1 ⴰⵇⴰ ⵏᵉⵜⵜⵣⴰⵡⴻⴳ ⴽⴻⵏⵏⵉⵡ, ⴰ ⴰⵢⵜⵎⴰ, ⵣⵉ ⵊⵊⵉⵀⴻⵜ ⵏ ⵜⵡⴰⵙⵉⵜ ⵏ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ ⴷ ⵡⴻⵙⵎⵓⵏⵉ ⵏⵏⴻⵖ ⵖⴰⵔⴻⵙ, 2 ⴰⵇⴰ ⵡⴰⵔ ⵜᵉⵜⵜⵏⴻⵅⵍⵉⵄⴻⵎ ⵏⵉⵖ ⵜⴻⵙⵃⵉⵙⵙⴼⴻⵎ ⵛⴰ ⴷⴻⵖⵢⴰ, ⵡⴰⵔ ⵉⴵⵉ ⵙ ⵉⵊⵊ ⵏ ⵡⴰⵡⴰⵍ ⵏⵉⵖ ⵙ ⵛⴰ ⵏ ⴰⵔⵔⵓⵃ ⵏⵉⵖ ⵙ ⵉⵛⵜ ⵏ ⵜⴻⴱⵔⴰⵜ ⴰⵅⵎⵉ ⵣⵣⴰⵢⵏⴻⵖ, ⵉ ⵉⵇⵇⴰⵔⴻⵏ: “ⵅⵣⴰⵔ, ⴰⵙⵙ ⵏ ⵙⵉⴷⵉⵜⵏⴻⵖ ⵢⵓⵙⴰ-ⴷⴷ!” ◘2:2 ⵉⵔⵎ. 29:8; ⵎⵜ. 24:4; ⴰⴼⴰ. 5:6; ⴽⵓⵍ. 2:18; 1 ⵢⵃ. 4:1. 3 ⵡⴰⵔ ⵜⵜⴻⵊⵊⵉ ⵓⵍⴰ ⴷ ⵉⵊⵊ ⴰⴷ ⴽⴻⵏⵏⵉⵡ ⵉⵖⵡⴰ ⵙ ⵛⴰ ⵏ ⵡⴻⴱⵔⵉⴷ, ⵎⵉⵏⵣⵉ ⴰⵙⵙ ⵏⵏⵉ ⵡⴰⵔ ⴷⴷ-ⵉⵜⵜⵉⵙ ⵇⴱⴻⵍ ⵉ ⴷⴷ ⵖⴰ ⵢⴰⵙ ⵓⵖⴻⵡⵡⴻⵖ ⵓⵛⴰ ⴰⴷ ⴷⴷ-ⵉⴱⴰⵏ ⴱⵏⴰⴷⴻⵎ ⵏ ⴷⴷⵏⵓⴱ, ⴰⵇⴰ-ⵜ ⴷ ⵎⵎⵉⵙ ⵏ ⵜⴻⵀⵍⵉⴽⴻⵜ. ◼2:3 ⵎⵎⵉⵙ ⵏ ⵜⴻⵀⵍⵉⴽⴻⵜ-ⵏⵉⵖ: ‘ⵎⵎⵉⵙ ⵏ ⵍⴻⵅⵚⴰⵔⴻⵜ’ ⵏⵉⵖ ‘ⵎⵎⵉⵙ ⵏ ⵍⴻⴼⵏⴰ’.  ◘2:3 ⵎⵜ. 24:23; 1 ⵜⵉⵎ. 4:1; 1 ⵢⵃ. 2:18. 4 ⵏⴻⵜⵜⴰ ⵉⵜⵜⴻⵎⵄⴰⵍⴰ ⵓ ⵉⵙⵙⵄⵓⴵⴰ ⵉⵅⴻⴼ ⵏⵏⴻⵙ ⵅ ⵎⴰⵔⵔⴰ ⵎⵉⵏ ⵉⵜⵜⵡⴰⵙⴻⵎⵎⴰⵏ ‘ⴰⵔⴻⴱⴱⵉ’ ⵏⵉⵖ ‘ⴰⵄⴱⴰⴷ’, ⴰⵍ ⵖⴰ ⵉⵇⵇⵉⵎ ⴷⵉ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⵏ ⴰⵔⴻⴱⴱⵉ ⴰⵎⴻⵛⵏⴰⵡ ⵏⴻⵜⵜⴰ ⴷ ⴰⵔⴻⴱⴱⵉ ⵉ ⵢⴻⴵⴰ, ⵓⵛⴰ ⴰⴷ ⵉⵙⵙⵛⴻⵏ ⵉ ⵢⵉⵅⴻⴼ ⵏⵏⴻⵙ, ⴰⵇⴰ ⵏⴻⵜⵜⴰ ⴰⵅⵎⵉ ⴰⵔⴻⴱⴱⵉ. ◘2:4 ⴷⴰⵏ. 11:36.

5 ⵎⴰ ⵡⴰⵔ ⵜⴻⵄⵇⵉⵍⴻⵎ ⵛⴰ ⵓⵎⵉ ⵜⵓⵖⴰ ⴰⵢⵉ ⴽⵉⵡⴻⵎ, ⴰⵇⴰ ⵏⵏⵉⵖ ⴰⵡⴻⵎ-ⵜ? 6 ⵎⴰⵛⴰ ⵍⴻⵅⵅⵓ ⵜⵉⵡⴹⴻⵎ ⵜⴻⵙⵙⵏⴻⵎ ⵎⵉⵏ ⴷ ⴰⵙ ⵉⴱⴻⴷⴷⴻⵏ ⵄⴰⴷ ⴷⴻⴳ ⵡⴻⴱⵔⵉⴷ, ⵃⵉⵎⴰ ⴰⴷ ⴷⴷ-ⵉⴱⴰⵏ ⴷⵉ ⵍⵡⴻⵇⵜ ⵏⵏⴻⵙ. 7 ⵙⵙⵉⵔⵔ ⵏ ⵍⵎⵓⵄⵚⵉⵢⵢⴻⵜ ⴰⵇⴰ ⵉⵅⴻⴷⴷⴻⵎ ⵍⴻⵅⵅⵓ. ⵎⴰⵛⴰ ⵎⴰⵍⴰ ⵉⵎⵎⴻⴽⵙⵉ ⵣⵉ ⵍⵡⴻⵙⵟ ⵎⵉⵏ ⴷ ⴰⵙ ⵉⵙⵙⴱⴻⴷⴷⴻⵏ ⵄⴰⴷ ⴷⴻⴳ ⵡⴻⴱⵔⵉⴷ ⵍⴻⵅⵅⵓ, 8 ⴰⴷ ⴷⴷ-ⵉⴹⵀⴰⵔ ⴱⴰⴱ ⵏ ⵍⵎⵓⵄⵚⵉⵢⵢⴻⵜ, ⵡⴻⵏⵏⵉ ⵖⴰ ⵉⵙⵙⵀⴻⵍⵍⴻⴽ ⵙⵉⴷⵉⵜⵏⴻⵖ ⵢⴰⵙⵓⵄ ⵙ ⵜⵡⴰⵔⵔⵉⵜ ⵏ ⵏⵏⴻⴼⵙ ⵣⴻⴳ ⵓⵇⴻⵎⵎⵓⵎ ⵏⵏⴻⵙ, ⴰⴷ ⵜ ⵉⵙⵙⴻⴱⴹⴻⵍ ⵅⵎⵉ ⴷⴷ ⵖⴰ ⵜⴱⴰⵏ ⵜⵡⴰⵙⵉⵜ ⵏⵏⴻⵙ. ◘2:8 ⴰⵢⵓⴱ 4:9; ⵉⵛⴰ. 11:4. 9 ⵎⴰⵖⴰⵔ ⵜⴰⵡⴰⵙⵉⵜ ⵏ ⴱⴰⴱ ⵏⵏⵉ ⵏ ⵍⵎⵓⵄⵚⵉⵢⵢⴻⵜ ⴰⴷ ⵜⵔⴰⵃ ⵊⵎⵉⵄ ⴰⴽ-ⴷ ⵍⵅⴻⴷⵎⴻⵜ ⵏ ⵛⵛⵉⵟⴰⵏ ⵙ ⵎⴰⵔⵔⴰ ⵊⵊⴻⵀⴷ ⴷ ⵍⴻⵄⵍⴰⵎⴰⵜ ⴷ ⵍⵎⵓⵄⵊⵉⵣⴰⵜ ⵉⵙⵙⵅⴰⵔⵔⵉⵇⴻⵏ, ◘2:9 ⴰⵄⵡⴷ. 13:2; ⵢⵃ. 8:41; 2 ⴽⵓⵔ. 4:4; ⴰⴼⴰ. 2:2; ⴰⵙⴰ. 13:13. 10 ⵓ ⵙ ⵎⴰⵔⵔⴰ ⵍⵖⴻⵛⵛ ⵏ ⵍⵎⵓⵄⵚⵉⵢⵢⴻⵜ ⴷⴻⴳ ⵢⵉⵏⵏⵉ ⵉ ⵖⴰ ⵉⵀⴻⵍⵍⴽⴻⵏ, ⵎⵉⵏⵣⵉ ⵏⵉⵜⵏⵉ ⵡⴰⵔ ⵇⴱⵉⵍⴻⵏ ⵛⴰ ⵜⴰⵢⵔⵉ ⵏ ⵜⵉⴷⴻⵜⵜ ⵃⵉⵎⴰ ⴰⴷ ⵣⵣⴰⵢⴻⵙ ⴰⴼⴻⵏ ⵜⵓⴷⴰⵔⵜ. ◘2:10 2 ⴽⵓⵔ. 2:15; 4:3. 11 ⵙ ⵓⵢⴻⵏⵏⵉ ⴰⵔⴻⴱⴱⵉ ⴰⴷ ⵖⴰⵔⵙⴻⵏ ⴷⴷ-ⵉⵙⵙⴻⴽⴽ ⵎⵉⵏ ⵜⴻⵏ ⵖⴰ ⵢⴰⵔⵔ ⵙ ⵊⵊⴻⵀⴷ ⵖⴰⵔ ⵓⵡⴻⴷⴷⴰⵔ, ⴰⵍ ⵖⴰ ⵢⴰⵎⵏⴻⵏ ⴷⴻⴳ ⵓⵅⴰⵔⵔⵉⵇ. ◘2:11 ⵔⵓⵎ. 1:24; 1 ⵜⵉⵎ. 4:1. 12 ⵎⴰⵔⵔⴰ ⵉⵏⵏⵉ ⵡⴰⵔ ⵢⵓⵎⵉⵏⴻⵏ ⵛⴰ ⴷⵉ ⵜⵉⴷⴻⵜⵜ, ⵎⴰⵛⴰ ⵉⵅⵙⴻⵏ ⵍⵎⵓⵄⵚⵉⵢⵢⴻⵜ ⴽⵜⴰⵔ, ⴰⴷ ⵜⵜⵡⴰⵃⴰⴽⵎⴻⵏ.

13 ⵎⴰⵛⴰ ⵉⵛⵓⵡⵡⴰⵔ ⴰⵏⴻⵖ ⴰⴷ ⵏⵇⴰⴷⴰ ⴰⵔⴻⴱⴱⵉ ⵍⴻⴱⴷⴰ ⵅⴰⵡⴻⵎ, ⴰ ⴰⵡⵎⴰⵜⴻⵏ ⵏⵏⴻⵖ, ⵉⵏⵏⵉ ⵅⴻⴼ ⵉⵄⵉⵣⵣ ⵙⵉⴷⵉⵜⵏⴻⵖ, ⴰⵇⴰ ⴰⵔⴻⴱⴱⵉ ⵉⵅⴹⴰⵔ ⵉ ⴽⴻⵏⵏⵉⵡ ⵣⴻⴳ ⵓⵎⴻⵣⵡⴰⵔⵓ ⵉ ⵜⵓⴷⴰⵔⵜ, ⵙ ⵜⵇⴻⴷⴷⴰⵙⵜ ⵣⵉ ⴰⵔⵔⵓⵃ ⵓ ⵙ ⵍ’ⵉⵎⴰⵏ ⵏ ⵜⵉⴷⴻⵜⵜ. 14 ⴰⵇⴰ ⵉⵍⴰⵖⴰ-ⴷⴷ ⵅⴰⵡⴻⵎ ⵉ ⵎⴰⵏ ⴰⵢⴰ ⵙ ⵓⴱⴰⵔⵔⴻⵃ ⵏⵏⴻⵖ ⵙ ⵍⴻⵅⴱⴰⵔ ⴰⵚⴻⴱⵃⴰⵏ, ⵃⵉⵎⴰ ⴰⴷ ⵜⵉⵍⵉⵎ ⵉ ⵓⵄⵓⴵⵉ ⵏ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ.

15 ⵙ ⵓⵢⴻⵏⵏⵉ, ⴰ ⴰⵢⵜⵎⴰ, ⴱⴻⴷⴷⴻⵎ ⵏⵉⵛⴰⵏ ⵓⵛⴰ ⵟⵟⴼⴻⵎ ⴷⵉ ⵜⵡⴻⵚⵚⴰ ⵉ ⴷ ⴰⵡⴻⵎ ⵉⵜⵜⵡⴰⵙⵙⵍⴻⵎⴷⴻⵏ ⵣⵣⴰⵢⵏⴻⵖ, ⵎⴰ ⵙ ⵡⴰⵡⴰⵍ ⵏⵉⵖ ⵙ ⵜⴻⴱⵔⴰⵜ ⵏⵏⴻⵖ. ◘2:15 2 ⵜⵙ. 3:6.

16 ⵎⴰⵛⴰ ⵏⴻⵜⵜⴰ, ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ, ⵓ ⴰⵔⴻⴱⴱⵉ, ⴱⴰⴱⴰⵜⵏⴻⵖ, ⵡⴻⵏⵏⵉ ⴷ ⴰⵏⴻⵖ ⵉⵅⵙⴻⵏ ⴷ ⵡⴻⵏⵏⵉ ⴷ ⴰⵏⴻⵖ ⵉⵡⵛⴻⵏ ⴰⴼⴻⵡⵡⴻⵊ ⵉⵜⵜⴷⵓⵎⴰⵏ ⴷ ⵓⵙⵉⵜⴻⵎ ⵉⵛⵏⴰⵏ ⵙ ⴰⵔⴹⴰ ⵏⵏⴻⵙ, 17 ⴰⴷ ⵉⵙⵙⴼⴻⵡⵡⴻⵊ ⵓⵍⴰⵡⴻⵏ ⵏⵡⴻⵎ ⵓⵛⴰ ⴰⴷ ⴽⴻⵏⵏⵉⵡ ⵉⵙⵙⴻⵊⵀⴻⴷ ⴷⵉ ⵎⴰⵔⵔⴰ ⴰⵡⴰⵍ ⵓ ⴷⵉ ⵎⴰⵔⵔⴰ ⵍⵅⴻⴷⵎⴻⵜ ⵜⴰⵚⴻⴱⵃⴰⵏⵜ. ◘2:17 1 ⵜⵙ. 3:13.