1 “ⵎⴰⵍⴰ ⵉⵇⴻⴷⴷⴻⵎ ⵃⴻⴷ ⵜⴰⵡⵀⵉⴱⵜ ⵏ ⵍⵖⵉⴵⴻⵜ ⵖⴰⵔ ⵙⵉⴷⵉ, ⴰⴷ ⵜⵉⵍⵉ ⵜⴻⵡⵀⵉⴱⵜ ⵏⵏⴻⵙ ⵏ ⵡⴰⵔⴻⵏ ⴰⵣⴷⴰⴷ ⵓⵛⴰ ⴰⴷ ⵅⴰⵙ ⵉⵙⴻⵢⵢⴻⴱ ⵣⵣⴻⵛⵜ ⵓⵛⴰ ⴰⴷ ⵅⴰⵙ ⵉⵙⵙⴰⵔⵙ ⵊⵊⴰⵡⵉ. ◘2:1 ⵓⴼ. 6:15; 9:17; ⵍⵅⵍ. 15:4 2 ⴰⴷ ⵜⵜ ⵢⴰⵡⵉ ⵖⴰⵔ ⵡⴰⵔⵔⴰⵡ ⵏ ⵀⴰⵔⵓⵏ, ⵉⴽⴻⵀⵀⴰⵏⴻⵏ, ⵓⵛⴰ ⴰⴷ ⵣⵣⴰⵢⴻⵙ ⵉⴽⵙⵉ ⵓⴽⴻⵀⵀⴰⵏ ⵉⵊⵊ ⵏ ⵡⵓⵔⵓ ⵉⵛⵛⵓⵔ ⵣⴻⴳ ⵡⴰⵔⴻⵏ ⴰⵣⴷⴰⴷ ⵏⵏⵉ ⵓ ⵣⵉ ⵣⵣⴻⵛⵜ ⵏⵏⵉ ⴰⴽ-ⴷ ⵎⴰⵔⵔⴰ ⵊⵊⴰⵡⵉ, ⵓⵛⴰ ⴰⴽⴻⵀⵀⴰⵏ ⴰⴷ ⵉⵙⵙⴱⴻⵅⵅⴰⵔ ⴰⵢⴰ ⵅ ⵓⵄⴰⵍⵟⴰⵔ ⵉ ⵍⵉⴷⴰⵔⴻⵜ ⵉ ⵜⴻⵡⵀⵉⴱⵜ ⵏⵏⵉ, ⴰⵇⴰ ⴷ ⵉⵛⵜ ⵏ ⵜⴻⵡⵀⵉⴱⵜ ⵏ ⵜⵎⴻⵙⵙⵉ ⴷ ⵉⵛⵜ ⵏ ⵍⴻⴼⵡⴰⵃⴻⵜ ⵉⵜⵜⴼⵓⵃⴻⵏ ⵉ ⵙⵉⴷⵉ. ◘2:2 ⵍⴰⵡⵉ 6:8 3 ⵎⵉⵏ ⵉⵇⵇⵉⵎⴻⵏ ⵏ ⵜⴻⵡⵀⵉⴱⵜ ⵏ ⵍⵖⵉⴵⴻⵜ ⴰⴷ ⵢⵉⵍⵉ ⵉ ⵀⴰⵔⵓⵏ ⵓ ⵉ ⵡⴰⵔⵔⴰⵡ ⵏⵏⴻⵙ. ⴰⵇⴰ ⴷ ⴰⵎⵇⴻⴷⴷⴰⵙ ⵇⴰⵄ ⵣⵉ ⵎⴰⵔⵔⴰ ⵜⵉⵡⵀⵉⴱⵉⵏ ⵏ ⵜⵎⴻⵙⵙⵉ ⵏ ⵙⵉⴷⵉ. ◘2:3 ⵍⴰⵡⵉ 10:12

4 ⵎⴰⵍⴰ ⵜⵇⴻⴷⴷⵎⴻⴷ ⵜⴰⵡⵀⵉⴱⵜ ⵉ ⵉⴵⴰⵏ ⴷ ⵜⴰⵡⵀⵉⴱⵜ ⵏ ⵍⵖⵉⴵⴻⵜ ⴷⴰⵔⵃⴻⵏ ⵜⵜ ⴷⵉ ⵜⴻⴼⵇⵓⵏⵜ, ⵅⴻⵏⵏⵉ ⴰⴷ ⵜⵉⵍⵉ ⴷ ⵍⴻⵎⵙⴻⵎⵏⴰⵜ ⴱⵍⴰ ⴰⵏⵜⵓⵏ, ⵉⵅⴻⴵⴹⴻⵏ ⵙ ⵣⵣⴻⵛⵜ, ⵓⵍⴰ ⴷ ⵜⵉⵍⴼⴰⴼ ⴱⵍⴰ ⴰⵏⵜⵓⵏ ⵜⵜⵡⴰⴷⴻⵀⵏⴻⵏⵜ ⵙ ⵣⵣⴻⵛⵜ, ⵎⴰⵔⵔⴰ ⵣⴻⴳ ⵡⴰⵔⴻⵏ ⴰⵣⴷⴰⴷ.

5 ⵎⴰⵍⴰ ⵜⴰⵡⵀⵉⴱⵜ ⵏⵏⴻⵛ ⴷ ⵜⴰⵡⵀⵉⴱⵜ ⵏ ⵍⵖⵉⴵⴻⵜ ⴳⴳⵯⵉⵏ ⵜⵜ ⵅ ⵡⴻⵅⴷⵉⵎ, ⴰⴷ ⵜⵉⵍⵉ ⵏ ⵡⴰⵔⴻⵏ ⴰⵣⴷⴰⴷ ⵉⵅⴻⴵⴹⴻⵏ ⵙ ⵣⵣⴻⵛⵜ, ⵡⴰⵔⴷⴰⵢⴻⵙ ⴱⵓ ⵡⴻⵏⵜⵓⵏ.

6 ⴰⴷ ⵜⴻⵏ ⵜⴰⵔⵥⴻⴷ ⴷ ⵉⴼⴻⵜⵡⵉⵜⴻⵏ ⵓⵛⴰ ⴰⴷ ⵅⴰⵙ ⵜⵙⴻⵢⵢⴱⴻⴷ ⵣⵣⴻⵛⵜ. ⴰⵇⴰ-ⵜⵜ ⴷ ⵉⵛⵜ ⵏ ⵜⴻⵡⵀⵉⴱⵜ ⵏ ⵍⵖⵉⴵⴻⵜ.

7 ⵎⴰⵍⴰ ⵜⴰⵡⵀⵉⴱⵜ ⵏⵏⴻⵛ ⴷ ⵜⴰⵡⵀⵉⴱⵜ ⵏ ⵍⵖⵉⴵⴻⵜ ⴳⴳⵯⵉⵏ ⵜⵜ ⴷⵉ ⵟⵟⴰⵊⵊⵉⵏ, ⴰⴷ ⵜⵉⵍⵉ ⵜⴻⵡⵊⴻⴷ ⵙ ⵡⴰⵔⴻⵏ ⴰⵣⴷⴰⴷ ⴰⴽ-ⴷ ⵣⵣⴻⵛⵜ. 8 ⵜⴰⵡⵀⵉⴱⵜ ⵏ ⵍⵖⵉⴵⴻⵜ ⵉ ⵣⵣⴰⵢⵙⴻⵏ ⵉⵡⴻⵊⴷⴻⵏ, ⴰⴷ ⵜⵜ ⵜⴰⵡⵢⴻⴷ ⵖⴰⵔ ⵙⵉⴷⵉ. ⴱⵏⴰⴷⴻⵎ ⴰⴷ ⵣⵣⴰⵢⴻⵙ ⴷⴷ-ⵉⵇⴰⵔⵔⴻⴱ ⵖⴰⵔ ⵓⴽⴻⵀⵀⴰⵏ ⵓⵛⴰ ⵡⴰⵏⵉⵜⴰ ⴰⴷ ⵜⵜ ⵢⴰⵡⵉ ⵖⴰⵔ ⵓⵄⴰⵍⵟⴰⵔ. 9 ⴰⴷ ⵉⴽⵙⵉ ⵓⴽⴻⵀⵀⴰⵏ ⵣⵉ ⵜⴻⵡⵀⵉⴱⵜ ⵏ ⵍⵖⵉⴵⴻⵜ ⵉⵛⵜ ⵏ ⵍⵉⴷⴰⵔⴻⵜ ⵓⵛⴰ ⴰⴷ ⵜⵜ ⵉⵙⵙⴱⴻⵅⵅⴰⵔ ⵅ ⵓⵄⴰⵍⵟⴰⵔ, ⴰⵇⴰ ⴷ ⵜⴰⵡⵀⵉⴱⵜ ⵏ ⵜⵎⴻⵙⵙⵉ, ⴷ ⵍⴻⴼⵡⴰⵃⴻⵜ ⵉⵜⵜⴼⵓⵃⴻⵏ ⵉ ⵙⵉⴷⵉ. 10 ⵎⵉⵏ ⵉⵇⵇⵉⵎⴻⵏ ⵏ ⵜⴻⵡⵀⵉⴱⵜ ⵏ ⵍⵖⵉⴵⴻⵜ ⴰⴷ ⵢⵉⵍⵉ ⵉ ⵀⴰⵔⵓⵏ ⵓ ⵉ ⵡⴰⵔⵔⴰⵡ ⵏⵏⴻⵙ. ⴰⵇⴰ-ⵜ ⴷ ⴰⵎⵇⴻⴷⴷⴰⵙ ⵇⴰⵄ ⵣⵉ ⵜⴻⵡⵀⵉⴱⵉⵏ ⵏ ⵜⵎⴻⵙⵙⵉ ⵏ ⵙⵉⴷⵉ.

11 ⵡⴰⵔ ⵉⵄⴻⴷⴷⴻⵍ ⵉ ⵓⵍⴰ ⴷ ⵉⵛⵜ ⵏ ⵜⴻⵡⵀⵉⴱⵜ ⵏ ⵍⵖⵉⴵⴻⵜ ⵉ ⵖⴰ ⵜⵇⴻⴷⴷⵎⴻⵎ ⵉ ⵙⵉⴷⵉ ⴰⴷ ⵜⵉⵍⵉ ⵜⴻⵡⵊⴻⴷ ⵙ ⵡⴻⵏⵜⵓⵏ. ⵎⴰⵖⴰⵔ ⵣⵉ ⵎⵉⵏ ⵎⴰ ⵏ ⵡⴻⵏⵜⵓⵏ ⴷ ⵣⵉ ⵎⵉⵏ ⵎⴰ ⵜⴰⵎⵎⴻⵏⵜ ⵡⴰⵔ ⵣⵣⴰⵢⴻⵙ ⵜⴻⵙⵙⴱⴻⵅⵅⴰⵔⴰⵎ ⵛⴰ ⵓⵍⴰ ⴷ ⵉⵛⵜ ⵏ ⵜⴻⵡⵀⵉⴱⵜ ⵏ ⵜⵎⴻⵙⵙⵉ ⵉ ⵙⵉⴷⵉ.

12 ⴰⴷ ⵜⵉⵡⵢⴻⵎ ⵜⴰⵡⵀⵉⴱⵜ ⵏ ⵓⵙⵓⴼⴼⴻⵖ ⴰⵎⴻⵣⵡⴰⵔⵓ ⵏ ⵚⵚⴰⴱⴻⵜ ⵖⴰⵔ ⵙⵉⴷⵉ, ⵎⴰⵛⴰ ⵏⵉⵜⵏⵉ ⵡⴰⵔ ⵣⴻⵎⵎⴰⵔⴻⵏ ⴰⴷ ⵙⵙⴱⴻⵅⵅⴰⵔⴻⵏ ⵜⴰⵡⵀⵉⴱⵜ-ⴰ ⵅ ⵓⵄⴰⵍⵟⴰⵔ ⴰⵎ ⵍⴻⴼⵡⴰⵃⴻⵜ ⵉⵜⵜⴼⵓⵃⴻⵏ ⵉ ⵙⵉⴷⵉ. ◘2:12 ⵍⵅⵍ. 18:12

13 ⴽⵓⵍ ⵜⴰⵡⵀⵉⴱⵜ ⵏ ⵜⴻⵡⵀⵉⴱⵜ ⵏ ⵍⵖⵉⴵⴻⵜ ⵏⵏⴻⵛ ⴰⴷ ⵜⵉⵍⵉ ⵜⵎⴻⴵⵃⴻⴷ ⵙ ⵜⵎⴻⴵⴰⵃⵟ. ⵜⴰⵎⴻⴵⴰⵃⵜ ⵏ ⵍⵄⴰⵀⴷ ⵏ ⴰⵔⴻⴱⴱⵉ ⵏⵏⴻⵛ ⵡⴰⵔ ⵜⵣⴻⵎⵎⴰⵔ ⴰⴷ ⵜⴻⵏⵇⴻⵚ ⵖⴰⵔ ⵜⴻⵡⵀⵉⴱⵜ ⵏ ⵍⵖⵉⴵⴻⵜ ⵏⵏⴻⵛ. ⴰⴷ ⵜⵇⴻⴷⴷⵎⴻⴷ ⵜⴰⵎⴻⴵⴰⵃⵜ ⵖⴰⵔ ⴽⵓⵍ ⵜⴰⵡⵀⵉⴱⵜ ⵏⵏⴻⵛ. ◘2:13 ⵎⴽ. 9:49

14 ⵎⴰⵍⴰ ⵜⵉⵡⵢⴻⴷ ⵉⵛⵜ ⵏ ⵜⴻⵡⵀⵉⴱⵜ ⵏ ⵍⵖⵉⴵⴻⵜ ⵏ ⵜⵎⴻⵏⵣⵓⵜ, ⴰⴷ ⵜⵉⵡⵢⴻⴷ ⵜⵉⴷⵔⵉⵏ ⵢⵉⵡⴹⴻⵏ, ⵜⵉⵏⵏⵉ ⵉⵜⵜⵡⴰⴼⴰⵔⴻⵏ ⵅ ⵜⵎⴻⵙⵙⵉ, ⴰⴽ-ⴷ ⵍⵃⴻⴱⴱ ⴰⵣⵉⵣⴰ ⵉⴱⴰⵔⵢⴻⵏ ⴰⵎ ⵜⴻⵡⵀⵉⴱⵜ ⵏ ⵍⵖⵉⴵⴻⵜ ⵣⵉ ⵜⵎⴻⵏⵣⵓⵜ ⵏⵏⴻⵛ. 15 ⴰⴷ ⵅⴰⵙ ⵜⵙⴻⵢⵢⴱⴻⴷ ⵣⵣⴻⵛⵜ ⵓ ⴰⴷ ⵅⴰⵙ ⵜⴻⵙⵙⴰⵔⵙⴻⴷ ⵊⵊⴰⵡⵉ, ⴰⵇⴰ ⴷ ⵜⴰⵡⵀⵉⴱⵜ ⵏ ⵍⵖⵉⴵⴻⵜ. 16 ⵅⴻⵏⵏⵉ ⴰⴷ ⵉⵙⵙⴱⴻⵅⵅⴰⵔ ⵓⴽⴻⵀⵀⴰⵏ ⵉⵊⵊ ⵏ ⵡⴻⵣⵢⴻⵏ ⵣⵉ ⵍⵃⴻⴱⴱ ⵉⴱⴰⵔⵢⴻⵏ ⵓ ⵣⵉ ⵣⵣⴻⵛⵜ ⵏⵏⴻⵙ ⴰⴽ-ⴷ ⵎⴰⵔⵔⴰ ⵊⵊⴰⵡⵉ ⵏⵏⴻⵙ ⵉ ⵅⴰⵙ ⵉⴵⴰⵏ ⴰⵎ ⵜⴻⵡⵀⵉⴱⵜ ⵏ ⵍⵉⴷⴰⵔⴻⵜ ⴷⵉ ⵎⴰⵏ ⴰⵢⴰ. ⴰⵇⴰ ⴷ ⵜⴰⵡⵀⵉⴱⵜ ⵏ ⵜⵎⴻⵙⵙⵉ ⵉ ⵙⵉⴷⵉ.”