1 ⵍⵃⵓⴽⵎ ⵉⵙⵙⴰⴳⴳⵯⴰⴷⴻⵏ ⵅ ⴱⴰⴱⵉⵍ ⵏⵏⵉ ⵉⵥⵔⴰ ⵉⵛⴰⵄⵢⴰ, ⵎⵎⵉⵙ ⵏ ⴰⵎⵓⵚ.

2 “ⵙⴳⴻⵄⵄⴷⴻⵎ ⵜⴰⵄⴻⴵⴰⵏⵜ ⵅ ⵡⴻⴷⵔⴰⵔ ⴰⵇⴻⵛⵛⴰⵔ, ⵙⵖⵓⵢⵢⴻⵎ ⵖⴰⵔⵙⴻⵏ, ⵛⴻⵢⵢⴰⵔⴻⵎ ⵙ ⵓⴼⵓⵙ ⴰⵇⴰ ⴰⴷ ⴰⴷⴼⴻⵏ ⵣⵉ ⵜⴻⵡⵡⵓⵔⴰ ⵏ ⵜⴰⵔⵡⴰ ⵏ ⵜⴰⵚⵉⵍⴻⵜ!”

3 “ⵏⴻⵛⵛ ⵓⵎⵓⵔⴻⵖ ⵉⵎⵇⴻⴷⴷⴰⵙⴻⵏ ⵉⵏⵓ, ⵏⴻⵛⵛ ⵍⴰⵖⵉⵖ ⵅ ⴰⵢⵜ ⵏ ⴱⵓ-ⵜⴻⵖⵔⵓⴹⵜ ⵉⵏⵓ ⴷⵉ ⵙⵙⵉⴱⴱⴻⵜ ⵏ ⵡⴻⵖⴹⴰⴱ ⵉⵏⵓ, ⵉⵏⵏⵉ ⵉⵏⴻⴳⴳⵣⴻⵏ ⵙ ⵍⴻⴼⵔⴰⵃⴻⵜ ⵅ ⵍⵄⴰⴹⴰⵎⴰ ⵉⵏⵓ.”

4 “ⴰⵇⴰ ⵣⵣⵀⵉⵔ ⵏ ⵉⵊⵊ ⵏ ⵓⴱⴰⵔⵔⵓ ⴰⵎⴻⵇⵇⵔⴰⵏ ⵅ ⵉⴷⵓⵔⴰⵔ, ⴰⵎ ⵏ ⵉⵊⵊ ⵏ ⵍⴳⴻⵏⵙ ⵉⵎⵖⴰⵔ, ⵍⵃⴻⵙⵙ ⵏ ⴷⴷⵔⵉⵣ ⵏ ⵜⴳⴻⵍⴷⴰⵡⵉⵏ, ⵏ ⵍⴻⴳⵏⵓⵙ ⵓⵙⵉⵏ-ⴷⴷ ⵎⵓⵏⴻⵏ. ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⵉⵙⴻⴷⴷ ⵍⵄⴻⵙⴽⴰⵔ ⵏⵏⴻⵙ. 5 ⴰⴷ ⴷⴷ-ⴰⵙⴻⵏ ⵣⵉ ⵜⴻⵎⵎⵓⵔⵜ ⵜⵉⴳⴳⵯⴻⵊ, ⵣⵉ ⵟⵟⴰⵔⴼ ⵏ ⵓⵊⴻⵏⵏⴰ, ⵙⵉⴷⵉ ⴷ ⵍⴻⵇⵛⵓⵄ ⵏ ⵡⴻⵙⵅⴻⴹ ⵏⵏⴻⵙ, ⵃⵉⵎⴰ ⴰⴷ ⵅⴰⵔⵔⴱⴻⵏ ⵎⴰⵔⵔⴰ ⵜⴰⵎⵎⵓⵔⵜ.”

6 “ⵙⵖⵓⵢⵢⴻⵎ, ⵎⴰⵖⴰⵔ ⴰⵙⵙ ⵏ ⵙⵉⴷⵉ ⵢⵓⴷⴻⵙ-ⴷⴷ, ⴰⴷ ⴷⴷ-ⵢⴰⵙ ⴰⵎ ⵓⵔⴻⴷⴷⴻⴵ ⵣⴻⴳ ⵓⵎⵣⴻⵎⵎⴰⵔ ⵅ ⴽⵓⵍⵛⵉ. ◘13:6 ⵢⵓⵡ. 2:10, 31; 3:15; ⵉⵛⴰ. 13:6-13; 24:23; ⴰⵎ. 8:9; ⵎⵜ. 24:29; ⵍⴻⵅ. 2:20; ⴰⵙⴰ. 6:12-13 7 ⵅ ⵓⵢⴰ ⴷⴻⵡⵍⴻⵏ ⵎⴰⵔⵔⴰ ⵉⴼⴰⵙⵙⴻⵏ ⴼⴻⵛⵍⴻⵏ ⵓ ⵡⵓⵍ ⵏ ⴽⵓⵍ ⴱⵏⴰⴷⴻⵎ ⵉⴼⴻⵙⵙⵉ. 8 ⵏⵉⵜⵏⵉ ⵏⵏⵅⴻⵍⵄⴻⵏ, ⵉⵍⴻⵇⵇⴻⴼ ⵉ-ⵜⴻⵏ ⵡⴻⵖⵏⴰⵙ ⴷ ⵍⴻⵡⵊⴻⵄ ⵏ ⵜⴰⵔⵓⵜ, ⵜⵜⵏⴻⵣⴱⴰⵔⴻⵏ ⴰⵎ ⵜⴻⵎⵖⴰⵔⵜ ⵉⵜⵜⴰⵔⵓⵏ. ⴽⵓⵍ ⵉⵊⵊ ⵉⵅⴻⵣⵣⴰⵔ ⵖⴰⵔ ⵡⴻⵏⵏⴻⵖⵏⵉ, ⵉⵖⴻⵎⴱⴰⴱ ⵏⵙⴻⵏ ⴳⴳⵉⵏ ⴰⵎ ⵢⵉⵛⴻⵄⵄⴰⵍⴻⵏ ⵏ ⵜⵎⴻⵙⵙⵉ.”

9 “ⵅⵣⴰⵔ, ⴰⵙⵙ ⵏ ⵙⵉⴷⵉ ⴰⴷ ⴷⴷ-ⵢⴰⵙ, ⵙ ⵍⴻⵇⵙⴰⵃⴻⵜ ⵉⵡⵄⴰⵔⴻⵏ ⵓ ⵙ ⵍⵃⴰⴷⵓⵇ ⵏ ⵡⴻⵖⴹⴰⴱ ⵏⵏⴻⵙ, ⵃⵉⵎⴰ ⴰⴷ ⵢⴰⵔⵔ ⵜⴰⵎⵎⵓⵔⵜ ⴷ ⵡⴰⵔⴻⴷⴷⴻⴵ ⵓ ⵃⵉⵎⴰ ⴰⴷ ⵣⵣⴰⵢⴻⵙ ⵉⵎⵃⴰ ⵉⵎⴻⴷⵏⴰⴱ. 10 ⵎⴰⵖⴰⵔ ⵉⵜⵔⴰⵏ ⵏ ⵓⵊⴻⵏⵏⴰ ⴷ ⵉⵡⵔⴰⴼⴻⵏ ⵏ ⵉⵜⵔⴰⵏ ⵡⴰⵔ ⵜⵜⴻⵊⵊⵉⵏ ⵄⴰⴷ ⵜⴰⴼⴰⵡⵜ ⵏⵙⴻⵏ ⴰⴷ ⵜⴰⵔⵖ, ⵜⴰⴼⵓⵛⵜ ⴰⴷ ⵜⴻⴱⴱⴰⵔⵛⴻⵏ ⵅⵎⵉ ⴷⴷ ⵖⴰ ⵜⴻⵏⵇⴰⵔ, ⵓⵛⴰ ⵜⴰⵣⵉⵔⵉ ⵡⴰⵔ ⵜⵜⴻⵊⵊⵉ ⵄⴰⴷ ⵜⴰⴼⴰⵡⵜ ⵏⵏⴻⵙ ⴰⴷ ⵜⵛⴻⵄⵛⴻⵄ. ◘13:10 ⵃⵉⵥ. 32:7; ⵢⵓⵡ. 3:4; 3:15; ⵎⵜ. 24:29; ⵎⴽ. 13:24; ⵍⴽ. 21:25 11 ⵎⴰⵖⴰⵔ ⴰⴷ ⵅⴻⴵⵚⴻⵖ ⵉ ⴷⴷⵓⵏⴻⵛⵜ ⵜⵓⵄⴻⴼⴼⵏⴰ ⵏⵏⴻⵙ ⵓ ⵉ ⵉⵄⴻⴼⴼⴰⵏⴻⵏ ⵍⵎⵓⵄⵚⵉⵢⵢⴻⵜ ⵏⵙⴻⵏ ⵓ ⵏⴻⵛⵛ ⴰⴷ ⵙⵙⴱⴻⴷⴷⴻⵖ ⵏⵏⴼⴰⵅⴻⵜ ⵏ ⵉⵎⵄⴻⴼⴼⴰⵔⴻⵏ ⵓ ⴰⴷ ⵙⵙⴻⵀⵡⵉⵖ ⵏⵏⴼⴰⵅⴻⵜ ⵏ ⴰⵢⵜ ⵏ ⴱⵓ-ⵍⴻⵅⵛⵓⵏⴻⵜ. 12 ⴰⴷ ⴰⵔⵔⴻⵖ ⴰⵔⵢⴰⵣ ⴰⴷ ⵢⵉⵍⵉ ⵉⵖⵍⴰ ⵅ ⵡⵓⵔⴻⵖ ⴰⵣⴷⴰⴷ, ⵓⵍⴰ ⴷ ⴱⵏⴰⴷⴻⵎ ⵅ ⵡⵓⵔⴻⵖ ⵉⵖⵍⴰⵏ ⵣⵉ ⵓⴼⵉⵔ. 13 ⵅ ⵓⵢⴰ ⴰⴷ ⵙⵙⴰⵔⵊⵉⵊⴻⵖ ⵉⵊⴻⵏⵡⴰⵏ ⵓⵛⴰ ⴰⴷ ⵜⴻⵏⵀⴻⵣⵣ ⵜⴻⵎⵎⵓⵔⵜ ⵣⴻⴳ ⵡⴻⵎⵛⴰⵏ ⵏⵏⴻⵙ ⵣⴻⴳ ⵓⴷⵓⵇⵇⴻⵣ ⵏ ⵓⴼⵓⴳⴻⵎ ⵏ ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⵓ ⵣⴻⴳ ⵡⴰⵙⵙ ⵏ ⵍⵃⴰⴷⵓⵇ ⵏ ⵡⴻⵖⴹⴰⴱ ⵏⵏⴻⵙ.” 14 “ⴰⵎ ⵜⵖⴰⵢⴹⴻⵜ ⵏ ⵡⴻⵣⵖⴰⵔ ⵉⵏⵊⴻⵔⴼⴻⵏ, ⴰⵎ ⵡⵓⴵⵉ ⵡⴰⵔ ⵖⴰⵔⴻⵙ ⴷⴷ-ⵉⴽⵙⵉ ⵓⵍⴰ ⴷ ⵉⵊⵊ, ⴰⵎⵎⵓ ⵉ ⵖⴰ ⵏⵏⵇⴻⵍⴱⴻⵏ ⵏⵉⵜⵏⵉ ⴽⵓⵍ ⵉⵊⵊ ⵖⴰⵔ ⵍⴳⴻⵏⵙ ⵏⵏⴻⵙ ⵓ ⴽⵓⵍ ⵉⵊⵊ ⴰⴷ ⵢⴰⵔⵡⴻⵍ ⵖⴰⵔ ⵜⴻⵎⵎⵓⵔⵜ ⵏⵏⴻⵙ. 15 ⵇⴰⵄ ⵡⴻⵏⵏⵉ ⵉ ⵖⴰ ⵉⵜⵜⵡⴰⴼⴻⵏ, ⴰⴷ ⵅⴰⵙ ⵛⵓⵇⴻⵏ, ⵓ ⵇⴰⵄ ⵡⴻⵏⵏⵉ ⵉ ⵖⴰ ⵟⵟⴼⴻⵏ, ⴰⴷ ⵉⵡⴹⴰ ⵙ ⵙⵙⵉⴼ. 16 ⵣⵣⴰⵜ ⵉ ⵜⵉⵟⵟⴰⵡⵉⵏ ⵏⵙⴻⵏ ⴰⴷ ⵜⵜⵡⴰⴷⴷⵣⴻⵏ ⵉⵃⴻⵏⵊⵉⵔⴻⵏ ⵏⵙⴻⵏ, ⴰⴷ ⵜⵜⵡⴰⴽⴻⵛⵛⴹⴻⵏⵜ ⵜⵓⴷⵔⵉⵏ ⵏⵙⴻⵏ ⵓ ⵜⵉⵎⵖⴰⵔⵉⵏ ⵏⵙⴻⵏ ⴰⴷ ⵜⵜⵡⴰⵙⵙⵏⵓⵇⵇⴱⴻⵏⵜ.”

17 “ⵅⵣⴰⵔ, ⵏⴻⵛⵛ ⴰⴷ ⵅⴰⵙⴻⵏ ⵙⵙⵃⴰⵔⵔⵛⴻⵖ ⵉⵎⴰⴷⵉⵢⵢⴻⵏ, ⵏⵉⵜⵏⵉ ⵡⴰⵔ ⴷ ⴰⵙⴻⵏ ⵜⴻⵛⵇⵉ ⵏⵏⵓⵇⴰⵔⵜ ⵓ ⵖⴰⵔⵙⴻⵏ ⵏⵉⵜⵏⵉ ⵓⵔⴻⵖ ⵡⴰⵔ ⵉⵙⴻⴽⴽⵡⵉ. 18 ⵍⴻⵇⵡⴰⵙ ⵏⵙⴻⵏ ⴰⴷ ⵅⴰⵔⵔⴳⴻⵏ ⵉⵃⵓⴷⵔⵉⵢⵢⴻⵏ, ⵡⴰⵔ ⴰⵔⴻⵃⵃⵎⴻⵏ ⵛⴰ ⵅ ⵍⵖⵉⴵⴻⵜ ⵏ ⵓⵄⴻⴷⴷⵉⵙ, ⵓ ⵜⵉⵟⵟ ⵏⵙⴻⵏ ⵡⴰⵔ ⵜᵉⵜⵜⵣⵉⴵⵉⵣ ⵉ ⵉⵃⴻⵏⵊⵉⵔⴻⵏ. 19 ⵜⴰⵏⴷⵉⵏⵜ ⵏ ⴱⴰⴱⵉⵍ, ⵜⴰⵍⵡⵉⵣⵜ ⵊⴰⵔ ⵜⴳⴻⵍⴷⴰⵜⵉⵏ, ⵜⴻⵏⵏⵉ ⴷ ⵍⵄⴻⵣⵣ ⴷ ⵓⵙⴻⵎⵖⴰⵔ ⵏ ⵉⴽⴰⵍⴷⴰⵏⵉⵢⵢⴻⵏ, ⴰⴷ ⵜⴻⴷⵡⴻⵍ ⴰⵎ ⵎⴰⵎⵎⴻⵛ ⵍⴰⵎⵉ ⵜⵓⵖⴰ ⴰⵔⴻⴱⴱⵉ ⵉⵙⵙⵏⴻⵇⵍⴻⴱ ⵙⴰⴷⵓⵎ ⴷ ⵄⴰⵎⵓⵔⵔⴰ. ◘13:19 ⴰⵎⵥ. 19:25; ⵉⵛⴰ. 1:9; ⵉⵔⵎ. 49:18; 50:40 20 ⵉ ⵍⴻⴱⴷⴰ ⵡⴰⵔ ⵉⵜⵜⵖⵉⵎⵉ ⴷⵉⵏ ⵓⵍⴰ ⴷ ⵉⵊⵊ, ⵡⴰⵔ ⴷⴰⵢⴻⵙ ⵣⴻⴷⴷⵖⴻⵏ ⵄⴰⴷ ⵣⵉ ⵊⵊⵉⵍ ⴰⵍ ⵊⵊⵉⵍ. ⴰⵄⵔⴰⴱ ⵡⴰⵔ ⴷⵉⵏⵏⵉ ⵉⵛⵛⵉⵜ ⴰⵇⵉⴹⵓⵏ ⵏⵏⴻⵙ ⵄⴰⴷ ⵓ ⵉⵎⴻⴽⵙⴰⵡⴻⵏ ⵡⴰⵔ ⵜⵜⴻⵊⵊⵉⵏ ⴰⴷ ⵜⴰⵔⴻⵢⵢⴻⵃ ⴷⵉⵏ ⵜⵃⵉⵎⴰⵔⵜ ⵏⵙⴻⵏ ⵄⴻⵎⵎⴰⵔⵚ. ◘13:20 ⵉⵔⵎ. 50:39 21 ⵍⴻⵡⵃⵓⵛ ⵏ ⵍⴻⵅⵍⴰ ⴰⴷ ⵣⵣⵍⴻⵏ ⴷⵉⵏⵏⵉ ⵓ ⵜⵉⵣⴻⴷⴷⵉⵖⵉⵏ ⵏⵙⴻⵏ ⴰⴷ ⵛⵛⵓⵔⴻⵏⵜ ⵙ ⵎⵓⴽⴰⵜ, ⵢⴻⵙⵙⵉⵙ ⵏ ⵏⵏⵄⴰⵎⴻⵜ ⴰⴷ ⵣⴻⴷⵖⴻⵏⵜ ⴷⵉⵏⵏⵉ ⵓⵛⴰ ⵉⵎⵓⵢⴰⵏ ⵉⵊⴻⵏⵏⴻⵏ ⴰⴷ ⴷⵉⵏⵏⵉ ⵏⴻⴳⵣⴻⵏ. 22 ⴰⴷ ⵙⵙⵎⵉⵄⵄⵉⵡⴻⵏ ⵉⴼⵉⵙⴻⵏ ⵉⵊⵊ ⵖⴰⵔ ⵡⴻⵏⵏⴻⵖⵏⵉ ⴷⵉ ⵍⵇⴻⵍⵄⴰⵜ ⵉⵜⵜⵡⴰⵊⵊⴻⵏ ⵏ ⴱⴰⴱⵉⵍ ⵓⵍⴰ ⴷ ⵓⵛⵛⴰⵏⴻⵏ ⵏ ⵍⴻⵅⵍⴰ ⴷⵉ ⵍⴻⵇⵚⵓⵔ ⵏ ⵍⴻⵀⵣⵓⵟ. ⵍⵡⴻⵇⵜ ⵏⵏⴻⵙ ⴰⴷ ⴷⴷ-ⵜⴰⵡⴻⴹ ⴷⴻⵖⵢⴰ ⵓ ⵓⵙⵙⴰⵏ ⵏⵏⴻⵙ ⵡⴰⵔ ⵜⵜⵣⵓⴳⴳⴰⵔⵜⴻⵏ ⵛⴰ.”