1 ⴰⵡⴰⵔⵏⵉ ⵎⴰⵏ ⴰⵢⴰ ⵥⵔⵉⵖ ⴰⵔⴻⴱⵄⴰ ⵏ ⵍⵎⴰⵍⴰⴽⴰⵜ ⴱⴻⴷⴷⴻⵏⵜ ⵖⴰⵔ ⴰⵔⴻⴱⵄⴰ ⵏ ⵜⵖⴻⵎⵎⵓⵔⴰ ⵏ ⵜⴻⵎⵎⵓⵔⵜ, ⵟⵟⴼⴻⵏⵜ ⴰⵔⴻⴱⵄⴰ ⵏ ⵉⵙⴻⵎⵎⵉⴹⴻⵏ ⵏ ⵜⴻⵎⵎⵓⵔⵜ, ⵃⵉⵎⴰ ⵡⴰⵔ ⵉⵜⵜⵙⵓⴹⵉ ⵓⵙⴻⵎⵎⵉⴹ ⵍⴰ ⵅ ⵍⴱⴰⵔⵔ ⵍⴰ ⵅ ⵡⴰⵎⴰⵏ ⵓⵍⴰ ⵅ ⵛⴰ ⵏ ⵜⵛⴻⵊⵊⴰⵔⵜ. ◼7:1 ⵜⴰⵛⴻⵊⵊⴰⵔⵜ-ⵏⵉⵖ ‘ⴰⴷⴷⴰⴳ’ (‘ⵉⴷⴷⴰⴳⴻⵏ’). 2 ⵓⵛⴰ ⵥⵔⵉⵖ ⵉⵊⵊ ⵏ ⵍⵎⴰⵍⴰⴽ ⵏⵏⴻⵖⵏⵉ ⵢⵓⵍⵉ-ⴷⴷ ⵎⴰⵏⵉⵙ ⴷ ⵜⵏⴻⵇⵇⴰⵔ ⵜⴼⵓⵛⵜ, ⴰⵇⴰ ⵖⴰⵔⴻⵙ ⴰⵛⴻⵎⵎⵉⵄ ⵏ ⴰⵔⴻⴱⴱⵉ ⵉⴷⴷⴰⵔⴻⵏ ⵓⵛⴰ ⵉⵍⴰⵖⴰ ⵙ ⵊⵊⴻⵀⴷ ⵉ ⴰⵔⴻⴱⵄⴰ ⵏ ⵍⵎⴰⵍⴰⴽⴰⵜ ⵏⵏⵉ ⵓⵎⵉ ⵜⴻⵎⵎⴻⵡⵛ ⵜⵣⴻⵎⵎⴰⵔ ⵃⵉⵎⴰ ⴰⴷ ⵙⵙⴻⵅⵙⴰⵔⴻⵏⵜ ⵜⴰⵎⵎⵓⵔⵜ ⴷ ⵍⴻⴱⵃⴰⵔ, ◘7:2 ⵢⵃ. 6:26; ⴰⵙⴰ. 9:4. 3 ⵉⵇⵇⴰⵔ: “ⵡⴰⵔ ⵜⵜⵙⴻⵅⵙⴰⵔⴻⵎ ⵜⴰⵎⵎⵓⵔⵜ ⵓⵍⴰ ⴷ ⵍⴻⴱⵃⴰⵔ ⵓⵍⴰ ⴷ ⵜⵉⵛⴻⵊⵊⵓⵔⴰ ⴰⵍ ⵖⴰ ⵏⴻⴳⴳ ⴰⵛⴻⵎⵎⵉⵄ ⵅ ⵜⴻⵏⵢⴰⵔⵉⵏ ⵏ ⵉⵎⵙⴻⵅⵅⴰⵔⴻⵏ ⵏ ⴰⵔⴻⴱⴱⵉ ⵏⵏⴻⵖ.”

4 ⵓⵛⴰ ⵙⵍⵉⵖ ⵍⵇⴻⴷⴷ ⵏ ⵢⵉⵏⵏⵉ ⵉⵜⵜⵡⴰⵛⴻⵎⵎⵄⴻⵏ, ⵎⵢⴰ ⵓ-ⴰⵔⴻⴱⵄⴰ ⵓ-ⵔⴻⴱⵄⵉⵏ-ⴰⵍⴻⴼ ⴰⵇⴰ ⵜⵜⵡⴰⵛⴻⵎⵎⵄⴻⵏ ⵣⵉ ⵎⴰⵔⵔⴰ ⵜⵉⵇⴻⴱⴱⴰⵍ ⵏ ⵉⵙⵔⴰⵉⵍ: ◘7:4 ⴰⵙⴰ. 14:1.

5 ⵜⴻⵏⵄⴰⵛ-ⴰⵍⴻⴼ ⵣⵉ ⵜⴻⵇⴱⵉⵍⵜ ⵏ ⵢⴰⵀⵓⴷⴰ,

ⵜⴻⵏⵄⴰⵛ-ⴰⵍⴻⴼ ⵣⵉ ⵜⴻⵇⴱⵉⵍⵜ ⵏ ⵔⵓⴱⵉⵏ,

ⵜⴻⵏⵄⴰⵛ-ⴰⵍⴻⴼ ⵣⵉ ⵜⴻⵇⴱⵉⵍⵜ ⵏ ⵊⴰⴷ,

6 ⵜⴻⵏⵄⴰⵛ-ⴰⵍⴻⴼ ⵣⵉ ⵜⴻⵇⴱⵉⵍⵜ ⵏ ⴰⵛⵉⵔ,

ⵜⴻⵏⵄⴰⵛ-ⴰⵍⴻⴼ ⵣⵉ ⵜⴻⵇⴱⵉⵍⵜ ⵏ ⵏⴰⴼⵜⴰⵍⵉ,

ⵜⴻⵏⵄⴰⵛ-ⴰⵍⴻⴼ ⵣⵉ ⵜⴻⵇⴱⵉⵍⵜ ⵏ ⵎⴰⵏⴰⵙⵙⴰ,

7 ⵜⴻⵏⵄⴰⵛ-ⴰⵍⴻⴼ ⵣⵉ ⵜⴻⵇⴱⵉⵍⵜ ⵏ ⵛⵉⵎⵄⵓⵏ,

ⵜⴻⵏⵄⴰⵛ-ⴰⵍⴻⴼ ⵣⵉ ⵜⴻⵇⴱⵉⵍⵜ ⵏ ⵉⵙⵙⴰⴽⴰⵔ,

ⵜⴻⵏⵄⴰⵛ-ⴰⵍⴻⴼ ⵣⵉ ⵜⴻⵇⴱⵉⵍⵜ ⵏ ⵍⴰⵡⵉ,

8 ⵜⴻⵏⵄⴰⵛ-ⴰⵍⴻⴼ ⵣⵉ ⵜⴻⵇⴱⵉⵍⵜ ⵏ ⵣⵉⴱⵓⵍⵓⵏ,

ⵜⴻⵏⵄⴰⵛ-ⴰⵍⴻⴼ ⵣⵉ ⵜⴻⵇⴱⵉⵍⵜ ⵏ ⵢⵓⵙⵓⴼ,

ⵜⴻⵏⵄⴰⵛ-ⴰⵍⴻⴼ ⵣⵉ ⵜⴻⵇⴱⵉⵍⵜ ⵏ ⴱⵉⵏⵢⴰⵎⵉⵏ.

9 ⴰⵡⴰⵔⵏⵉ ⵎⴰⵏ ⴰⵢⴰ ⴰⵇⴰ ⵥⵔⵉⵖ ⵉⵊⵊ ⵏ ⵓⴱⴰⵔⵔⵓ ⵏ ⵍⵖⴰⵛⵉ ⴰⵎⴻⵇⵇⵔⴰⵏ ⵉ ⵡⴰⵔ ⵉⵣⴻⵎⵎⴰⵔ ⵓⵍⴰ ⴷ ⵉⵊⵊ ⴰⴷ ⵜ ⵉⵃⵙⴻⴱ, ⵣⵉ ⴽⵓⵍ ⵍⴳⴻⵏⵙ ⴷ ⵜⴻⵇⴱⵉⵍⵜ ⵓ ⵣⵉ ⵎⴰⵔⵔⴰ ⵛⵛⵓⵄⵓⴱ ⴷ ⵉⵍⵙⴰⵡⴻⵏ. ⵏⵉⵜⵏⵉ ⴱⴻⴷⴷⴻⵏ ⵣⵣⴰⵜ ⵉ ⵍⵄⴰⵔⵛ ⴷ ⵢⴻⵣⵎⴰⵔ, ⴰⵔⴹⴻⵏ ⵍⴻⵄⴱⴰⵢⴰⵜ ⵜⵉⵣⵉⵔⴰⵔⵉⵏ ⴷ ⵜⵉⵛⴻⵎⵍⴰⵍⵉⵏ, ⵓⵛⴰ ⵖⴰⵔⵙⴻⵏ ⵜⵉⵙⴻⴹⵡⵉⵏ ⵏ ⵜⵉⵏⵉ ⴷⴻⴳ ⵉⴼⴰⵙⵙⴻⵏ ⵏⵙⴻⵏ, 10 ⵜⵜⵍⴰⵖⴰⵏ ⵙ ⵊⵊⴻⵀⴷ:

“ⴰⵙⴻⵏⵊⴻⵎ ⴰⵇⴰ ⵙ ⴰⵔⴻⴱⴱⵉ ⵏⵏⴻⵖ,

ⵡⴻⵏⵏⵉ ⵉⵇⵇⵉⵎⴻⵏ ⵅ ⵍⵄⴰⵔⵛ

ⵓ ⵙ ⵢⴻⵣⵎⴰⵔ.”

11 ⵓⵛⴰ ⵎⴰⵔⵔⴰ ⵍⵎⴰⵍⴰⴽⴰⵜ ⵜⵓⵖⴰ ⴱⴻⴷⴷⴻⵏⵜ ⵏⵏⴹⴻⵏⵜ ⵉ ⵍⵄⴰⵔⵛ ⴰⴽ-ⴷ ⵉⵎⵖⴰⵔⴻⵏ ⴷ ⴰⵔⴻⴱⵄⴰ ⵏ ⵉⵎⵓⴷⴷⴰⵔⴻⵏ, ⵡⴹⴰⵏ ⵖⴰⵔ ⵜⴻⵎⵎⵓⵔⵜ ⵙ ⵡⵓⴷⵎⴰⵡⴻⵏ ⵏⵙⴻⵏ ⵇⵉⴱⴰⵍⵜ ⵉ ⵍⵄⴰⵔⵛ, 12 ⵇⵇⴰⵔⴻⵏ

“ⴰⵎⵉⵏ!

ⴰⵄⵓⴵⵉ ⴷ ⵍⴱⴰⵔⴰⴽⴰ

ⴷ ⵜⵉⵖⵉⵜ ⴷ ⵓⵇⴰⴷⵉ

ⴷ ⵛⵛⴰⵏ ⴷ ⵚⵚⵓⵍⵟⴰ ⴷ ⵊⵊⴻⵀⴷ

ⴰⵇⴰ-ⵜⴻⵏ ⵉ ⴰⵔⴻⴱⴱⵉ ⵏⵏⴻⵖ

ⵉ ⵍⴻⴱⴷⴰ ⵇⴰⵄ.

ⴰⵎⵉⵏ!”

13 ⵉⵟⵟⴻⴼ ⵉⵊⵊⴻⵏ ⵣⴻⴳ ⵉⵎⵖⴰⵔⴻⵏ ⵏⵏⵉ ⴷⴻⴳ ⵡⴰⵡⴰⵍ, ⵉⵏⵏⴰ ⴰⵢⵉ: “ⵎⵉⵏ ⵄⵏⴰⵏ ⵉⵏⴰ, ⵉⵏⵏⵉ ⵢⴰⵔⴹⴻⵏ ⵍⴻⵄⴱⴰⵢⴰⵜ ⵜⵉⵛⴻⵎⵍⴰⵍⵉⵏ, ⵎⵉⵏ ⵄⵏⴰⵏ ⵓ ⵎⴰⵏⵉⵙ ⴷⴷ-ⵓⵙⵉⵏ?” 14 ⵏⴻⵛⵛ ⵏⵏⵉⵖ ⴰⵙ: “ⴰ ⵙⵉⴷⵉ, ⵛⴻⴽ ⵉ ⵉⵙⵙⵏⴻⵏ.” ⵉⵏⵏⴰ ⴰⵢⵉ: “ⵉⵏⴰ ⴰⵇⴰ ⵓⵙⵉⵏ-ⴷⴷ ⵣⵉ ⵍⵎⴻⵃⵏⴻⵜ ⵜⴰⵎⴻⵇⵇⵔⴰⵏⵜ. ⴰⵇⴰ ⵏⵉⵜⵏⵉ ⵙⵉⵣⴷⵉⴳⴻⵏ ⵍⴻⵄⴱⴰⵢⴰⵜ ⵏⵙⴻⵏ ⵓⵛⴰ ⴰⵔⵔⵉⵏ ⵜⴻⵏⵜ ⴷ ⵜⵉⵛⴻⵎⵍⴰⵍⵉⵏ ⴷⴻⴳ ⵉⴷⴰⵎⵎⴻⵏ ⵏ ⵉⵣⵎⴰⵔ. 15 ⵙ ⵓⵢⴻⵏⵏⵉ ⴱⴻⴷⴷⴻⵏ ⵏⵉⵜⵏⵉ ⵣⵣⴰⵜ ⵉ ⵍⵄⴰⵔⵛ ⵏ ⴰⵔⴻⴱⴱⵉ ⵓⵛⴰ ⵙⴻⵅⵅⴰⵔⴻⵏ ⴰⵙ ⴰⵙⵙ ⴷ ⴵⵉⵍⴻⵜ ⴷⵉ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ, ⵓⵛⴰ ⵡⴻⵏⵏⵉ ⵉⵇⵇⵉⵎⴻⵏ ⵅ ⵍⵄⴰⵔⵛ ⴰⴷ ⵅⴰⵙⴻⵏ ⵉⵡⵡⴻⵜ ⴰⵇⵉⴹⵓⵏ ⵏⵏⴻⵙ. 16 ⵡⴰⵔ ⵉⵇⵇⵉⵎ ⵄⴰⴷ ⴰⴷ ⴵⴰⵥⴻⵏ ⵏⵉⵖ ⴰⴷ ⴼⴼⴰⴷⴻⵏ, ⵡⴰⵔ ⵜⴻⵏ ⵜᵉⵜⵜⵇⴻⴷⴷⵉ ⵓⵍⴰ ⴷ ⵜⴰⴼⵓⵛⵜ ⵓⵍⴰ ⴷ ⵉⵛⵜ ⵏ ⵊⵊⵓⵔⵔⴻⵜ ⵏ ⵍⴻⵃⵎⵓ, ◘7:16 ⵉⵛⴰ. 49:10. 17 ⵎⵉⵏⵣⵉ ⵉⵣⵎⴰⵔ ⵏⵏⵉ ⵉⴵⴰⵏ ⴷⵉ ⵍⵡⴻⵙⵟ ⵏ ⵍⵄⴰⵔⵛ ⴰⴷ ⵜⴻⵏ ⵢⴰⵔⵡⴻⵙ, ⴰⴷ ⵜⴻⵏ ⵉⵏⴷⴻⵀ ⵖⴰⵔ ⵜⵓⴷⴰⵔⵜ ⵓ ⵖⴰⵔ ⵜⴰⵍⴰⵡⵉⵏ ⵏ ⵡⴰⵎⴰⵏ, ⵓⵛⴰ ⵏⴻⵜⵜⴰ ⴰⴷ ⴰⵙⴻⵏ ⵉⵎⵙⴻⵃ ⴽⵓⵍ ⴰⵎⴻⵟⵟⴰ ⵣⵉ ⵜⵉⵟⵟⴰⵡⵉⵏ ⵏⵙⴻⵏ.” ◘7:17 ⵉⵛⴰ. 25:8; ⵉⵥⵀⴷ. 23:1; ⴰⵙⴰ. 21:4.