1 ⴰⵡⴰⵔⵏⵉ ⵎⴰⵏ ⴰⵢⴰ ⵜⴻⵎⵙⴰⵔ, ⴰⵇⴰ ⵉⵊⴰⵔⵔⴻⴱ ⴰⵔⴻⴱⴱⵉ ⵉⴱⵔⴰⵀⵉⵎ, ⵉⵏⵏⴰ ⴰⵙ: “ⵉⴱⵔⴰⵀⵉⵎ!” ⵓⵛⴰ ⵉⵏⵏⴰ ⴰⵙ: “ⵅⵣⴰⵔ, ⵏⴻⵛⵛ ⴰⵇⴰ ⴰⵢⵉ ⴷⴰ!” 2 ⵉⵏⵏⴰ ⴰⵙ ⵏⴻⵜⵜⴰ: “ⴽⵙⵉ ⴰⵢⴻⵏⵏⵉ ⵏ ⵎⵎⵉⵛ, ⵡⴻⵏⵏⵉ ⵜⴻⵅⵙⴻⴷ, ⵉⵙⵃⴰⵇ, ⵓⵛⴰ ⵔⵓⵃ ⵖⴰⵔ ⵜⴻⵎⵎⵓⵔⵜ ⵏ ⵎⵓⵔⵉⵢⴰ ⵓⵛⴰ ⵜⵇⴻⴷⴷⵎⴻⴷ ⵜ ⴷⵉⵏ ⴷ ⵜⴰⵖⵔⴰⵚⵜ ⵅ ⵢⵉⵊⵊ ⵏ ⵡⴻⴷⵔⴰⵔ ⵊⴰⵔ ⵉⴷⵓⵔⴰⵔ ⵉ ⴷ ⴰⵛ ⵖⴰ ⵉⵏⵉⵖ.” ◘22:2 ⵄⴱⵔ. 11:17. 3 ⵉⴽⴽⴰⵔ ⵉⴱⵔⴰⵀⵉⵎ ⵣⵉⵛ, ⵉⵃⴻⵣⵣⴻⵎ ⵉ ⵡⴻⵖⵢⵓⵍ ⵏⵏⴻⵙ ⵓⵛⴰ ⵉⴽⵙⵉ ⴰⴽⵉⴷⴻⵙ ⵜⵏⴰⵢⴻⵏ ⵏ ⵉⵎⵙⴻⵅⵅⴰⵔⴻⵏ ⵏⵏⴻⵙ ⴷ ⵎⵎⵉⵙ ⵉⵙⵃⴰⵇ. ⵉⵇⴻⵙⵙ ⴰⴽⴻⵛⵛⵓⴹ ⵉ ⵜⴻⵡⵀⵉⴱⵜ ⵏ ⵜⵖⴰⵔⵚⵜ, ⵉⴽⴽⴰⵔ, ⵉⵔⵓⵃ ⴷⴻⴳ ⵡⴻⴱⵔⵉⴷ ⵖⴰⵔ ⵡⴻⵎⵛⴰⵏ ⵉ ⴷ ⴰⵙ ⵉⵏⵏⴰ ⴰⵔⴻⴱⴱⵉ. 4 ⴷⴻⴳ ⵡⴰⵙⵙ ⵡⵉⵙⵙ ⵜⵍⴰⵜⴰ ⵉⵙⵙⴳⴻⵄⵄⴻⴷ ⵉⴱⵔⴰⵀⵉⵎ ⵜⴰⵎⵓⵖⵍⵉ ⵏⵏⴻⵙ ⵓⵛⴰ ⵉⵥⵔⴰ ⴰⵎⵛⴰⵏ ⵣⵉ ⵍⴰⴳⴳⵯⴰⵊ. 5 ⵉⵏⵏⴰ ⵉⴱⵔⴰⵀⵉⵎ ⵉ ⵉⵎⵙⴻⵅⵅⴰⵔⴻⵏ ⵏⵏⴻⵙ: “ⵔⴰⵊⴰⵎ ⴷⴰ ⴰⴽ-ⴷ ⵡⴻⵖⵢⵓⵍ, ⵏⴻⵛⵛ ⴷ ⵓⵃⴻⵏⵊⵉⵔ ⴰⴷ ⵏⵔⴰⵃ ⴷⵉⵀⴰ, ⴰⴷ ⵏⴻⵙⵊⴻⴷ. ⴰⵡⴰⵔⵏⵉ ⴰⵙ ⴰⴷ ⵖⴰⵔⵡⴻⵎ ⴷⴷ-ⵏⴻⵄⵇⴻⴱ.” 6 ⵉⴽⵙⵉ ⵉⴱⵔⴰⵀⵉⵎ ⴰⴽⴻⵛⵛⵓⴹ ⵉ ⵡⴻⵛⵎⴰⴹ ⵏ ⵜⵖⴰⵔⵚⵜ, ⵉⵙⵙⴰⵔⵙ ⵉ-ⵜ ⵅ ⵎⵎⵉⵙ ⵉⵙⵃⴰⵇ ⵓ ⵏⴻⵜⵜⴰ ⵙ ⵢⵉⵅⴻⴼ ⵏⵏⴻⵙ ⵉⴽⵙⵉ ⵙ ⵓⴼⵓⵙ ⵏⵏⴻⵙ ⵜⵉⵎⴻⵙⵙⵉ ⴷ ⵜⵅⴻⴷⵎⴻⵛⵜ, ⵓⵛⴰ ⴰⵎⵎⵓ ⵉ ⵔⵓⵃⴻⵏ ⵏⵉⵜⵏⵉ ⵙ ⵜⵏⴰⵢⴻⵏ ⵉⴷⵙⴻⵏ. 7 ⵅⴻⵏⵏⵉ ⵉⵙⵙⵉⵡⴻⵍ ⵉⵙⵃⴰⵇ ⴰⴽ-ⴷ ⵉⴱⵔⴰⵀⵉⵎ ⴱⴰⴱⴰⵙ, ⵉⵏⵏⴰ: “ⴱⴰⴱⴰ ⵉⵏⵓ!” ⵉⵏⵏⴰ ⵏⴻⵜⵜⴰ: “ⵅⵣⴰⵔ, ⵏⴻⵛⵛ ⴰⵇⴰ ⴰⵢⵉ ⴷⴰ, ⵎⵎⵉ!” ⵓⵛⴰ ⵉⵏⵏⴰ ⵏⴻⵜⵜⴰ: “ⵅⵣⴰⵔ, ⴰⵇⴰ ⴷⴰ ⵜⵉⵎⴻⵙⵙⵉ ⴷ ⵓⴽⴻⵛⵛⵓⴹ, ⵎⴰⵛⴰ ⵎⴰⵏⵉ ⵉⴵⴰ ⵉⵣⵎⴰⵔ ⵉ ⵜⵖⴰⵔⵚⵜ?” ◘22:7 ⵢⵃ. 1:29, 36 8 ⵉⵏⵏⴰ ⵉⴱⵔⴰⵀⵉⵎ: “ⴰⵔⴻⴱⴱⵉ ⵙⵉⵎⴰⵏⵜ ⵏⵏⴻⵙ ⴰⴷ ⵉⵙⵙⴰⵔⵣⴻⵇ ⵙ ⵢⴻⵣⵎⴰⵔ ⵉ ⵜⵖⴰⵔⵚⵜ, ⴰ ⵎⵎⵉ!” ⵓⵛⴰ ⴰⵎⵎⵓ ⵉ ⵔⵓⵃⴻⵏ ⵙ ⵜⵏⴰⵢⴻⵏ ⵉⴷⵙⴻⵏ 9 ⵓⵛⴰ ⵉⵡⴹⴻⵏ ⵖⴰⵔ ⵡⴻⵎⵛⴰⵏ ⵏⵏⵉ ⵉ ⴷ ⴰⵙ ⵉⵏⵏⴰ ⴰⵔⴻⴱⴱⵉ. ⴷⵉⵏ ⵉ ⵉⴱⵏⴰ ⵉⴱⵔⴰⵀⵉⵎ ⵉⵊⵊ ⵏ ⵓⵄⴰⵍⵟⴰⵔ ⵓⵛⴰ ⵉⵄⴷⴻⵍ ⴰⴽⴻⵛⵛⵓⴹ, ⵉⵛⴰⵔⴼ ⵎⵎⵉⵙ ⵉⵙⵃⴰⵇ ⵓⵛⴰ ⵉⵙⵙⴰⵔⵙ ⵉ-ⵜ ⵅ ⵓⵄⴰⵍⵟⴰⵔ ⵅ ⵉⴽⴻⵛⵡⴰⴹ. ◘22:9 ⵢⴰⵄ. 2:21. 10 ⵅⴰⵙ ⵓⵛⴰ ⵉⵙⵙⵡⵉⵥⵥⴻⴹ ⵉⴱⵔⴰⵀⵉⵎ ⴰⴼⵓⵙ ⵏⵏⴻⵙ ⵓⵛⴰ ⵉⴽⵙⵉ-ⴷⴷ ⵜⴰⵅⴻⴷⵎⴻⵛⵜ, ⵃⵉⵎⴰ ⴰⴷ ⵉⵖⴰⵔⵚ ⵉ ⵎⵎⵉⵙ. 11 ⵎⴰⵛⴰ ⵍⵎⴰⵍⴰⴽ ⵏ ⵙⵉⴷⵉ ⵉⵍⴰⵖⴰ ⴰⵙ-ⴷⴷ ⵣⴻⴳ ⵓⵊⴻⵏⵏⴰ, ⵉⵏⵏⴰ ⴰⵙ: “ⵉⴱⵔⴰⵀⵉⵎ, ⵉⴱⵔⴰⵀⵉⵎ!” ⵏⴻⵜⵜⴰ ⵉⵏⵏⴰ: “ⵏⴻⵛⵛ ⴰⵇⴰ ⴰⵢⵉ ⴷⴰ!” 12 ⵅⴻⵏⵏⵉ ⵉⵏⵏⴰ ⴰⵙ: “ⵡⴰⵔ ⵙⵡⵉⵥⵥⵉⴹ ⴰⴼⵓⵙ ⵏⵏⴻⵛ ⵖⴰⵔ ⵓⵃⴻⵏⵊⵉⵔ. ⵡⴰⵔ ⴷ ⵜⵜⴻⴳⴳ ⵛⴰ, ⵎⵉⵏⵣⵉ ⵍⴻⵅⵅⵓ ⴰⵇⴰ ⵙⵙⵏⴻⵖ ⴱⴻⵍⵍⵉ ⵜᵉⵜⵜⴻⴳⴳⵯⴻⴷⴻⴷ ⴰⵔⴻⴱⴱⵉ ⵓ ⵡⴰⵔ ⵅⴰⴼⵉ ⵜⴻⵙⵙⵄⵉⵣⵣⴻⴷ ⴰⵢⴻⵏⵏⵉ ⵏ ⵎⵎⵉⵛ.” 13 ⵉⵙⵙⴳⴻⵄⵄⴻⴷ ⵉⴱⵔⴰⵀⵉⵎ ⵜⵉⵟⵟⴰⵡⵉⵏ ⵏⵏⴻⵙ, ⵓ ⵅⵣⴰⵔ, ⴰⵇⴰ ⴰⵡⴰⵔⵏⵉ ⴰⵙ ⵜⵓⵖⴰ ⵉⵊⵊ ⵏ ⵉⵛⴰⵔⵔⵉ ⵉⵇⵇⴻⵏ ⵖⴰⵔ ⵛⴱⴰⵔⵇ ⵣⴻⴳ ⵡⴰⵛⵛⴰⵡⴻⵏ ⵏⵏⴻⵙ. ⵢⵓⵢⵓⵔ ⵉⴱⵔⴰⵀⵉⵎ ⴷⵉⵏⵏⵉ, ⵉⵟⵟⴻⴼ ⵉⵛⴰⵔⵔⵉ ⵓⵛⴰ ⵉⴳⴳⴰ-ⵉ-ⵜ ⴷ ⵜⴰⵖⴰⵔⵚⵜ ⴷⴻⴳ ⵡⴻⵎⵛⴰⵏ ⵏ ⵎⵎⵉⵙ. ◼22:13 ⴰⵛⵛⴰⵡⴻⵏ-ⵏⵉⵖ ‘ⵉⵇⵉⵛⵛⴰⵡⴻⵏ’. 14 ⵉⵍⴰⵖⴰ ⵉⴱⵔⴰⵀⵉⵎ ⵉⵙⴻⵎ ⵏ ⵡⴻⵎⵛⴰⵏ ⵏⵏⵉ: “ⵙⵉⴷⵉ ⴰⴷ ⵉⵙⵙⴰⵔⵣⴻⵇ!” ⵙ ⵓⵢⴻⵏⵏⵉ ⵉⵇⵇⴰⵔ ⴱⵏⴰⴷⴻⵎ ⴰⵍ ⴰⵙⵙ-ⴰ: “ⴷⴻⴳ ⵡⴻⴷⵔⴰⵔ ⵏ ⵙⵉⴷⵉ ⴰⴷ ⵢⵉⵍⵉ ⵢⴰⵔⵣⴻⵇ!” ◼22:14 ⴰⴷ ⵉⵙⵙⴰⵔⵥⴻⵇ ... ⴰⴷ ⵉⵜⵜⵡⴰⵙⵙⴰⵔⵥⴻⵇ-ⵙ ⵜⵄⵉⴱⵔⴰⵏⵉⵜ ‘ⴰⴷ ⵉⵥⴰⵔ ... ⴰⴷ ⵉⵜⵜⵡⴰⵥⴰⵔ’. ⴰⴼⴻⵙⵙⴰⵔ -ⵡⴰ ⴷ ⴰⴷⵔⴰⵔ ‘ⵎⵓⵔⵉ-ⵢⴰⵀ’, ⴰⵎⵛⴰⵏ ⵏⵏⵉ ⵉ ⵖⴰ ⵉⵙⵙⵛⴻⵏ ⴰⵔⴻⴱⴱⵉ (ⴰⵄⵡⴷ. 12:11) ⴷ ⴰⵎⵛⴰⵏ ⵏ ⵣⵥⴰⵡⴻⵛⵜ ⵉⵇⴻⴷⴷⵙⴻⵏ ⵏⵏⵉ ⵜⵓⵖⴰ ⴷⵉⵏ ⴷⴻⴳ ⵡⵓⵙⵙⴰⵏ ⴰⵡⴰⵔⵏⵉ ⵎⴰⵏ ⴰⵢⴰ. ⴰⴷ ⵜⴰⵖ ⵜⵓⵖⴰ ⴰⵎⵛⴰⵏ-ⴰ ⵓⵍⴰ ⴷ ⴰⵎⵛⴰⵏ ⵎⴰⵏⵉ ⵜⵓⵖⴰ ⵉⵥⴻⴷⴷⴻⵖ ⵎⴰⵍⴽⵉⵚⴰⴷⵉⵇ, ⴰⵊⴻⴵⵉⴷ ⵏ ⵙⴰⵍⵉⵎ, ⵉⵅⵙ ⴰⴷ ⵢⵉⵏⵉ ⵜⴰⵙⵖⴰⵔⵜ ⵏ ⵡⴻⴷⵔⴰⵔ ⵏⵏⵉ ⵉⴵⴰⵏ ⵖⴰⵔ ⵛⵛⴰⵎⴰⵍ, ⵜⴻⵏⵏⵉ ⵉⴷⴻⵡⵍⴻⵏ ⴷ ⴰⴷⵔⴰⵔ ⵏ ⵣⵥⴰⵡⴻⵛⵜ ⵉⵇⴻⴷⴷⵙⴻⵏ. ⵜⴰⵙⵖⴰⵔⵜ ⵏ ⵍⵊⴰⵏⵓⴱ ⵏ ⵡⴻⴷⵔⴰⵔ ⵜⵓⵖⴰ ⴷ ⵜⴰⵏⴷⵉⵏⵜ ⵏ ⴷⴰⵡⵓⴷ. ⴷⴰⵡⵓⴷ ⵉⵟⵟⴻⴼ ⵍⴱⵓⵔⵊ ⵏ ⴰⵢⵜ ⵏ ⵢⴰⴱⵓⵙ ⵏⵏⵉ ⵉⴵⴰⵏ ⵅ ⵡⴻⴷⵔⴰⵔ-ⴰ (1 ⵉⵊ. 8:1, 1 ⵉⵎ. 11:5, 2 ⵚⵎ. 5:6, 7, 9). ⴰⵡⴰⵔⵏⵉ ⴰⵙ ⵉⵙⵖⴰ ⴷⴰⵡⵓⴷ ⵜⴰⵙⵖⴰⵔⵜ ⵏ ⵛⵛⴰⵎⴰⵍ ⵏ ⵡⴻⴷⵔⴰⵔ 'ⵎⵓⵔⵉ-ⵢⴰⵀ' ⵥⵉ ⴰⵔⴰⵡⵏⴰ, ⵡⴻⵏⵏⵉ ⵖⴰⵔ ⵉⴵⴰ ⵉⵊⵊ ⵏ ⵡⴻⵏⴷⵔⴰⵔ ⵅ ⵡⴻⴷⵔⴰⵔ-ⴰ ⵎⴰⵏⵉ ⵜⵓⵖⴰ ⴷⴷ-ⵉⵙⵙⴻⵀⵡⴰ ⵍⵎⴰⵍⴰⴽ ⵏ ⵙⵉⴷⵉ ⴰⴼⵓⵙ ⵏⵏⴻⵙ ⴰⵍⴰⵎⵉ ⵜⴱⴻⴷⴷ ⵊⵊⵔⵉⵃⴻⵛⵜ ⵏⵏⵉ ⵉⵙⵙⵉⵡⴻⴹ ⵍⵎⴰⵍⴰⴽ ⵏ ⵙⵉⴷⵉ ⵅ ⵉⵙⵔⴰⵉⵍ ⵏⵏⵉ ⴷⴷ ⵢⵓⵙⵉⵏ ⵥⵉ ⵙⵙⵉⴱⴱⴻⵜ ⵏ ⵍⴻⵃⵙⴰⴱ ⵏ ⵍⴳⴻⵏⵙ ⵏⵏⵉ ⵉⴳⴳⴰ ⴷⴰⵡⵓⴷ ⵙ ⵢⵉⵅⴻⴼ ⵏⵏⴻⵙ, ⴱⵍⴰ ⵎⴰ ⵉⵜⵜⴰⵔ ⵙⵉⴷⵉ (ⵅⵥⴰⵔ 2 ⵚⵎ. 24). ⵅⵎⵉ ⵉ ⵖⴰ ⵏⵖⴰⵔ 2 ⵚⵎ. 5:7, 1 ⵉⵊ. 8:1 ⵓ ⵉⵥⵀⴷ. 2:6 ⵏᵉⵜⵜⴰⴼ ⴰⵇⴰ ⵏⵥⴻⵎⵎⴰⵔ ⴰⴷ ⵏⴻⵃⵙⴻⴱ ⴰⴷⵔⴰⵔ-ⴰ 'ⵎⵓⵔⵉ-ⵢⴰⵀ' ⴷ ⴰⴷⵔⴰⵔ 'ⵙⵉⵃⵢⵓⵏ', ⴰⴷⵔⴰⵔ ⵉⵇⴻⴷⴷⵙⴻⵏ, ⵎⴰⵏⵉ ⵙⵙⴰⵔⵙⴻⵏ ⵜⵜⴰⴱⵓⵜ ⴷⴻⴳ ⵡⵓⵙⵙⴰⵏ ⵏ ⴷⴰⵡⵓⴷ (2 ⵚⵎ. 6:17). ⵉⴷⵡⴻⵍ ⵙⵉⵃⵢⵓⵏ ⴷ ⵉⵙⴻⵎ ⴰⵏⴻⴳⴳⴰⵔ ⵏ ⵎⴰⵔⵔⴰ ⴰⴷⵔⴰⵔ, ⵓⵍⴰ ⴷ ⵉⵙⴻⵎ ⵉ ⵜⴻⵏⴷⵉⵏⵜ ⵏ ⵓⵔⵛⴰⵍⵉⵎ ⵎⴰⵔⵔⴰ. ⵅⵥⴰⵔ ⵄⴰⵡⴻⴷ ⴰⴼⴻⵙⵙⴰⵔ ⵖⴰⵔ 2 ⵉⵊ. 19:31. 15 ⵉⵍⴰⵖⴰ-ⴷⴷ ⵍⵎⴰⵍⴰⴽ ⵏ ⵙⵉⴷⵉ ⵡⵉⵙⵙ ⵎⴰⵔⵜⴰⵢⴻⵏ ⵣⴻⴳ ⵓⵊⴻⵏⵏⴰ ⵅ ⵉⴱⵔⴰⵀⵉⵎ, 16 ⵉⵏⵏⴰ: “ⵎⵉⵏⵣⵉ ⵜⴻⴳⴳⵉⴷ ⵎⴰⵏ ⴰⵢⴰ ⵓⵛⴰ ⵡⴰⵔ ⵅⴰⴼⵉ ⵜᵉⵟⵟⵉⴼⴻⴷ ⴰⵢⴻⵏⵏⵉ ⵏ ⵎⵎⵉⵛ, ⴰⴷ ⵊⵊⴰⴵⴻⵖ ⵅ ⵙⵉⵎⴰⵏⵜ ⵉⵏⵓ, ⵉⵇⵇⴰⵔ ⵙⵉⴷⵉ, ◘22:16 ⵍⴽ. 1:73; ⵄⴱⵔ. 6:13. 17 ⴰⵇⴰ ⴰⴷ ⵛⴻⴽ ⴱⴰⵔⴽⴻⵖ ⴰⵟⵟⴰⵙ ⵓⵛⴰ ⴰⴷ ⴽⴻⵜⵜⴰⵔⴻⵖ ⵣⵣⴰⵔⵉⵄⴻⵜ ⵏⵏⴻⵛ ⴰⵟⵟⴰⵙ ⴰⵎ ⵢⵉⵜⵔⴰⵏ ⵏ ⵓⵊⴻⵏⵏⴰ ⵓ ⴰⵎ ⵢⵉⵊⴷⵉ ⵅ ⵜⵎⴰ ⵏ ⵍⴻⴱⵃⴰⵔ. ⵣⵣⴰⵔⵉⵄⴻⵜ ⵏⵏⴻⵛ ⴰⴷ ⵜᵉⵟⵟⴻⴼ ⵜⴰⵡⵡⴰⵔⵜ ⵏ ⵍⵄⴻⴷⵢⴰⵏ ⵏⵏⴻⵙ ⴷ ⵍⵡⴰⵔⵜ ◘22:17 ⴰⵎⵥ. 24:60. 18 ⵓ ⴷⵉ ⵣⵣⴰⵔⵉⵄⴻⵜ ⵏⵏⴻⵛ ⴰⴷ ⵜⵜⵡⴰⴱⴰⵔⴽⴻⵏ ⵎⴰⵔⵔⴰ ⵍⴻⴳⵏⵓⵙ ⵏ ⵜⴻⵎⵎⵓⵔⵜ, ⵎⵉⵏⵣⵉ ⵜⴻⵙⵍⵉⴷ ⵉ ⵜⵎⵉⵊⵊⴰ ⵉⵏⵓ.” ◘22:18 ⴰⵎⵥ. 12:3; 18:18; 26:4; ⵍⴻⵅ. 3:25; ⴳⴰⵍ. 3:8. 19 ⵅⴻⵏⵏⵉ ⵉⵄⵇⴻⴱ-ⴷⴷ ⵉⴱⵔⴰⵀⵉⵎ ⵖⴰⵔ ⵉⵎⵙⴻⵅⵅⴰⵔⴻⵏ ⵏⵏⴻⵙ. ⵏⵉⵜⵏⵉ ⴽⴽⴰⵔⴻⵏ ⵓⵛⴰ ⵔⵓⵃⴻⵏ ⵊⵎⵉⵄ ⴷⴻⴳ ⵡⴻⴱⵔⵉⴷ ⵖⴰⵔ ⴱⵉ’ⵔ-ⵙⴻⴱⵄⴰ, ⵓⵛⴰ ⵉⴳⴳⴰ ⵉⴱⵔⴰⵀⵉⵎ ⴰⴷ ⵉⵣⴷⴻⵖ ⴷⵉ ⴱⵉ’ⵔ-ⵙⴻⴱⵄⴰ.

20 ⴰⵡⴰⵔⵏⵉ ⵎⴰⵏ ⴰⵢⴰ ⵉⵎⵙⴰⵔ ⴰⵇⴰ ⵅⴻⴱⴱⴰⵔⴻⵏ ⵉⴱⵔⴰⵀⵉⵎ, ⵏⵏⴰⵏ ⴰⵙ: “ⵅⵣⴰⵔ, ⵄⴰⵡⴻⴷ ⵎⵉⵍⴽⴰ ⵜⵓⵔⵓⵡ-ⴷⴷ ⵉⵃⴻⵏⵊⵉⵔⴻⵏ ⵉ ⵏⴰⵃⵓⵔ ⵓⵎⴰⵛ: 21 ⵄⵓⵚ, ⴰⵎⴻⵏⵣⵓ ⵏⵏⴻⵙ, ⴷ ⴱⵓⵣ ⵓⵎⴰⵙ, ⴷ ⵇⴰⵎⵓⵡⵉⵍ ⵡⴻⵏⵏⵉ ⴷ ⴱⴰⴱⴰⵙ ⵏ ⴰⵔⴰⵎ, 22 ⴷ ⴽⴰⵙⴰⴷ ⴷ ⵃⴰⵣⵓ ⴷ ⴼⵉⵍⴷⴰⵛ ⴷ ⵢⵉⴷⵍⴰⴼ ⴷ ⴱⵉⵜⵓⵡⵉⵍ.” 23 ⴱⵉⵜⵓⵡⵉⵍ ⵉⵊⵊⴰ-ⴷⴷ ⵔⵉⴼⵇⴰ. ⵜⵎⴻⵏⵢⴰ ⴰⵢⴰ ⵉ ⴷⴷ-ⵜⵓⵔⵓⵡ ⵎⵉⵍⴽⴰ ⵉ ⵏⴰⵃⵓⵔ, ⵓⵎⴰⵙ ⵏ ⵉⴱⵔⴰⵀⵉⵎ. 24 ⵓ ⵜⴰⵢⵢⴰ ⵏⵏⴻⵙ, ⵜⴻⵏⵏⵉ ⵓⵎⵉ ⵇⵇⴰⵔⴻⵏ ⵔⵉⵄⵓⵎⴰ, ⵜⵓⵔⵓⵡ ⴰⵙ-ⴷⴷ ⵄⴰⵡⴻⴷ ⵟⴰⴱⴰⵃ ⴷ ⵊⴰⵃⴰⵎ ⴷ ⵜⴰⵃⴰⵛ ⴷ ⵎⴰⵄⴽⴰ. ◼22:24 ⵜⴰⵢⵢⴰ ⵏⵏⴻⵙ-ⵉⵅⵙ ⴰⴷ ⵢⵉⵏⵉ ‘ⵜⴰⵢⵢⴰ ⵏ ⵏⴰⵃⵓⵔ’.