1 ⵅⴻⵏⵏⵉ ⵉⵙⵡⴻⴹ ⵢⴰⵙⵓⵄ ⵖⴰⵔ ⴰⵢⵜⴱⴰⴱ ⵏ ⵡⴰⴳⵍⴰ ⵙⵙⵔⵓⵙⴰⵏ ⵚⵚⴷⴰⵇⵉ ⵏⵙⴻⵏ ⴷⵉ ⵙⵙⴻⵏⴷⵓⵇ. ◘21:1 [ⵎⴽ. 12:41-44] — 2 ⵉⵊ. 12:10; ⵎⴽ. 12:41. 2 ⵉⵥⵔⴰ ⵄⴰⵡⴻⴷ ⵉⵛⵜ ⵏ ⵜⴰⵊⵊⴰⵍⵜ ⵜⴰⵎⴻⵣⵍⵓⴹⵜ ⵜⴻⵙⵙⴰⵔⵙ ⴷⴰⵢⴻⵙ ⵜⵏⴰⵢⴻⵏ ⵏ ⵓⵇⵉⵢⵢⴰⵜ, ⵙⴻⵎⵎⴰⵏ ⵜⴻⵏⵜ ‘ⵛⴰⵎⵓⵏⴰⵜ’. 3 ⵉⵏⵏⴰ ⴰⵙⴻⵏ: “ⵙ ⵜⵉⴷⴻⵜⵜ, ⵏⴻⵛⵛ ⴰⴷ ⴰⵡⴻⵎ ⵉⵏⵉⵖ, ⴰⵇⴰ ⵜⴰⵊⵊⴰⵍⵜ-ⴰ ⵍⵎⴻⵙⴽⵉⵏⴰ ⵜⴻⵏⴹⴰⵔ ⴷⴰⵢⴻⵙ ⴽⵜⴰⵔ ⵣⵣⴰⵢⵙⴻⵏ ⵎⴰⵔⵔⴰ. ◘21:3 2 ⴽⵓⵔ. 8:12. 4 ⵎⵉⵏⵣⵉ ⵎⴰⵔⵔⴰ ⵏⵉⵜⵏⵉ ⵏⴹⴰⵔⴻⵏ ⵣⵉ ⵣⵣⵉⵢⴰⴷⴰ ⵏ ⵡⴰⴳⵍⴰ ⵏⵙⴻⵏ ⵉⵛⵜ ⵏ ⵚⵚⴻⴷⵇⴻⵜ ⴷⴻⴳ ⵡⴻⵅⵅⴰⵎ ⵏ ⵚⵚⴷⴰⵇⵉ ⵏ ⴰⵔⴻⴱⴱⵉ, ⵎⴰⵛⴰ ⵏⴻⵜⵜⴰⵜ ⵣⵉ ⵍⴻⵅⵚⴻⵚ ⵏⵏⴻⵙ ⴰⵇⴰ ⵜⴻⵏⴹⴰⵔ ⴷⴰⵢⴻⵙ ⵎⴰⵔⵔⴰ ⵎⵉⵏ ⵖⴰⵔⴻⵙ.”

5 ⴰⵍⴰⵎⵉ ⵜⵓⵖⴰ ⵛⴰ ⵏ ⵉⵡⴷⴰⵏ ⵙⵙⴰⵡⴰⵍⴻⵏ ⵅ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ, ⵜⴻⵏⵏⵉ ⵜⵣⴻⵡⵡⴻⵇ ⵙ ⵉⵥⵔⴰ ⵉⵚⴻⴱⵃⴻⵏ ⴷ ⵚⵚⴷⴰⵇⵉ, ⵉⵏⵏⴰ ⴰⵙⴻⵏ ⵢⴰⵙⵓⵄ: ◘21:5 [ⵎⵜ. 24:1-14; ⵎⴽ. 13:1-13] — ⵎⵜ. 24:1; ⵎⴽ. 13:1. 6 “ⵎⴰ ⵜᵉⵜⵜⵡⴰⵍⴰⵎ ⵜⵉⵎⴻⵙⵍⴰⵢⵉⵏ-ⴰ? ⴰⴷ ⴷⴷ-ⴰⵙⴻⵏ ⵡⵓⵙⵙⴰⵏ ⵡⴰⵔ ⵉⵜⵜⵖⵉⵎⵉ ⵓⵍⴰ ⴷ ⵉⵊⵊ ⵏ ⵡⴻⵥⵔⵓ ⵅ ⵡⴻⵥⵔⵓ ⵏⵏⴻⵖⵏⵉ ⵉ ⵡⴰⵔ ⵉⵜⵜⴰⵔⴻⴷⴷⴵⴻⵏ.” ◘21:6 1 ⵉⵊ. 9:7; ⵎⵉⵅⴰ 3:12; ⵍⴽ. 19:44. 7 ⵙⵙⴻⵇⵙⴰⵏ ⵜ, ⵏⵏⴰⵏ: “ⴰ ⴰⵎⵙⴻⵖⵖⴰⵔ, ⵎⴻⵍⵎⵉ ⵉ ⵖⴰ ⵢⵉⵍⵉ ⵓⵢⴰ ⴷ ⵎⴰⵏ ⵍⴻⵄⵍⴰⵎⴻⵜ ⴰⵇⴰ ⵜⵉⵎⴻⵙⵍⴰⵢⵉⵏ-ⴰ ⵓⴷⵙⴻⵏⵜ-ⵉ-ⴷⴷ?” 8 ⵉⵏⵏⴰ ⴰⵙⴻⵏ: “ⵄⴻⵙⵙⴻⵎ, ⵡⴰⵔ ⵜᵉⵜⵜⵡⴰⵖⴰⵔⵔⴻⵎ, ⵎⵉⵏⵣⵉ ⴰⵟⵟⴰⵙ ⴰⴷ ⴷⴷ-ⴰⵙⴻⵏ ⵙ ⵢⵉⵙⴻⵎ ⵉⵏⵓ, ⴰⴷ ⵉⵏⵉⵏ: ‘ⴰⵇⴰ ⵏⴻⵛⵛ ⴷ ⵍⵎⴰⵙⵉⵃ!’ ⵓ: ‘ⵍⵡⴻⵇⵜ ⴰⵇⴰ ⵜⵉⵡⴻⴹ-ⴷⴷ!’, ⵎⴰⵛⴰ ⵡⴰⵔ ⴳⴳⵓⵔⴻⵎ ⴰⵡⴰⵔⵏⵉ ⴰⵙⴻⵏ. ◘21:8 ⵉⵔⵎ. 29:8; ⵎⵜ. 24:4; ⴰⴼⴰ. 5:6; ⴽⵓⵍ. 2:18; 2 ⵜⵙ. 2:2; 1 ⵢⵃ. 4:1. 9 ⵎⴰⵍⴰ ⵜⴻⵙⵍⵉⵎ ⵅ ⵍⴱⴰⵔⵓⴹ ⴷ ⵉⵖⴻⵡⵡⵖⴻⵏ, ⵡⴰⵔ ⵜⵜⵏⴻⵅⵍⵉⵄⴻⵎ ⵛⴰ, ⵎⵉⵏⵣⵉ ⵙ ⵓⵖⵉⵍ ⴰⴷ ⵢⵉⵍⵉ ⵓⵢⴰ ⴷ ⴰⵎⴻⵣⵡⴰⵔ, ⵎⴰⵛⴰ ⵡⴰⵔ ⵉⵜⵜⵉⵍⵉ ⵄⴰⴷ ⴷⴻⵖⵢⴰ ⵓⵏⴻⴳⴳⴰⵔ.

10 ⵎⴰⵖⴰⵔ ⵉⵊⵊ ⵏ ⵍⴳⴻⵏⵙ ⴰⴷ ⴷⴷ-ⵉⴳⴻⵄⵄⴻⴷ ⴹⵉⴷⴷ ⵏ ⵉⵊⵊ ⵏ ⵍⴳⴻⵏⵙ ⵏⵏⴻⵖⵏⵉ ⵓ ⵉⵛⵜ ⵏ ⵜⴳⴻⵍⴷⵉⵜ ⴹⵉⴷⴷ ⵏ ⵉⵛⵜ ⵏ ⵜⴳⴻⵍⴷⵉⵜ ⵏⵏⴻⵖⵏⵉⵜ. ◘21:10 ⵉⵛⴰ. 19:2. 11 ⴰⴷ ⵉⵍⵉⵏ ⵉⵏⵀⴻⵣⵣⵉⵢⵢⴻⵏ ⵏ ⵜⴻⵎⵎⵓⵔⵜ ⵎⵖⴰⵔⴻⵏ ⴷⵉ ⵄⵍⴰⵎ ⴽⵓⵍ ⵉⵎⵓⵛⴰⵏ ⴷ ⵍⴰⵥ ⴷ ⵊⵊⵔⴰⵢⴻⵃ ⴷ ⵜⵉⴳⴳⵯⵓⴷⵉ ⴷ ⵓⵙⵏⴻⵅⵍⵉⵄ. ⵓⵛⴰ ⴰⴷ ⴷⴷ-ⴱⴰⵏⴻⵏⵜ ⵍⴻⵄⵍⴰⵎⴰⵜ ⵎⵖⴰⵔⴻⵏⵜ ⵣⴻⴳ ⵓⵊⴻⵏⵏⴰ ⵓ ⴰⴷ ⴷⵉⵏ ⵉⵍⵉⵏⵜ ⵜⵃⴰⵔⵢⴰⴹⵉⵏ ⵉⵊⴻⵀⴷⴻⵏ. 12 ⵎⴰⵛⴰ ⵇⴱⴻⵍ ⵎⴰⵏ ⴰⵢⴰ ⵎⴰⵔⵔⴰ ⴰⴷ ⵅⴰⵡⴻⵎ ⵙⵙⴰⵔⵙⴻⵏ ⵉⴼⴰⵙⵙⴻⵏ, ⴰⴷ ⴽⴻⵏⵏⵉⵡ ⵙⴻⵍⵍⵎⴻⵏ ⵖⴰⵔ ⵜⴻⵎⵣⵉⴷⴰⵡⵉⵏ ⴷ ⵍⴻⵃⴱⵓⵙⴰⵜ, ⵓⵛⴰ ⴰⴷ ⴽⴻⵏⵏⵉⵡ ⵏⴻⴷⵀⴻⵏ ⵣⵣⴰⵜ ⵉ ⵉⵊⴻⴵⵉⴷⴻⵏ ⴷ ⵍⵃⵓⴽⴽⴰⵎ ⵅ ⵙⵙⵉⴱⴱⴻⵜ ⵏ ⵢⵉⵙⴻⵎ ⵉⵏⵓ. ◘21:12 ⵎⵜ. 10:17; 24:9; ⵎⴽ. 13:9; ⵢⵃ. 16:2; ⵍⴻⵅ. 4:3; 5:18; 12:4; 16:24; ⴰⵙⴰ. 2:10. 13 ⵎⴰⵛⴰ ⵎⴰⵏ ⴰⵢⴰ ⴰⴷ ⵢⴰⵔⵔⴰ ⴽⴻⵏⵏⵉⵡ ⴰⴷ ⵜⵛⴻⵀⴷⴻⵎ. ◘21:13 ⵍⴽ. 9:15; 21:13; 24:48 14 ⴳⴳⴻⵎ ⴷⴻⴳ ⵡⵓⵍⴰⵡⴻⵏ ⵏⵡⴻⵎ ⵎⴰⵃⴻⵏⴷ ⵡⴰⵔ ⵜⴰⵔⴻⵣⵣⵓⵎ ⴰⴷ ⵜⵍⴻⵎⴷⴻⵎ ⵎⴰⵎⵎⴻⵛ ⵉ ⴷⴷ ⵖⴰ ⵜⴰⵔⵔⴻⵎ. ◘21:14 ⵎⵜ. 10:19; ⵎⴽ. 13:11. 15 ⵎⵉⵏⵣⵉ ⵏⴻⵛⵛ ⴰⴷ ⴰⵡⴻⵎ ⵡⵛⴻⵖ ⴰⵇⴻⵎⵎⵓⵎ ⴷ ⵜⵉⵖⵉⵜ ⵉ ⵡⴰⵔ ⵣⴻⵎⵎⴰⵔⴻⵏ ⴰⴷ ⵜⴻⵏ ⵙⵙⴱⴻⴷⴷⴻⵏ ⵎⴰⵔⵔⴰ ⵍⵄⴻⴷⵢⴰⵏ ⵏⵡⴻⵎ. ◘21:15 ⵓⴼ. 4:12; ⵉⵛⴰ. 54:17; ⵎⵜ. 10:19; ⵍⴻⵅ. 6:10. 16 ⴰⴷ ⴽⴻⵏⵏⵉⵡ ⵙⴻⵍⵍⵎⴻⵎ ⵍⵡⴰⵍⵉⴷⵉⵏ ⵏⵡⴻⵎ ⴷ ⵜⴰⵡⵎⴰⵜ ⵏⵡⴻⵎ ⴷ ⵍⴰⴵ ⵏⵡⴻⵎ ⴷ ⵉⵎⴻⴷⴷⵓⴽⴽⴰⵍ ⵏⵡⴻⵎ ⵓⵛⴰ ⴰⴷ ⵏⵖⴻⵏ ⵛⴰ ⵣⵣⴰⵢⵡⴻⵎ, ◘21:16 ⵎⵉⵅⴰ 7:6; ⵍⴻⵅ. 7:59; 12:2. 17 ⵓ ⴽⴻⵏⵏⵉⵡ ⴰⴷ ⵜᵉⵜⵜⵡⴰⵛⴰⵔⵀⴻⵎ ⵣⵉ ⵎⴰⵔⵔⴰ ⵙ ⵙⵙⵉⴱⴱⴻⵜ ⵏ ⵢⵉⵙⴻⵎ ⵉⵏⵓ. ◘21:17 ⵎⵜ. 10:22; ⵎⴽ. 13:13. 18 ⵡⴰⵅⵅⴰ ⴰⵎⴻⵏⵏⵉ ⵓⵍⴰ ⴷ ⵉⵊⵊ ⵏ ⵓⵥⴻⵟⵟⵓ ⵏ ⵓⵛⵓⵡⵡⴰⴼ ⵏ ⵓⵣⴻⴵⵉⴼ ⵏⵡⴻⵎ ⵡⴰⵔ ⵉⵜⵜⵡⴻⴷⴷⴰⵔⵉ ⵛⴰ, ◘21:18 1 ⵚⵎ. 14:45; 2 ⵚⵎ. 14:11; 1 ⵉⵊ. 1:52; ⵎⵜ. 10:30. 19 ⵎⴰⵛⴰ ⵙ ⵚⵚⴱⴰⵔ ⵏⵡⴻⵎ ⴰⴷ ⵜⴰⵔⴻⴱⵃⴻⵎ ⵍⴻⵄⵎⵓⵔ ⵏⵡⴻⵎ.”

20 “ⵅⵎⵉ ⵖⴰ ⵜⵥⴰⵔⴻⵎ ⵓⵔⵛⴰⵍⵉⵎ ⴰⵇⴰ ⵉⵏⵏⴻⴹ ⴰⵙ-ⴷⴷ ⵍⵄⴻⵙⴽⴰⵔ, ⵅⴻⵏⵏⵉ ⵙⵏⴻⵎ ⴱⴻⵍⵍⵉ ⴰⵇⴰ ⵉⵇⴰⵔⵔⴻⴱ-ⴷⴷ ⵡⴰⵔⴻⴷⴷⴻⴵ ⵏⵏⴻⵙ. ◘21:20 [ⵎⵜ. 24:15-21; 24:29-35; ⵎⴽ. 13:14-19; 13:24-32] — ⴷⴰⵏ. 9:27; ⵣⴰⴽ. 14:1-3; ⵎⵜ. 24:15-35; ⵎⴽ. 13:14-31. 21 ⵅⴻⵏⵏⵉ ⵉⵜⵜⵅⴻⵚⵚⴰ ⴰⴷ ⴰⵔⴻⵡⵍⴻⵏ ⵉⵏⵏⵉ ⵉⴵⴰⵏ ⴷⵉ ⵢⴰⵀⵓⴷⵉⵢⵢⴰ ⵖⴰⵔ ⵉⴷⵓⵔⴰⵔ, ⴻⵊⵊ ⵉⵏⵏⵉ ⵉⴵⴰⵏ ⴷⵉ ⵍⵡⴻⵙⵟ ⵏⵏⴻⵙ ⴰⴷ ⵣⵣⴰⵢⴻⵙ ⴼⴼⵖⴻⵏ, ⴰⴷ ⴰⵔⴻⵡⵍⴻⵏ, ⴷ ⵢⵉⵏⵏⵉ ⵉⴵⴰⵏ ⴷⵉ ⴷⵛⵓⵔⴰⵜ, ⵡⴰⵔ ⵜⵜ ⵜⵜⵉⴷⴼⴻⵏ, 22 ⵎⵉⵏⵣⵉ ⵉⵏⴰ ⴷ ⵓⵙⵙⴰⵏ ⵏ ⵏⵏⴻⵇⵎⴻⵜ ⵃⵉⵎⴰ ⴰⴷ ⵉⵜⵜⵡⴰⴽⴻⵎⵎⴻⵍ ⵎⴰⵔⵔⴰ ⵎⵉⵏ ⵢⵓⵔⵉⵏ. ◼21:22 ⵓⵙⵙⴰⵏ ⵏ ⵏⵏⴻⵇⵎⴻⵜ-ⵏⵉⵖ ‘ⵓⵙⵙⴰⵏ ⵏ ⵡⴻⵄⵎⵓⴷ’.  ◘21:22 ⴷⴰⵏ. 9:26, 27; ⵎⵜ. 24:15; ⵎⴽ. 13:14. 23 ⵓⵛⵜ ⵅ ⵜⴻⵎⵖⴰⵔⵉⵏ ⵏⵏⵉ ⵙ ⴷⴷⴻⵢⵙⴻⵜ ⴷ ⵜⵉⵏⵏⵉ ⵉⵙⵙⵓⵟⵟⵓⴹⴻⵏ ⴷⴻⴳ ⵡⵓⵙⵙⴰⵏ ⵏⵏⵉ, ⵎⵉⵏⵣⵉ ⴰⴷ ⴷⵉⵏ ⵜⵉⵍⵉ ⵍⵎⴻⵃⵏⴻⵜ ⴷ ⵜⴰⵎⴻⵇⵇⵔⴰⵏⵜ ⵅ ⵜⴻⵎⵎⵓⵔⵜ ⴷ ⵡⴻⵖⴹⴰⴱ ⵅ ⵍⴳⴻⵏⵙ-ⴰ. 24 ⵏⵉⵜⵏⵉ ⴰⴷ ⵡⴹⴰⵏ ⵙ ⵍⴻⵇⴹⴻⵄ ⵏ ⵙⵙⵉⴼ, ⴰⴷ ⵜⵜⵡⴰⵃⴻⴱⴱⵙⴻⵏ ⴰⵎ ⵜⵜⵡⴰⵏⴻⴷⵀⴻⵏ ⵊⴰⵔ ⵎⴰⵔⵔⴰ ⵍⴻⴳⵏⵓⵙ, ⵓⵛⴰ ⵓⵔⵛⴰⵍⵉⵎ ⴰⴷ ⵅⴰⵙ ⵄⴻⴼⵙⴻⵏ ⵍⴻⴳⵏⵓⵙ ⴰⵍ ⵖⴰ ⴽⴻⵎⵎⵍⴻⵏⵜ ⵣⵣⵎⴰⵏⴰⵜ ⵏ ⵍⴻⴳⵏⵓⵙ.” ◘21:24 ⵔⵓⵎ. 11:25.

25 “ⴰⴷ ⴷⵉⵏ ⵉⵍⵉⵏⵜ ⵍⴻⵄⵍⴰⵎⴰⵜ ⴷⵉ ⵜⴼⵓⵛⵜ, ⴷⵉ ⵜⵣⵉⵔⵉ ⵓ ⴷⴻⴳ ⵉⵜⵔⴰⵏ, ⵓⵛⴰ ⵅ ⵜⴻⵎⵎⵓⵔⵜ ⴰⴷ ⴷⵉⵏ ⵜⵉⵍⵉ ⵍⵎⴻⵃⵏⴻⵜ ⴷⵉ ⵍⴻⴳⵏⵓⵙ, ⴰⵍ ⴷ ⴰⵙⴻⵏ ⵉⵡⴻⴷⴷⴰⵔ ⵎⵉⵏ ⵖⴰ ⴳⴳⴻⵏ ⵣⴻⴳ ⵓⵏⴻⵅⵍⵉⵄ ⵏ ⵣⵣⵀⵉⵔ ⴰⵎⴻⵇⵇⵔⴰⵏ ⵏ ⵍⴻⴱⵃⴰⵔ, ◘21:25 ⵉⵛⴰ. 13:10; ⵃⵉⵥ. 32:7; ⵢⵓⵡ. 3:4; 3:15; ⵎⵜ. 24:29; ⵎⴽ. 13:24; ⴰⵙⴰ. 6:12. 26 ⵓ ⵣⴻⴳ ⵡⴻⵏⵀⴻⵣⵣⵉ ⵏ ⵜⴻⵎⵎⵓⵔⵜ ⴷ ⴰⵎⴻⵇⵇⵔⴰⵏ ⴰⴷ ⵉⵙⵙⵏⴻⵅⵍⵉⵄ ⵍⴻⵄⵎⴰⵔ ⵏ ⵉⵡⴷⴰⵏ ⵣⵉ ⵜⵉⴳⴳⵯⵓⴷⵉ ⵣⵉ ⵎⵉⵏ ⵉ ⴷⴷ ⵖⴰ ⵢⴰⵙⴻⵏ ⵅ ⵜⴻⵎⵎⵓⵔⵜ, ⵓ ⵚⵚⵓⵍⴰⵟⴰⵜ ⵏ ⵉⵊⴻⵏⵡⴰⵏ ⴰⴷ ⵜⵜⵡⴰⵏⵀⴻⵣⵣⴻⵏⵜ. 27 ⵍⴻⵅⴷⴻⵏⵏⵉ ⴰⴷ ⵥⴰⵔⴻⵏ ⵎⵎⵉⵙ ⵏ ⴱⵏⴰⴷⴻⵎ, ⵅⵎⵉ ⴷⴷ ⵖⴰ ⵢⴰⵙ ⴷⴻⴳ ⵉⵙⴻⵢⵏⵓⵜⴻⵏ, ⵙ ⵊⵊⴻⵀⴷ ⴷ ⵓⵄⵓⴵⵉ ⴰⵟⵟⴰⵙ. ◘21:27 ⴷⴰⵏ. 7:10; ⵎⵜ. 16:27; 24:30; 25:31; 26:64; ⵎⴽ. 13:26; 14:62; ⵍⴻⵅ. 1:11; 2 ⵜⵙ. 1:10; ⴰⵙⴰ. 1:7. 28 ⵅⵎⵉ ⵖⴰ ⴱⴷⴰⵏⵜ ⵜⵎⴻⵙⵍⴰⵢⵉⵏ-ⴰ, ⴳⴳⴻⵎ ⵜⴰⵔⵢⴰⵙⵜ, ⵙⴳⴻⵄⵄⴷⴻⵎ ⵉⵣⴻⴵⵉⴼⴻⵏ ⵏⵡⴻⵎ ⵎⵉⵏⵣⵉ ⴰⵙⴻⵏⵊⴻⵎ ⵏⵡⴻⵎ ⴰⵇⴰ ⵢⵉⵡⴻⴹ-ⴷⴷ.” ◘21:28 ⵔⵓⵎ. 8:23.

29 ⵉⵄⴰⵡⴻⴷ ⴰⵙⴻⵏ ⵉⵊⵊ ⵏ ⵓⵎⴻⴷⵢⴰ: “ⵅⵣⴰⵔⴻⵎ ⵖⴰⵔ ⵡⴰⵔⵜⵓ ⵏ ⵜⴰⵣⴰⵔⵜ ⵓ ⵖⴰⵔ ⵎⴰⵔⵔⴰ ⵜⵉⵛⴻⵊⵊⵓⵔⴰ. ◘21:29 ⵎⵜ. 24:32; ⵎⴽ. 13:28. 30 ⵅⵎⵉ ⵖⴰ ⵙⵙⵏⴻⴹⵢⴻⵏⵜ, ⴰⴷ ⵜⴻⵙⵙⵏⴻⵎ ⵙ ⵎⴰⵏ ⴰⵢⴰ ⴰⵇⴰ ⴰⵏⴻⴱⴷⵓ ⵢⵉⵡⴻⴹ-ⴷⴷ. 31 ⴰⵎⵎⵓ ⵉⵜⵜⵅⴻⵚⵚⴰ ⵄⴰⵡⴻⴷ ⴽⴻⵏⵏⵉⵡ, ⵅⵎⵉ ⵖⴰ ⵜᵉⵜⵜⵡⴰⵍⴰⵎ ⵜⵉⵎⴻⵙⵍⴰⵢⵉⵏ-ⴰ ⵜⵜⴻⵎⵙⴰⵔⴰⵏⵜ, ⵙⵏⴻⵎ ⵅⴻⵏⵏⵉ ⴱⴻⵍⵍⵉ ⵜⴰⴳⴻⵍⴷⵉⵜ ⵏ ⴰⵔⴻⴱⴱⵉ ⵜⵓⴷⴻⵙ-ⴷⴷ. 32 ⵙ ⵜⵉⴷⴻⵜⵜ ⴰⴷ ⴰⵡⴻⵎ ⵉⵏⵉⵖ, ⴰⵇⴰ ⵡⴰⵔ ⵉⵄⴻⴷⴷⵓ ⵊⵊⵉⵍ-ⴰ ⴰⵍ ⵖⴰ ⵢⵉⵍⵉ ⵓⵢⴰ ⴽⵓⵍⵛⵉ. 33 ⴰⵊⴻⵏⵏⴰ ⴷ ⵜⴻⵎⵎⵓⵔⵜ ⴰⴷ ⵄⴻⴷⴷⵓⵏ, ⵎⴰⵛⴰ ⴰⵡⴰⵍⴻⵏ ⵉⵏⵓ ⵡⴰⵔ ⵄⴻⴷⴷⵓⵏ ⵄⴻⵎⵎⴰⵔⵚ. ◘21:33 ⵉⵥⵀⴷ. 102:27; ⵉⵛⴰ. 51:6; ⵎⵜ. 24:35; ⵄⴱⵔ. 1:11.

34 ⵃⴹⴰⵎ ⵉⵅⴻⴼ ⵏⵡⴻⵎ ⵃⵉⵎⴰ ⵡⴰⵔ ⵜⵜⴻⴹⵇⵉⵍⴻⵏ ⵡⵓⵍⴰⵡⴻⵏ ⵏⵡⴻⵎ ⵣⴻⴳ ⵓⴼⵓⵛⵛⴻⵃ ⴷ ⵡⴻⵙⵛⴰⵔ ⴷ ⵉⵎⵓⵏⴰⵙ ⵏ ⴷⴷⵓⵏⴻⵛⵜ-ⴰ, ⵓ ⵡⴰⵔ ⵅⴰⵡⴻⵎ ⴷⴷ-ⵉⵡⴹⵉ ⵡⴰⵙⵙ ⵏⵏⵉ ⴷⴻⵖⵢⴰ. ◘21:34 ⵔⵓⵎ. 13:13; 1 ⵜⵙ. 5:6; 1 ⴱⵟ. 4:7. 35 ⵎⵉⵏⵣⵉ ⴰⴷ ⴷⴷ-ⵢⴰⵙ ⴰⵙⵙ ⵏⵏⵉ ⴰⵎ ⵍⴼⴻⵅ ⵅ ⵎⴰⵔⵔⴰ ⵉⵏⵏⵉ ⵉⵇⵇⵉⵎⴻⵏ ⵅ ⵓⵖⴻⵎⴱⵓⴱ ⵏ ⵜⴻⵎⵎⵓⵔⵜ. ◘21:35 1 ⵜⵙ. 5:2; 2 ⴱⵟ. 3:10; ⴰⵙⴰ. 3:3; 16:15. 36 ⵃⴹⴰⵎ ⵅⴻⵏⵏⵉ ⵍⴻⴱⴷⴰ, ⵥⴰⴵⴻⵎ ⵃⵉⵎⴰ ⴰⴷ ⵜⵉⵍⵉⵎ ⵜⴻⵙⴷⴰⵀⴻⴵⴻⵎ ⵎⴰⵃⴻⵏⴷ ⴰⴷ ⵜⵏⴻⵊⵎⴻⵎ ⵣⵉ ⵎⴰⵔⵔⴰ ⵎⵉⵏ ⵖⴰ ⵉⵎⵙⴰⵔⴻⵏ, ⵓⵛⴰ ⴰⴷ ⵜⴱⴻⴷⴷⴻⵎ ⵣⵣⴰⵜ ⵉ ⵎⵎⵉⵙ ⵏ ⴱⵏⴰⴷⴻⵎ.” ◘21:36 ⵎⵜ. 24:42; 25:13; ⵎⴽ. 13:33; ⵍⴽ. 12:40; 1 ⵜⵙ. 5:6.

37 ⵙ ⵓⵣⵉⵍ ⵜⵓⵖⴰ ⵉⵙⵙⴻⵍⵎⴰⴷ ⴷⵉ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ, ⵎⴰⵛⴰ ⵙ ⴵⵉⵍⴻⵜ ⵜⵓⵖⴰ ⵉⵜⵜⴻⴼⴼⴻⵖ, ⵉⵜⵜⵖⵉⵎⴰ ⵉⵜⵜⵏⵓⵙⴰ ⵅ ⵡⴻⴷⵔⴰⵔ ⵓⵎⵉ ⵇⵇⴰⵔⴻⵏ: ‘ⵜⴰⴷⴷⴰⵔⵜ ⵏ ⵣⵣⵉⵜⵓⵏ’. ◘21:37 ⵢⵃ. 8:2. 38 ⴷⵉ ⵚⵚⴱⴻⵃ ⵣⵉⵛ ⵜⵓⵖⴰ ⵎⴰⵔⵔⴰ ⵉⵡⴷⴰⵏ ⵜⵜⴰⵙⴻⵏ-ⴷⴷ ⵖⴰⵔⴻⵙ ⴷⵉ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⵃⵉⵎⴰ ⴰⴷ ⵙⵍⴻⵏ ⴰⵡⴰⵍ ⵏⵏⴻⵙ.