1 ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ: 2 “ⴰ ⵎⵎⵉⵙ ⵏ ⴱⵏⴰⴷⴻⵎ, ⴰⵔⵔ ⵓⴷⴻⵎ ⵏⵏⴻⵛ ⵖⴰⵔ ⵉⴷⵓⵔⴰⵔ ⵏ ⵙⴰⵄⵉⵔ ⵓ ⵏⴰⴱⴱ ⵅⴰⵙ, 3 ⵡⴰⵀ, ⵉⵏⵉ ⴰⵙ: ‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ! ⵅⵣⴰⵔ, ⵏⴻⵛⵛ ⴰⴷ ⵖⴰⵔⴻⴽ ⴷⴷ-ⴰⵙⴻⵖ, ⴰ, ⵉⴷⵓⵔⴰⵔ ⵏ ⵙⴰⵄⵉⵔ ⵓⵛⴰ ⴰⴷ ⵙⵙⵡⵉⵥⵥⴹⴻⵖ ⴰⴼⵓⵙ ⵉⵏⵓ ⴹⵉⴷⴷ ⵏⵏⴻⵛ ⵓⵛⴰ ⴰⴷ ⵛⴻⴽ ⴰⵔⵔⴻⵖ ⴷ ⵜⴰⵔⴻⴷⴷⴻⴵⵜ ⴷ ⵍⴻⵅⵍⴰ. 4 ⵏⴻⵛⵛ ⴰⴷ ⴰⵔⵔⴻⵖ ⵜⵉⵏⴻⴷⴷⴰⵎ ⵏⵏⴻⵛ ⴷ ⵍⵅⴰⵔⴱⴻⵜ ⵓ ⵛⴻⴽ ⴰⴷ ⵜⴷⴻⵡⵍⴻⴷ ⴷ ⵜⴰⵔⴻⴷⴷⴻⴵⵜ ⵓ ⵛⴻⴽ ⴰⴷ ⵜⴻⵙⵙⵏⴻⴷ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ, 5 ⵎⵉⵏⵣⵉ ⵖⴰⵔⴻⴽ ⵍⴻⵄⴷⴰⵡⴰⵜ ⵉⵜⵜⴷⵓⵎⴰⵏ ⵓ ⵎⵉⵏⵣⵉ ⵜⵙⴻⵍⵍⵎⴻⴷ ⴰⵢⵜ ⵏ ⵉⵙⵔⴰⵉⵍ ⵉ ⵜⵣⴻⵎⵎⴰⵔ ⵏ ⵙⵙⵉⴼ ⴷⵉ ⵍⵡⴻⵇⵜ ⵏ ⵓⴹⴻⵢⵢⴻⵄ ⵏⵙⴻⵏ, ⴷⵉ ⵍⵡⴻⵇⵜ ⵏ ⵍⵃⵉⵙⴰⴱ ⴰⵏⴻⴳⴳⴰⵔ ⵅ ⵍⵎⵓⵄⵚⵉⵢⵢⴻⵜ.’ ” ◘35:5 ⵃⵉⵥ. 25:15

6 “ⵙ ⵓⵢⴰ, ⵙ ⵜⵉⴷⴻⵜⵜ ⴰⵎ ⴷⴷⴰⵔⴻⵖ ⵏⴻⵛⵛ, ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ‘ⵏⴻⵛⵛ ⴰⴷ ⵛⴻⴽ ⴰⵔⵔⴻⵖ ⴷ ⵉⴷⴰⵎⵎⴻⵏ ⵇⴰⵄ ⵓ ⵉⴷⴰⵎⵎⴻⵏ ⴰⴷ ⵛⴻⴽ ⴹⴼⴰⵔⴻⵏ. ⵡⴰⵀ ⵓⵎⵉ ⵡⴰⵔ ⵜⵛⴰⵔⵀⴻⴷ ⵛⴰ ⴰⵙⵉⵣⵣⴻⵍ ⵏ ⵉⴷⴰⵎⵎⴻⵏ, ⴰⴷ ⵛⴻⴽ ⴹⴼⴰⵔⴻⵏ ⵉⴷⴰⵎⵎⴻⵏ. 7 ⵏⴻⵛⵛ ⴰⴷ ⴰⵔⵔⴻⵖ ⵉⴷⵓⵔⴰⵔ ⵏ ⵙⴰⵄⵉⵔ ⴷ ⵜⴰⵔⴻⴷⴷⴻⴵⵜ ⴷ ⵍⵅⴰⵔⴱⴻⵜ. ⵏⴻⵛⵛ ⴰⴷ ⵣⵣⴰⵢⴻⵙ ⵇⴻⵙⵙⴻⵖ ⵡⵉ ⵉⵄⴻⴷⴷⵓⵏ ⴷ ⵡⵉ ⴷⴷ-ⵉⴷⴻⴽⴽⵡⴰⵍⴻⵏ. 8 ⵏⴻⵛⵛ ⴰⴷ ⵛⵛⵓⵔⴻⵖ ⵉⴷⵓⵔⴰⵔ ⵏⵏⴻⵙ ⵙ ⵢⵉⵏⵏⵉ ⵉⵜⵜⵡⴰⵏⵖⴻⵏ, ⵜⵉⵡⵔⵉⵔⵉⵏ ⵏⵏⴻⵛ ⴷ ⵜⴻⵖⵣⵓⵔⵜⵉⵏ ⵏⵏⴻⵛ, ⵡⴰⵀ, ⵉⵏⵏⵉ ⵉⵜⵜⵡⴰⵏⵖⴻⵏ ⵙ ⵙⵙⵉⴼ ⴰⴷ ⵡⴹⴰⵏ ⴷⵉ ⵎⴰⵔⵔⴰ ⵜⵉⵖⴻⵣⵔⴰⵜⵉⵏ ⵏⵏⴻⵛ. 9 ⵏⴻⵛⵛ ⴰⴷ ⵛⴻⴽ ⴳⴳⴻⵖ ⴷ ⵜⵉⵔⴻⴷⴷⴻⴵⵉⵏ ⵉ ⵍⴻⴱⴷⴰ ⵓ ⵜⵉⵏⴻⴷⴷⴰⵎ ⵏⵏⴻⵛ ⵄⴻⵎⵎⴰⵔⵚ ⵡⴰⵔ ⴷⴰⵢⵙⴻⵏⵜ ⵜⵜⵡⵉⴼⴻⵏ ⵄⴰⴷ ⵉⵎⴻⵣⴷⴰⵖ ⵓ ⴽⴻⵏⵏⵉⵡ ⴰⴷ ⵜⴻⵙⵙⵏⴻⵎ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ, 10 ⵎⵉⵏⵣⵉ ⵜⴻⵏⵏⵉⴷ: ⵜⵏⴰⵢⴻⵏ ⵏ ⵍⴻⴳⵏⵓⵙ ⵏⵏⵉ ⴷ ⵜⵏⴰⵢⴻⵏ ⵏ ⵜⴻⵎⵎⵓⵔⴰ ⵏⵏⵉ ⴰⴷ ⵉⵍⵉⵏⵜ ⵉⵏⵓ ⵓ ⵏⴻⵛⵛⵉⵏ ⴰⴷ ⵜⴻⵏⵜ ⵟⵟⴼⴻⵏ ⴷ ⵍⵡⴰⵔⵜ!, ⴰⵎ ⵙⵉⴷⵉ ⴰⵇⴰ-ⵜ ⴷⵉⵏ.’ ” ◘35:10 ⵉⵥⵀⴷ. 83:13

11 “ⵙ ⵓⵢⴰ, ⵙ ⵜⵉⴷⴻⵜⵜ ⴰⵎ ⴷⴷⴰⵔⴻⵖ ⵏⴻⵛⵛ, ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ‘ⵏⴻⵛⵛ ⴰⴷ ⴰⵛ ⴳⴳⴻⵖ ⴰⵏⴻⵛⵜ ⵏ ⵡⴻⵖⴹⴰⴱ ⵏⵏⴻⵛ ⵓ ⴰⵏⴻⵛⵜ ⵏ ⵜⵓⵙⵎⵉ ⵏⵏⴻⵛ ⵏⵏⵉ ⵜⵓⵖⴰ ⵖⴰⵔⴻⴽ ⴷⴻⴳ ⵡⴻⵛⵔⴰⵀ ⵏⵏⴻⵛ ⵣⵣⴰⵢⵙⴻⵏ, ⵎⴰⵛⴰ ⵏⵉⵜⵏⵉ ⴰⴷ ⴰⵢⵉ ⵙⵙⵏⴻⵏ ⵅⵎⵉ ⵅⴰⴽ ⵖⴰ ⵃⴻⴽⵎⴻⵖ. 12 ⴰⴷ ⵜⴻⵙⵙⵏⴻⴷ, ⴱⴻⵍⵍⵉ ⵏⴻⵛⵛ, ⵙⵉⴷⵉ, ⵙⵍⵉⵖ ⵉ ⵎⴰⵔⵔⴰ ⴰⵛⴻⵇⵇⴰⴼ ⵏⵏⴻⵛ ⵏⵏⵉ ⵜⴻⵙⵙⵉⵡⵍⴻⴷ ⴹⵉⴷⴷ ⵉ ⵉⴷⵓⵔⴰⵔ ⵏ ⵉⵙⵔⴰⵉⵍ, ⵜⴻⵏⵏⵉⴷ: ⴰⵇⴰ ⵜⵡⴰⵔⴻⴷⴷⴵⴻⵏ, ⵎⵎⴻⵡⵛⴻⵏ ⴰⵏⴻⵖ ⴷ ⵎⴰⵛⵛⴰ. 13 ⴰⵎⵎⵓ ⵉ ⵅⴰⴼⵉ ⵜⵇⴻⵍⴱⴻⵎ ⵙ ⵓⵇⴻⵎⵎⵓⵎ ⵏⵡⴻⵎ ⵉⵛⵛⵓⵔ ⵙ ⵓⴽⴻⴱⴱⴰⵔ ⵓⵛⴰ ⵜⴰⵔⵏⵉⵎ ⵜⴼⴰⵔⵔⵖⴻⵎ ⴰⵡⴰⵍⴻⵏ ⵏⵡⴻⵎ ⵅⴰⴼⵉ ⴰⵟⵟⴰⵙ. ⵏⴻⵛⵛ ⵙⵍⵉⵖ ⵜ.’ 14 ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ‘ⴰⵎ ⵜⴼⴰⵔⵔⴻⵃ ⵎⴰⵔⵔⴰ ⵜⴰⵎⵎⵓⵔⵜ, ⵏⴻⵛⵛ ⴰⴷ ⵛⴻⴽ ⴰⵔⵔⴻⵖ ⴷ ⵉⵛⵜ ⵏ ⵜⴻⵎⵎⵓⵔⵜ ⵉⵜⵜⵡⴰⵔⴻⴷⴷⴵⴻⵏ. 15 ⴰⵎ ⵎⴰⵎⵎⴻⵛ ⵜⴼⴰⵔⵃⴻⴷ ⵙ ⵜⴻⵙⵖⴰⵔⵜ ⵏ ⵜⴰⴷⴷⴰⵔⵜ ⵏ ⵉⵙⵔⴰⵉⵍ, ⵎⵉⵏⵣⵉ ⴰⵇⴰ ⵜᵉⵜⵜⵡⴰⵔⴻⴷⴷⴻⴵ, ⵏⴻⵛⵛ ⴰⴷ ⴽⵉⴽ ⴳⴳⴻⵖ ⴰⵎⵎⵓ, ⴰ ⴽⴻⵏⵏⵉⵡ, ⵉⴷⵓⵔⴰⵔ ⵏ ⵙⴰⵄⵉⵔ, ⵛⴻⵎ ⵎⴰⵔⵔⴰ ⵜⴰⵎⵎⵓⵔⵜ ⵏ ⵉⴷⵓⵎ, ⴰⴷ ⵜⵉⵍⵉⴷ ⴷ ⵜⴰⵔⴻⴷⴷⴻⴵⵜ! ⵓⵛⴰ ⵏⵉⵜⵏⵉ ⴰⴷ ⵙⵙⵏⴻⵏ, ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ.’ ”