1 ⴰⵍⴰⵎⵉ ⵢⴰⵔⵣⴻⵎ ⵏⴻⵜⵜⴰ ⴰⵛⴻⵎⵎⵉⵄ ⵡⵉⵙⵙ ⵙⴻⴱⵄⴰ, ⵜⵓⵖⴰ ⴰⵊⴻⵏⵏⴰ ⵢⴰⵔⵙⴰ ⵄⵍⴰⵃⴰⵍ ⴰⵣⵢⴻⵏ ⵏ ⵜⵙⴰⵄⵄⴻⵜ.

2 ⵓⵛⴰ ⵥⵔⵉⵖ ⵙⴻⴱⵄⴰ ⵏ ⵍⵎⴰⵍⴰⴽⴰⵜ ⵏⵏⵉ ⵉⴱⴻⴷⴷⴻⵏ ⵣⵣⴰⵜ ⵉ ⴰⵔⴻⴱⴱⵉ ⵓⵛⴰ ⵉⵎⵎⴻⵡⵛ ⴰⵙⴻⵏⵜ ⵙⴻⴱⵄⴰ ⵏ ⵡⴰⵛⵛⴰⵡⴻⵏ ⵏ ⵓⵢⵉⵛⵛ ⵏ ⵉⵛⴰⵔⵔⵉ.

3 ⴰⵇⴰ ⵉⵊⵊ ⵏ ⵍⵎⴰⵍⴰⴽ ⵏⵏⴻⵖⵏⵉ ⵢⵓⵙⴰ-ⴷⴷ, ⵢⵓⵢⵓⵔ ⴰⴷ ⵉⴱⴻⴷⴷ ⵖⴰⵔ ⵓⵄⴰⵍⵟⴰⵔ ⵙ ⵉⵛⵜ ⵏ ⵜⴻⵇⴷⵓⵃⵜ ⵏ ⵡⵓⵔⴻⵖ ⵉ ⵍⴻⴱⵅⵓⵔ. ⵉⵎⵎⴻⵡⵛ ⴰⵙ ⵡⴰⵟⵟⴰⵙ ⵏ ⵍⴻⴱⵅⵓⵔ ⵃⵉⵎⴰ ⴰⴷ ⵜ ⵉⵡⴻⵀⵀⴻⴱ ⴰⴽ-ⴷ ⵜⵥⴰⴵⵉⵜⵉⵏ ⵏ ⵎⴰⵔⵔⴰ ⵉⵎⵇⴻⴷⴷⴰⵙⴻⵏ ⵅ ⵓⵄⴰⵍⵟⴰⵔ ⵇⵉⴱⴰⵍⵜ ⵉ ⵍⵄⴰⵔⵛ. 4 ⵓⵛⴰ ⴰⵔⵔⵉⵃⴻⵜ ⵏ ⵍⴻⴱⵅⵓⵔ ⴰⴽ-ⴷ ⵜⵥⴰⴵⵉⵜⵉⵏ ⵏ ⵉⵎⵇⴻⴷⴷⴰⵙⴻⵏ ⵜⵓⵖⴰ ⵜᵉⵜⵜⴳⴻⵄⵄⴰⴷ ⵣⴻⴳ ⵓⴼⵓⵙ ⵏ ⵍⵎⴰⵍⴰⴽ ⵖⴰⵔ ⵣⵣⴰⵜ ⵏ ⴰⵔⴻⴱⴱⵉ. ◘8:4 ⵉⵥⵀⴷ. 141:2. 5 ⵍⵎⴰⵍⴰⴽ ⵉⴽⵙⵉ ⵜⴰⵇⴷⵓⵃⵜ ⵏ ⵍⴻⴱⵅⵓⵔ, ⵉⵛⵛⵓⵔ ⵉ-ⵜⵜ ⵙ ⵜⵎⴻⵙⵙⵉ ⵣⴻⴳ ⵓⵄⴰⵍⵟⴰⵔ ⵓⵛⴰ ⵉⵏⴹⴰⵔ ⵉ-ⵜ ⵖⴰⵔ ⵜⴻⵎⵎⵓⵔⵜ ⵓⵛⴰ ⵓⵙⵉⵏ-ⴷⴷ ⵡⴰⵊⵊⴰⵊⴻⵏ ⴷ ⵜⵎⵉⵊⵊⴰⵡⵉⵏ ⴷ ⵡⴰⵙⵙⴰⵎⴻⵏ ⴷ ⵉⵊⵊ ⵏ ⵡⴻⵏⵀⴻⵣⵣⵉ ⵏ ⵜⴻⵎⵎⵓⵔⵜ.

6 ⵓⵛⴰ ⵃⴻⵣⵣⵎⴻⵏⵜ ⵙⴻⴱⵄⴰ ⵏ ⵍⵎⴰⵍⴰⴽⴰⵜ ⵜⵉⵏⵏⵉ ⵖⴰⵔ ⵉⴵⴰ ⵙⴻⴱⵄⴰ ⵏ ⵡⴰⵛⵛⴰⵡⴻⵏ ⵏ ⵓⵢⵉⵛⵛ ⵏ ⵉⵛⴰⵔⵔⵉ ⵃⵉⵎⴰ ⴰⴷ ⴷⴰⵢⵙⴻⵏ ⵙⵓⴹⴻⵏⵜ.

7 ⵓⵛⴰ ⵉⵙⵓⴹ ⵓⵎⴻⵣⵡⴰⵔⵓ ⴷⵉ ⵍⴱⵓⵇ ⵏⵏⴻⵙ ⵓⵛⴰ ⵜⴻⵡⴹⴰ-ⴷⴷ ⵜⴻⴱⵔⵓⵔⵉ ⴷ ⵜⵎⴻⵙⵙⵉ ⵅⴻⴵⴹⴻⵏⵜ ⴰⴽ-ⴷ ⵡⴰⵎⴰⵏ, ⵜⵜⵡⴰⵎⴻⵏⴹⴰⵔⴻⵏⵜ ⵅ ⵜⴻⵎⵎⵓⵔⵜ, ⵓⵛⴰ ⵜⴻⵛⵎⴻⴹ ⵉⵛⵜ ⵏ ⵜⵜⵓⵍⵓⵜ ⵏ ⵜⴻⵎⵎⵓⵔⵜ ⴷ ⵉⵛⵜ ⵏ ⵜⵜⵓⵍⵓⵜ ⵏ ⵜⵛⴻⵊⵊⵓⵔⴰ ⵓⵍⴰ ⴷ ⵎⴰⵔⵔⴰ ⴰⵔⴱⵉⵄ ⵏ ⵜⴻⵎⵎⵓⵔⵜ ⵉⵛⵎⴻⴹ.

8 ⵅⴻⵏⵏⵉ ⵉⵙⵓⴹ ⵡⴻⵏⵏⵉ ⴷ ⵡⵉⵙⵙ ⵜⵏⴰⵢⴻⵏ ⴷⵉ ⵍⴱⵓⵇ ⵏⵏⴻⵙ ⵓⵛⴰ ⵛⴰ ⵏ ⵜⵎⴻⵙⵍⴰⵛⵜ ⴰⵎ ⵡⴻⴷⵔⴰⵔ ⴰⵎⴻⵇⵇⵔⴰⵏ ⵉⵛⴻⵎⵎⴹⴻⵏ, ⵉⵎⵎⴻⵏⴹⴰⵔ ⴷⵉ ⵍⴻⴱⵃⴰⵔ ⵓⵛⴰ ⵉⵛⵜ ⵏ ⵜⵜⵓⵍⵓⵜ ⵏ ⵍⴻⴱⵃⴰⵔ ⵉⴷⵡⴻⵍ ⴷ ⵉⴷⴰⵎⵎⴻⵏ, ◘8:8 ⵉⵛⴰ. 13:13, 19; ⵉⵔⵎ. 51:25 9 ⵓ ⵉⵛⵜ ⵏ ⵜⵜⵓⵍⵓⵜ ⵏ ⵉⵎⵓⴷⴷⴰⵔⴻⵏ ⴷⵉ ⵍⴻⴱⵃⴰⵔ ⵉⵏⵏⵉ ⵖⴰⵔⵙⴻⵏ ⵍⴻⵄⵎⴰⵔ, ⵎⵎⵓⵜⴻⵏ, ⵓⵛⴰ ⵉⵛⵜ ⵏ ⵜⵜⵓⵍⵓⵜ ⵏ ⵉⵖⴰⵔⵔⵓⴱⴰ ⵜⴰⵔⴻⴷⴷⴻⴵ. ◼8:9 ⵉⵎⵓⴷⴷⴰⵔⴻⵏ-ⵏⵉⵖ ‘ⵍⵃⴰⵢⴰⵡⴰⵏⴰⵜ’.

10 ⵅⴻⵏⵏⵉ ⵉⵙⵓⴹ ⵡⴻⵏⵏⵉ ⴷ ⵡⵉⵙⵙ ⵜⵍⴰⵜⴰ ⴷⵉ ⵍⴱⵓⵇ ⵏⵏⴻⵙ ⵓⵛⴰ ⵉⵡⴹⴰ-ⴷⴷ ⵉⵊⵊ ⵏ ⵉⵜⵔⵉ ⴰⵎⴻⵇⵇⵔⴰⵏ ⵣⴻⴳ ⵓⵊⴻⵏⵏⴰ, ⵢⵓⵔⵖⴰ ⴰⵎ ⵢⵉⵊⵊ ⵏ ⵓⵄⴻⵛⵛⴰⵍ ⵏ ⵜⵎⴻⵙⵙⵉ, ⵉⵡⴹⴰ-ⴷⴷ ⵅ ⵉⵛⵜ ⵏ ⵜⵜⵓⵍⵓⵜ ⵏ ⵉⵖⴻⵣⵔⴰⵏ ⵓ ⵅ ⵜⴰⵍⴰⵡⵉⵏ ⵏ ⵡⴰⵎⴰⵏ. 11 ⵉⵜⵔⵉ-ⵢⴰ ⵇⵇⴰⵔⴻⵏ-ⴰⵙ ‘ⴰⴱⵙⵉⵏⵜⴰ’, ⵏⵉⵖ ‘ⵛⵛⵉⵃ’. ⵓⵛⴰ ⵉⵛⵜ ⵏ ⵜⵜⵓⵍⵓⵜ ⵏ ⵡⴰⵎⴰⵏ ⵜⴻⴷⵡⴻⵍ ⵜⴰⵔⵣⴻⴳ ⴰⵎ ‘ⴰⴱⵙⵉⵏⵜ’, ⵓⵛⴰ ⵎⵎⵓⵜⴻⵏ ⴰⵟⵟⴰⵙ ⵏ ⵢⴻⵡⴷⴰⵏ ⵙ ⵡⴰⵎⴰⵏ ⵓⵎⵉ ⴷⴻⵡⵍⴻⵏ ⴷ ⵉⵎⴻⵔⵣⴰⴳⴻⵏ. ◼8:11 ⴰⴱⵙⵉⵏⵜⴰ-ⵉⵙⴻⵎ ⵡⴰⵏⵉⵜⴰ ⵉⵅⵙ ⴰⴷ ⵢⵉⵏⵉ ‘ⵛⵛⵉⵃ’.

12 ⵅⴻⵏⵏⵉ ⵉⵙⵓⴹ ⵡⴻⵏⵏⵉ ⴷ ⵡⵉⵙⵙ ⴰⵔⴻⴱⵄⴰ ⴷⵉ ⵍⴱⵓⵇ ⵏⵏⴻⵙ ⵓⵛⴰ ⵜᵉⵜⵜⵡⴰⵟⵟⴻⴼ ⵉⵛⵜ ⵏ ⵜⵜⵓⵍⵓⵜ ⵏ ⵜⴼⵓⵛⵜ ⴷ ⵉⵛⵜ ⵏ ⵜⵜⵓⵍⵓⵜ ⵏ ⵜⵣⵉⵔⵉ ⴷ ⵉⵛⵜ ⵏ ⵜⵜⵓⵍⵓⵜ ⵏ ⵉⵜⵔⴰⵏ, ⴰⵍⴰⵎⵉ ⵜⴱⴱⴰⵔⵛⴻⵏ ⵉⵛⵜ ⵏ ⵜⵜⵓⵍⵓⵜ ⵣⵣⴰⵢⵙⴻⵏ, ⵡⴰⵔ ⵜᵉⵜⵜⵉⵍⵉ ⵄⴰⴷ ⵜⴼⴰⵡⵜ ⵉ ⵢⵉⵛⵜ ⵏ ⵜⵜⵓⵍⵓⵜ ⵏ ⵓⵣⵉⵍ ⵓⵛⴰ ⴰⵎⵎⵓ ⵓⵍⴰ ⴷⵉ ⴵⵉⵍⴻⵜ.

13 ⵓⵛⴰ ⵙⵍⵉⵖ ⵉⵊⵊ ⵏ ⵓⴳⵉⴷⴻⵔ ⵉⵟⵟⴰⵡ-ⴷⴷ ⴷⵉ ⵍⵡⴻⵙⵟ ⵏ ⵓⵊⴻⵏⵏⴰ, ⵉⵇⵇⴰⵔ: “ⵓⵛⵜ, ⵓⵛⵜ, ⵓⵛⵜ ⵅ ⵢⵉⵏⵏⵉ ⵉⵣⴻⴷⴷⵖⴻⵏ ⵅ ⵜⴻⵎⵎⵓⵔⵜ ⵅ ⵙⵙⵉⴱⴱⴻⵜ ⵏ ⵜⵎⵉⵊⵊⴰⵡⵉⵏ ⵉⵏⵏⴻⵖⵏⵉ ⵏ ⵡⴰⵛⵛⴰⵡⴻⵏ ⵏ ⵉⵛⴰⵔⵔⵉ ⵏ ⵜⵍⴰⵜⴰ ⵏ ⵍⵎⴰⵍⴰⴽⴰⵜ ⵉ ⵖⴰ ⵉⵙⵓⴹⴻⵏ ⵄⴰⴷ ⴷⵉ ⵍⴱⵓⵇ!”