1 “ⵉⵙⵔⴰⵉⵍ ⴷ ⵉⵛⵜ ⵏ ⵜⵣⴰⵢⴰⵔⵜ ⵜⴻⵡⵙⴻⵄ, ⵜⴻⵏⵏⵉ ⵉ ⴷⴷ ⵉⵜⵜⴰⵡⵢⴻⵏ ⵍⵖⵉⴵⴻⵜ ⵉ ⵢⵉⵅⴻⴼ ⵏⵏⴻⵙ. ⵎⴰⵎⵎⴻⵛ ⵜⵓⵖⴰ ⵍⵖⵉⴵⴻⵜ ⵏⵏⴻⵙ ⵜⴻⵎⵎⴰⵔⵏⵉ, ⴰⵎⵎⵓ ⵉ ⴷⴷ-ⵎⵎⴰⵔⴻⵏⵢⴻⵏ ⵓⵍⴰ ⴷ ⵉⵄⴰⵍⵟⴰⵔⴻⵏ ⵏⵏⴻⵙ, ⵎⴻⵛⵃⴰⵍ ⵜⴻⵛⵏⴰ ⵜⴻⵎⵎⵓⵔⵜ ⵏⵏⴻⵙ, ⴰⵎⵎⵓ ⵉ ⴳⴳⵉⵏ ⵏⵉⵜⵏⵉ ⵓⵍⴰ ⴷ ⵉⵎⴰⵢⴹⵓⵜⴻⵏ ⵉⵇⴻⴷⴷⵙⴻⵏ ⵛⵏⴰⵏ. ◘10:1 ⵃⵓⵛ. 8:11 2 ⵓⵍ ⵏⵙⴻⵏ ⴰⵇⴰ ⵉⵜⵜⵡⴰⴱⴹⴰ, ⵍⴻⵅⵅⵓ ⴰⵇⴰ ⴷⴰⵢⵙⴻⵏ ⵍⵄⵉⴱ. ⵏⴻⵜⵜⴰ ⴰⴷ ⵢⴰⵔⵥ ⵉⵄⴰⵍⵟⴰⵔⴻⵏ ⵏⵙⴻⵏ, ⵏⴻⵜⵜⴰ ⴰⴷ ⵉⵀⴷⴻⵎ ⵉⵎⴰⵢⴹⵓⵜⴻⵏ ⵏⵙⴻⵏ ⵉⵇⴻⴷⴷⵙⴻⵏ 3 ⵎⴰⵖⴰⵔ ⵍⴻⵅⵅⵓ ⵇⵇⴰⵔⴻⵏ: ‘ⵏⴻⵛⵛⵉⵏ ⵡⴰⵔ ⵖⴰⵔⵏⴻⵖ ⴱⵓ ⵓⵊⴻⴵⵉⴷ, ⵎⴰⵖⴰⵔ ⵏⴻⵛⵛⵉⵏ ⵡⴰⵔ ⵏⴻⴳⴳⵯⵉⴷ ⵛⴰ ⵙⵉⴷⵉ, ⵓ ⵄⴰⴷ ⵎⴰⵍⴰ ⵜⵓⵖⴰ ⴷⵉⵏ ⴰⵊⴻⴵⵉⴷ: ‘ⵎⵉⵏ ⵉⵣⴻⵎⵎⴰⵔ ⴰⴷ ⴰⵏⴻⵖ ⵉⴳⴳ?’ ◘10:3 ⵃⵓⵛ. 3:4 4 ⵙⵙⴰⵡⴰⵍⴻⵏ ⴰⵡⴰⵍⴻⵏ ⵉⵅⵡⴰⵏ, ⵜⵜⵊⴰⴵⴰⵏ ⵥⵓⵔ ⴰⵎ ⵜⵜⴻⴳⴳⴻⵏ ⵉⵊⵊ ⵏ ⵍⵄⴰⵀⴷ, ⵓⵛⴰ ⵍⵃⵓⴽⵎ ⵉⴷⵡⴻⵍ ⵉⵜⵜⴳⴻⵄⵄⴻⴷ ⴰⵎ ⵢⵉⵊⵊ ⵏ ⵍⴻⵄⵛⴻⴱ ⴰⵎⴻⵙⵎⵓⵎ ⴷⵉ ⵍⴻⵅⴹⵓⴹ ⵏ ⵉⵢⵢⴰⵔⴻⵏ. 5 ⵉⵎⴻⵣⴷⴰⵖ ⵏ ⵙⴰⵎⴰⵔⵢⴰ ⴰⴷ ⵏⵏⵅⴻⵍⵄⴻⵏ ⵣⵉ ⵙⵙⵉⴱⴱⴻⵜ ⵏ ⵓⵄⴻⵊⵎⵉ ⵏ ⴱⴰⵢⵜ-ⴰⵡⴰⵏ, ⵎⴰⵖⴰⵔ ⵍⴳⴻⵏⵙ ⵏⵏⴻⵙ ⴰⴷ ⵅⴰⵙ ⵉⵛⴹⴻⵏ, ⵓⵛⴰ ⵓⵍⴰ ⴷ ⵉⴽⴻⵀⵀⴰⵏⴻⵏ ⵏⵏⴻⵙ ⴰⴷ ⵅⴰⵙ ⵛⴻⴹⵏⴻⵏ, ⵅ ⵓⵄⵓⴵⵉ ⵏⵏⴻⵙ, ⵎⴰⵖⴰⵔ ⵡⴰⵏⵉⵜⴰ ⵉⵜⵜⵡⴰⴽⴽⴻⵙ ⵣⵣⴰⵢⴻⵙ. 6 ⴰⴷ ⵜ ⴰⵡⵢⴻⵏ ⵖⴰⵔ ⴰⵛⵛⵓⵔ ⴷ ⵜⴰⵔⵣⴻⴼⵜ ⵉ ⵓⵊⴻⴵⵉⴷ ⵢⴰⵔⵉⴱ. ⵉⴼⵔⴰⵢⵉⵎ ⴰⴷ ⵉⴳⴳ ⵍⴻⴼⴹⵉⵃⴻⵜ ⵉ ⵓⵣⴻⴵⵉⴼ ⵏⵏⴻⵙ ⵓ ⵉⵙⵔⴰⵉⵍ ⴰⴷ ⵉⵙⴻⴹⵃⴰ ⵣⵉ ⵍⵇⴰⵔⴰⵔ ⵏⵏⴻⵙ. 7 ⵉⵜⵜⵡⴰⵙⵙⴻⵙⵇⴰⵔ ⵓⵊⴻⴵⵉⴷ ⵏ ⵙⴰⵎⴰⵔⵢⴰ ⴰⵎ ⵓⴽⵓⴼⴼⵓ ⵅ ⵡⵓⴷⴻⵎ ⵏ ⵡⴰⵎⴰⵏ. 8 ⴰⴷ ⵜⵜⵡⴰⵀⴻⴷⵎⴻⵏⵜ ⵍⴻⴳⵄⵓⴷⵉ ⵏ ⴰⵡⴰⵏ, ⴰⵇⴰ-ⵜⴻⵏⵜ ⴷ ⴷⴷⴻⵏⴱ ⵏ ⵉⵙⵔⴰⵉⵍ. ⵉⵙⴻⵏⵏⴰⵏⴻⵏ ⴷ ⵜⵣⴻⴳⴳⵯⴰⵔⵜ ⴰⴷ ⵓⵄⵍⴰⵏ ⵅ ⵉⵄⴰⵍⵟⴰⵔⴻⵏ ⵏⵙⴻⵏ ⵓ ⵏⵉⵜⵏⵉ ⴰⴷ ⵉⵏⵉⵏ ⵉ ⵉⴷⵓⵔⴰⵔ: ‘ⴷⵍⴻⵎ ⴰⵏⴻⵖ!’ ⵓ ⵉ ⵜⴻⵡⵔⵉⵔⵉⵏ: ‘ⵡⴹⴰⵏⵜ-ⵉ-ⴷⴷ ⵅⴰⵏⴻⵖ!’ ◘10:8 ⵉⵛⴰ. 2:19; ⵍⴽ. 23:30; ⴰⵙⴰ. 6:16; 9:6 9 ⵣⴻⴳ ⵡⵓⵙⵙⴰⵏ ⵏ ⵊⵉⴱⵄⴰ ⵜⴻⴳⴳⵉⴷ ⴷⴷⵏⵓⴱ, ⴰ ⵉⵙⵔⴰⵉⵍ. ⴷⵉⵏⵏⵉ ⵇⵇⵉⵎⴻⵏ ⵏⵉⵜⵏⵉ ⴱⴻⴷⴷⴻⵏ, ⵉⵡⴰ, ⵡⴰⵔ ⵜⴻⵏ ⵉⵍⴻⵇⵇⵉⴼ ⵍⴰⵜⴰⵔ ⵏ ⵓⵎⴻⵏⵖⵉ ⴰⴽ-ⴷ ⴰⵢⵜ ⵏ ⵍⵎⵓⵄⵚⵉⵢⵢⴻⵜ ⴷⵉ ⵊⵉⴱⵄⴰ. ◘10:9 ⵃⵓⵛ. 9:9 10 ⴰⵇⴰ ⴷⴰⵢⵉ ⵎⴻⵥⵔⵉ ⵃⵉⵎⴰ ⴰⴷ ⵜⴻⵏ ⵛⴰⵔⴼⴻⵖ ⵓ ⴰⴷ ⵅⴰⵙⴻⵏ ⵙⵙⵎⵓⵏⴻⵖ ⵍⴻⴳⵏⵓⵙ ⵅⵎⵉ ⵜⴻⵏ ⵖⴰ ⵛⴰⵔⴼⴻⵖ ⵙ ⵜⵏⴰⵢⴻⵏ ⵏ ⵉⵅⴻⵟⵟⴰⵏ ⵏⵙⴻⵏ.”

11 “ⵉⴼⵔⴰⵢⵉⵎ ⴷ ⵉⵛⵜ ⵏ ⵜⵄⴻⵊⵎⵉⵜ ⵉⵜⵜⵡⴰⴷⴰⵔⵔⴱⴻⵏ, ⵜᵉⵜⵜⴻⵅⵙ ⴰⴷ ⵜⴻⵙⵙⴰⵔⵡⴻⵜ. ⵏⴻⵛⵛ ⵄⴷⵓⵖ ⵅ ⵜⵛⵓⵏⵉ ⵏ ⵢⵉⵔⵉ ⵏⵏⴻⵙ. ⵏⴻⵛⵛ ⴰⴷ ⵏⴻⴷⵀⴻⵖ ⵉⴼⵔⴰⵢⵉⵎ, ⵢⴰⵀⵓⴷⴰ ⴰⴷ ⵉⵛⴰⵔⵣ, ⵢⴰⵄⵇⵓⴱ ⴰⴷ ⵉⵏⵇⴻⵛ ⵜⴻⵎⵎⵓⵔⵜ ⵉ ⵢⵉⵅⴻⴼ ⵏⵏⴻⵙ. ◼10:11 ⵏⴻⵛⵛ ⵄⴷⵓⵖ ⵅ ⵜⵛⵓⵏⵉ ⵏ ⵢⵉⵔⵉ ⵏⵏⴻⵙ-ⵉⵅⵙ ⴰⴷ ⵢⵉⵏⵉ ⴱⴻⵍⵍⵉ ⵉⵜⵜⵡⴰⴳⴳ ⵉⵊⵊ ⵏ ⵥⵥⴰⵢⵔⵓ ⵅ ⵢⵉⵔⵉ ⵏⵏⴻⵙ. 12 ⵣⴰⵔⵄⴻⵎ ⵜⴰⵙⴻⴳⴷⴰ ⵉ ⵢⵉⵅⴻⴼ ⵏⵡⴻⵎ, ⵎⵊⴰⵔⴻⵎ ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵎⴰⵃⴻⵏⴷ ⴰⴷ ⵣⵣⴰⵢⴻⵙ ⵜⵄⴻⵎⵎⴰⵔⴻⵎ ⴰⵇⴻⵎⵎⵓⵎ ⵏⵡⴻⵎ, ⵛⴰⵔⵣⴻⵎ ⵉⵊⵊ ⵏ ⵢⴻⵢⵢⴰⵔ ⵉⵅⵡⴰ ⵉ ⵢⵉⵅⴻⴼ ⵏⵡⴻⵎ, ⵎⵉⵏⵣⵉ ⴰⵇⴰ-ⵜ ⴷ ⵍⵃⴰⵍ ⵎⴰⵃⴻⵏⴷ ⴰⴷ ⵜⴰⵔⵣⵓⵎ ⵅ ⵙⵉⴷⵉ, ⴰⵍ ⴷⴷ ⵖⴰ ⵢⴰⵙ ⵏⴻⵜⵜⴰ ⵓ ⴰⴷ ⵢⴰⵔⵔⴰ ⵜⴰⵙⴻⴳⴷⴰ ⴰⴷ ⵅⴰⵡⴻⵎ ⵜⴻⵛⵛⴰⵜ ⴰⵎ ⵡⴻⵏⵥⴰⵔ.”◘10:12 ⵉⵔⵎ. 4:3

13 “ⴰⵇⴰ ⴽⴻⵏⵏⵉⵡ ⵜⵛⴰⵔⵣⴻⵎ ⵎⵉⵏ ⵡⴰⵔ ⵉⵃⵍⵉⵏ, ⵜⵚⴻⵢⵢⴼⴻⵎ ⵍⵎⵓⵄⵚⵉⵢⵢⴻⵜ, ⵜⴻⵛⵛⵉⵎ ⵍⵖⵉⴵⴻⵜ ⵏ ⵓⵅⴰⵔⵔⵉⵇ, ⵎⴰⵖⴰⵔ ⵛⴻⴽ ⵜᵉⵜⴻⵛⵍⴻⴷ ⵅ ⵡⴻⴱⵔⵉⴷ ⵉ ⵜⵉⵅⴹⴰⵔⴻⴷ ⵙⵉⵎⴰⵏⵜ ⵏⵏⴻⵛ, ⵅ ⵓⴱⴰⵔⵔⵓ ⵏ ⴰⵢⵜ ⵏ ⴱⵓ-ⵜⴻⵖⵔⵓⴹⵜ ⵏⵏⴻⵛ. 14 ⴰⴷ ⵉⴽⴽⴰⵔ ⵉⵊⵊ ⵏ ⴷⴷⵔⵉⵣ ⵏ ⵓⵎⴻⵏⵖⵉ ⴹⵉⴷⴷ ⵉ ⵍⴳⴻⵏⵙ ⵏⵏⴻⵛ ⵓ ⵎⴰⵔⵔⴰ ⵍⵇⴻⵍⵄⴰⵜ ⵏⵏⴻⵛ ⴰⴷ ⵜⵜⵡⴰⵀⴻⴷⵎⴻⵏⵜ ⴰⵎ ⵎⴰⵎⵎⴻⵛ ⵉⵀⴷⴻⵎ ⵛⴰⵍⵎⴰⵏ ⴱⴰⵢⵜ-ⴰⵔⴱⵉⵍ ⴷⴻⴳ ⵡⴰⵙⵙ ⵏ ⵓⵎⴻⵏⵖⵉ, ⵓⵎⵉ ⵜᵉⵜⵜⵡⴰⵍⴱⴻⵣ ⵉⵛⵜ ⵏ ⵢⴻⵎⵎⴰⵙ ⴰⴽ-ⴷ ⵉⵃⴻⵏⵊⵉⵔⴻⵏ ⵏⵏⴻⵙ. 15 ⴰⵎⵎⵓ ⵉ ⵉⴳⴳⴰ ⴱⴰⵢⵜ-ⵉⵍ ⴰⴽⵉⴷⵡⴻⵎ ⵣⵉ ⵙⵙⵉⴱⴱⴻⵜ ⵏ ⵜⵓⵄⴻⴼⴼⵏⴰ ⵏⵡⴻⵎ ⵢⵓⴵⵖⴻⵏ. ⵖⴰⵔ ⵍⴻⴼⵊⴰⵔ ⴰⴷ ⵉⵜⵜⵡⴰⵙⴻⵖⴹ ⵓⵊⴻⴵⵉⴷ ⵏ ⵉⵙⵔⴰⵉⵍ ⵙ ⵉⵊⵊ ⵏ ⵓⵙⴻⵖⴷ ⵇⴰⵄ.”