵏⵏⵉ ⵉⴼⵓⴷⴻⵏ, ⴻⵊⵊ ⵉ-ⵜ ⴰⴷ ⴷⴷ-ⵢⴰⵙ,

ⴰⴷ ⵉⵙⵓ ⴰⵎⴰⵏ ⵉⴷⴷⴰⵔⴻⵏ ⴱⴰⵟⴻⵍ.” ◘22:17 ⵉⵛⴰ. 55:1; ⵢⵃ. 7:37

18 “ⵏⴻⵛⵛ ⵛⴻⵀⵀⴷⴻⵖ ⵉ ⵎⴰⵔⵔⴰ ⵉⵏⵏⵉ ⵉⵜⵜⴻⵙⵍⴰⵏ

ⵉ ⵡⴰⵡⴰⵍⴻⵏ ⵏ ⵏⵏⵓⴱⵓⵡⴰ ⵏ ⵡⴻⴷⵍⵉⵙ-ⴰ ⵉⵜⵜⵡⴰⵏⴹⴻⵏ:

ⵎⴰⵍⴰ ⴷⵉⵏ ⵃⴻⴷ ⵡⴻⵏⵏⵉ ⵅⴰⵙⴻⵏ ⵉ ⵖⴰ ⵢⴰⵔⵏⵉⵏ,

ⴰⵔⴻⴱⴱⵉ ⴰⴷ ⵅⴰⵙ ⵢⴰⵔⵏⵉ ⵊⵊⵔⴰⵢⴻⵃ,

ⵜⵉⵏⵏⵉ ⵉⵜⵜⵡⴰⵣⴻⵎⵎⴻⵎⴻⵏ ⴷⴻⴳ ⵡⴻⴷⵍⵉⵙ-ⴰ.

19 ⵎⴰⵍⴰ ⵛⴰ ⵏ ⵉⵊⵊⴻⵏ ⵉⴽⴽⴻⵙ ⵣⴻⴳ ⵡⴰⵡⴰⵍⴻⵏ

ⵏ ⵡⴻⴷⵍⵉⵙ ⵉⵜⵜⵡⴰⵏⴹⴻⵏ ⵏ ⵏⵏⵓⴱⵓⵡⴰ-ⵢⴰ,

ⴰⴷ ⴰⵙ ⵉⴽⴽⴻⵙ ⴰⵔⴻⴱⴱⵉ ⵜⴰⵙⵖⴰⵔⵜ ⵏⵏⴻⵙ

ⵣⵉ ⵜⵛⴻⵊⵊⴰⵔⵜ ⵏ ⵜⵓⴷⴰⵔⵜ ⵓ ⵣⵉ ⵜⴻⵏⴷⵉⵏⵜ ⵉⵇⴻⴷⴷⵙⴻⵏ.” ◘22:19 ⴰⵄⵡⴷ. 4:2; 12:32; ⴰⵡⵍⵏ. 30:6; ⴰⵙⴰ. 13:8; 17:8.

20 ⵅⵎⵉ ⵏⴻⵜⵜⴰ ⵉⵛⵀⴻⴷ ⵅ ⵎⴰⵏ ⴰⵢⴰ, ⵉⵏⵏⴰ:

“ⵡⴰⵀ, ⵏⴻⵛⵛ ⴰⴷ ⴷⴷ-ⴰⵙⴻⵖ ⴷⴻⵖⵢⴰ!”

“ⴰⵙ-ⴷⴷ, ⴰ ⵙⵉⴷⵉ ⵢⴰⵙⵓⵄ!”

21 ⴰⵔⴹⴰ ⵏ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ ⴰⵇⴰ-ⵜ ⴰⴽ-ⴷ ⵎⴰⵔⵔⴰ ⵉⵎⵇⴻⴷⴷⴰⵙⴻⵏ ⵏⵏⴻⵙ. “ⴰⵎⵉⵏ!”

ⴰⵏⴻⴳⴳⴰⵔ ⵏ ⵍⵄⴰⵀⴷ ⵏ ⵊⴷⵉⴷ.

ⴰⵄⵓⴵⵉ ⵉ ⵢⵉⵙⴻⵎ ⵏ ⴰⵔⴻⴱⴱⵉ,

ⴱⴰⴱⴰⵜⵏⴻⵖ ⴷ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ

ⴷ ⴰⵔⵔⵓⵃ ⵉⵇⴻⴷⴷⵙⴻⵏ.