26
ⵜⴰⵡⵀⵉⴱⵜ ⵏ ⵉⵎⴻⵣⵡⵓⵔⴰ
1 “ⵅⵎⵉ ⵖⴰ ⵜⴰⴷⴼⴻⴷ ⵖⴰⵔ ⵜⴻⵎⵎⵓⵔⵜ ⵏⵏⵉ ⴷ ⴰⵛ ⵖⴰ ⵉⵡⵛ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⴷ ⵍⵡⴰⵔⵜ, ⵓⵛⴰ ⴰⴷ ⵜⵜ ⵜᵉⵟⵟⴼⴻⴷ ⵓⵛⴰ ⴰⴷ ⴷⴰⵢⴻⵙ ⵜⵣⴻⴷⵖⴻⴷ, 2 ⵅⴻⵏⵏⵉ ⴰⴷ ⵜⴻⴽⵙⵉⴷ ⵣⵉ ⵜⵎⴻⵣⵡⴰⵔⵓⵜ ⵏ ⴽⵓⵍ ⵍⵖⵉⴵⴻⵜ ⵉ ⵖⴰ ⵜⴻⵙⵙⵎⵓⵏⴻⴷ ⵣⵉ ⵜⴻⵎⵎⵓⵔⵜ ⵏⵏⵉ ⴷ ⴰⵛ ⵖⴰ ⵉⵡⵛ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⴰⴷ ⵜ ⵜⴻⴳⴳⴻⴷ ⴷⵉ ⵜⵙⵓⴵⴻⵜ ⵓⵛⴰ ⴰⴷ ⵜⵔⴰⵃⴻⴷ ⵖⴰⵔ ⵡⴻⵎⵛⴰⵏ ⵉ ⵖⴰ ⵢⵉⵅⴹⴰⵔ ⵙⵉⴷⵉ ⵎⴰⵃⴻⵏⴷ ⴰⴷ ⴷⵉⵏ ⵉⵙⵙⴻⵣⴷⴻⵖ ⵉⵙⴻⵎ ⵏⵏⴻⵙ. ◘26:2 ⵓⴼ. 23:19; 34:26; ⵍⴰⵡⵉ 2:14; 23:10; ⵍⵅⵍ. 15:17 3 ⵓⵛⴰ ⴰⴷ ⴷⴷ-ⵜⴰⵙⴻⴷ ⵖⴰⵔ ⵓⴽⴻⵀⵀⴰⵏ, ⵡⴻⵏⵏⵉ ⴷⵉⵏ ⵖⴰ ⵢⵉⵍⵉⵏ ⴷⴻⴳ ⵡⵓⵙⵙⴰⵏ ⵏⵏⵉ, ⴰⴷ ⴰⵙ ⵜⵉⵏⵉⴷ: ‘ⴰⵇⴰ ⴰⵙⵙ-ⴰ ⴰⴷ ⴱⴰⵔⵔⵃⴻⵖ ⵉ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⴱⴻⵍⵍⵉ ⴰⵇⴰ ⵓⴷⴼⴻⵖ ⵖⴰⵔ ⵜⴻⵎⵎⵓⵔⵜ ⵏⵏⵉ ⵅ ⵉⵊⵊⵓⴵ ⵙⵉⴷⵉ ⵉ ⵍⴻⵊⴷⵓⴷ ⵏⵏⴻⵖ ⵃⵉⵎⴰ ⴰⴷ ⴰⵏⴻⵖ ⵜⵜ ⵉⵡⵛ.’ 4 ⵓⵛⴰ ⴰⴷ ⵉⴽⵙⵉ ⵓⴽⴻⵀⵀⴰⵏ ⵜⴰⵙⵓⴵⴻⵜ ⵣⴻⴳ ⵓⴼⵓⵙ ⵏⵏⴻⵛ, ⴰⴷ ⵜⵜ ⵉⵙⵙⴰⵔⵙ ⵣⵣⴰⵜ ⵉ ⵓⵄⴰⵍⵟⴰⵔ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ. 5 ⴰⴷ ⵜⴱⴰⵔⵔⵃⴻⴷ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⴰⴷ ⵜⵉⵏⵉⴷ: ‘ⴰⵔⴰⵎⵉⵢⵓ ⵏⵏⵉ ⵜⵓⵖⴰ ⵉⴵⴰⵏ ⵄⵍⴰⵃⴰⵍ ⴰⴷ ⵉⴼⵏⴰ ⴰⵇⴰ ⵜⵓⵖⴰ-ⵜ ⴷ ⴱⴰⴱⴰ. ⵏⴻⵜⵜⴰ ⵉⵀⵡⴰ ⵖⴰⵔ ⵎⵉⵚⵔⴰ ⵓⵛⴰ ⵉⵣⴷⴻⵖ ⴷⵉⵏ ⴰⵎ ⵓⴱⴰⵔⵔⴰⵏⵉ ⴰⴽ-ⴷ ⵉⵊⵊ ⵏ ⵡⵓⵔⵓ ⵏ ⵢⴻⵔⵢⴰⵣⴻⵏ ⵡⴰⵀⴰ ⵓⵛⴰ ⵉⵢⵎⴰ, ⵉⴷⵡⴻⵍ ⴷ ⵉⵊⵊ ⵏ ⵍⴳⴻⵏⵙ ⵉⵎⵖⴰⵔ, ⵉⵊⵀⴻⴷ ⵓ ⴷⴻⴳ ⵡⴰⵟⵟⴰⵙ. ◘26:5 ⴰⵎⵥ. 46:1 6 ⵉⵎⵉⵚⵔⵉⵢⵢⴻⵏ ⴹⴻⵍⵎⴻⵏ ⵓ ⵃⵚⴰⵔⴻⵏ ⴰⵏⴻⵖ ⵓ ⴳⴳⵉⵏ ⵅⴰⵏⴻⵖ ⵜⴰⵙⵎⵓⵖⵉ ⵜⴻⵇⵙⴻⵃ. 7 ⵓⵛⴰ ⵏⴻⵙⵖⵓⵢ ⵖⴰⵔ ⵙⵉⴷⵉ, ⴰⵔⴻⴱⴱⵉ ⵏ ⵍⴻⵊⴷⵓⴷ ⵏⵏⴻⵖ, ⵓⵛⴰ ⵉⵙⵍⴰ ⵙⵉⴷⵉ ⵉ ⵜⵎⵉⵊⵊⴰ ⵏⵏⴻⵖ ⵓ ⵉⵥⵔⴰ ⴰⵔⵥⵉⵢⵢⴻⵜ ⵏⵏⴻⵖ ⴷ ⵍⴻⵖⴱⴻⵏ ⵏⵏⴻⵖ ⴷ ⵍⵎⴻⵃⵏⴻⵜ ⵏⵏⴻⵖ. 8 ⵉⵙⵙⵓⴼⴼⴻⵖ ⴰⵏⴻⵖ-ⴷⴷ ⵙⵉⴷⵉ ⵣⵉ ⵎⵉⵚⵔⴰ ⵙ ⵓⴼⵓⵙ ⵉⵊⴻⵀⴷⴻⵏ, ⵙ ⵓⵖⵉⵍ ⵉⵙⵙⵡⵉⵥⵥⴹⴻⵏ, ⵙ ⵜⵉⵎⴻⴳⴳⴰ ⵉⵎⵖⴰⵔⴻⵏ ⵉⵙⵙⵉⴳⴳⵯⵉⴷⴻⵏ, ⵙ ⵍⴻⵄⵍⴰⵎⴰⵜ ⵓ ⵙ ⵍⵎⵓⵄⵊⵉⵣⴰⵜ, 9 ⵓⵛⴰ ⵉⵙⵙⵉⴷⴻⴼ ⴰⵏⴻⵖ ⵖⴰⵔ ⵡⴻⵎⵛⴰⵏ-ⴰ ⵓⵛⴰ ⵉⵡⵛⴰ ⴰⵏⴻⵖ ⵜⴰⵎⵎⵓⵔⵜ-ⴰ, ⵜⴰⵎⵎⵓⵔⵜ ⵉⴼⴻⵢⵢⴹⴻⵏ ⵙ ⵓⵖⵉ ⴷ ⵜⴰⵎⵎⴻⵏⵜ. 10 ⵓⵛⴰ ⵍⴻⵅⵅⵓ, ⵅⵣⴰⵔ, ⵉⵡⵢⴻⵖ-ⴷⴷ ⵜⴰⵎⴻⵣⵡⴰⵔⵓⵜ ⵏ ⵍⵖⵉⴵⴻⵜ ⵏ ⵜⴻⵎⵎⵓⵔⵜ ⵏⵏⵉ ⴷ ⴰⵢⵉ ⵜⴻⵡⵛⵉⴷ, ⴰ ⵙⵉⴷⵉ!’ ⵅⴻⵏⵏⵉ ⴰⴷ ⵜ ⵜⴻⴳⴳⴻⴷ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⴰⴷ ⵜⴱⴻⵏⴷⵇⴻⴷ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ. 11 ⴰⴷ ⵜⴼⴰⵔⵔⵃⴻⴷ ⵣⵉ ⵎⴰⵔⵔⴰ ⵍⵅⴰⵍ ⵉ ⵖⴰ ⵉⵡⵛ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⵉ ⵛⴻⴽ ⵓ ⵉ ⴰⵢⵜⴱⴰⴱ ⵏ ⵜⴰⴷⴷⴰⵔⵜ ⵏⵏⴻⵛ: ⵛⴻⴽ ⴷ ⵓⵍⴰⵡⵉ ⴷ ⵓⴱⴰⵔⵔⴰⵏⵉ ⵉ ⵉⴵⴰⵏ ⴷⵉ ⵍⵡⴻⵙⵟ ⵏⵏⴻⵛ.”
ⵍⴻⵄⵛⵓⵔ
12 “ⵅⵎⵉ ⵖⴰ ⵜⴽⴻⵎⵎⵍⴻⴷ ⵣⴻⴳ ⵓⵄⴻⵛⵛⴰⵔ ⵏ ⵎⴰⵔⵔⴰ ⵍⴻⵄⵛⵓⵔ ⵏ ⵍⵖⵉⴵⴻⵜ ⵏⵏⴻⵛ ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵜⵍⴰⵜⴰ, ⵡⴻⵏⵏⵉ ⴷ ⴰⵙⴻⴳⴳⵯⴰⵙ ⵏ ⵍⴻⵄⵛⵓⵔ, ⵅⴻⵏⵏⵉ ⴰⴷ ⵜⴻⵏ ⵜⴻⵡⵛⴻⴷ ⵉ ⵓⵍⴰⵡⵉ, ⵉ ⵓⴱⴰⵔⵔⴰⵏⵉ, ⵉ ⵓⵢⵓⵊⵉⵍ, ⵉ ⵜⴰⵊⵊⴰⵍⵜ, ⵃⵉⵎⴰ ⴰⴷ ⵛⵛⴻⵏ ⴷⴰⵅⴻⵍ ⵉ ⵜⴻⵡⵡⵓⵔⴰ ⵏⵏⴻⵛ ⵓ ⴰⴷ ⵊⵊⵉⵡⵏⴻⵏ. ◘26:12 ⵍⴰⵡⵉ 27:30; ⵍⵅⵍ. 18:24, ⴰⵄⵡⴷ. 14:28, 29 13 ⵓⵛⴰ ⴰⴷ ⵜⵉⵏⵉⴷ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ: ‘ⴰⵇⴰ ⴽⵙⵉⵖ ⵎⵉⵏ ⵉⴵⴰⵏ ⵉⵇⴻⴷⴷⵙⴻⵏ ⵣⵉ ⵜⴰⴷⴷⴰⵔⵜ ⵉⵏⵓ ⵓⵛⴰ ⵄⴰⵡⴻⴷ ⵡⵛⵉⵖ ⵜ ⵉ ⵓⵍⴰⵡⵉ, ⵉ ⵓⴱⴰⵔⵔⴰⵏⵉ, ⵉ ⵓⵢⵓⵊⵉⵍ, ⵉ ⵜⴰⵊⵊⴰⵍⵜ, ⴰⵎ ⵎⴰⵎⵎⴻⵛ ⵎⴰⵔⵔⴰ ⵜⵉⵡⴻⵚⵚⴰ ⵉ ⴷ ⴰⵢⵉ ⵜⵡⴻⵚⵚⵉⴷ. ⵏⴻⵛⵛ ⵡⴰⵔ ⵄⴻⴷⴷⵉⵖ ⵓⵍⴰ ⵅ ⵉⵛⵜⴻⵏ ⵣⵉ ⵜⵡⴻⵚⵚⴰ ⵏⵏⴻⵛ ⵓ ⵡⴰⵔ ⵜⵜⵓⵖ ⵡⴰⵍⵓ. ◘26:13 ⴰⵄⵡⴷ. 14:27 14 ⵡⴰⵔ ⵣⵣⴰⵢⴻⵙ ⵛⵛⵉⵖ ⴷⴻⴳ ⵡⴻⵛⴹⴰⵏ ⵉⵏⵓ ⵓ ⵡⴰⵔ ⵣⵣⴰⵢⴻⵙ ⴽⵙⵉⵖ ⵓⵎⵉ ⵅⴻⵎⵊⴻⵖ ⵓⵍⴰ ⵡⴰⵔ ⵣⵣⴰⵢⴻⵙ ⵡⵛⵉⵖ ⵉ ⵢⵉⵊⵊ ⵏ ⵓⵎⴻⵜⵜⵉⵏ. ⴰⵇⴰ ⵙⵍⵉⵖ ⵉ ⵜⵎⵉⵊⵊⴰ ⵏ ⵙⵉⴷⵉ, ⴰⵔⴻⴱⴱⵉ ⵉⵏⵓ, ⵓ ⴳⴳⵉⵖ ⵎⴰⵔⵔⴰ ⵎⵉⵏ ⴷ ⴰⵢⵉ ⵜⵓⵎⵓⵔⴻⴷ. 15 ⵅⵣⴰⵔ ⵣⵉ ⵜⵣⴻⴷⴷⵉⵖⵜ ⵏⵏⴻⵛ ⵉⵇⴻⴷⴷⵙⴻⵏ, ⵣⴻⴳ ⵓⵊⴻⵏⵏⴰ, ⵖⴰⵔ ⵙⵡⴰⴷⴷⴰⵢ ⵓⵛⴰ ⴱⴰⵔⴻⴽ ⵍⴳⴻⵏⵙ ⵏⵏⴻⵛ ⵉⵙⵔⴰⵉⵍ ⴷ ⵜⴻⵎⵎⵓⵔⵜ ⵏⵏⵉ ⴷ ⴰⵏⴻⵖ ⵜⴻⵡⵛⵉⴷ, ⴰⵎ ⵎⴰⵎⵎⴻⵛ ⵜⴻⵊⵊⵓⴵⴻⴷ ⵉ ⵍⴻⵊⴷⵓⴷ ⵏⵏⴻⵖ, ⵜⴰⵎⵎⵓⵔⵜ ⵏⵏⵉ ⵉⵜⵜⴼⴻⵢⵢⴹⴻⵏ ⵙ ⵓⵖⵉ ⴷ ⵜⴰⵎⵎⴻⵏⵜ.’ ” ◘26:15 ⵉⵛⴰ. 63:15
ⴰⵡⴰⵍ ⴰⵏⴻⴳⴳⴰⵔⵓ
16 “ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⴰⵇⴰ ⵢⵓⵎⵓⵔ ⵉ ⵛⴻⴽ ⴰⵙⵙ-ⴰ, ⴰⴷ ⵜⴻⴳⴳⴻⴷ ⵜⵉⵡⴻⵚⵚⴰ-ⵢⴰ ⴷ ⵍⴼⴰⵔⴰⵢⵉⴹ-ⴰ. ⵃⴹⴰ ⵜⴻⵏⵜ ⵓⵛⴰ ⴻⴳⴳ ⵣⵣⴰⵢⵙⴻⵏ ⵙ ⵎⴰⵔⵔⴰ ⵓⵍ ⵏⵏⴻⵛ ⴷ ⵎⴰⵔⵔⴰ ⵍⴻⵄⵎⴰⵔ ⵏⵏⴻⵛ. 17 ⴰⵙⵙ-ⴰ ⵜⴻⵏⵏⵉⴷ ⴰⵇⴰ ⵙⵉⴷⵉ ⴰⴷ ⵢⵉⵍⵉ ⴷ ⴰⵔⴻⴱⴱⵉ ⵏⵏⴻⵛ, ⴰⴷ ⵜⵓⵢⵓⵔⴻⴷ ⴷⴻⴳ ⵉⴱⵔⵉⴷⴻⵏ ⵏⵏⴻⵙ, ⴰⴷ ⵜⴻⵃⴹⵉⴷ ⵜⵉⵡⴻⵚⵚⴰ ⴷ ⵍⵓⵎⵓⵔⴰⵜ ⵏⵏⴻⵙ ⴷ ⵍⴼⴰⵔⴰⵢⵉⴹ ⵏⵏⴻⵙ ⵓⵛⴰ ⴰⴷ ⵜⴻⵙⵍⴻⴷ ⵉ ⵜⵎⵉⵊⵊⴰ ⵏⵏⴻⵙ. ◘26:17 ⴰⵎⵥ. 17:7 18 ⵓⵛⴰ ⵙⵉⴷⵉ ⵉⵏⵏⴰ ⴰⵛ ⴰⵙⵙ-ⴰ ⵉ ⵛⴻⴽ, ⴰⵇⴰ ⵛⴻⴽ ⴰⴷ ⵖⴰⵔⴻⵙ ⵜⵉⵍⵉⴷ ⴷ ⵉⵊⵊ ⵏ ⵍⴳⴻⵏⵙ ⵉⵖⵍⴰ ⴰⵟⵟⴰⵙ, ⴰⵎ ⵎⴰⵎⵎⴻⵛ ⴷ ⴰⵡⴻⵎ ⵉⵏⵏⴰ, ⵓ ⵉⵜⵜⵅⴻⵚⵚⴰ ⴰⵛ ⴰⴷ ⵜⴻⵃⴹⵉⴷ ⵎⴰⵔⵔⴰ ⵜⵉⵡⴻⵚⵚⴰ ⵏⵏⴻⵙ, ◘26:18 ⵓⴼ. 19:5; ⴰⵄⵡⴷ. 7:6; 14:2 19 ⵃⵉⵎⴰ ⵏⴻⵜⵜⴰ ⴰⴷ ⵛⴻⴽ ⵉⵙⵙⵓⵄⵍⴰ ⵅ ⵎⴰⵔⵔⴰ ⵍⴻⴳⵏⵓⵙ ⵉ ⵓⵙⴻⵎⵖⴰⵔ ⴷ ⵢⵉⵙⴻⵎ ⴷ ⵍⵄⴻⵣⵣ, ⵃⵉⵎⴰ ⴰⴷ ⵜⵉⵍⵉⴷ ⴷ ⵉⵊⵊ ⵏ ⵍⴳⴻⵏⵙ ⵉⵇⴻⴷⴷⵙⴻⵏ ⵉ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⴰⵎ ⵎⴰⵎⵎⴻⵛ ⵜⵓⵖⴰ ⵉⵏⵏⴰ.” ◘26:19 ⴰⵄⵡⴷ. 4:7
◘26:2 26:2 ⵓⴼ. 23:19; 34:26; ⵍⴰⵡⵉ 2:14; 23:10; ⵍⵅⵍ. 15:17
◘26:12 26:12 ⵍⴰⵡⵉ 27:30; ⵍⵅⵍ. 18:24, ⴰⵄⵡⴷ. 14:28, 29
◘26:13 26:13 ⴰⵄⵡⴷ. 14:27
◘26:15 26:15 ⵉⵛⴰ. 63:15
◘26:18 26:18 ⵓⴼ. 19:5; ⴰⵄⵡⴷ. 7:6; 14:2