83
1 ⵉⵣⵍⵉ. ⴰⵣⴻⵀⵀⴻⴷ ⵏ ⴰⵙⴰⴼ.
2 ⴰ ⴰⵔⴻⴱⴱⵉ, ⵡⴰⵔ ⵙⵙⴻⵖⴷ,
ⵡⴰⵔ ⵜⵜⴻⴳⴳ ⵉⵅⴻⴼ ⵏⵏⴻⵛ ⴷ ⴰⴷⴻⵀⵛⵓⵔ,
ⵡⴰⵔ ⵙⴻⵇⵇⴰⵔ ⵛⴰ, ⴰ ⴰⵔⴻⴱⴱⵉ.
3 ⵎⴰⵖⴰⵔ ⵅⵣⴰⵔ,
ⵍⵄⴻⴷⵢⴰⵏ ⵏⵏⴻⵛ ⵜⵜⴰⵔⵔⵓⴵⵓⴷⴻⵏ,
ⵉⵏⵏⵉ ⵛⴻⴽ ⵉⵛⴰⵔⵔⵀⴻⵏ ⵙⵙⴳⴻⵄⵄⴷⴻⵏ ⴰⵣⴻⴵⵉⴼ.
4 ⵜⵜⵅⴰⵔⵔⵚⴻⵏ ⴷⴻⴳ ⵉⵛⵜ ⵏ ⵜⵎⴻⵄⵎⵓⵍⵜ
ⴷⵉ ⵜⵏⵓⴼⴼⴰⵔ
ⴹⵉⴷⴷ ⵉ ⵍⴳⴻⵏⵙ ⵏⵏⴻⵛ,
ⵜⵜⴻⵎⵛⴰⵡⴰⵔⴻⵏ
ⵅ ⵢⵉⵏⵏⵉ ⵉⵜⵜⵡⴰⵃⴹⴰⵏ ⵣⵣⴰⵢⴻⴽ.
5 ⵇⵇⴰⵔⴻⵏ: “ⴰⵙⴻⵎ-ⴷⴷ, ⴻⵊⵊ ⴰⵏⴻⵖ
ⴰⴷ ⵜⴻⵏ ⵏⵜⴻⵃⵃⴰ ⴰⵎ ⵍⴳⴻⵏⵙ,
ⴰⵍⴰⵎⵉ ⵡⴰⵔ ⵉⵜⵜⵉⴷⴰⵔ ⵄⴰⴷ
ⴷⴻⴳ ⵢⵉⵙⴻⵎ ⵏ ⵉⵙⵔⴰⵉⵍ.”
6 ⵎⴰⵖⴰⵔ ⵜⵜⴻⵎⵛⴰⵡⴰⵔⴻⵏ ⵙ ⵡⵓⵍ ⴷ ⵉⵊⵊ,
ⴰⵇⴰ ⵜⵜⴻⴳⴳⴻⵏ ⵉⵊⵊ ⵏ ⵍⵄⴰⵀⴷ ⴹⵉⴷⴷ ⵉ ⵛⴻⴽ: ◘83:6 ⴱⵙ 2:2
7 ⵉⵇⵉⴹⴰⵏ ⵏ ⵉⴷⵓⵎ ⴷ ⴰⵢⵜ ⵏ ⵉⵙⵎⴰⵄⵉⵍ,
ⵎⵓ’ⴰⴱ ⴷ ⴰⵢⵜ ⵏ ⵀⴰⵊⴰⵔ,
8 ⵊⴰⴱⴰⵍ ⴷ ⵄⴰⵎⵎⵓⵏ ⴷ ⵄⴰⵎⴰⵍⵉⵇ,
ⴼⵉⵍⵉⵛⵉⵜ ⴷ ⵉⵎⴻⵣⴷⴰⵖ ⵏ ⵚⵓⵔ.
9 ⵓⵍⴰ ⴷ ⴰⵛⵛⵓⵔ ⵉⵎⵎⴰⵔⵏⵉ ⵖⴰⵔⵙⴻⵏ.
ⵏⵉⵜⵏⵉ ⵜⵓⵖⴰ ⴰⵜⴻⵏ ⴷ ⴰⴼⵓⵙ ⵉⵊⵀⴻⴷ
ⵉ ⴰⵢⵜ ⵏ ⵍⵓⵟ. ⵙⵉⵍⴰⵀ.
10 ⴻⴳⴳ ⴰⵙⴻⵏ ⴰⵎ ⵎⵉⴷⵢⴰⵏ ⴷ ⵙⵉⵙⴰⵔⴰ,
ⴰⵎ ⵢⴰⴱⵉⵏ ⵖⴰⵔ ⵢⴻⵖⵣⴰⵔ ⵏ ⵇⵉⵛⵓⵏ.
11 ⵏⵉⵜⵏⵉ ⵜⵜⵡⴰⵜⴻⵃⵃⴰⵏ ⵖⴰⵔ ⵄⴰⵢⵏ-ⴷⵓⵔ,
ⴷⴻⵡⵍⴻⵏ ⴷ ⵍⴻⵖⴱⴰⵔ ⵅ ⵜⴻⵎⵎⵓⵔⵜ.
12 ⴻⴳⴳ ⵉ-ⵜⴻⵏ ⴰⴽ-ⴷ ⵜⴰⵔⵡⴰ ⵏ ⵜⴰⵚⵉⵍⴻⵜ ⵏⵙⴻⵏ
ⴰⵎ ⵖⵓⵔⴰⴱ ⴷ ⴷⵉ’ⴱ,
ⵎⴰⵔⵔⴰ ⴰⵢⵜ ⵏ ⵊⵊⴻⵀⴷ ⵏⵙⴻⵏ
ⴰⵎ ⵣⴰⴱⴰⵃ ⴷ ⵚⴰⵍⵎⵓⵏⵏⴰⵄ, ◘83:12 ⵍⵇⴹ. 7:25; 8:5; ⵉⵥⵀⴷ. 83:12
13 ⵉⵏⵏⵉ ⵉⵇⵇⴰⵔⴻⵏ:
“ⴻⵊⵊ ⴰⵏⴻⵖ ⴰⴷ ⵏⴻⵟⵟⴻⴼ
ⵜⵉⵣⴻⴷⴷⵉⵖⵉⵏ ⵏ ⴰⵔⴻⴱⴱⵉ
ⵉ ⵢⵉⵅⴻⴼ ⵏⵏⴻⵖ ⴷ ⵍⵡⴰⵔⵜ.”
14 ⴰ ⴰⵔⴻⴱⴱⵉ ⵉⵏⵓ, ⴻⴳⴳ ⵉ-ⵜⴻⵏ
ⴰⵎ ⵢⵉⵊⵊ ⵏ ⵓⵇⴻⵍⵍⵉⵊ
ⵉⵜⵜⴻⵏⵏⴹⴻⵏ ⴷⵉ ⵍⴻⵄⵡⵉⵏ,
ⴰⵎ ⵓⵍⵓⵎ ⵣⵣⴰⵜ ⵉ ⵡⵓⴷⴻⵎ ⵏ ⵓⵙⴻⵎⵎⵉⴹ.
15 ⴰⵎ ⵜⵎⴻⵙⵙⵉ ⵜⴻⵙⵙⵔⴻⵇⵇⴰ ⴰⵣⵖⴰⵔ,
ⴰⵎ ⵓⵛⴻⵄⵄⴰⵍ ⵉⵜⵜⴻⵜⵜ ⵉⴷⵓⵔⴰⵔ, ◼83:15 ⴰⵥⵖⴰⵔ-ⵏⵉⵖ ‘ⵍⵖⴰⴱⴻⵜ’ ⵏⵉⵖ ‘ⵜⴰⵥⴳⴰⵏⵜ’.
16 ⴰⵥⵥⴻⵍ ⴰⵎⵎⵓ ⵅⴰⵙⴻⵏ ⵙ ⵓⵙⴻⵎⵎⵉⴹ ⵏⵏⴻⵛ,
ⵙⵏⴻⵅⵍⴻⵄ ⵉ-ⵜⴻⵏ ⵙ ⵜⵃⴰⵔⵢⴰⴹⵜ ⵏⵏⴻⵛ.
17 ⵍⴻⵃⵃⴻⴼ ⵓⴷⴻⵎ ⵏⵙⴻⵏ ⵙ ⵍⴻⵃⵢⴰ,
ⵎⴰⵃⴻⵏⴷ ⵏⵉⵜⵏⵉ, ⴰ ⵙⵉⴷⵉ,
ⴰⴷ ⴰⵔⵣⵓⵏ ⵅ ⵢⵉⵙⴻⵎ ⵏⵏⴻⵛ.
18 ⴻⵊⵊ ⵉ-ⵜⴻⵏ ⴰⴷ ⴱⴰⵔⵔⵇⴻⵏ
ⵓ ⴰⴷ ⴰⵔⴻⵊⴼⴻⵏ ⵉ ⵍⴻⴱⴷⴰ,
ⴻⵊⵊ ⵉ-ⵜⴻⵏ ⴰⴷ ⵙⴻⴹⵃⴰⵏ
ⵓⵛⴰ ⴰⴷ ⵜⵜⵡⴰⵀⴻⵍⵍⴽⴻⵏ,
19 ⵃⵉⵎⴰ ⴰⴷ ⵙⵙⵏⴻⵏ, ⴰⵇⴰ ⵛⴻⴽ ⵡⴰⵀⴰ
ⵉ ⵖⴰⵔ ⵉⴵⴰ ⵢⵉⵙⴻⵎ ‘ⵙⵉⴷⵉ’,
ⴰⵎⵄⵓⴵⵉ ⵅ ⵎⴰⵔⵔⴰ ⵜⴰⵎⵎⵓⵔⵜ.