1 ⵅⴻⵏⵏⵉ ⵉⵙⵓⴹ ⵡⴻⵏⵏⵉ ⴷ ⵡⵉⵙⵙ ⵅⴻⵎⵙⴰ ⴷⵉ ⵍⴱⵓⵇ ⵏⵏⴻⵙ ⵓⵛⴰ ⵥⵔⵉⵖ ⵉⵊⵊ ⵏ ⵢⴻⵜⵔⵉ ⵉⵡⴹⴰ-ⴷⴷ ⵣⴻⴳ ⵓⵊⴻⵏⵏⴰ ⵅ ⵜⴻⵎⵎⵓⵔⵜ, ⵜⴻⵎⵎⴻⵡⵛ ⴰⵙ ⵜⴰⵙⴰⵔⵓⵜ ⵏ ⵓⵇⴻⵎⵎⵓⵎ ⵏ ⵜⴻⵙⵔⴰⴼⵜ ⵢⵓⴵⵖⴻⵏ. ◘9:1 ⵍⴽ. 8:31; ⴰⵙⴰ. 17:8. 2 ⵓⵛⴰ ⵉⴳⴻⵄⵄⴻⴷ-ⴷⴷ ⴷⴷⴻⵅⵅⴰⵏ ⵣⴻⴳ ⵓⵇⴻⵎⵎⵓⵎ ⵏ ⵜⴻⵙⵔⴰⴼⵜ, ⴰⵎ ⴷⴷⴻⵅⵅⴰⵏ ⵏ ⵜⴻⴼⵇⵓⵏⵜ ⵜⴰⵎⴻⵇⵇⵔⴰⵏⵜ ⵉⵃⵎⴰⵏ, ⵓⵛⴰ ⵜⴼⵓⵛⵜ ⴷ ⵍⴻⵄⵡⵉⵏ ⴱⴱⴰⵔⵛⵏⴻⵏ ⵙ ⴷⴷⴻⵅⵅⴰⵏ ⵏ ⵜⴻⵙⵔⴰⴼⵜ. 3 ⵣⵉ ⴷⴷⴻⵅⵅⴰⵏ ⴼⴼⵖⴻⵏ-ⴷⴷ ⵣⵣⴰⵢⴻⵙ ⵉⴱⵓⵔⴻⵅⵙⴻⵏ ⵖⴰⵔ ⵜⴻⵎⵎⵓⵔⵜ, ⵜⴻⵎⵎⴻⵡⵛ ⴰⵙⴻⵏ ⵚⵚⵓⵍⵟⴰ ⴰⵎ ⵜⴻⵏⵏⵉ ⵉⴵⴰⵏ ⵖⴰⵔ ⵜⵖⴰⵔⴹⵎⵉⵡⵉⵏ ⵏ ⵜⴻⵎⵎⵓⵔⵜ. 4 ⵉⵜⵜⵡⴰⵏⵏⴰ ⴰⵙⴻⵏ, ⵎⴰⵃⴻⵏⴷ ⵡⴰⵔ ⵊⴻⵢⵢⵃⴻⵏ ⴰⵔⴱⵉⵄ ⵏ ⵜⴻⵎⵎⵓⵔⵜ ⵓⵍⴰ ⴷ ⵇⴰⵄ ⴰⵖⴻⵎⵎⵓⵢ ⴰⵣⵉⵣⴰ ⵓⵍⴰ ⴷ ⵜⵉⵛⴻⵊⵊⵓⵔⴰ, ⵎⵖⵉⵔ ⵉⵡⴷⴰⵏ ⵡⴰⵀⴰ ⵉⵏⵏⵉ ⵡⴰⵔ ⵖⴰⵔ ⵉⴵⵉ ⵓⵛⴻⵎⵎⵉⵄ ⵏ ⴰⵔⴻⴱⴱⵉ ⵅ ⵜⴻⵏⵢⴰⵔⵜ ⵏⵙⴻⵏ. ◼9:4 ⵜⴰⵛⴻⵊⵊⴰⵔⵜ-ⵏⵉⵖ ‘ⴰⴷⴷⴰⴳ’ (‘ⵉⴷⴷⴰⴳⴻⵏ’).  ◘9:4 ⵃⵉⵥ. 9:4; ⵢⵃ. 6:26; ⴰⵙⴰ. 6:6; 7:2, 3. 5 ⵜⴻⵎⵎⴻⵡⵛ ⴰⵙⴻⵏ ⵜⵣⴻⵎⵎⴰⵔ ⵎⴰⵃⴻⵏⴷ ⵡⴰⵔ ⵜⴻⵏ ⵏⴻⵇⵇⴻⵏ, ⵎⴰⵛⴰ ⴰⴷ ⵜⴻⵏ ⵄⴻⴷⴷⴱⴻⵏ ⵍⵇⴻⴷⴷ ⵏ ⵅⴻⵎⵙⴰ ⵏ ⵉⵢⵓⵔⴻⵏ, ⵓⵛⴰ ⴰⵄⴻⴷⴷⴻⴱ ⵏⵙⴻⵏ ⴰⵎ ⵓⵄⴻⴷⴷⴻⴱ ⵏ ⵜⵖⴰⵔⴹⴻⵏⵜ ⵅⵎⵉ ⵜᵉⵜⵜⴻⵇⵇⴻⵙ ⵉ ⴱⵏⴰⴷⴻⵎ.

6 ⴷⴻⴳ ⵡⵓⵙⵙⴰⵏ ⵏⵏⵉ ⴰⴷ ⴰⵔⵣⵓⵏ ⵉⵡⴷⴰⵏ ⵅ ⵍⵎⴻⵡⵜ, ⵎⴰⵛⴰ ⵡⴰⵔ ⵜⵜ ⵜⵜᵉⵟⵟⵉⴼⴻⵏ, ⵓⵛⴰ ⴰⴷ ⵜⵜⴰⵔⴻⵏ ⴰⴷ ⵎⵎⵜⴻⵏ, ⵎⴰⵛⴰ ⵍⵎⴻⵡⵜ ⴰⴷ ⵣⵣⴰⵢⵙⴻⵏ ⵜⴰⵔⵡⴻⵍ. ◘9:6 ⵉⵛⴰ. 2:19; ⵉⵔⵎ. 8:3; ⵃⵓⵛ. 10:8; ⵍⴽ. 23:30; ⴰⵙⴰ. 6:16. 7 ⵉⴱⵓⵔⴻⵅⵙⴻⵏ ⴳⴳⵉⵏ ⴰⵎ ⵢⵉⵢⵙⴰⵏ ⵉⵡⴻⵊⴷⴻⵏ ⵉ ⵓⵎⴻⵏⵖⵉ, ⵓ ⵖⴰⵔⵙⴻⵏ ⵅ ⵉⵣⴻⴵⵉⴼⴻⵏ ⵏⵙⴻⵏ ⵛⴰ ⴰⵎ ⵜⵜⵉⵊⴰⵏ ⴰⵅⵎⵉ ⵜⴻⵏⵜ ⴳⴳⵉⵏ ⵙ ⵡⵓⵔⴻⵖ, ⵓ ⵉⵖⴻⵎⴱⴰⴱ ⵏⵙⴻⵏ ⴰⵎ ⵉⵖⴻⵎⴱⴰⴱ ⵏ ⵉⵡⴷⴰⵏ, ◘9:7 ⵓⴼ. 10:4; ⵢⵓⵡ. 2:4 8 ⵓ ⴰⵛⵓⵡⵡⴰⴼ ⵏⵙⴻⵏ ⴰⵎ ⵓⵛⵓⵡⵡⴰⴼ ⵏ ⵜⴻⵎⵖⴰⵔⵉⵏ ⵓ ⵜⵉⵖⵎⴰⵙ ⵏⵙⴻⵏ ⴰⵎ ⵜⵉⵏⵏⵉ ⵏ ⵡⴰⵢⵔⴰⴷⴻⵏ, ◘9:8 ⵢⵓⵡ. 1:6 9 ⵓ ⵜⵓⵖⴰ ⵖⴰⵔⵙⴻⵏ ⵜⵛⴰⴱⴱⴰⵜ ⵅ ⵉⴷⵎⴰⵔⴻⵏ ⵏⵙⴻⵏ ⴰⵎ ⵜⵛⴰⴱⴱⴰⵜ ⵏ ⵡⵓⵣⵣⴰⵍ ⵉ ⵓⵙⴻⵍⵇⵉ, ⵓ ⴷⴷⵔⵉⵣ ⵏ ⵡⴰⴼⵔⵉⵡⴻⵏ ⵏⵙⴻⵏ ⴰⵎ ⴷⴷⵔⵉⵣ ⵏ ⵉⴽⴰⵔⵔⵓⵜⴻⵏ ⴰⴽ-ⴷ ⵡⴰⵟⵟⴰⵙ ⵏ ⵉⵢⵙⴰⵏ ⵉⵜⵜⴻⵇⵏⵓⵏⵏⵓⵢⴻⵏ ⵖⴰⵔ ⵓⵎⴻⵏⵖⵉ, 10 ⵓ ⵖⴰⵔⵙⴻⵏ ⵉⴽⴻⵏⵏⴰⵙⴻⵏ ⴰⵎ ⵢⵉⵏⵏⵉ ⵏ ⵜⵖⴰⵔⴹⵎⵉⵡⵉⵏ ⵓ ⵜⵓⵖⴰ ⴷⵉⵏ ⵉⵙⴻⵏⵏⴰⵏⴻⵏ ⴷⴻⴳ ⵉⴽⴻⵏⵏⴰⵙⴻⵏ ⵏⵙⴻⵏ. ⵏⵉⵜⵏⵉ ⵖⴰⵔⵙⴻⵏ ⵚⵚⵓⵍⵟⴰ ⵃⵉⵎⴰ ⴰⴷ ⵙⵙⴻⵀⵡⴰⵏ ⴷⵔⵓⵛⵜ ⵅ ⵉⵡⴷⴰⵏ, ⵍⵎⵉⵊⴰⵍ ⵏ ⵅⴻⵎⵙⴰ ⵏ ⵉⵢⵓⵔⴻⵏ. 11 ⵏⵉⵜⵏⵉ ⵖⴰⵔⵙⴻⵏ ⵍⵎⴰⵍⴰⴽ ⵏ ⵜⴻⵙⵔⴰⴼⵜ ⴷ ⴰⵊⴻⴵⵉⴷ ⵅⴰⵙⴻⵏ, ⵇⵇⴰⵔⴻⵏ ⴰⵙ ⵙ ⵜⵄⵉⴱⵔⴰⵏⵉⵜ ‘ⴰⴱⴰⴷⴷⵓ’ ⵓ ⵙ ⵜⵔⴰⵎⵉⵜ ⵇⵇⴰⵔⴻⵏ ⴰⵙ ‘ⵛⴰⵔⴰ’. ◼9:11 ⴰⴱⴰⴷⴷⵓ - ⵉⵙⴻⵎ-ⴰ ⵢⵓⵙⴰ-ⴷ ⵣⵉ ⵜⵓⵜⵍⴰⵢⵜ ⵏ ⵜⵄⵉⴱⵔⴰⵏⵉⵜ ⵓⵛⴰ ⵉⵅⵙ ⴰⴷ ⵢⵉⵏⵉ 'ⴰⵔⴻⵢⵢⴻⴱ' ⵏⵉⵖ 'ⴰⵔⴻⴷⴷⴻⴵ' (ⴰⵙⴰ. 9:11).

12 ⵓⵛⵜ ⵜⴰⵎⴻⵣⵡⴰⵔⵓⵜ ⵜⴻⵄⴷⵓ, ⴰⵡⴰⵔⵏⵉ ⵎⴰⵏ ⴰⵢⴰ ⴰⴷ ⴷⴷ-ⴰⵙⴻⵏⵜ ⵄⴰⴷ ⵜⵏⴰⵢⴻⵏ ⵏ ⵡⵓⵛⵜⴰⵜ. ◘9:12 ⴰⵙⴰ. 8:13.

13 ⴰⵡⴰⵔⵏⵉ ⵎⴰⵏ ⴰⵢⴰ ⵉⵙⵓⴹ ⵍⵎⴰⵍⴰⴽ ⵡⵉⵙⵙ ⵙⴻⵜⵜⴰ ⴷⵉ ⵍⴱⵓⵇ ⵏⵏⴻⵙ ⵓⵛⴰ ⵙⵍⵉⵖ ⵜⵎⵉⵊⵊⴰ ⵉ ⴷⴷ-ⵢⵓⵙⵉⵏ ⵣⵉ ⴰⵔⴻⴱⵄⴰ ⵏ ⵡⴰⵛⵛⴰⵡⴻⵏ ⵏ ⵓⵄⴰⵍⵟⴰⵔ ⵏ ⵡⵓⵔⴻⵖ ⵉ ⵉⴱⴻⴷⴷⴻⵏ ⵇⵉⴱⴰⵍⵜ ⵉ ⴰⵔⴻⴱⴱⵉ, 14 ⵜⴻⵏⵏⴰ ⵉ ⵍⵎⴰⵍⴰⴽ ⵡⵉⵙⵙ ⵙⴻⵜⵜⴰ ⵉ ⵖⴰⵔ ⵉⴵⴰ ⵓⵢⵉⵛⵛ ⵏ ⵉⵛⴰⵔⵔⵉ: “ⴼⵙⵉⵢ ⵉ ⴰⵔⴻⴱⵄⴰ ⵏ ⵍⵎⴰⵍⴰⴽⴰⵜ ⵏⵏⵉ ⵉⵛⴰⵔⴼⴻⵏ ⵟⵟⴰⵔⴼ ⵏ ⵉⵖⵣⴰⵔ ⴰⵎⴻⵇⵇⵔⴰⵏ, ⵍⴼⵓⵔⴰⵟ.” 15 ⵓⵛⴰ ⴰⵔⵅⵓⵏ ⴰⵙⴻⵏ ⵉ ⴰⵔⴻⴱⵄⴰ ⵏ ⵍⵎⴰⵍⴰⴽⴰⵜ ⵏⵏⵉ ⵜⵓⵖⴰ ⵉⵡⴻⵊⴷⴻⵏ ⴷⵉⵏⵏⵉ ⵖⴰⵔ ⵡⴰⵙⵙ ⴷ ⵓⵢⵓⵔ ⴷ ⵓⵙⴻⴳⴳⵯⴰⵙ, ⵃⵉⵎⴰ ⴰⴷ ⵏⵖⴻⵏⵜ ⵉⵛⵜ ⵏ ⵜⵜⵓⵍⵓⵜ ⵏ ⵉⵡⴷⴰⵏ. 16 ⵜⵓⵖⴰ ⵍⵇⴻⴷⴷ ⵏ ⵍⵄⴻⵙⴽⴰⵔⴰⵜ ⵏ ⵢⵉⵏⵏⵉ ⵉⵏⴻⴷⴷⵀⴻⵏ ⵉⵢⵙⴰⵏ ⵜⵢⵓⵢⴰ ⵏ ⵄⴻⵛⵔⴰ-ⴰⵍⴰⴼ ⵙ ⵄⴻⵛⵔⴰ ⵏ ⵍⵓⵍⵓⴼ, ⵓⵛⴰ ⵙⵍⵉⵖ ⵎⴻⵛⵃⴰⵍ ⴷⵉ ⴵⴰⵏ. ◼9:16 ⵜⵢⵓⵢⴰ ⵏ ⵄⴻⵛⵔⴰ-ⴰⵍⴰⴼ ⵙ ⵄⴻⵛⵔⴰ ⵏ ⵍⵓⵍⵓⴼ-ⵍⵇⴻⴷⴷ ⵏⵙⴻⵏ ⴰⵎⵎⵓ 2 ⵅ 10.000 ⵅ 10.000 ⵉⵅⵙ ⴰⴷ ⵢⵉⵏⵉ 200 ⵎⵉⵍⵢⵓⵏ, ⵉⵅⵙ ⴰⴷ ⵢⵉⵏⵉ ⵉⵊⵊ ⵏ ⵍⵄⴻⵙⴽⴰⵔ ⴷ ⴰⵎⴻⵇⵇⵔⴰⵏ ⴰⵟⵟⴰⵙ ⵙ ⵡⴰⵟⵟⴰⵙ. 17 ⴰⵎⵎⵓ ⵉ ⵥⵔⵉⵖ ⵉⵢⵙⴰⵏ ⴷⵉ ⵍⴻⵡⵃⵉⵢ, ⴰⵇⴰ ⵉⵏⵏⵉ ⵅⴰⵙⴻⵏ ⵉⵏⵢⵉⵏ ⵜⵓⵖⴰ ⵙⵙⴷⵓⵔⵔⵓⵢⴻⵏ ⵉⴷⵎⴰⵔⴻⵏ ⵏⵙⴻⵏ ⵙ ⵜⵛⴰⴱⴱⴰⵜ ⵏ ⵡⵓⵣⵣⴰⵍ ⵉ ⵓⵙⴻⵍⵇⵉ ⴷ ⵜⵉⵣⴻⴳⴳⵯⴰⵖⵉⵏ ⴰⵎ ⵜⵎⴻⵙⵙⵉ, ⵛⴰⴱⴻⵏⵜ, ⴷ ⵜⵉⵡⵔⴰⵖⵉⵏ ⴰⵎ ⵍⴻⵛⴱⴰⵔⴻⵢⵢⴻⵜ. ⵉⵣⴻⴵⵉⴼⴻⵏ ⵏ ⵉⵢⵙⴰⵏ ⵏⵏⵉ ⴰⵎ ⵢⵉⵣⴻⴵⵉⴼⴻⵏ ⵏ ⵡⴰⵢⵔⴰⴷⴻⵏ ⵓⵛⴰ ⵣⴻⴳ ⵉⵇⴻⵎⵎⵓⵎⴻⵏ ⵏⵙⴻⵏ ⵜⴻⴼⴼⴻⵖ-ⴷⴷ ⵣⵣⴰⵢⵙⴻⵏ ⵜⵎⴻⵙⵙⵉ ⴷ ⴷⴷⴻⵅⵅⴰⵏ ⴷ ⵍⴻⵛⴱⴰⵔⴻⵢⵢⴻⵜ. 18 ⴰⵇⴰ ⵉⵛⵜ ⵏ ⵜⵜⵓⵍⵓⵜ ⵏ ⵉⵡⴷⴰⵏ ⵜᵉⵜⵜⵡⴰⵏⴻⵖ ⵙ ⵜⵍⴰⵜⴰ-ⵢⴰ ⵏ ⵊⵊⵔⴰⵢⴻⵃ: ⵙ ⵜⵎⴻⵙⵙⵉ ⴷ ⵍⴻⵛⴱⴰⵔⴻⵢⵢⴻⵜ ⴷ ⴷⴷⴻⵅⵅⴰⵏ ⵉ ⴷⴷ-ⵉⵜⵜⴻⴼⴼⵖⴻⵏ ⵣⴻⴳ ⵉⵇⴻⵎⵎⵓⵎⴻⵏ ⵏⵙⴻⵏ. 19 ⵎⵉⵏⵣⵉ ⵚⵚⵓⵍⵟⴰ ⵏⵙⴻⵏ ⴰⵇⴰ-ⵜⵜ ⴷⴻⴳ ⵉⵇⴻⵎⵎⵓⵎⴻⵏ ⴷ ⵉⴽⴻⵏⵏⴰⵙⴻⵏ ⵏⵙⴻⵏ, ⵎⵉⵏⵣⵉ ⵉⴽⴻⵏⵏⴰⵙⴻⵏ ⵏⵙⴻⵏ ⴳⴳⵉⵏ ⴰⵎ ⵉⴼⵉⵖⵔⴰⵏ ⵏⵏⵉ ⵖⴰⵔ ⵉⴵⴰ ⵉⵣⴻⴵⵉⴼⴻⵏ, ⵓⵛⴰ ⵜⵜⵊⴻⵢⵢⵃⴻⵏ ⵣⵣⴰⵢⵙⴻⵏ ⵉⵡⴷⴰⵏ.

20 ⵉⵡⴷⴰⵏ ⵉⵇⵇⵉⵎⴻⵏ, ⵉⵏⵏⵉ ⵡⴰⵔ ⵉⵜⵜⵡⴰⵏⵖⴻⵏ ⵛⴰ ⵙ ⵊⵊⵔⴰⵢⴻⵃ-ⴰ, ⵡⴰⵔ ⵜⵓⴱⴻⵏ ⵛⴰ ⵣⵉ ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵙⴻⵏ ⴰⵍⴰⵎⵉ ⵡⴰⵔ ⵄⴻⴱⴱⴷⴻⵏ ⵄⴰⴷ ⵛⵛⵡⴰⵟⴻⵏ ⴷ ⵍ’ⴰⵚⵏⴰⵎ ⵏ ⵡⵓⵔⴻⵖ ⴷ ⵏⵏⵓⵇⴰⵔⵜ ⴷ ⵏⵏⵃⴰⵙ ⴷ ⵡⴻⵥⵔⵓ ⴷ ⵓⴽⴻⵛⵛⵓⴹ, ⵉⵏⵏⵉ ⵡⴰⵔ ⵉⵜⵜⵡⵉⵍⵉⵏ, ⵡⴰⵔ ⵉⵜⵜⴻⵙⵍⵉⵏ, ⵡⴰⵔ ⵉⴳⴳⵓⵔⴻⵏ, ◘9:20 ⵉⵥⵀⴷ. 115:4, 5, 6, 7; 135:15. 21 ⵓⵛⴰ ⵏⵉⵜⵏⵉ ⵡⴰⵔ ⵜⵓⴱⴻⵏ ⵛⴰ ⵣⴻⴳ ⵡⴻⵏⵖⴰⵢ ⵏⵙⴻⵏ, ⵍⴰ ⵣⵉ ⵜⵙⴻⵃⵃⴰⵔⵜ ⵏⵙⴻⵏ ⵓⵍⴰ ⵣⵉ ⴼⴰⵔⵇ-ⵛⵛⵖⴻⵍ ⵏⵙⴻⵏ.