1 “ⴰⵍⴰⵎⵉ ⵜⵓⵖⴰ ⵉⵙⵔⴰⵉⵍ ⵄⴰⴷ ⴷ ⴰⵃⴻⵏⵊⵉⵔ, ⵜⵓⵖⴰ ⵜⵜⴻⵅⵙⴻⵖ ⵜ ⵓ ⵏⴻⵛⵛ ⵍⴰⵖⵉⵖ-ⴷⴷ ⵉ ⵎⵎⵉ ⵣⵉ ⵎⵉⵚⵔⴰ. ◘11:1 ⵓⴼ. 4:22-23: ⵎⵜ. 2:15 2 ⵓⵍⴰ ⴷ ⵉⵏⴰⴱⵉⵢⵢⴻⵏ ⵉⵏⵓ ⵍⴰⵖⴰⵏ ⵅⴰⵙⴻⵏ, ⵎⴰⵛⴰ ⵅⴻⵏⵏⵉ ⴰⴳⴳⵯⴻⵊⴻⵏ ⵏⵉⵜⵏⵉ ⴷⴻⵖⵢⴰ ⵅ ⵉⵖⴻⵎⴱⴰⴱ ⵏⵙⴻⵏ ⵎⴰⵃⴻⵏⴷ ⴰⴷ ⴰⵡⵢⴻⵏ ⵜⵉⵖⴰⵔⵚⴰ ⵉ ‘ⵉⴱⴰⵄⵍⴻⵏ’ ⴷ ⵜⴻⵡⵀⵉⴱⵉⵏ ⵏ ⵍⴻⴱⵅⵓⵔ ⵉ ⵍⴻⵅⵢⴰⵍⴰⵜ ⵏⵙⴻⵏ ⵉⵏⴻⵇⵛⴻⵏ. 3 ⴷ ⵏⴻⵛⵛ ⵉ ⵜⵓⵖⴰ ⵉⵙⵙⴻⵍⵎⴰⴷⴻⵏ ⵜⵉⵛⵍⵉ ⵉ ⵉⴼⵔⴰⵢⵉⵎ, ⵡⴰⵀ, ⵏⴻⵜⵜⴰ ⵉⴽⵙⵉ ⵜⴻⵏ ⵅ ⵉⵖⴰⴵⴻⵏ ⵏⵏⴻⵙ, ⵎⴰⵛⴰ ⵏⵉⵜⵏⵉ ⵡⴰⵔ ⵙⵙⵉⵏⴻⵏ ⵛⴰ ⴰⵇⴰ ⵏⴻⵛⵛ ⴷ ⵡⴻⵏⵏⵉ ⵉ ⵜⴻⵏ ⵉⵙⵙⴳⴻⵏⴼⴰⵏ. 4 ⵙ ⵜⴻⵙⵖⵓⵏⵉⵏ ⵏ ⴱⵏⴰⴷⴻⵎ ⵊⴻⴱⴷⴻⵖ ⵜⴻⵏ-ⴷⴷ ⵖⴰⵔⵉ, ⵙ ⵜⵎⵓⵔⴰⵔ ⵏ ⵜⵎⴻⵅⵙⵉⵡⵜ, ⵓ ⵏⴻⵛⵛ ⵜⵓⵖⴰ ⵉ ⵏⵉⵜⵏⵉ ⴰⵎ ⵡⴻⵏⵏⵉ ⴷⴷ-ⵉⵙⵙⴳⴻⵄⵄⴰⴷⴻⵏ ⵣⵣⴰⵢⵍⴻⵜ ⵣⴻⴳ ⵉⵖⴻⵙⵎⵉⵔⴻⵏ ⵏⵙⴻⵏ, ⵓ ⵏⴻⵛⵛ ⵙⵙⵡⵉⵥⵥⴹⴻⵖ ⴰⵙ ⵉⴼⴰⵙⵙⴻⵏ ⵉⵏⵓ ⵎⴰⵃⴻⵏⴷ ⴰⴷ ⴰⵙ ⵡⵛⴻⵖ ⴰⴷ ⵉⵛⵛ.”

5 “ⵏⴻⵜⵜⴰ ⵡⴰⵔ ⴷⴷ-ⵉⵜⵜⴰⵔⵔⵉ ⵙ ⵓⵣⴻⴵⵉⴼ ⵖⴰⵔ ⵎⵉⵚⵔⴰ. ⴰⵛⵛⵓⵔ, ⵏⴻⵜⵜⴰ ⴰⴷ ⵢⵉⵍⵉ ⴷ ⴰⵊⴻⴵⵉⴷ ⵏⵏⴻⵙ, ⵎⴰⵖⴰⵔ ⵏⵉⵜⵏⵉ ⵓⴳⵉⵏ ⴰⴷ ⴷⴷ-ⴷⴻⵡⵍⴻⵏ. 6 ⵙⵙⵉⴼ ⴰⴷ ⵉⵏⵏⴻⴹ ⴷⵉ ⵜⵏⴻⴷⴷⴰⵎ ⵏⵙⴻⵏ ⵓⵛⴰ ⴰⴷ ⵢⴰⵔⴻⴷⴷⴻⴵ ⵉⵄⵓⵎⴰⴷ ⵏⵏⴻⵙ ⵏ ⵓⴱⴻⵍⵍⴻⵄ ⵏ ⵜⴻⵡⵡⵓⵔⴰ ⵓ ⴰⴷ ⵜⴻⵏ ⵢⴻⵛⵛ ⵣⵉ ⵙⵙⵉⴱⴱⴻⵜ ⵏ ⵉⵅⴰⵔⵔⵉⵚⴻⵏ ⵏ ⵢⵉⵅⴻⴼ ⵏⵙⴻⵏ. 7 ⵎⴰⵖⴰⵔ ⵍⴳⴻⵏⵙ ⵉⵏⵓ ⵉⵇⵇⵉⵎ ⵉⵜⵜⵏⴻⵇⵍⴰⴱ ⵅⴰⴼⵉ. ⵏⵉⵜⵏⵉ ⵜⵜⵍⴰⵖⴰⵏ ⵊⵎⵉⵄ ⵖⴰⵔ ⵙⴻⵏⵏⴻⵊ, ⵎⴰⵛⴰ ⵏⴻⵜⵜⴰ ⵡⴰⵔ ⵜⴻⵏ ⵉⵙⵙⵄⵓⴵⵉ ⵛⴰ.”

8 “ⵎⴰⵎⵎⴻⵛ ⵣⴻⵎⵎⴰⵔⴻⵖ ⵏⴻⵛⵛ ⴰⴷ ⵛⴻⴽ ⵙⴻⵍⵍⵎⴻⵖ, ⵉⴼⵔⴰⵢⵉⵎ? ⵎⴰⵎⵎⴻⵛ ⵣⴻⵎⵎⴰⵔⴻⵖ ⵏⴻⵛⵛ ⴰⴷ ⵛⴻⴽ ⵙⴻⵍⵍⵎⴻⵖ, ⵉⵙⵔⴰⵉⵍ? ⵎⴰⵎⵎⴻⵛ ⵣⴻⵎⵎⴰⵔⴻⵖ ⵏⴻⵛⵛ ⴰⴷ ⵛⴻⴽ ⵙⴻⵍⵍⵎⴻⵖ ⴰⵎ ⴰⴷⴰⵎⴰ, ⴰⴷ ⵛⴻⴽ ⴳⴳⴻⵖ ⴷ ⴰⵎⴻⴷⵢⴰ ⴰⵎ ⵚⴰⴱⵓⵢⵉⵎ? ⵓⵍ ⵉⵏⵓ ⵉⵏⵏⴻⵃⵡⴻⵍ ⵣⵣⴰⵢⵉ, ⴰⵣⵉⴵⴻⵣ ⵉⵏⵓ ⵉⵜⵜⴻⵅⵜⵓⵅ ⵊⵎⵉⵄ. ◘11:8 ⴰⵎⵥ. 19:24; ⴰⵄⵡⴷ. 29:22 9 ⵏⴻⵛⵛ ⵡⴰⵔ ⵜⴻⵊⵊⵉⵖ ⴰⴷ ⴰⵔⵅⵓⵖ ⵍⵃⴰⴷⵓⵇ ⵏ ⵡⴻⵖⴹⴰⴱ ⵉⵏⵓ, ⵏⴻⵛⵛ ⵡⴰⵔ ⴷⴷ-ⴷⴷⵉⴽⴽⵡⵉⵍⴻⵖ ⵛⴰ ⵎⴰⵃⴻⵏⴷ ⴰⴷ ⴰⵔⴻⴷⴷⴵⴻⵖ ⵉⴼⵔⴰⵢⵉⵎ, ⵎⴰⵖⴰⵔ ⵏⴻⵛⵛ ⴷ ⴰⵔⴻⴱⴱⵉ ⵓ ⵏⴻⵛⵛ ⵡⴰⵔ ⴵⵉⵖ ⴷ ⴱⵏⴰⴷⴻⵎ, ⵏⴻⵛⵛ ⴷ ⴰⵎⵇⴻⴷⴷⴰⵙ ⴷⵉ ⵍⵡⴻⵙⵟ ⵏⵏⴻⵛ, ⵡⴰⵔ ⴷⴷ-ⵜⵜⵉⵙⴻⵖ ⵛⴰ ⵙ ⵜⵎⴻⵙⵙⵉ ⵏ ⵍⵖⴰⴹⴰⴱ ⵉⵏⵓ. 10 ⵏⵉⵜⵏⵉ ⴰⴷ ⴳⴳⵓⵔⴻⵏ ⴰⵡⴰⵔⵏⵉ ⵉ ⵙⵉⴷⵉ. ⵏⴻⵜⵜⴰ ⴰⴷ ⵉⵙⵙⵎⵓⵀⵔⵓⵜ ⴰⵎ ⵢⵉⵊⵊ ⵏ ⵡⴻⵢⵔⴰⴷ, ⵎⴰⵖⴰⵔ ⴰⴷ ⵉⵙⵙⵎⵓⵀⵔⵓⵜ ⵏⴻⵜⵜⴰ ⵓⵛⴰ ⵉⵃⴻⵏⵊⵉⵔⴻⵏ ⴰⴷ ⴷⴷ-ⴰⵙⴻⵏ ⵜⵜⴰⵔⵊⵉⵊⵉⵏ ⵣⵉ ⵜⵎⴰ ⵏ ⵍⴻⴱⵃⴰⵔ. 11 ⴰⵎ ⵉⵊⴹⴰⴹ ⴰⴷ ⴷⴷ-ⴰⵙⴻⵏ ⵜⵜⴰⵔⵊⵉⵊⵉⵏ ⵣⵉ ⵜⴻⵎⵎⵓⵔⵜ ⵏ ⵎⵉⵚⵔⴰ ⵓ ⴰⵎ ⵜⴻⴷⴱⵉⵔⵜ ⵣⵉ ⵜⴻⵎⵎⵓⵔⵜ ⵏ ⴰⵛⵛⵓⵔ ⵓ ⵏⴻⵛⵛ ⴰⴷ ⵜⴻⵏ ⵙⵙⵣⴻⴷⴻⵖ ⴷⵉ ⵜⵓⴷⵔⵉⵏ ⵏⵙⴻⵏ, ⵉⵇⵇⴰⵔ ⵙⵉⴷⵉ.”